E Kona te Toa Ni Buokiira n Riki ni Mimitong

Iroun Unimwaane Peter F. Meurs

Man te Itingaun

Iangoi nimaua kawai ni karikirakea mwiin ao mwaakan ara ibuobuoki ae teimatoa n te otenanti ae tabu n te toa.

Teuana mai ibuakon au ururing bon iaon bootaki n toa ae karaoaki ni mweengara i Warrnambool, Australia. Imarenan 10 ao 15 aomata aika a ira ara mwaanga, ao tamau, temanna mai ibuakoia teniman aika iai irouia te nakoanibonga, e reke aia tai ni kakabwaia te toa. I uring namakin aika I karekei ngke e wareki ma te nanorinano ao ma te karaurau taekan te tataro n te toa. N tainako e ruru bwanaana ngkana e namakina te Tamnei. N tabetai ao e na toki teutana imwain ae kabanea te tataro.

Bukina bwa ti nimaua au ririki, I aki kona n ota n nanon te bwai are e a tia n taekinaki ke ni karaoaki, e ngae n anne, I ataia ae iai te bwai ae onoti ae riki. I kona n namakina te rau ao manga kakoauaan ana kairoro te Tamnei ae Raoiroi ngke e kantaninga ana tangira te Tia Kamaiu ibukira tamau.

E reirei te Tia Kamaiu: “Ao kam na aki toki ni karaoa aio nakoia ake a rairinanoia ma ni bwabetitoaki n arau; ao kam na karaoi ni kauringa raraau, are I a tia ni kawawaea i bukimi, bwa kam aonga ni kakoaua nakon te Tama bwa kam aki toki n uringai. Ao ngkana kam aki toki n uringai ao e na memena Tamneiu iroumi” (3 Nibwaai 18:11).

I kaoira ni kabane bwa ti na iangoi nimaua kawai ni kakorakora mwiin ao mwaakan te mwakuri n te otenanti ae tabu n te toa, te otenanti ae kona ni buokiira n riki n ni mimitong.

1. Katauraoi ni Moan taai

Ti kona ni moana ara katauraoi ibukin te toa n te tai ae maan imwain te bootaki n toa. Te Kaonobong e kona n riki bwa te tai ae tamaroa n iangoi rikirakera ao ara katauraoi n tamnei

Te mate bon te bwaintangira ae kakawaki ni kawaira n riki n aron Tamara are i Karawa. E kakawaki ibukina bwa e na karekei kakatai ao kakaewenako are e na karekea ara tai ni bitaki ao n rikirake. E reirei te Uea Beniamina bwa “ana kairiribai te Atua te aomata, … ao e na, teimatoa n aki toki, ni karokoa ae e kakauongo nakon ana wirikiriki te Tamnei ae Tabu, ao e kakorakora nakon te aro n aomata ao n riki bwa ae itiaki rinanon ana mwakuri ni kamaiu Kristo te Uea” (Motiaea 3:19). Te ibuobuoki n te otenanti n te toa e karekea te tai ni kamaiu riki nanora ao tamneira nakon te Atua.

N ara katauraoi, a uruaki nanora ngkana ti kaota te kakaitau ibukin ana Mwakuri ni Kamaiu Kristo, rairi nanora man ara bure ao ara kairua, ao ni bubuti ibukin ana ibuobuoki te Tama ni kawaira ae teimatoa n riki n ai Arona. Ti kona ngkanne ni kantaninga te tai ae katauraoia te toa n uringa Ana anga karea ao ni kabooui ara motinnano nakon berita aika tabu ni kabane aika ti a tia ni karaoi.

2. Moantaai n Roko

Ara taneiai n ara toa e kona n nakoraoi ngkana ti roko n te tai ae maan imwain te bootaki ao n iango ngkana e tang te katangitang ni kaukuuki.

Beretitenti Boyd K. Packer e reirei: “Katangitang ni kaukuuki, aika a katangaki ma te rau, bon kakorakoraan te tamnei. E kaoi kairi mai ieta.”¹ “Tiaki aio te tai,” e kabwarabwara Beretitenti Russell M. Nelson, “ibukin te rairaki ke kanakoan te rongorongo ma te tai ibukin te tataro mwaaka ngkai taan kairiiri ao membwa a katauraoia n tamneia ibukin te toa.”²

3. Anene ao Reirei man Taeka n te Boki n Anene n te Toa

Te anene n te toa bon mwakoron ara taneiai n te toa ae onoti kakawakina. E kakorakorai ara iango ao ara namakin te katangitang. Iai ana kairoro ae korakora riki te toa ngkana ti kabanea ara iango iaon taekan ao mwaakan te reirei ae ti reireinaki iai. Ti reiakina ae bati riki man taeka n aron “Ikoaki, uruaki, raebtiaki ibukira,”³ “Ti riai n uringa (ana mwakuri ni kamaiu te Tia Kamaiu) ao ni kakoaua ae a itiaki nanoia ao baia,”⁴ ao “Ike a kaitibo iai te motiraoi, tangira, ao te akoi ma mwiina ae kakukurei mai ieta!”⁵

Ngkana ti anenea te anene n ara katauraoi n taua te toa, a kona taekana n riki bwa mwakoron ara motinnano n ara berita. Iangoia, ibukin te katooto, “Ti tangiriko, te Uea; a onrake nanora. Ti na nakonako n te kawai ae rineaki.”⁶

4. Ibuobuoki n Tamnei n te Tataro n Toa (Taraa Moronaai 4–5)

Irarikin are te aki kakauongo raoi nakon taekan taian tataro n toa aika ko tataneiai ma ngaai, ti kona n reiakina ae mwaiti riki, ao n namakina ae e mwaiti riki ngkana ti iangoi motinnano ao kakabwaia aika irekereke n rin inanon tataro aika tabu aikai.

