Imwiin Manga Utina, te Tia Kamaiu e barongaa Ana Ekaretia rinanoia Ana Abotoro, n raonaki ma Betero.

Turai 9

E kanga Iesu Kristo ni Kaira Ana Ekaretia?

Makuri 1– 5

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man titiraki aika inano ke aika bon am kario (tara Aeniboki ni Kabuta,, 10.2, 11.2). Babaire ao mwakuria te bwai ae maroroakinaki.

• Maiuakina te euangkerio. Tera atuun reirei ae e a tia ni maroroakinna te bitiobiriki ni bootakin kauntira ni kairake n te uoote? Tera ae ti kona ni karaoia n te kiraati ke n te kooram ae boboto iaon marooro aikanne?

• Tararuakiia naake iai kainnanoia. Ti na kanga ni karoko nakoia aomata n ana kawai Kristo ngkana ti noora kainnanoana ao n aki ata te bwai ae ko na taekinna?

• Kaoia ni kabane bwa ana karekea te euangkerio. Tera ae ti kunea n ana euangkerio Iesu Kristo ae uota te kimwareirei nakoira? Ko na kanga n tibwaua te kimwareirei anne ma tabeman?

• Katiteuanakiia utu ibukin te maiu ae akea tokina. Tera ae ti karaoia ni kakaei araia ara bakatibu aika a kainnanoi otenanti n te tembora? Tera ae ti kona ni karaoia ni buokiia tabeman ni kakaei araia aia bakatibu?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Bon te bwai teuana ataakin te Ekaretia bwa e raoiroi, ao bwa te Ekaretia anne e reiakinii moan tuua aika koaua, ke te Ekaretia anne e buokiko n riki bwa te aomata ae tamaroa. Bon te bwai naba teuana ataakina bwa te Ekaretia aio ni boong aikai bon ngaia raoi are ana Ekaretia Iesu Kristo, are e kateaki man kairaki raoi Irouna rinanon te burabeti ae maiu. Te boki ae Makuri e anganiira kakoauaan raoi bain te Tia Kamaiu inanon waakinan Ana Ekaretia. Ngkai ko kamatebwaia mwakoro 1-5, taratarai bwaai ni kakoaua aikanne, iangoia raoi bwa ko kanga n ataia ae E teimatoa ni kaira ana Ekaretia naba ni boong aikai. E kanga n tia te koaua aio ni kakabwaiako?

Iai aia koaua kairake ake ko reireiniia ae te Ekaretia are a kainna e bon kairaki iroun te Tia Kamaiu? E na kanga te aeka n kakoaua anne ni kakabwaiaia? Ko na kanga ni buokiia ni karekea ke ni kakorakorai aia koaua? N raonaki ma kamatebwaian Makuri 1-5, ko kona naba ni wareka ana rongorongo Unimwaane Quentin L. Cook “Te Kakabwaia n Teimatoan te Kaotioti Nakoia Burabeti ao Ara Kaotioti ni Kairi Maiura” (Riaona, Meei 2020, 96-100).

Te Uaia n Reirei

Ni waakinan te marooro, ko kona ni koreia iaon te burakibooti Iesu Kristo e kaira Ana Ekaretia rinanon te kaotioti nakoia Ana Abotoro. Membwa n te kiraati ke te kooram a kona n tibwauai bwaai ake a kunei n aia kamatebwai iaon Makuri 1-5 ae boutokaa te rongorongo aio. (Ngkana e riai, ko kona ni kairiia nakon Makuri 1:1-8; 2:36-39; 4:1-13, 31-33.) Tera te bwai ni kakoaua ae ti nooria bwa e teimatoa Iesu Kristo n kaira Ana Ekaretia n arona are ngkoa ma boong naba aikai? Waaki ni kakukurei n aron aikai a kona ni buokiia ake ko reireiniia bwa a na kakorakorai aia onimaki iaon te koaua ae kakawaki aio.

