Te Kakabwaia are E Roko Iroura Ngkana Ti Taromauriia Tamara are i Karawa
Te taromauri e kakaawaki ao bon aan maiura n tamnei. Bon te bwai ae ti riai n tatangiria, ukoukoria, ao ni kataia n rinanona.
Rokona
Teuana te bwai ae moan te kamimi ao n tangiraki are e koreaki ni koroboki aika a tabu ae mimitong bon rongorongon rokon te Tia Kamaiu nakoia aomata i Amerika imwiin Matena ao Mangautina. Aomata a tia n rootaki n te urubeke ae korakora are e karika “te aonaaba ae bwanin [n riki] ni bitaki.”1 Rongorongon taai akanne e irekereke imwiin te kaangaanga, are ni kabane aomata a reitinako n tang,2 ao inuukan tangiia, a rang n tangira te kamaiuaki, rau, ao te kainaomataaki.
Ngke e a ruorikaaki te Tia Kamaiu mai karawa, aomata a bwaka I Waena uoua te tai. Te moantai are e riki imwiin are E katanoata, ma te kariaiakaki mai karawa:
“Nooria, bon Iesu Kristo Ngai, are a kakoauaa ibukina burabeti bwa e na roko nakon te aonaaba.
“Ao nooria, ngai te oota ao maiuin te aonaaba.”3
Imwiina e kaoia naake a roko n“teirake ao nakomai nakoiu bwa kam na karin baimi irarikiu, ao bwa kam aonga naba n namakina mwiin te nera i baiu ao i waeu, bwa kam aonga n ataia bwa boni ngai Atuan Iteraera, ao Atuan aonaaba ae bwanin, ao I a tia n tiringaki ibukin buren aonaaba. …
“Ao ngke a bane n tia n nako ma ni kakoauaai bon I bukiia, ao a takaarua ni katiteuanaki ni kangai:
“Otanna! E na kakabwaiaki aran te Atua ae Moan te Rietaata!”4
Ao ngkanne, ibukin te kauatai, “a bane ni bwaka inano i waen Iesu.” Ma n te tai aei ma te kantaninga, ibukina ti reiakinna bwa a “taromauriia.”5
Boong Aikai
Ni moan te ririki aei I karaoa tibwangau ni kawara te titeiki i maeaon te United States. Bon te Taabati are ti taneiai iai, te boowi ae kakaraoaki, ma kain te Ekaretia. I mataku ngke a rin aomata n te umwantabu ao ni mwaing ma te karinerine nakon tabo n tekateka aika tauraoi. Te kabanea n taeka, maroro ni wirikiriki ake ko ongo inanon te kawai n rin. Tiina ao kaaro a kataia—n tabetai ma aki tokanikai—ni katoki beroroia ataei aika takaremwaremwa. E bon riiriiki aei.
Ma ngkanne, imwain waakin te boowi, taeka aika a kairaki iroun te Tamnei a roko n au iango.
Kaain te aro aikai aki ti roko ni karaoi tibwangaia ke n ongora nakoia taan taetae.
A roko ni bukina ae rang kakaawaki ae nano riki.
A roko bwa a na “taromauri.”
Ngke e waaki te boowi, I nooria kaain te aro aika mwaiti n te taromauri. Iai taraakin aon moaia kanga ai aron taraaia kain karawa ni kaota, te anua ni karinerine ao n rau. Iai aroia ae kakukureia nanou. Te namakin are ti karekea n te Tabati anne bon te bwai ae kanga e onoti.
A taromauri.
A rinanon namakin mai karawa.
I kona n nooria iaon moaia.
Ao I kimwareirei ao I nebonebo ma ngaiia. Ao ngke I karaoia, te Tamnei e taetae i nanou. Ao n te bong anne, I reiakina te bwai teuana bon ibukiu, ibukin te Atua, ao ibukin te tibwanga n taromauri ni koaua inanon maiura.
Te Taromauri ni Katoabong ni Maiura
Aika Itiaki ni Boong aika Kaitira a rang n rianako ngkana e roko ibuobuoki n taian nakoa n te Ekaretia. Ma n tabetai ti kona ni bon ira aron ara mwakuri, are kanga ti bon tii karaoa te mwakuri. N tabetai rorokora ni boowi ao n ara taromauri n te abanuea e kona ni kabwaka ni bwaai aika mimitong n te taromauri. Ao n akean anne, ti bon kabua te reitaki ae akea kabotauana ma teuare akea tokina—temanna are ngaira ti katauaki nako iai ngkai natin Tamara are i Karawa ae tatangira.
