Turai 10

Bukin Tera e Kakawaki Bwa Ti na Iriia Burabeti Aika a Maiu?

2 Uea 2–7

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera ae a tia ni maroroakinna n ara bootaki ni kauntira ibukiia kairake n te uoote? Tera mwakuri aika ti kona ni karaoi aika boboto iaon bwaai aika ti maroroakin?

• Tararuakiia naake iai kainnanoia. Ti na kanga ni karoko nakoia aomata n ana kawai Kristo ngkana ti noora kainnanoana ao n aki ata te bwai ae ko na taekinna?

• Kaoia ni kabane bwa ana karekea te euangkerio. Tera te bwai ae ti a tia ni kunea inanon ana euangkerio Iesu Kristo are e uota te kimwareirei nakoira? Ti na kanga n tibwaua te kimwareirei anne ma tabeman?

• Katiteuanakiia utu ibukin te maiu ae akea tokina. Tera tabeua kawai aika ti kona iai n reitaki ma kaain ara utu ake tabeman, n aroia tenaan tibu ao tenaan katin?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

E na bae n iai teutana Naaman te rebera inanora ni kabane (taraa 2 Uea 5:1–15). N aron Naaman, are e rikirake unna ngke e tuangaki iroun te burabeti Eria bwa e na ti tebokia inanon te karaanga bwa e aonga ni kamaiuaki, ti na bae n aki atai bukin aIa reirei ara burabeti. Ti na bae n iangoia bwa tabeua aia reirei akea nanoia nakoira ao ngaia ae aki kaeineti nakoira. Ma te Atua e beritan kakabwaia aika korakora ngkana ti nanorinano n ira te burabeti (taraa Reirei ao Berita aika Tabu 21:4–7). A kanga burabeti aikai ni buokiko ni kaniiko riki nakon te Uea? Tera riki katooto man 2 Uea 4–6 aika a kaotia bwa ti na kanga ni kakabwaiaaki ngkana ti iriia burabeti aika maiu?

Ngkana ko katauraoiko n reirei taekan kakabwaia aika roko mairouia burabeti aika maiu aikai, iangoi kakaewenako aika ko kaitara mangaai. E kanga irakin te burabeti ni kona ni buokiia ma kakaewenako aikai? Ko kona naba ni wareka ana rongorongo Unimwaane Neil L. Andersen “Ana Burabeti te Atua” (Liahona, Meei 2018, 24–27) ke ana rongorongo Unimwaane L. Whitney Clayton “Whatsoever He Saith unto You, Do It (Te Bwai are e Tuangii Ngkami, Karaoia)” (Liahona, Meei 2017, 97–99).

Irirakin te burabeti e kona ni buokiia kairake ma aia kangaanga ake a kaitarai.

Te Uaia n Reirei

Ni moanakin te marooro, ko kona n tuangiia kaain te kiraati ke te kooram n tatabeua nako (ke kurubu aika uarereke) bwa a na rinanon teuana mai ibuakon rongorongo aikai: 2 Uea 4:1–7; 5:6–14; 6:8, 13–17. Tuangiia bwa a na kakaea te bwai ae kaungaia bwa a na wareka ao n irii aia reirei burabeti ao abotoro ni boong aikai. Imwiin ae a tibwaua te bwai ae e kunea te kurubu n tatabeua nako, ko kona n tuangiia tabeman kairake bwa a na kabanea te tiententi aei: “Ngke I iriia burabeti aika maiu ao abotoro, I …” N reitanako te marooro iaon irakiia burabeti, rinea teuana ke ae mwaiti riki man iango aikai.

• Bukina bwa iai burabeti aika maiu inanon ana Ekaretia te Uea ae kaokaki, membwa n am kiraati ke kooram e na reke aia tai ni kaekaki aia titiraki ake tabeman ibukiia burabeti aika maiu. Ko na bae ni koroi iaon te boote titiraki aikai ake e na kona n iai irouia aomata n taekaia burabeti aika maiu: Bukin tera iai ami burabeti? E kanga n rineaki te burabeti? Ko kanga n ataia bwa e bon taetae raoi te burabeti ibukin te Atua? A kona kairake n ukoukori kaeka nakon titiraki aikai inanon bwaai n ibuobuoki iaan “Reitan Bwaai n Mwakuri.” A kona ni kataneiai ni kaekai titiraki aikai ao ake tabeman a tia ni kabonganai koaua aika a tia ni kunei ao oin aia iango ao aia taneiai.

• A kanga ni kona aia taeka ara burabeti aika maiu ni buokira ngkana ti kaitara ma oin ara kakaewenako? Ni buokia kairake ni kaeka te titiraki aei, ko kona ni kaoia bwa a na koroia iaon te boote tabeua reirei ao kakao ake e anga te burabeti n te maungatabu ni kabuta ae tibwa nako. Tera ae ti a tia ni karaoia ni mwakuri iaon a na reirei ao a na kakao? Tera bitaki aika ti a tia n noori inanon maiura ibukin kekeiaki aikai? Ko kona ni kaoa temanna bwa e na tibwaua ana taneiai are e a tia ana reirei te burabeti ni buoka teuanne ke neienne n ana kakaewenako.

• Ko na kanga ni buokiia naake ko reireiniia bwa a na ataia ae irakin te burabeti e na buokiia ni kania riki nakon te Tia Kamaiu? Teuana te kawai ko na anganiia n tatabemaniia te kaati ae uarereke ao kaoia bwa a na wareki mwakoron a na rongorongo Unimwaane Neil L. Andersen “Ana Burabeti te Atua.” A kona ni koreia n iteran te kaati are tuana te bwai ae a reiakinna n aron ana kona te burabeti ni buokiia ni kaniia riki nakon Kristo. N iteran te kaati are teuana, a kona ni koreia iai te bwai ae kaungaaki iai nanoia bwa a na karaoia n ira te burabeti. Kaoiia bwa a na tibwaua te bwai are a koroia.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Amota 3:7; Reirei ao Berita aika Tabu 1:4, 37–38; Mote 6:26–27, 32–36; Gospel Topics, “Prophets,” topics.ChurchofJesusChrist.org; “Why Do We Have Prophets?” (witeo), ChurchofJesusChrist.org (Bukin tera iai ara burabeti)

• Gary E. Stevenson, “Nanon te Burabeti,” Liahona, Meei 2018, 17–20 (E kanga te burabeti n rineaki)

Reirei n ana Kawai te Tia Kamaiu

“Rairaki ni koaua e irekereke riki nakon ae ti namakinan te Tamnei ni kamatoa te koaua nakon tamneira; ti riai naba ni mwakuri iaon koaua akanne. N raona buokakiia taan reiakinaki n namakina ao ni kinaa te Tamnei, buokiia ni mwakuri iaon wirikiriki ake a karekei” (Teaching in the Savior’s Way, 10).