• Ko kona n katauraoi tabeua titiraki n aron aikai: E kanga Iesu Kristo ni Kaira Ana Ekaretia? Ti na kanga ni karikirakea ana onimaki iaon ae Iesu Kristo e kaira Ana Ekaretia? E aera kai ti onimakiniia ana burabeti ao abotoro te Uea? Anganiia kaain te kiraati ke kooram n tatabemaniia teuana mai ibuakon titiraki aikanne, ao kaoia bwa a na iangoa raoi te titiraki ao n iangoi kiibu man koroboki aika a tabu ae a na kona ni buoka kaekaana (ngkana e kainnanoaki, tara “Reitan Bwaai ni Mwakuri” ibukin iango tabeua). Ao anganiia aia tai ni kabane bwa a na tibwauai man marooroakinii bwaai ake a reiakinna.

• Ni buokiia kaain te kiraati ke kooram n noora aron te Uea n kaira Ana Ekaretia, kaoia bwa a na rinanon moan mwakoron ana rongorongo Unimwaane Quentin L. Cook “Te Kakabwaia n Teimatoan te Kaotioti Nakoia Burabeti ao Ara Kaotioti ni Kairi Maiura.” A kona kain te kiraati ke kooram n tibwauai bwaai tabeua man te rongorongo anne ae buokiia n ataia bwa Iesu Kristo e kakaonimaki man ira raoi buakon kairan Ana Ekaretia. Tera riki atatai n noori koauan bwaai aika raba aika ti kona n karekei ni kiibu man koroboki aika a tabu ake iaan “Reitan Bwaai ni Mwakuri?

• E kona n rangi n ibuobuoki nakoia kairake bwa ana reiakina riki aron te Uea ni kaira am uoote. Ko kona n butiia kairake bwa a na tibwauai katooto iaon aron te Uea n kairiia taan kairiiri n te uoote, n ikotaki ma te beretitenti n te kiraati ke kooram. Inanon te wiiki imwain te kiraaki, butiia tabeman taan kairiiri n te uoote bwa ana tibwauai—n rabwataia ke rinanon bwaai n reitaki—aia taneiai are e kaota kairakiia iroun te Uea. Membwa n te kiraati ke kooram a kona n karekei katooto riki man ana rongorongo Beretitenti Henry B. Eyring “Te Uea E Kaira Ana Ekaretia” (Riaona, Nobembwa. 2017, 81–84). Bukin tera ngkai e kakaawaki bwa e na iai am onimaki bwa te Uea e kairiia taan kairiiri n te uoote?

• Tabeman aomata a namakinna bwa ngkana aomata ngaira aika ti raoiroi ao ni karaoi bwaai aika raoiroi, ti aki kainnanoa te ekaretia. Ko kona n titirakiniia kairake bwa e na tera aia kaeka nakon te aekaki aio. N ana rongorongo “Te Uea E Kaira Ana Ekaretia” (Riaona, Nobembwa. 2021, 24–26), Beretitenti Dallin H. Oaks e anga tabeua bukina ngkai ekaretia, n ikotaki ma ana Ekaretia te Uea are e a tia n kaokaki, a kakawaki. Kairake a kona n ikatoatoa n rinanon te rongorongo aio, ke n kurubu aika uarereke, ke n bon te kiraati ke kooram ao n tibwauai bwaai ake a kunei.

Te Uea e kaira Ana Ekaretia rinanon te kaotioti, n ikotaki naba ma beretitentii n te kiraati ao kooram.

Karaoia inanon te Onimaki

Kaungaia kaain te kiraati ke membwa n te kooram bwa a na iangoi man korei baike a na karaoi ni mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakin are e na kakorakorai reitakiia ma Tamara are i Karawa ao Iesu Kristo.

Reitan Bwaai ni Mwakuri

• I-Ebeto 2:19–20; 4:11–15; Reirei ao Berita aika Tabu 1:38; 21:1–6; Taekan te Onimaki 1:5–6

Reirei n ana Kawai te Tia Kamaiu

Ni kaoan te Tamnei n am tai n angareirei, kaungaia tabeman bwa a na tibwauai oin aia kaotioti iaon koaua ake kam maroroakin.