N te Mwanibwa, iroun Crystal Suzanne

N te Mwanibwa, iroun Crystal Suzanne

Beberuare 12

N na Kanga ni Katamaroa Taromaurian te Atua?

Ioane 2–4

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta,, 10.2, 11.2). Bairei kawai aika ko na karaoi n te bwai ae ko maroroakinna.

• Maiuakina te euangkerio. Ti kanga n roko ni kaan riki nakon te Tia Kamaiu? Ti kanga ni kataia n riki n Arona?

• Tararuakiia naake iai kainnanoia. Antai ae a mena n ara iango? Ti na kanga ni buokiia aomata n tatabemaniia nako aikai?

• Kaoiia ni kabane bwa ana karekea te euangkerio. Ti na kanga ni kaekai aia titiraki raoraora ibukin te Ekaretia n te kawai are e na kakorakorai aia onimaki iroun te Tia Kamaiu?

• Katiteuanakiia utu ibukin te maiu ae akea tokina. Tera tabeua kawai aika ti kona iai n reitaki ma kaain ara utu ake tabeman, n aroia tiura ao naan nako tarira ao mwanera?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ainen Tamaria are e kabwarabwaraaki n Ioane 4 e bae n okioki nakon te mwaniba ni karekea te ran. Ma e okoro n te tai aei. E kaitibo ma te mwaane ae te Iutaia are e butiia ibukin nimana. Te aro aei e aki bati n ririki ibukina ngkai aki rangi n iraorao Iutaia ma Itamaria. Ma iai riki te bwai teuana ae e kaokoro n taekan te mwaane aio. Taraana bwa kanga Ngaia te burabeti, e titirakinna neiei ibukin taekan taromaurian te Atua. E kariaiakaki bwa e na taromauriaki te Atua Itamaria? Ke a riai aomata n taromaurii i Ierutarem, n aron ae a taku Iutaia? (taraa Ioane 4:19–20). E kabwarabwara te mwaane bwa ike ti taromauri iai e aki kakawaki nakon ae ti kanga n taromauri: Bon iai ngkai are a na taromauria te Tama n te tamnei taan taromauri ni koaua: bwa E tangiriia taan taromauria aika ai aroia aikai te Tama” (Ioane 4:23). Ngkanne te mwaane e tuanga neierei bwa antai Ngaia—Bon te Kristo Ngaia, te Tia Kamaiua te aonaaba (taraa Ioane 4:25–26).

Te roronrikirake ake ko reireiia a oota bwa tera nanon taromaurian Tamara are i Karawa? Irarikin te taromauri n te umantabu (taraa Reirei ao Berita aika Tabu 59:9–10), baikara riki aanga aika iai irouia n taromauria, n reitaki ma naake tao a tuai ataia ae te taromauri? Bwaai ni ibuobuoki aikai a kona ni buokiko ni katauraoiko n reiakiniia taekan ae a na kanga ni katamaroa aia nebo ibukin te Atua: Taian Areru 95:1–7; Mataio 4:8–10; Aramwa 32:4–11; Reirei ao Berita aika Tabu 20:17–19; 93:19–20, ao ana rongorongo Bitiobi Dean M. Davies “The Blessings of Worship” (Riaona, Nob. 2016, 93–95).

Te Uaia n Reirei

Ni moana te maroro ibukin taekan katamaroan te taromauri, ko kona ni kaoia kaain te kiraati ke te kooram bwa temanna ma temanna a na rinanoa Ioane 4:19–26 ao ni korei kaekaan titiraki n aron aikai: Bukin tera ngkai I taromauriia te Atua? Tera ae nanonaki irou n taromauriia te Atua? E na rangi n ibuobuoki naba ngkana kam kaai n rinanoa nanon te taeka ane iaan “Worship” n te Guide to the Scriptures (scriptures.ChurchofJesusChrist.org). Imwiin reken aia tai ni iangoi titiraki, kaoiia bwa a na tibwai aia iango. Mwakuri aika imwiina a na kona ni buokiia ni karekei ana wirikiriki te Tamnei ae Raoiroi.

