te taanga itinanikun te tembora

Meei 14

E Kanga te Uea ni Buokiia Mwaane ao Aine ni Katiteuanaaki ni Mwakuri inanon te Mare?

Mataio 19–20; Mareko 10; Ruka 18

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta,, 10.2, 11.2). Bairei aron mwakuriian bwaai ake a tia n maroroakinaki.

• Maiuakina te euangkerio. E kanga te rairaki nakon te Uea ni buokiira ni kaaitarai kangaanga ao kataaki?

• Tararuakiia naake iai kainnanoia. Antai ae ti ataia are e kainanoa ara tataro ao ara iraorao?

• Kaoaiia ni kabane bwa a na karekea te euangkerio. Tera babaire n tibwaua te euangkerio aika a tia ni marooroakinaki inanon bowiin te kauntira n te uoote ibukiia kairake? E na kanga ara kiraati ke kooram ni kairaki n tibwauan te euangkerio?

• Katiteuanakiia utu in akea tokina. E kanga mwakurian rongorongon te utu ni kakorakora ara reitaki maTamara are i Karawa ao Iesu Kristo?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ni moanna mairoun Atam ao Ewa, Tamara are i Karawa ao Iesu Kristo a tia ni kakaea bwa a na kamatoa ao ni katiteuanaia buuaine ao buumwaane n te mare. E reirei te Tia Kamaiu, “Ma ngaia ae e na kitana tamana ma tinana te aomata n nim ma buna; ao a na riki n ti te irikona naka uoman?” (Mataio 19:5). N te aro naba anne, e kataia Tatan ni karaoa ana kabanea ni kona ni karaurea te mare ao n uruana te utu. Taraa n ae kaain am kiraati ke te kooram a atai angiin kaangaanga are e a rootaki iai te mare ni boong aikai. Tao a tia naba n nooria buuaine ao buumwaane ni uaia ni mwakuri n ukora te buoka mai ikarawa ni karekea te katiteuanaaki. Iangoia raoi bwa a kanga taneiai aikai n anganiia reireiaia aron karekean te katiteuanaaki n te mare. Tera ae ko kona ni karaoia n reireiniia kakawakin te katauraoi ibukin taian reitaki n te mare ibukin taai aika a na roko?

N te wiiki ae nako, e reke aia tai kaain te kiraati ke te kooram ni wreka ana reirei te Tia Kami iaon te mare ni Mataio 19:4–6. Ni katauraoi n anga reirei, kamatebwai kiibu aikai, uana naba ma ana marooro Beretitenti Dieter F. Uchtdorf “In Praise of Those Who Save” (Riaona, Meei 2016, 77–80) ke tabeua marooro ake a taekinaki n te kamataata aei.

Te Uaia n Reirei

Te mare a kona n aki iangoia kairake aika a mwaiti. E ngae n anne, a kainnanoa te katauraoi ma te taratararaoi. Ko kona ni weteiia kairake bwa a na iangoia bwa aongkoa a katorobubua imatan te baonikarea n te tembora bwa a na kabaeaki ao te tia kabaebae e a tia n anganiia taeka n reirei bwa a na kamatebwaia Mataio 19:4–6. Tera koaua aika ti kunei inanon kiibu aikai are a na buokiia te taanga aika a boou aika a tibwa mareaki? E kanga n riki te buumwaane ao te buuaine n riki bwa tii “teuana”? E kanga te Tia Kamaiu n ibuobuoki? Waaki ni kakukurei n aron aikai a kona ni buokiia kaain am kiraati ke te kooram ni mataata bwa e kanga n reke te katiteuanaaki n te mare.

