“Nobembwa 28. E Kanga Iotebwa Timiti Ni Buoka Kakoroan Bukin Ana Babaire Tamara are i Karawa? Reirei ao Berita aika Tabu 135–136,” Nakomai, Iriirai—Ibukin te Kooram n te Nakoanibonga ae te Aaron ao aia Kiraati Ataeinnaine: Atuun Reirei 2021 (2020)
“Nobembwa 28. E Kanga Iotebwa Timiti Ni Buoka Kakoroan Bukin Ana Babaire Tamara are i Karawa?” Nakomai, Iriirai—Ibukin te Kooram n te Nakoanibonga ae te Aaron ao aia Kiraati Ataeinnaine: Atuun Reirei 2021
Te Tari Iotebwa, iroun David Lindsley
Nobembwa 28
E Kanga Iotebwa Timiti Ni Buoka Kakoroan Bukin Ana Babaire Tamara are i Karawa?
Te Uaia ni Marooro
E kairaki irouia kaain te beretitentii n te kooram ke te kiraati; e na kabanea 10–20 te miniti
Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri ni bwaai ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):
-
Ara kooram ke ara kiraati. Tera ae ti kona ni karaoia ni karika te bonnano imarenaia kaain te kooram ke te kiraati? Baikara kouru ae ti tangiria ni bane n uaia ni mwakuriia?
-
Tibwangara ke mwiokoara. Tera ae ti karaoia n tibwaua te euangkerio? Baikara bwaai aika ti a tia n rinanoi ni karaoan te mwakuri n te tembora ao n rongorongon te utu?
-
Maiura. Ti kanga n tia n nora bain te Uea inanon maiura? Tera te namakin n tamnei ae e a tia n reke iroura inanon tain kamatebwaian booki aika tabu n te wiiki aei?
N tokin te reirei, ngkana e riai, karaoi waaki aikai:
-
Kaota koauan te reirei are e reiakinaki.
-
Kauringiia kain te kooram ke te kiraati iaon babaire ao kakao ake a karaoi n tain te bootaki.
Reirei te Reirei
Kairaki iroun te tia kairiiri ae ikawai ke te kairake; e na kabanea 25–35 te miniti
Katauraoiko n te Maiu n Tamnei
“Iotebwa Timiti, ana Burabeti ao ana Tia Mamata te Uea, e a tia ni karaoa ae mwaiti riki, ma tii Iesu, ibukin kamaiuaia aomata n te aonaba aei, nakoia aomata nako ake a tia ni maeka iai” (Reirei ao Berita aika Tabu 135:3). Aio te titiraki n ninikoria ibukin taben Iotebwa Timiti. Ko a tia n iangoia tera ae nanonaki n te taeka aei inanon maium? E na tera kaokoron maium ngke arona bwa e tuai kaokaki ana euangkerio Iesu Kristo? Tera ae ko kona ni karaoia ni buokiia kaain am kooram ke am kiraati ni kakorakorai aia koaua ibukin ana mition Iotebwa Timiti?
Ngkai ko katauraoi n anga reirei, irarikin are ko kamatebwaia Reirei ao Berita aika Tabu 135, iangoia bwa ko na rinanon ana rongorongo Beretitenti M. Russell Ballard “Tiaki Tina Waakinako n te Mwakuri ae Rangi ni Kakawaki?” (Riaona, Meei 2020, 8–11) ao ana rongorongo Unimwaane Neil L. Andersen “Joseph Smith” (Riaona, Nobembwa 2014, 28–31).
Maiura a kakabwaiaki man koaua ake a kaokaki rinanon te Burabeti Iotebwa Timiti.
Te Uaia n Reirei
Ni moana am kabwarabwara bwa e kanga Iotebwa Timiti n ibuobuoki ni kakoroa bukin ana babaire Tamara are i Karawa, ko kona ni manga rinanona tera ae a tia n reiakinna kaain te kooram ke te kiraati ibukin te Burabeti man warekan Reirei ao Berita aika Tabu 135 n te wiiki aei. N aron te katooto, a kona ni korei ni karinani koaua ake a atai ibukin te Tia Kamaiu ao Ana euangkerio bwa ibukin Iotebwa Timiti. Bukin tera ngkai koaua aikai n tatabeua a kakaawaki n ana babaire Tamara are i Karawa? Waaki ni kakukurei akana imwiina a kona ni buokiia kaain am kooram ke am kiraati ni kamatataaki riki n taben Iotebwa Timiti n te babaire ni kamaiu.