N raroa man ae karina n riki, e karika te kakukurei, te taromauri e kakaawaki ao e boboto ni maiura n Tamnei. Bon te bwai ae ti riai n tatangiria, n ukoukouria, ao n teimatoa n rinanona.
Tera te Taromauri?
Ngkana ti taromauriia te Atua, ti nakoina ma te tangira ni karinerine, nanorinano, ao te nebonebo. Ti karinea ao ti butimwaia bwa ara uea ae te King, te Tia Karika te aonaaba, Tamara ae tangiraki ao ae akea tokin ana tangira.
Ti karinea ao ti mataiakinna.
Ti anga ngaira nako Ina.
Ti tabeki nanora ni kakorakoraira n tataro, ni kakaitau n Ana taeka, kimwareirei n Ana akoi, ao baireia n iriria ma te motinnano ae kakaonimaki.
Taromaurian te Atua bon te bwai ae moan te kakaawakin ni maiun ana reirei Iesu Kristo are ngkana ti kabwaka ni butimwaia inanora, ti na ukoukoria ao e na aki reke inanon ara Kauntira, Ekaretia, ao tembora.
Ana reirei ni koaua a katikaki nakon “taromaurian teuare e karaoa karawa, ma aonaaba, ao taari, ao koburake n ran—ni wetea aran te Uea ni ngaina ao ni bong.”6
Ti kona n reiakina riki ae mwaiti ibukin taromauriana ae koaua man kamatebwaian aroia tabeman—aomata ake a aki rang kakokoro ma ngaira—ni kaitarai, ni kateia, ao taromaurina n rokon teuare i karawa.
Kamimi, Kakaitau, ao Onimaki
N ana moan itera te ka-19 n tienture, te aonaaba ni Kiritian a tia ni katuaka te iango are te Atua e bon taetae naba nakoia aomata. Ma inanon te tiburing n 1820, are e bitia n aki toki ngke te ataeinimwane ae nanorinano man te oniman e rin n te buakonikai ao e katorobubua n tataro. Man te bong anne, a bwaro mii aika kamimi, kaotioti, ao a kaoti kain karawa a ruo nakon te aonaaba, ni kakabwaiaia kain te aonaaba ma atatai aika kakaawaki ni kaineti ma aron ao ana kantaninga te Atua ao Ana reitaki ma aomata.
Oliver Cowdery e kabwarabwarai boong akanne bwa “aki kona ni mwanuokinaki taekaia. … Ai kakukureira! Ai kamimiira! Ai tamaroara!”7
Ana taeka Oliver e kaota te moan bwai are e raonaki n taromaurian te atua ni koaua—te namakin ae Tamaroa ao te kakaitau ae bati.
Ni katoabong, ma riki te bong ae te Taabati, ti karekea tibwangara ae onoti n rinanon kamimiin ao tamaroan karawa ao n anga ara nebonebo nakon te Atua ibukin Ana kakabwaia n tamaroan ao tikiraoin ana nanoanga.
Aio are e na kairiiri nakon te kantaninga. Aikai bon moan bwai n te taromauri.
Ota, Ataibwai, ao te Onimaki
N te bong ae kakabwaiaki n te Bentekota, te Tamnei ae Tabu e rin n nano ao n aia iango ana reirei Kristo, ni kaoniia n te ota ao te ataibwai.
Man te bong anne iai taai ake aki koaua bwa tera te bwai ae a riai ni karaoia. Ierutarem e a tia n riki bwa te tabo ae kakamaaku irouia taan iriira te Tia Kamaiu, ao tao a bon titiraki bwa tera ae a riki irouia.
Ma ngke e a kaon inanoia te Tamnei ae Raoiroi, a bua nanokokoraki ao nano n rarawa. Rinanon te namakin ae onoti n te taromauri ni koaua, Ana aomata te Atua a karekea te ota mai karawa, ataibwai, ao kakorakoraan aia koaua. Ao anne are e kairi nakon te onimaki.
Man te tai anne, Abotoro ao aika Itiaki a kakorakoraaki n te nanomatoa ni kakoroa bukin aia kouru. Ma te ninikoria a tataekina taekan Kristo Iesu nakon te aonaaba ni kabane.
Ngkana ti taromauri inanon te tamnei, ti kaoa te ota ao te koaua inanon tamneira, are e kakorakora ara onimaki. Bwaai aika uoua aikai bon bwaai aika kakaawaki n te taromauri ni koaua.
N Riki bwa Ana Reirei ao te Tangira ae Kororaoi
N ana Boki Moomon ti reiakinna bwa man te tai are Aramwa te teei e kamaiuaki man korakoran ana kakaitara, e aki manga okira arona. E ninikoria “ni mwaamwananga ni kabuta aon aban …ao nakoia aomata ni kabane… , ni kakaonimaki ni kamaoi ikoaki akea a tia ni karaoi nakon te Ekaretia.”8
Ana taromauri ae teimatoa n taromaurian te Atua ae moan te korakora e karikiira bwa ana reirei ae moan te korakora.
