Kristo e kateirakea man te maten natin Iairo te aine

Natiu te Aine, Teirake, iroun Simon Dewey

Maati 12

E na Kanga te Tia Kamaiu ni Buokai n Tokanikai Iaon Maaku?

Mataio 9–10; Mareko 5; Ruka 9

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man titiraki aika inano ke aika bon am kario (tara Aeniboki ni Kabuta,, 10.2, 11.2). Babaire ao mwakuria te bwai ae maroroakinaki.

• Maiuakina te euangkerio. Ti kanga n tia n nora bain te Uea inanon maiura?

• Tararuakiia naake iai kainnanoia. Ti na kanga ni buokiira i bon iroura inanon bwaai ake ti rinanona?

• Kaoiia ni kabane ni karekea te euangkerio. Ti na kanga ni katamaroa kabonganakin bwaai n rabakau aika boou bwa bwaai ni mwakuri n tibwaua te euangkerio?

• Katiteuanakiia utu ibukin te maiu ae akea tokina. Tera ae ti na karaoia ni buokiia ara utu n roko nakon Kristo?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Mwakoro 5 n ana booki Mareko ao iai rekootin rokoia teniman aomata nakon Iesu aika iai irouia te maaku. Te mwaane ae iai irouna “tamnei ae kamara” e aitara ma te maiu n titiku n ti ngaia, e maeka “n maunga, ao i nanon neia mate, ao e tatakarua, ao e korokoroia n atibu” (Mareko 5:2, 5). Iairo, te tia taua taekan te tinakoke, e maeka buan natina te aine, are “e a kan mate” (Mareko 5:23). Ao te aine ae “nrara te ngauni ma ua ririki” e aki reke marurungina imwiin ae “kabanea ana bai n anga” nakoia “tani katoki aoraki” (Mareko 5:25-26). Aomata n tatabemaniia ake ko reireiniia iai rongorongoia ae onoti, ao aitara ma oin nako maakuia. Ma ngkai te Tia Kamaiu e kona ni kanakoi tamnei aika kamwara, kateirakeia maate, ao ni katoki aoraki, E kona ni buokiira ngkana ti maaku. Ana taeka n ibuobuoki nakon Iairo e korakora nakoira naba n boong aikai: “Tai maku, ko na ti onimaki” (Mareko 5:36).

Ngkai ko katauraoiko n anga reirei, iangoia n kamatebwaia ana rongorongo Unimwaane Ronald A. Rasband “Ko na tai Maaku” (Riaona, Nobembwa. 2018, 18–21) ao ana rongorongo Titira Lisa L. Harkness “Raoi, Bwaaka” (Riaona, Nobembwa. 2020, 80–82).

Te Uaia n Reirei

Ko kona n kaoa kaain te kiraati ke te kooram bwa e na kauarerekea te karaki are n Mareko 5 ngke Iesu e anoa Iairo bwa e na “tai maaku” (tara kiibu 22-24, 35-43) ke kam kona n rinanon te karaki n te kurubu. Ko kona ni karaoa naba anne ma karaki ake tabeua n te mwakoro aio—te mwaane ma te tamnei ae buakaka inanona ao te aine are e nraara. A kanga waaki aika kakamaku aikai n ti te arona ma ake ti na aitara ma ngaai inanon maiura? Tera ae ti reiakinna man karakin te Tia Kamaiu aikai ao tera arora n ukora Ana ibuobuoki? Mwaukri aikai a kona n buokiia kairake n karikirakea aia onimaki iroun Iesu Kristo ao n reiakina iriran Ana taeka n ibuobuoki: “Ko na tai maaku, ti onimaki.” (Mareko 5:36).

• Ana kakao te Uea bwa ti na aki maaku, ake a okioki rinanon nako koroboki aika a tabu, e na kakabwaiaia kairake ngkana aki maaku. Kaoia bwa a na wareki koroboki aika a tabu inanon “Reitan Bwaai ni Mwakuri” ao karaoa te boutita ae a kona n katekea ni mweengaia—ke te boutita iaon te intanete ae a na kona n tibwauaia n te aonraain—ae boboto iaon koroboki aika a tabu ake a wareki. Ngkana a tibwaua aia tamnei ma te kiraati, kaoia bwa ana tibwauaia bwa tera ae a tia n reiakinna ae e buokia ngkana a maaku. E kanga n tia n buoki ngkami te Tia Kamaiu n taai ake kam maaku iai?

• Iangoia n kaota tamnein te Tia Kamaiu ngke e katoka te buaka, n ai aron are n te intanete aekan are n ana marooro Titita Lisa L. Harkness “Raoi, Bwaaka” (tara naba Bokin Tamnein te Euangkerio [2009], nambwa. 40). Ngkoe ke temanna ae ko rineia e kona n tibauaa rongorongon te Tia Kamaiu ngke e katoka te buaka man Mareko 4:35-41 ke man ana marooro Titita Harkness. Tera arora n tabetai ae te arona ma ake n te kaibuke? Tera ae ti reiakinna man te karaki aio ae taekan ana ibuobuoki nakoira te Tia Kamaiu ngkana ti maaku? Kaoia kairake bwa a na rinanon ana marooro Titita Harkness, n taratarai mwakoro n taeka ke tiententi aika e buokiia ni kakorakorai aia onimaki iroun Iesu Kristo. A kona ni korei bwaai aikane iaon te burakibooti. E na kanga ara onimaki iroun te Tia Kamaiu ni buokiira ngkana bon tiaki Nanona bwa e na kanakoi kangaanga inanon maiura?

• Tabeua anene n taromauri a neboa te Tia Kamaiu ibukin Ana karaunano ao kakorakora inanon taai ni kangaanga ao n raraoma, n ai aron “I Kainanoiko Ngai” ke “Tiiku Irou” (Anene n Taromauri, nambwa 98, 166). Ko kona naba n anenea ke ni wareki tabeua kuuna aikai n ikotaki, n taratarai aanga ae na kona ni buokiira iai te Tia Kamaiu.

• Te maaku ao te raraoma a bon riiriki ngkana ti kaitara ma kangaangan te maiu aio. Ibukiia tabeman, namakin aika e na kona ni kamwaukuia. A na kona ni buokaki kaain am kiraati ke am kooram man te marooro iaon aron te Tia Kamaiu ni kona ni buokiia naake a rotaki n te raraoma. Kain te kiraati ke kooram a kona n ikotaki n rinanon ana marooro Unimwaane Ronald A. Rasband “Ko na Tai Maaku” ke ana marooro Unimwaane Erich W. Kopischke “Addressing Mental Health” (Riaona, Nob. 2021, 36–38.) n kakaei koaua aika iai nanoia nakoia ao n tibwauaia. Kaungaia kairake bwa a na taetae ma te karo ke te tia kairiiri ae onimakinaki ke nakon mentalhealth.ChurchofJesusChrist.org ngkana a kainnanoa te ibuobuoki.

te ataeinimwaane ae kamatebwai

Te Tia Kamaiu e berita nakoira bwa e na buokiira ngkana ti okirikaaki Nakoina n taai ake ti maaku man raraoma iai.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi ni mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakin are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Iotua 1:9; Taeka n Areru 56:3–4; Itaia 41:10; Ioane 14:27; 2 Timoteo 1:7; Reirei ao Berita aika Tabu 50:41–44; 68:6

Reirei n ana Kawai te Tia Kamaiu

“Ngkana ko angareirei, nakon riki ti kanakoan rongorongo, buoka te kairake ni karekei koauan te euangkerio ibukiia inanon koroboki aika tabu ao aia taeka burabeti.