Reirei ao Berita
Ti bia tararuai raoi rabwatara ao ara iango n tarataraakin taian reirei ake a koreaki n Tuan te Mauri, te babaire ae katauraoaki ae tabu.
N te tairiki aei, tariu, I tataro ibukin ana kairiiri Tamara are i Karawa ngkai I tibwaua au rongorongo ma ngkami.
N 1833 te Uea e kaota nakon te Burabeti Iotebwa Timiti te babaire ibukin marurungira. Te babaire anne e kuneaki n te ka 89 ni mwakoro n Doctrine ao Covenants ao e aranaki bwa Tuan te Mauri. E anga te kaetieti ae onoti ni kaeti ma aron amwarake ake ti kang, ao e katabua kamanenaan bwaai aika a na uruani iai rabwatara.
Naake a ongeaba nakon ana tua te Uea ao ake a kakaonimaki ni kawakina Tuan te Mauri are beritanaki ni kakabwaia aika onoti, ni kairaki inanona te marurung ao karakaan riki te korakora n te rabwata.1
N te tai ae nako I wareka te rongorongo ae koaua ibukin kaotioti aika korakora ni kaineti ma berita aikai. Temanna kaain te aro ae kakaonimaki n te Ekaretia, John A. Larsen, e beku n tain ana Kauoua ni Buaka te Aonaaba bwa te tia Tararua Mataniwin te Aba ibukin te United States ni kaibuken USS Cambria. N tain te buaka i Biribin, e kaoti te rongorongo irouia kurubu aika taan boom ao taan kabwaka boom man te wanikiba. A kanakoaki taian oota ibukin kitanan te tabo. Ngkai te USS Cambria e a tia n nako, John ao teniman toana a booti aia bwai ni mwakuri ao ni kawaekoaia nakon te bike, a kantaninga reken tokaia n tewaana te kaibuke ae e na mwananga. N tekeraoia, bwa e roko te kaibuke n anaiia ao ni kabutimwaaka nakon te kabanea ni kaibuke are e nang kitana kamwanokun te aba. Mwaane ake a toka iaon te kaibuke are e nang nako, inanon te konabwai ni kawaekoakoaia ni kitana te tabo n aron are a kona, a bon tabetabe ni mwakuri iaon teeke ao e reke aia tai n tii karekenakoi taian roobu nakoia aman mwaane, are n te kantaninga a na kona n tamwarake nako aon teeke.
John ma ana reerio n nim inuukana, e kunea ngaia bwa e a tinetine mai tabon te roobu ae 40 te buuti (12 te miita), n iteran te kaibuke ni buti nako mooa nako aon taari. E a moanna ni kookia rake, ni baina aika uaai, n ataakina bwa ngkana a kounako baina man te roobu, e na bae ni mate. Imwiin tamwarekna tii ni katenimwakoron te kawai, e namakinna bwa a mwai baina ao a maraki. E a moanna ni mamaara are e a namakinna bwa e aki kona riki are iaona.
Ma keerikakin korakorana, e a bon kataua tekena are e anganaki, e karaurau n tataro John nakon te Atua n tuangnga bwa e aki toki ni kawakina Tuan te Mauri ao n tia ni maiuakina te aro ni maiu ae Itiaki—ao ngkai e rang kainnanoi kakabwaia ake a tia ni beritanaki.
E taku John imwiina bwa ngke e a tia n tataro, e namakina rikiraken korakorana. E a manga moanna riki n tamwarake ao ni kona ni kawaetitiia n tamwarakea te roobu. Ngke e roko iaon teeke, e a oki aron ikeikena ao e a kona ni ikeike raoi. Taian kakabwaia ni karakaakin te maururung, ao te korakora, a beritanaki n Tuan te Mauri, are e anganaki. E anga ana kakaitau nakon Tamana are i Karawa ngkanne, ao ni karokoa nikiran maiuna, ibukin kaekaan ana tataro ni kan buokaki.2
Taari, ti bia tararuai raoi rabwatara ao ara iango n tarataraakin taian reirei ake a koreaki n Tuan te Mauri, te babaire ae katauraoaki ae tabu. Ma nanou ao tamneiu ni kabane, I kakoauai mimitongin kakabwaiai ake a tataningaira ngkana ti karaoia. Bwa e na koro nanona, I tataro, n aran ara Uea ao ara Tia Kamaiu, Iesu Kristo, amen.