Akea Riki te Kukurei n Ataia bwa Natim A Ata te Tia Kamaiu
I aki ataia ngkana iai te bwai n te aonaaba aei ae kona ni uota te kukurei ae raka riki ao te kimwareirei nakon ataakin Natira n ata te Tia Kamaiu,
Tariu ao mwaneu, I a tibwa tia n iangoa te titiraki aei: “Ngkana ni kabane natimi a ata te euangkerio mai iroumi—ngkai a ti ataia mairoumi—a na mwaitira riki ae a na ataia?” Te titiraki aei e kaineti naba nakoia ni kabane naake a tangiriia, reireiniia, ao a kakairi nakoia natiia.
Akea riki te bwaintangira ae kakaawaki are ti kona n tuangiira natira nakon te ururing ae matoa inanoia ao ti ataia bwa e maiu te Tia Kabooira? A ataia natira te bwai ae ti ataia? Ao ae kakaawaki riki, a tia n ataia inanoia bwa E maiu?
Ngke te ataeinimwane ngai, bon ngai natin tinau ae moan te kanganga aron kaikawaakina. I bon rang n takaremwaremwa. Tinau e tuangai bwa maakuna ae e korakora ngkana I aki rinanon te maiu n ikawai man maiu n ataei. I bon rang ni takaremwa.
I uringa n te taina ngke I tekateka ngke I ataeinimwane n tain te Bootaki n toa teuana ma au utu. Tinau e a tibwa karekea ana Boki ae tabu ae bwanin. Te boki aei a bane iai Koroboki aika a kariaiakaki ao bon i nuukana raoi iai te beebwa ae rainiiaki ibukin te koro-boki.
N tain te Bootaki, I tuangnga ngkana I kona n taua ana boki ae tabu. Ma te kantaninga are e na kaungaai ni karekea au karinerine, e a anganai. Ngke I tabe n taratara ana boki, I nooria bwa e a tia ni korei ana kouru n te itera are e kona ni Koroboki iai. N angani ngkami taekan ana kouru, N na tuangi ngkami bwa ngai te Kauoman mai ibuakoia Onoman ataei ao arau bon Brett. Tinau e koreia, n te uraura, ti teuana ana kouru: “Taotaonnano ma Brett!”
N anga kakoaua ni buokami n ota n te kaangaanga are a kaitara au karo ni karikirakeaia ara utu, N na taekina taekan ara wareware n utu ni booki aika a tabu. Ni katoa ingabong, tinau e wareka ana Boki Moomon nakoira n te kaingabong. N te tai anne, tariu ae ikawai, Dave, ao ngai ti na tekateka n aki karongoa ma te aki karinerine. Ni kaota raoi te koaua, ti aki kakauongo. Ti wareka te Koroboki ake iaon bwaokin te tirioo.
N tokina, n te ingabong teuana, I baireia bwa N nang kaaitara tinau. I taku, “Tinau, bukin tera ko karaoa aio nakoira? Bukin tera ko wareka Ana Boki Moomon ni katoa ingabong?” Imwiin taetaeu I mama ni kaota. Te koaua, I aki kakoaua ae I bon taekinna. I tuangnga, “Tinau, I aki kakauongo!”
Ana kaeka n tangira bon moan te kakaawaki inanon maiu. E taku, “Natiu, I mena n te boowi are e reirei iai Beretitenti Marion G. Romney n taekan te kakabwaia man warekan Koroboki aika a tabu. N tain te boowi, I karekea te berita are ngkana I wareka Ana Boki Moomon nakoia natiu ni katoabong, ana bon aki bua n tamneia.” Imwiina e taraai ni matau, ma te nanomatoa ni koaua, n taku, “Ao Ko na bon aki bua mairou!”
E rootaki nanou n ana taeka. N aki tara aki kororaoiu, I bon tau ni kamaiuaki! E reireinai te koaua ae akea tokina bwa ngai natin Tamara are I Karawa ae tangira. I reiakinna bwa n aki tarai kaangaangan arou, I bon tau. Aio te tai ae kororaoi ibukin te ataeinimwane ae uarereke ae ngai.
I rangi ni kakaitau n akea tokina nakon tinau ni kabotaua ma te anera ao ibukiia anera ni kabane ake a tangiriia natiia ma te kororaoi, n aki tarai aia kairua. I kamatoa ni kakaoaua bwa ni kabane aine (n te Ekaretia)—N na araniia bwa anera—bon tiina I Tion, ngkana a tia ke n tuai ni mare ke ni kariki n te maiu aei.
Ririki aika a nako te Moan Beretitentii e katanoata: “Te nakoa n tina e kaan nakon karawa. Bon te kabanea n rietata ni beku ae mimitong are e kona ni karaoia te aomata. E karikiia aine ake a karinea te wewete ae mimitong aei ni katitebooia ma anera.”1
I kakaitau ibukiia anera ni kabuta te Ekaretia ake a ninikoria ma te tangira n tataekina te koaua ae akea tokina nakoia natin Tamara are i Karawa.
I kakaitau ibukin te bwaintangira n Ana Boki Moomon. I ataia bwa e bon koaua! Iai inanona ana euangkerio ae bwanin Iesu Kristo. I aki ata temanna are e teimatoa ni warekan Ana Boki Moomon ni katoa bong ma te nano ae itiaki ao te onimaki inanon Kristo are e a tia ni kabua aia koaua ao ni bwaka. Ana berita Moronaai n taetae ni burabeti iai inanona kaeka ni kaineti ma ataakin koauan bwaai ni kabane—n ikotaki ma karekean te konabwai ni kaokoroaki ao n totokoa ana kairiiri teuare buakaka. (tara Moronai 10:4–5.)