Taromauri ni koaua e bitiira n riki bwa a na reirei a kakaonimaki aika matoatoa iroun ara Mwatita ae tangira ao te Tia Kamaiu Iesu Kristo. Ti bitaki ao ni kaan riki n ai Arona.
Ti na rang n oota riki ao n tabeaianga. Ni kakai kabwarabure riki. Ni kai tatangira.
Ti ataia bwa e kaangaanga ae ti na taekinna ae ti tangira te Atua ngkai ti karaoa naba te kairiribai, ni kananako, ke ni aki tabeakiniia tabeman ake irarikira.9
Te taromauri ni koaua e kairi nakon te nanomwaaka ae aki tataninga n nakonako ni kawain ana reirei. Ao anne are e oti bwa e kairi nakon te tangira ae kororaoi. Aika uoua aikai bon bwaai aika a kakaawaki n te nebonebo.
Kam na rin i nanon Ana mataroa ma te Katituaraoi
Ngke I iangoa te bwai are waaki ni moaningabongin te Tabati, n te autinibootaki, inanon te titeiki are tataneiai te aba iai, riki n te bong aei I kaungaaaki man te namakin n tamnei ae onoti are e na kakabwaiai maiura n aki toki.
I reiakinna bwa riki ngkana ti mwaatai ni bairei ara tai, nakoara, ao tibwangara—riki ngkana ti kaeti ni kabane bwaoki iaon ara riiti n te aomata, utu, ke te mataniwi ae “kororaoi”—ngkana ti kabwaka n taromauria te Tia Kainaomataira ae nanoanga, Kingin karawa, ao te Atua ae mimitong, ti na kabua te kukurei ae bati ao te rau n te euangkerio.
Ngkana ti taromauriia te Atua, ti kakoaua ao ti butimwaia ma te karinerine naba anne are a karaoia aomata ake ngkoe i Amerika. Ti nakoina ma te namakin ae akea tiana n te mimi ao te karinerine. Ti mimi inanon te kakaitau n tamaroan te Atua. Ao n anne, ti karekea te kantaninga.
Ti iangoi ana taeka te Atua, ao anne are e kaona nanora n te ota ao te koaua. Ti karekei taraakin tamaroan te aba n Tamnei are a tii nooraki rinanon otan te Tamnei ae Raoiroi.10 Ao anne, e kainnanoa te onimaki.
Ngkai ti taromauri, nanora a kaitiakaki ao ti kabaeira n nakonako ni mwanekan ara Tia Kamaiu ae tangiraki, Iesu Kristo. Ao man aio, ti kainnanoa te tangira ae kororaoi.
Ngkana ti taromauri, nanora a reitinako n nebonebo nakon te Atua.
Ti tabuia ao ti karinea n tainako—inanon ara autinibootaki, mweengara, tembora, aon ara beku ni kabane.
Ngkana ti tataro, ti kauki nanora nakon mwaakan ana Mwakuri ni Kamaiu Iesu Kristo.
Maiura a riki bwa kanikina ao ni kaotan ara nebonebo.
Tariu ao mwaneu, namakin n Tamnei aki rootaki ni korakoran bwaai aika a riki irarikira ao n aki rootaki ma bwaai aika riki inanora. Bon au Kakoaua bwa te nebonebo ni koaua e na bita te Bootaki n Ekaretia ae tataneiai te aba iai nakon te bukamaru n Tamnei ae onoti. E na karikirakei maiura, karababai ara atatai, ao ni kakorakorai ara koaua. Bwa ngkana ti na rairi nanora nakon te Atua, n aron Taian Areru ake ngkoe, ti na “rin I nanon ana mataroa ma te katituaraoi, ao inanon ana boowi ma te nebonebo: [ti] kakaitau nakoina, ao ti neboa arana.
“Ba E raoiroi Iehova; akea tokin ana atataiaomata; ai uana naba ana kakaonimaki nakon te rorona ma te rorona.”11
Rinanon te taromauri ae nano ao e nako man te nano, ti na rikirake ao ni matoa inanon ara kantaninga, onimaki ao tangira ae kororaoi. Ao rinanon te waaki aei, ti na ikoti otan karawa inanon tamneira are e na kaotai maiura ma ana kantaninga teuare i karawa, ni karekea te rau, ao te kukurei ae akea tokina.
Aio te kakabwaia n te taromauri inanon maiura. Man aei I nanorinano ni kakoaua n aran Iesu Kristo ae tabu, amen.