• Atam ao Ewa a katauraoa te banna ni katooto n riki bwa te buuaine ao te buumwaane ae a uaia ni mwakuri inanon te katiteuanaaki. Ko kona ni kaota tamneia (taraa Gospel Art Book [2009], namb. 5) ao tuangiia kaain am kiraati ke te kooram bwa a na wareka Mote 5:1–12, n kakaei kawai ike a uaia ni katiteuanaaki iai ni mwakuri Atam ao Nei Ewa. Tera ae a karaoia bwa a aonga te Atua ni kakabwaia aia reitaki? Ni buokiia kairake bwa a na reiakina te katiteuanaaki inanon te mare, a kona ni kamatebwai koroboki aika tabu inanon “Reitan Bwaai n Mwakuri.”

• E reirei Beretitenti Dieter F. Uchtdorf bwa n bootaki aika a mwaiti,“ni kabane bwaai a tara n ti teuana kabonganaaia.” Ma te anua aei e na aki kabonganaaki nakon ara mare ao ara utu, ma, ti riai “ni katabui ara kabanea n tamaroa ni kekeiaki n kamaiuiia ao ni kanakoraoa [aroia]” (“In Praise of Those Who Save,” 77). Ni buoka ni katamneia te iango aei, ko kona ni kaoiia kairake bwa a na iangoa te bwai teuana ae a bon tibwa onea mwina ae e uruaki, e a rootaki, ke matana, ke e a bane taina. Bukin tera ngkai e kaokoro te mare ma bwaai aika a kona n oneaki mwiia n aron aikai? A kona kaain te kiraati ke te kooram ni wareka mwakoron ana marooro Beretitenti Uchtdorf ae atuunai n “Saving Our Marriages” ao n tibwauai kawai ike buumwaane ao buuaine a kona ni uaia ni mwakuri ma te Tia Kamaiu ni kakorakora aia mare. Tera ae ti kona ni karaoia ngkai ni katuaraoi ibukin maare aika a matoatoa, ao man katiteuanaaki?

• Iangoa korean Te Katiteunaaki n te Mare iaon te burakibooti ao kaoiia tkairake bwa a na koroi bwaai ae buuaine ao buumwaane a kona ni karaoi bwa a na katiteuanaaki. Ngkanne tuangiia kairake bwa a na kakaea “Te Utu: Te Katanoata nakon te Aonaaba” (ChurchofJesusChrist.org) ibukin iango tabeua a kona ni karini nakon baike a korei ni karinanil. Baikara konabwai ake a noori kaain am kiraati ke kooram i boni irouia ke irouia taanga ni mare aika a atai aika a bongana ibukin te katiteuanaaki n te mare? Bukin tera ngkai e kakawaki ni karikirakea ao ni kamwakuri reirei ikai inanon ara reitaki? Witeo inanon “Reitan Bwaai n Mwakuri” anga tabeua katooto man tamaroan anua aikai.

• Ngkana iai aia titiraki ke raraomaia kaain am kiraati ke kooram n taekan te raure, iangoia ni uaia n rinanoa mwakoron ana marooro Beretitenti Dallin H. Oaks “Divorce” (Riaona, Meei 2007, 70–73).

taanga aika a inga

Ni moanna mairoun Atam ao Ewa, Tamara are i Karawa ao Iesu Kristo a tia ni kakaea bwa a na kamatoa ao ni katiteuanaia buuaine ao buumwaane n te mare.

Mwakuri ma te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia bwa a na iangoia bwa e kanga mwakurian aia namakinan ni kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• 1 I-Korinto 11:11; Reirei ao Berita aika Tabu 42:22; 49:15–17; Mote 3:18, 21–24 (Kakawakin te katiteuanaaki inanon te mare)

• “Renaissance of Marriage,” “Let Us Be Men,” “Expressions of Love” (videos), ChurchofJesusChrist.org

Reirei n ana Kawai te Tia Kamaiu

Ni kaotan ana tangira Kristo ae koaua raoi iai mwaakana ni kamarau nanoia kaain te kiraati ake a kamatebwai. Ni buokiia kaain te kiraati n namakina ae a tangiraki, ko kona n tuangiia bwa a na irii iwawaki n reirei aika iaon kawaia ni kaoti man tibwauakin aia taneiai ke aia namakin ibukin te boki ae tabu.