Te Ne Toe Hāʻele Mai ke Pule mo Pule Fakatuʻi, tā fakatātaaʻi ʻe Mary R. Sauer

Te Ne Toe Hāʻele Mai ke Pule mo Pule Fakatuʻi, tā fakatātaaʻi ʻe Mary R. Sauer

28 Mē

Ko e Hā Te u Lava ʻo Fai ʻi he Taimí Ni ke Teuteu ki he Hāʻele ʻAnga Ua Mai ʻa e Fakamoʻuí?

Siosefa Sāmita—Mātiu 1; Mātiu 24–25; Maʻake 12–13; Luke 21

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko ia ne vahe maí?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni kiate kinautolu ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Ko e hā e ongo ʻoku maʻu ʻe he toʻu tupu ʻokú ke akoʻí fekauʻaki mo e moʻui ʻi he ngaahi ʻaho fakaʻosi kimuʻa he Hāʻele ʻAnga Ua Mai ʻa Sīsū Kalaisí? Ko e moʻoni ko ha kuonga fakatuʻutāmaki ʻeni, ʻoku fakaʻilongaʻi ʻaki ʻa e faingataʻá, faiangahalá, mo e fakaʻauhá. Ka ʻi he taimi naʻe fakamatalaʻi ai ʻe he Fakamoʻuí hotau kuongá ki Heʻene kau ākongá ʻi he ofi ki he ngataʻanga ʻo ʻEne moʻui fakamatelié, naʻá Ne ʻomi ha ʻamanaki lelei kiate kitautolu. Neongo naʻá Ne fakahā ʻa e fakapoʻuli ʻe tuʻunuku maí, ka naʻá Ne talaʻofa ʻe hanga ʻe Heʻene māmá ʻo “ʻufiʻufi ʻa e fonuá kotoa” ʻi Heʻene liuaki maí (vakai, Siosefa Sāmita—Mātiu 1:22–26; vakai foki, Tokāteline mo e Ngaahi Fuakava 45:34–38).

Te ke tokoniʻi fēfē nai ʻa e toʻu tupú ke mahino lelei ange kiate kinautolu ʻa e ngaahi tāpuaki mo e faingamālie ʻo e moʻui ʻi he ngaahi ʻaho kimui ní? Ko e hā te ke lava ʻo fakahoko ke ueʻi kinautolu ke takitaha teuteuʻi kinautolu mo e māmaní ki he Hāʻele ʻAnga Ua Mai ʻa e Fakamoʻuí? Makehe mei hono ako e ngaahi potufolofola ʻo e uike ní, fakakaukau ke toe vakaiʻi ha ngaahi maʻuʻanga tokoni ʻe niʻihi ʻoku lisi ʻi he “Hāʻele ʻAnga Ua Mai ʻa Sīsū Kalaisí” ʻi he Ngaahi Tefito ʻo e Ongoongoleleí (topics.ChurchofJesusChrist.org).

Ako Fakataha

Ke tokoni ke toe vakaiʻi ʻe he toʻu tupú e meʻa ne nau lau ʻi he folofolá he uike ní, te ke lava ʻo hiki e ngaahi ʻuluʻi tohi ko ʻení ʻi he palakipoé: Ngaahi Kikite Ngali Fakamamahí mo e Ngaahi Fanongonongo Nāunauʻiá (vakai, Russell M. Nelson, “Tali Lelei ʻa e Kahaʻú ʻi he Tui,” Liahona, Nōvema 2020, 73–76). ʻE lava leva ke toe vakaiʻi ʻe he tokotaha kotoa ʻa e Siosefa Sāmita—Mātiu 1:22–37 pea hiki e ngaahi meʻa “fakamamahi” mo e “nāunauʻia” ʻe hoko kimuʻa pea liuaki mai ʻa e Fakamoʻuí. Ko e hā ʻoku mahuʻinga ai ke tau ʻiloʻi e ngaahi meʻa ʻe hoko ko ʻení? Ke tokoni ke ako lahi ange e toʻu tupú ki he founga ke teuteu ai ki he hāʻele mai ʻa e Fakamoʻuí, fakakaukau ki he ngaahi ʻekitivitī ko ʻení pe ko haʻo ʻekitivitī pē ʻaʻau.

• ʻE lava ke tokoni e ngaahi potufolofola ʻi he “Ngaahi Maʻuʻanga Tokoni Poupoú” ke mahino ki he toʻu tupú ʻa e founga ʻoku teuteuʻi ai ʻe he Tamai Hēvaní ʻa e hala ki he Hāʻele ʻAnga Ua Mai ʻa Hono ʻAló. ʻE lava ke ke hiki ʻi he palakipoé ʻa e ngaahi meʻa naʻe hoko ʻoku fakamatalaʻi ʻi he folofolá pea kole ki he tokotaha takitaha ke ne lau ha taha ʻo e ngaahi potufolofolá. ʻE lava ke fakatauhoa ʻe he tokotaha takitaha ʻenau potufolofolá ki ha meʻa ʻi he palakipoé pea aleaʻi ʻa e potufolofolá mo e kalasí. Ko e hā ʻoku fokotuʻu mai ʻe he ngaahi meʻa ko ʻení fekauʻaki mo hotau fatongia ʻi heʻetau teuteu ki he Hāʻele ʻAnga Ua Mai ʻa e Fakamoʻuí? Ko e hā ʻoku ueʻi kitautolu ke tau fai fakakalasi pe fakakōlomu?

