Beberuare 26

Ana Kanga Ana Reirei te Tia Kamaiu ni Kona ni Buokai n Karaoi Mooti aika Raoiroi?

Mataio 6-7

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man titiraki aika inano ke aika bon am kario (tara Aeniboki ni Kabuta,, 10.2, 11.2). Babaire ao mwakuria te bwai ae maroroakinaki.

• Maiuakina te euangkerio. Tera atuun reirei ae e a tia ni maroroakinna te bitiobiriki ni bootakin kauntira ni kairake n te uoote? Tera ae ti kona ni karaoia n te kiraati ke n te kooram ae boboto iaon marooro aikanne?

• Tararuakiia naake iai kainnanoia. Ti na kanga ni karoko nakoia aomata n ana kawai Kristo ngkana ti noora kainnanoia ao n aki ata te bwai ae ko na taekinna?

• Kaoia ni kabane bwa ana karekea te euangkerio. Tera ae ti kunea n ana euangkerio Iesu Kristo ae uota te kimwareirei nakoira? Ko na kanga n tibwaua te kimwareirei anne ma tabeman?

• Katiteuanakiia utu ibukin te maiu ae akea tokina. Tera ae ti karaoia ni kakaei araia ara bakatibu aika a kainnanoi otenanti n te tembora? Tera ae ti kona ni karaoia ni buokiia tabeman ni kakaei araia aia bakatibu?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Iai arora n tatabemaniira nako—ae riki man kabwakara—ni motika taekaia aomata, n aki motiraoi ke e aki—kororaoi. Ma e reireiniira te Tia Kamaiu, “Tai motiki taeka n ae aki kororaoi, bwa e na aki motikaki taekam iai; ma motikia n ae kororaoi” (Ana Rairairi Iotebwa Timiti, Mataio 7:1 [n Mataio 7:1 footnote a]). Iangoia raoi bwa e kanga te reirei aei ni kona ni kakabwaiako ao ake ko reireiniia. Te Tia Kamaiu e kaotia man ana banna ni katooto te bwai ae E nanonna n “te moti ae kororaoi.” Te katooto, iangoia bwa E kanga arona nakon te aine are e bukinaki ni wenenibure. E aki kabuakaka, ma E aki naba kabwara ana bure. E kaoia ni kangai “ko na nako, ao tai manga bure” (Ioane 8:11). Tera ae ko a tia n reireinaki iai n taekan te moti ae kororaoi mai iroun te Tia Kamaiu?

Ngkai ko iangoia raoi bwa ko na kanga ni buokiia kairake n oota n te motiki taeka ae kororaoi, ko kona ni kamatebwaia Mataio 7:1-2 ao ana rongorongo Unimwaane Lynn G Robbins “Te Tia Moti ae Kororaoi” (Riaona, Nob. 2016, 96–98).

Te Uaia n Reirei

Ko kona ni waakina te marooro iaon te motiki taeka ae kororaoi man titirakinakiia kaain te kiraati ke te kooram bwa a na iangoa te tai teuana ae a tia n namakinna ae a motibuakaki taekaia irouia aomata. Tera am namakin iai? Tera ae ti reiakinna ibukin te motiki taeka man ana reirei te Tia Kamaiu n Mataio 7:1-5? (tara Ana Rairairi Iotebwa Timiti n te footnote 1a). Tera nanon te kibuntaeka ae “te motiki taeka ae kororaoi”? Ko kona ni marooro iaon kiibu aikai man kaoaia kaain te kiraati ke te kooram bwa a na taekin kiibu aikanne n oin aia taeka. Mwakuri aika n aron aikai a kona ni buokiia ake ko reireiniia bwa a na motiki taeka n ae kororaoi.

• Ana reirei te Tia Kamaiu n Mataio 6-7 e kona ni buokiira n karaoa te “motiki taeka ae kororaoi.” Ibukin buokaia kaain te kiraati ke te kooram bwa a na karekei reirei aikai, ko kona n anganiia n tatabemaniia nako teuana man kiibu aikai bwa a na iangoi: Mataio 6:14–15; 7:3–5; 7:12; 7:15–20. Tera ae nanonaki n ana taeka te Tia Kamaiu inanon kiibu aikai ibukin te motiki taeka ae kororaoi? Tera ae ti kona n reiakinna man ana katooto te Tia Kamaiu n Ioane 8:1–11 ao Mataio 9:10–13? Tera kakaokoro aika ti norii imarenan motikan taekara iroun te Tia Kamaiu ao motikan taekara bon imarenara?