I kakaitau naba ibukin ana tangira Tamara are i Karawa ao ibukin Natina, Iesu Kristo. Te Tia Kamaiu e karekea te banna ni katooto ae kororaoi n aron maiuakinan te maiu ae aki kororaoi n te aonaaba ae aki booraoi. Ti tangiria ibukina bwa E moan tangiriira (tara 1 Ioane 4:19). Ana tangira ibukira akea kabotauana. Bon ngaia raora ni koaua. Maonona “ai aron te timtim n rara” ibukim ao ibukiu naba (tara Ruka 22:44). E kabwarai aia bure ake aki kona ni kabwaraaki. E tangiriia naake aki kona n tangiraki. E karaoa are aki kona ni karaoia aomata n rabwata. E katauraoa te Mwakuri ni kamaiu bwa tina tokanikai iaon ara bure, maraki, ao aorakiia aomata nako.
Ibukin ana Mwakuri ni Kamaiu Iesu Kristo, ti kona ni maiu ma te berita are n aki taraia bwa tera ara kaangaanga are ti mena inanona, ti kona n tainako ni karekea te kantaninga Irouna, “are iai korakorana ni kamaiu” (2 Nibwaai 31:19). Ibukin Ana Mwakuri ni Kamaiu, ti kona ni karekea te kimwareirei, rau, kukurei, ao te maiu are akea tokina.
Beretitenti Boyd K. Packer e taekinna: “Ma ti tabeman aomata ake a na rineia n tuanga temanna are a tia n anganaki te kariaia, akea te anua, akea te anua ae kareke, akea te kaitara, akea te bure, akea te kekerikaaki, ake te bure are e kona n totokoa karekean te berita are kabwanina te kabwarabure. Anne te berita n ana mwakuri ni kamaiu Kristo.”2
Teuana te bwai ae moan te kamimi n rongorongon rimoa bon rongorongon ana reirei te Tia Kamaiu n aban Amerika. Katamneia n am iango bwa a na aekakira te roko ikekei. Ngkai I a tia n iangoia n au iango Ana tangira ao ana tabeaianga irouia aika Itiaki n ikotaki n te tembora, I a tia n iangoia irouia atai n tatabemaniia ake I tangiriia riki nakon te maiu. I a tia ni kataia n iangoia aron are N na namakinna n nooria ami ataei, ni kona ni Kakoaua kawarakiia iroun te Tia Kamaiu n roko nakoina, ni kakokaua bain te Tia Kamaiu are tangaina, n tei irarikiia ataei n tatabemaniia, temanna imwiin temanna, n taua baina ao waena, ao imwiina n noriia n tatabemaniia n tei ao ni Kakoaua bwa E maiu! (Tara 3 Nibwaai 11:14–17; tara naba 17:21; 18:25.) Bwa a na rairaki natira man taku, “Tinau, Tamau, bon te Tia Kamaiu!”
I aki ataia ngkana iai te bwai n te aonaaba aei ae kona ni uota te kukurei ae raka riki ao te kimwareirei nakon ataakin Natira n ata te Tia Kamaiu, “n ataia ake a na kawariia ibukin kamaunaan aia bure.” Anne bukina, ngkai kain te Ekaretia “ti kakarabakauakina Kristo” ao ti kakoaua iroun Kristo(2 Nibwaai 25:26).
-
Anne bukina ngkai ti tataro ma natira ni katoabong.
-
Anne bukina ngkai ti wareki Koroboki aika a tabu ma ngaiia ni katoabong.
-
Anne bukina ngkai ti reireiniia bwa a na ibuobuoki imarenaia, bwa a aonga ni kona ni karekei kakabwaia ibon irouia ngkai a kabuai maiuia ni buokiia tabeman (tara Mareko 8:35; Motiaea 2:17).
Ngkai ti kabanei nanora nakon bwaai aika beebete ni baaten n Abotoro aikai, ti na kakorakoraia natira n ana tangira te Tia kamaiu ao te kairiiri mai karawa ao ni katanaki ngkai ti kaitarai korakoran angiin te kakaitau.
Te euangkerio bon ibukin temanna n tatabemaniia ni koaua. Bon taekan te tibu ae bua (tara Ruka 15:3–7); bon taekan te aine n Tamaria te mwanibwa (tara Ioane 4:5–30); bon taekan te nati ae bakatae (tara Ruka 15:11–32).
Ao bon taekan temanna te ataeinimwane are e kaotia bwa e aki kakauongo.
Bon taekara n tatabemaniira—ngkai ti aki kororaoi—n riki bwa temanna ma te Tia Kamaiu ngkai E mena irarikin Tamana (tara Ioane 17:21).
I kakoaua bwa iai Tamara are I Karawa ae tangira, are e kinaira n arara! I Kakoaua bwa Iesu Kristo bon Natin te Atua ae maiu. Bon ngaia te Riki Temanna ao ara Tia Tei iroun te Tama. I Kakoaua riki bwa te kamaiu e roko inanon ao rinanon Arana—ao n akea riki te kawai.
Bon au tataro bwa ti na kabanei nanora ao baira ni buokiia ni kabane natin Tamara are I Karawa ni Kina ao n namakina Ana tangira. Ngkana ti karaoaia, E berita nakoira te kukurei ae akea tokina ao te kimwareirei n te aonaaba aio ao n te aonaaba ae e na roko. N aran Iesu Kristo, amen.