• Naʻe akonaki ʻa Palesiteni Lāsolo M. Nalesoni: “ ʻE founga fēfē haʻatau fehangahangai mo e ngaahi kikite ngali fakamamahi mo e ngaahi fanongonongo nāunauʻia fekauʻaki mo hotau kuongá? Naʻe fakahā mai ʻe he ʻEikí ʻi ha founga faingofua, kae fakaofo, mo pau: ʻKapau te mou mateuteu, ʻe ʻikai te mou manavahēʻ [Tokāteline mo e Ngaahi Fuakava 38:30]“ (”Tali Lelei ʻa e Kahaʻú ʻi he Tui,“ 74). Ke tokoni ke mateuteu ange e toʻu tupú ki he liuaki mai ʻa e Fakamoʻuí, ʻe lava ke ke kole ange ke nau takitaha lau ha taha ʻo e tefitoʻi moʻoni ʻe tolu ʻo e teuteú naʻe vahevahe ʻe Palesiteni Nalesoni ʻi heʻene pōpoakí. Fakaafeʻi kinautolu ke vahevahe ʻa e meʻa ʻoku nau akó. Ko e hā ʻoku ueʻi kitautolu ke fakahoko ke ngāueʻi ai e faleʻi ʻa Palesiteni Nalesoní?

• Naʻe fakamatalaʻi ʻe ʻEletā D. Toti Kulisitofasoni ʻi he kamataʻanga ʻo ʻene pōpoakí ko e “Teuteu ki he Toe Hāʻele Mai ʻa e ʻEikí,” ʻa e tuʻunga ʻe ʻi ai ʻa e māmaní hili ʻa e Hāʻele ʻAnga Ua Mai ʻa Sīsū Kalaisí (Liahona, Mē 2019, 81–84). Fakaafeʻi e toʻu tupú ke nau toe vakaiʻi ʻene fakamatalá pea fakafehoanaki ia mo e tuʻunga ʻoku ʻi ai e māmaní he taimi ní. ʻE lava ke nau aleaʻi e meʻa te tau lava ʻo fai he taimí ni ke mateuteu ai ke moʻui ʻi he faʻahinga māmani naʻe fakamatalaʻi ʻe ʻEletā Kulisitofasoní. (ʻE ala tokoni e palakalafi ʻe fā ʻo ʻene pōpoakí ʻa ia ʻoku kamata ʻaki ʻa e “ʻUluakí, pea ʻoku mahuʻinga ki he toe hāʻele mai ʻa e ʻEikí.” ʻOku tokoni fēfē e Siasi ʻo e Fakamoʻuí ke teuteuʻi kitautolu ki Heʻene Hāʻele ʻAnga Ua Maí? Naʻe hiki ʻe ʻEletā Kulisitofasoni ha founga ʻe tolu ʻoku “fakaivia mo fakamafaiʻi makehe ai e Siasí ke fakakakato ai e ngaahi teuteu ʻoku fie maʻu ki he Hāʻele ʻAnga Ua Mai ʻa e ʻEikí.” ʻE lava ke kumi mo aleaʻi ʻe he kau mēmipa ʻo e kalasí ʻa e ngaahi meʻá ni.

finemui ʻoku fai ʻene ako

Kapau ʻoku tau mateuteu, ʻoku ʻikai fie maʻu ke tau manavahē ki he ngaahi meʻa ʻe hoko ʻo aʻu ki he Hāʻele ʻAnga Ua Mai ʻa e Fakamoʻuí.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Tokāteline mo e Ngaahi Fuakava 65:1–2 (Ko hono fakafoki mai ʻo e ongoongoleleí)

• Tokāteline mo e Ngaahi Fuakava 20:8–12 (Ko hono ʻomi ʻo e Tohi ʻa Molomoná)

• Malakai 4:5–6; Tokāteline mo e Ngaahi Fuakava 110:13–16 (Ko hono fakafoki mai e ngaahi kī ʻo e lakanga fakataulaʻeikí)

• 3 Nīfai 21:1, 8 (Ko hono tānaki fakataha ʻo ʻIsilelí)

• Siosefa Sāmita—Mātiu 1:28–30 (Taú, moveuveú mo e angahalá)

• Siosefa Sāmita—Mātiu 1:31 (Malangaʻi ʻo e ongoongoleleí ki he māmaní)

• Gary E. Stevenson, “Tokonaki ha Fakavaʻe Lelei ki he Kuonga ʻe Hoko Maí,” Liahona, Mē 2020, 48–52

Ko e Faiako ʻi he Founga ʻa e Fakamoʻuí

Akoʻi ki he kau akó ʻe hanga ʻe he Laumālié ʻi he taimi ʻe niʻihi lolotonga ha fealēleaʻaki fakakalasí, ʻo akoʻi kiate kinautolu ha ngaahi meʻa ʻoku ʻikai lea ʻaki.