Te kariki ao te ran a kakabwaiakaki ao ni katabuaki ibukin tamneira. A kauringiira n ana anga karea te Tia Kamaiu ao E kona ni buokiira ni karikiira bwa ti na mimitong.

Tataro a kabwarabwara bwa ti anaa te kariki ni kauringa rabwatan te Nati, are E anga bwa te karea bwa aonga ni bane n tau aomata ibukin te kamaiuaki, ao ti mooi n te ran ni kauringa iai raraan te Nati, are E kawawaea bwa ti aonga ni kamaiuaki ngkana ti raira nanora.

Tataro a kamatatai tuua ma taekana ae kangai “Bwa a boni kukurei” (Moronaai 4:3). Te kibu n taeka ae bebete aei iai nanona ae moan te mwaaka ibukira. Ti kukurei ni beku ao n ibuobuoki? Iai nanora ni bitaki? Iai nanora ni mwakurii kabwakara? Iai nanora ni karoko ao ni kakabwaiaia tabeman? Iai nanora n onimakina te Tia Kamaiu?

Ngkana a taekinaki kakabwaia ao ngkana ti taua, ti kakoaua inanora ae ti kukurei n:

Katoka iaora aran Iesu Kristo.
Kekeiaki ni kawakin Ana tua.
N Ururingnga n tainako.

E kabaneaki te tataro ma te kakao ao te berita ae kaunganano: “Bwa e aonga ni memena Tamneina irouia n tainako” ( Moronaai 4:3).

E koroia Bauro, “Bwa uaan te Tamnei te tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki, te nimamannei, [ao] te taubaang” (I-Karatia 5:22–23). Kakabwaia ao bwaintangira aika tikiraoi a tauraoi nakoira ngkana ti kawakin ana tua.

5. Iangoia ao Ururingnga ngkana e a Kabutaki Kanikina n te Toa

Taai aika a rau ngkana e kabutaki te toa irouia kaain te nakoanibonga e kona ni mimitong nakoira.

Ngke e kabutaki te kariki, ti kona ni kantaningaia bwa man ana kabanea ni mwakuri n tangira ibukira, te Tia Kamaiu e uota, “iaona te mate, bwa e aonga ni kabwara ana kabaebae te mate are e kabaeiia ana aomata” ( Aramwa 7:12).

Ti na bae n uringa te kakabwaia ae kakukurei n ni Kaokan bwai are “e na reke nakoira ni kabane, … ake a kabaeaki ao ake a inaomata, nakon te mwaane ao te aine, nakoia aika a buakaka ao ake a raoiroi; ao a na akea naba iran atuuia ae na bua; ao bwaai ni kabane a na manga kaokaki nakon aroia ae kororaoi” ( Aramwa 11:44).

Ngke e kabutaki te ran, ti kona n uringa ana tataro te Tia Kamaiu:

“Noria, Ngai, te Atua, I a tia ni karawawataaki ni bwaai aikai ibukiia ni kabane, bwa ana aki karawawataaki ngkana a rairinanoia; …

Te karawawataaki are e riki nako Ina, te kabanea ni korakora, n ruru ibukin te maraki, ao ni wawanako raraana ni bwangabwangan rabwatana ni kabane, ao ni korakai n rabwatana ao n tamneina. E tuatua bwa e na aki mooi n te mwangko ae mao, ao n ni kararoa mai iai. ( taraa D&C 19:16, 18).

Ti uringnga bwa E uota “iaona [mamaarara], bwa e na on nanona n te nanoanga, ni kaineti ma te maiu n iriko, bwa e aonga n ataia ni kaineti ma te maiu n iriko bwa e na kanga ni buokiia ana aomata ni kaineti ma [mamaarara]” ( Aramwa 7:12).

Ngkana ti iangoa ara taneiai n te toa, ti na bae n titirakiniira:

Tera ae n na karaoia n te wiiki aei ni katauraoai raoi n taua te toa?
I kona n ibuobuoki n ae mwaiti riki nakon te karinerine ao te kaotioti are e kona n raona moan te bootaki n toa?
Tera te reirei ae reiakinaki n anenen te toa?
Tera ae I ongo ao n namakinna ngke I kakauongo nakon te tataro n toa?
Tera ae I iangoia ngke e kabutaki te toa?

Unimwaane David A. Bednar e reirei: “Te otenanti n te toa bon te kakao ae tabu ao n okioki bwa ko na raira nanom ma te koaua ao ni kabouaki n te tamnei. Te mwakuri n tauakin te toa, bon irouna, e aki kanakoi buure. Ma ngkana ti katauraoi ma te iango ao n ibuobuoki n te otenanti ae tabu aei ma ake a uruaki nanoia man raraoma tamneia, te berita e kangai bwa e aonga ni memena Tamnein te Uea iaora n tainako. Ao man mwaakan te Tamnei ae Raoiroi ae korakora bwa raoraora n tainako, ti kona n tainako ni kateimatoa kabwaraan ara bure.”⁷

I kakoaui kakabwaia aika mwaiti aika a tauraoi nakoira ngkana ti karikirakea ara katauraoi ao ara ibuobuoki n tamnei n te otenanti n te toa. I kakoaua naba bwa a tauraoi kakabwaia aikai nakoira ibukin ana tangira Tamara are i Karawa ao a na anga karea ni kamaiu Natina ae Tangiraki, Iesu Kristo. N arana ae E tabu, riki Iesu Kristo, amen.