• Bukina bwa iai iroura te inaomata n rinerine, ti riai n tainako ni motika taekan bwaai ake ti na karaoi ao ake ti na aki. Ma ngkai ana reirei te Tia Kamaiu ngaira, ti kantaningaaki bwa ti na aki motiki taekaia ke n burebureia aomata. Ni buokiia kairake n ataa te kaokoro, tibwauaia ma ngaiia te rongorongo mai iroun Beretitenti Dallin H. Oaks n “Reitan Bwaai ni Mwakuri.” N te kiraati ke te kooram, bootaki ni mwakuri n iangoi katooto iaon motikan taekan te waaki teuana—n aron te waaki ni kakukurei, te bootaki, ke te marooro—n aki motika taekan te aomata are e ira buakon waaki aikane. Bukin tera e raoiroi riki ae ko na motika taekan te waaki nakon te aomata? A kona kairake n iai riki aia titiraki iaon te motiki taeka ae kororaoi (tarai katooto n“Reitan Bwaai n Mwakuri). Ikotaki ni marooroakin aia titiraki ni kabongana te rongorongo are iaan “Reitan Bwaai ni Mwakuri” ibukin karekean kaekaan aia titiraki. Kaoiia kairake bwa a na tibauaa te bwai ae a namakinna bwa a na karaoia ibukin te bwai are a reiakinna.

• N ana rongorongo n te maungatabu ni kabuta “Developing Good Jugement and Not Judging Others” (Riaona, Meei 2010,103-5) Unimwaane Gregory A Schwitzer e karakini uoua karaki—raoraon Iesu te aine ae Mareta ao karakinan te mwaane temanna ae buokia ngkoa Unimwaane Schwitzer. Tera ae a reireiniira karaki aikai ibukin arora n taraia ao ni mwannanoia aomata? Tera tuua are a kona ni buokiira n katootonga riki Kristo ao n motiki taeka n ae kororaoi? Taian witeo “Looking through Windows” ao “Judging Others? Stop It!” (ChurchofJesusChrist.org) e kona ni karekei atatai aika nano riki tabeua.

Ngkana ti reiakinna n riki kanga ai aron Kristo, ti na kona n karaoi mooti aika kororaoi.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakin nia kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Katooton titiraki iaon motikan taekaia aomata: “I a tia n reireinaki bwa n na rineia raoi raoraou. Ma N na kanga ni karaoa aio n aki motiki taekaia aomata?” “Ngkana I kataia ni maiuakina te euangkerio, I bukinaki bwa I motiki taeka. N na kanga ni koaua nakon bwaai ake I kakoauai ao ni kaota te tangira nakoia ake aki kukurei iai?”

• 1 Tamuera 16:7; Moronaai 7:12–19; Reirei ma Berita aika Tabu 11:12

• Atuun Rongorongo n te Euangkerio, “Judging Others,” topics.ChurchofJesusChrist.org

• Beretitenti Dallin H. Oaks e reirei: “Ngkana e kona ni karaoaki ti na katoka motikan taekaia aomata ma ti na ti motiki taekan taian waaki. E kakawaki aio n taai ake ti mwakurii waaki aika kaokoro ma ake ti riai n rereitaki ma ngaia—ni mweenga, n te tabo ni mwakuri, ke n te komiunite. Ti kona ni katei ao ni mwakuri banna aika rietata ibukira ke ni mwengara n aki kabuakakaia ake a karaoa ae kaokoro ma ngaira” (“Judge Not’ and Judging,” Ensign, Aokati 1999, 11).

Reirei n ana Kawai te Tia Kamaiu

Am kekeiaki e riai n boutokai aia kekeiaki kaaro. Tibauaia ma aia karo kairake bwaai ake ko reireiniia. Marooro ma ngaiia bwa ko aonga n ataa kainnanoia kairake n am kiraati ao te kabanea n tamaroa ni kawai ni buoki kainnano aikanne.