• Kaain am kiraati ke te kooram e na reke aia atatai ae rangi n tamaroa bwa tera nanon ae ko na taromauriia te Atua. Ko kona n tuangiia bwa a na tibwaa aia taneiai ngke a namakinna bwa a taromauriia te Atua. Karaki ni koroboki aika tabu n aron aikai a kona n reita otaia ao n anganiia iango n taekan ae a na kanga ni karaoa taromaurian te Atua bwa e na rangi n uaana: Taian Areru 95:1–7; Mataio 4:8–10; Aramwa 32:4–11; Reirei ao Berita aika Tabu 20:17–19; 93:19–20. A na kona naba ni maroroakina ana taeka Unimwaane Bruce R. McConkie inanon “Reitan Bwaai n Mwakuri.”

• Ni buokiia kairake ni katamaroa aia taromauri ibukin te Atua, iangoia korei taeka aikai iaon te burakibooti: Antai, Bukin tera, Iaara, ao Ni kanga. Tuangiia bwa a na rinanoi koroboki aika tabu ake a karinanaki inanon “Worship” n te Guide to the Scriptures (scriptures.ChurchofJesusChrist.org), ni kakaei kiibu are e na buokiia ni kaotaia bwa antai, bukin tera, iaara, ao ti na kanga n taromauri. Ngkana a kunea te kibu ae irekereke mangaia, kaoia bwa a na maroroakinna ma kaain te kiraati ke te kooram ao korea te kibu iaan atuun taeka ake a kaineti nako iai. Kaungaia bwa a na tibwai aia taneiai ngke a namakinna bwa a kaan riki ma te Atua rinanon te taromauri.

• Ana rongorongo Bitiobi Dean M. Davies “The Blessing of Worship” iai inanona aia katooto aomata ngke a taromauriia te Atua. Tao kam kona ni kaai ni wareka te mwakoro “What Is Worship?” Ngkanne e kona temanna ma temanna n rinanoa teuana te katooto ngke a taromauri aomata are e kuneaki ni mwakoro akana teniua akana imwiina man te rongorongo. Tera ae e reireinira katooto aikai n tatabeua ibukin taromaurian te Atua? Tera ae e reireiniira kabanean mwakoron te rongorongo n taekan kakabwaia aika a roko man tarmoauriana ma nanora ni kabane? Tera ae ti kairaki bwa ti na karaoia ni katamaroa ara taromauri ibukin te Atua?

te ataeinimwaane ae wareware

Te taromauri kanoana kamatebwaian ana taeka te Atua ao itera ni mwakuri ae a kaota nanora ni kabane ao ara tangira ibukin te Atua.

Mwakuri ma te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia bwa a na iangoia bwa e kanga mwakurian aia namakinan ni kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• “Elements of Worship,” Teachings of Presidents of the Church: David O. McKay (2003), 29–37

• Donald L. Hallstrom, “The Conversion of the Children of God” (Kanakobwana ibukin te Tieminari ao Intitute n Taekan te Aro, Tuun 13, 2017), broadcasts.ChurchofJesusChrist.org

• E reirei Unimwaane Bruce R. McConkie: “Te taromauri ae koaua ao n tau kanoana bon touan mwanekan Natin te Atua; kanoana bon kawakinan tuua ao te ongotaeka nakon ana kantaninga te Tama n te aro are tia karikirakeaki man te akoi nakon te akoi ni karokoa are ti kamimitongaki inanon Kristo ngkai Ngaia inanon Tamana. E riaon riki te tataro ao te kabwarabwara ao te anene. Bon maiuakinana ao karaoana ao te ongotaeka. Bon katotongan maiun Teuare moan te kakannato” (“How to Worship,” Ensign, Ritembwa 1971, 130; manin taekana ae boou man kabuburaaki).

Reirei n ana Kawai te Tia Kamaiu

“Te reirei are e kuneaki inanon booki aika tabu ao n aia taeka burabeti ni boong aika kaitira iai mwaakana ni bitii naano ao ni kakorakora te onimaki. Ngkai ngkoe ao naake ko reireiniia ‘a na kata tamaroan ana taeka te Atua,” ko na kunea bwa iai “a na konabwai ni kairia aomata bwa a na karaoa ae e eti” (Aramwa 31:5).