Tianuare 23

E na Kanga ni Buokai te Uea ni Beku ma te Kakaonimaki Riki?

Karikani Bwaai 5; Mote 6

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, ikotaki kaokioka n atonga Ana Botoniango te Bootaki n Ataeinnaine ke ana Botoniango Te Nakoanibonga ae te Aaron. Ngkanne kaira te marooro iaon te mwakuri ni kamaiu ao karietataaki kabongana teuana ke raka man taian titiraki inano ke oin am titiraki (taraa Aeniboki ni Kabuta, 10.2, 11.2, ChurchofJesusChrist.org). Babaire ao mwakuria te bwai ae maroroakinaki.

• Maiuakina te euangkerio. Tera te bwai ae ti a tia n rinanona mai mwaina ae e a tia ni kakorakora ara koaua?

• Tararuakiia naake iai kainnanoia. Antai ae e kainnanoa ara ibuobuoki ao ara tataro? Tera namakinan te kukurei are ti na karaoia ni buokiia?

• Kaoaiia ni kabane ni karekea te euangkerio. Ti na kanga n riki bwa te oota nakoia kaain ara utu ke raoraora ake aki butimwaea ara koaua?

• Katiteuanakiia utu in akea tokina. Ti na kanga ni kona ni kaota re tangira ao boutoka ibukiia ara utu ao karaoi kaokoro aika a tamaroa inanon mweengara?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Ngke e karekea weteana Enoka ni beku iroun te Uea, e namakina te aki tau (taraa Mote 6:31). Ma te Uea e aki ti kanakoa Enoka ni karaoa Ana mwakuri, E berita nakon Enoka bwa E na kawakinna ao ni buokiia (taraa Mote 6:32–34).

Tao ko kona n ikarekerekea nakon ana namakina Enoka n aki tau inanon am waaki ni beku. Tabeua man ara beku are ti anganaki rinanon weteara man te Ekaretia. N taai tabetai, ti a noora kainanoana ao n namakina te kairi iroun te Tamnei ni kaota ara tangira ao te boutoka. Bwa tera nako ae kaoti, ti kona ni karekea te kaungaaki, n aron are e karaoia Enoka, ataakina bwa te Uea e na buokiira ngkana ti kariaia Ana kakao n “nakonako ma ngai” (Mote 6:34).

Ngkai ko katauraoi n reirei iaon te ibuobuoki ti kona ni karekea mairoun te Uea ngkana ti buokiia tabeman, rinanoa Mote 6 ao iangoa te taneiai ake ko a tia ni buokiia tabeman. E kanga ni buokiko te Uea inanon am kekeiaki? Tera ae ko kantaningaia n am kiraati ke membwa n te kooram are a na reiakinna man te katooto iroun Enoka ao tabeman? Ko kona ni wareka teuana man rongorongo iroun Beretitenti Henry B. Eyring: “Walk with Me (Nakonako ma Ngai)” (Riaona, Meei 2017, 82–85) ke “Aine Inanon te Berita a Uaia ni Ikarekebai ma te Atua” (Riaona, Nov. 2019, 70–73).

Ti kona n iriira ana katooto te Tia Kamaiu ngkana ti ibuobuoki ngkana ti beku inanon ara tai ni katoabong.

Te Uaia n Reirei

Buokakiia tabeman e karekea te tai ae tamaroa ibukira n “nakonako ma [te Atua],” ao ti na karekea Ana buoka ngkana ti beku (Mote 6:34). Ni buoka te kiraati ke membwa n te kooram moana marooroakina aio, ko kona n tuangiia ni ukora Mote 6:32–39 ibukin kawai ake te Uea e tiku ma Enoka inanon ana beku. E kanga te Uea ni buokiira ngkana ti beku Irouna? Iango akana imwiina a kona ni buokiko ni kaira te marooro iaon te buoka mairoun te Atua are ti kona ni karekea ngkana ti buokiia tabeman.

• Koroboki aika tabu a kanoaaki ma reirei iaon te beku (taraa, ibukin te katooto, Mataio 25:31–40; Ruka 10:25–37; Motiaea 2:17). Iangoa kaoakiia koraki ake ko reireiniia n tibwai kiibu n taeka man koroboki aika tabu are e kaunga nanoia ni beku ibukiia tabeman. Ko kona n tuangiia imwain taina n roko n tauraoi n tibwai kiibu n taeka man koroboki aika tabu iaon te beku ke katooton te beku. Ngkana a tangira buokaia, a na konaa n taraia iaan “Beku” inanon Bwai ni Kairi nakon Koroboki aika Tabu (scriptures.ChurchofJesusChrist.org). Tera baika ti namakinna bwa ti riai ni karaoai imwin ara wareware?

• E beku te Tia Kamaiu ibukiia tabeman rinanon Ana tai ni mwakuri. Tera ae ti kona n reiakinna man Ana katooto are e kona ni buokiira ngkana ti beku? Ni kaekaa te titiraki aei, kiraati n tatabeua ke membwa n te kooram a kona ni wareka teuana man koroboki aika tabu, n ukora te bwai ae e reirei iaon ana katooto ni beku te Tia Kamaiu: Mataio 14:13–21; Ioane 9:1–11, 35–38; 13:4–5, 12–17; 3 Nibwaai 17:5–9. Kaoiia bwa a na tibwaua te bwai are a kunei. Katauraoa te tai ibukiia ni kabane n iangoa temanna are a na kona ni buokiia ao a na kanga n iriira ana katooto te Tia Kamaiu inanon aia beku.

• N tabetai ti iangoa nanon te beku bwa karaoan te bwai teuana ae bubura ao ni kana te tai. Anne tao e riki bwa teuana bukina tabeman ibuakora e aki bane korakoraia n aia beku n aron are a bon konaa. Ko na riai ni katerea bwa te Tia Kamaiu e aki toki ni buokiia aomata are E nooria rinanon Ana tai ni katoabong ni maiuna (taraa, ibukin te katooto, Mataio 12:9–13; Mareko 5:21–34; Ruka 19:1–10; Ioane 4:3–26). Ni buokiia kaain te kiraati ke membwa n te kooram iangoi kawai aika bebete are a na kona ni beku ibukiia tabeman inanon maiuia ni katoabong, ko kona ni kaota teuana te witeo mai ibuakon aikai: “When Ye Are in the Service—YM” ke “When Ye Are in the Service—YW” (ChurchofJesusChrist.org). Tuangiia kairake bwa a na tibwai aia iango. Tera mwakuri n ibuobuokia aika uarereke ake ti a tia nooria tabeman ni karaoia? Tera ae ti kaungaaki ni karaoia? Kaoiia n tatabeman aomata ni korei kawai ni kabwanina rongorongo aikai: “I kona ni buokiia tabeman man …” ao “N na ukora ana ibuobuoki te Uea n au kekeiaki ni beku man …” Ngkanne tuangiia tabeman n tibwai baike a korei.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakinan are e na kakorakorai reitakiia ma Tamara are i Karawa ao Iesu Kristo.

Reitan Bwaai ni Mwakuri

• “Opportunities to Do Good,” “Teachings of Thomas S. Monson: Rescuing Those in Need” (videos), ChurchofJesusChrist.org

• Bonnie L. Oscarson, “The Needs before Us (Te Kainano ae tei Imatara)” (Riaona, Nob. 2017, 25–27)

Reirei n ana Kawai te Tia Kamaiu

“N reitan buokakiia taan reiakinaki n aia namakin ao ni kinaa ana ibuobuoki te Tamnei, buokiia ni mwakuri iaon kairakiia are a karekea” (Teaching in the Savior’s Way [2016], 10).