-
Ni buokiia kaain te kooram ke te kiraati ni katauraoia ni buokiia tabeman bwa a na kamatataaki ni kakawakin te Burabeti Iotebwa Timiti, a kona ni wareka “The Restoration of the Gospel of Jesus Christ through Joseph Smith” n te mwakoro 3 n Taetaekina Au Euangkerio ([2019], 36–38). Te mwakuri n ikatoatoa ke ni kurubu aika uarereke, a kona n atai botoniango aika kakaawaki ake a kan tibwauaia nakoia tabeman. Ngkanne a kona ni kataneiaia n tibwaua ana taneiai Iotebwa Timiti i bon imarenaia n oin aia taeka. Tuangiia tera ae a iangoia bwa a na karaoia n tibwaua te rongorongo ibukin Kaokan bwai. Tao a kona n iangoa te aomata ae onoti are a kona n tibwaua te rongorongo aei ma ngaia. A kona naba n tauraoi n tibwaua aia taneiai ngke a tia ni buoka temanna n reiakina rongorongon Iotebwa Timiti.
-
Tuangiia kaain te kooram ke te kiraati bwa a na iangoia aongkoa are e taetae temanna raoraoia n tain te taromauri ni kangai, “I tuai koaua raoi ngkana iai au koaua ibukin Iotebwa Timiti. Ko kanga n ataia ae ngaia te burabeti?” E kanga arora ni kaeka? Tera ae ti reiakinna man oin ana taneiai Iotebwa Timiti inanon Iotebwa Timiti—Rongorongo 1:8–19 bwa ti kanga ni karekea ke ni kakorakorai ara koaua? Tuangiia kaain te kooram ke te kiraati bwa a na korei kawai are a na kona ni kakorakora aia koaua ibukin te Burabeti Iotebwa Timiti ao n tatabemaniia a kona n rinea teuana te bwai are a tangiria ni kan karaoia n te wiiki aei.
-
Ni buokiia kaain te kooram ke te kiraati ni kamatataaki riki n te mwakuri are e kakoroa bukina te Atua rinanon Iotebwa Timiti, ko kona ni kaoia bwa a na wareka iteraniba 48–53 man Aia Reirei Beretitenti n te Ekaretia: Gordon B. Hinckley (2016) ke mataku n teuana ke ae mwaiti riki witeo inanon “Reitan Bwaai n Mwakuri.” A kona n rinea teuana ke uoua reirei ao mwakuri ake a kaotaki inanon bwaai ni mwakuri aikai ake a rangi ni bongana ibukiia. A kona ni kabwarabwara bukin tera a kakaitau ngkai e kaoki bwaai aikai te Uea rinanon Iotebwa Timiti. A bae naba ni kukurei ni korea aia rongorongo ni kaota aia kakaitau n aron ana mwakuri Iotebwa Timiti are e a tia ni buokiia ni kaaniaki ma te Tia Kamaiu. A kona naba n iangoia tera ae a kona riki ni karaoia ni kabonganai raoi kakabwaia ake a e a tia ni katauraoi te Uea rinanon Iotebwa Timiti.
Mwakuri inanon te Onimaki
Kaungaiia kain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei n irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.
Reitan Bwaai n Mwakuri
-
Reirei ao Berita aika Tabu 35:17–18 (Rinanon te Burabeti Iotebwa Timiti, e a tia te Uea ni kaoka te euangkerio ae bwanin)
-
Russell M. Nelson, “Ana Boki Moomon: Tera Aron Maium Ngkana Arona bwa akea?” Riaona, Nobembwa 2017, 60–63
-
“Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples” (witeo), ChurchofJesusChrist.org
Reirei n ana Kawai te Tia Kamaiu
Te Tia Kamaiu e katurua ana taratara iaon buokakiia Ana taan Iriiria bwa a na maiuakina te euangkerio ma nanoia ni kabane. Ko na kanga ni buokiia kairake n noria bwa e kanga aia koaua ibukin Iotebwa Timiti n rooti maiuia n te bong ae koraki?