Ana Mwakuri ni Kamaiu te Tia Kamaiu: Aan te Kiritian ni Koaua, iroun Kirk Richards

Ana Mwakuri ni Kamaiu te Tia Kamaiu: Aan te Kiritian ni Koaua, iroun Kirk Richards

Tuun 25

Tera Nanon Ana Mwakuri ni Kamaiu te Tia Kamaiu Irou?

Mataio 27; Mareko 15; Ruka 23; Ioane 19

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man titiraki aika inano ke aika bon am kario (tara Aeniboki ni Kabuta, 10.2, 11.2). Babaire ao mwakuria te bwai ae maroroakinaki.

• Maiuakina te euangkerio. Ti kanga n roko ni kaan riki nakon te Tia Kamaiu? Ti kanga ni kataia n riki n Arona?

• Tararuakiia naake iai kainnanoia. Antai ae a mena n ara iango? Ti na kanga ni buokiia aomata n tatabemaniia nako aikai?

• Kaoia ni kabane bwa ana karekea te euangkerio. Ti na kanga ni kaekai aia titiraki raoraora ibukin te Ekaretia n te kawai are e na kakorakorai aia onimaki iroun te Tia Kamaiu?

• Katiteuanakiia utu ibukin te maiu ae akea tokina. Tera tabeua kawai aika ti kona iai n reitaki ma kaain ara utu ake tabeman, n aroia tenaan tibu ao tenaan katin?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Unimwaane David A. Bednar e a tia n nonoria irouia tabeman Aika Itiaki n Boong aikai bwa “A tara n iai aia onimaki iroun te Tia Kamaiu, ma a aki kakoaua Ana kakabwaia are E berita iai ake a tauraoi ibukiia ke a kona ni kamwakuri inanon maiuia” (“If Ye Had Known Me,” Riaona, Nob. 2016, 104) . N taekana teuana, e ngae ngkana ti kakoaua bwa Iesu Kristo e korakai man mate ibukin ana bure te aonaaba, ti kona n manga bon titiraki ngkana E korakai ao ni mate ibukin aika oin raoi ara bure. Kam a tia n namakina anne? A na kanga aomata n am kiraati ke kooram ni buokaki man ootaia bwa ana Mwakuri ni kamaiu te Tia Kamaiu e mwakuri raoi nakoia? Ko na kanga ni buokiia?

Iangoi titiraki aikai ngkai ko wareka taekan Taurakin te Tia Kamaiu n te wiiki aio. Ngkai ko katauraoi n angareirei iaon nanon raoi ana Mwakuri ni kamaiu Kristo, ko kona ni kamatebwaia ana rongorongo Beretitenti Dallin H. Oaks “Tera ae Tia n Karaoia te Tia Kamaiu Ibukira?” (Riaona,Meei 2021, 75–77).

Te Uaia n Reirei

Kaoia kain te kiraaki ke te kooram bwa a na tibauaa te bwai ae a reiakinna iaon Taurakin te Tia Kamaiu n te wiiki ae nako n te Nu Tetemanti ao aia namakin ibukin te Tia Kamaiu. Ibukin buokaia bwa ana karaoia, ko kona n titirakiniia bwa “Tera ae ti reiakinna ibukin Iesu Kristo man bwaai ake E taekinii n Ana kabanea n aua n maiu?” Te katooto teuana, ko kona n ukorii taai ake te Tia Kamaiu, ngke e maraki ibukira ni bane, e bon taraia naba ake Irarikina ma te nanoanga (tara, ibukin te katooto, Ruka 23:34, 39-43; Ioane 19:25-27). Aio e kona ni kairiira nakon te maroro iaon aron ana Mwakuri ni kamaiu Iesu Kristo n roota te aonaaba n kabuta ao ai bon ngkoe. Waaki ni kakukurei n aron aikai a kona ni ibuobuoki n taian marooro iaon ana Mwakuri ni kamaiu te Tia Kamaiu.

• N te moan barakirabu n ana rongorongo “Tera ae Tia n Karaoia te Tia Kamaiu Ibukira?,” Beretitenti Dallin H. Oaks e kabwarabwara ana marooro ma te aine ae e tuai kakoauaa ae Iesu Kristo e a tia n karaoi bwaai ibukina. A kona kaain te kiraati ke te kooram ni wareka te barakirabu anne, ao ni katamneia bwa ai ngaiia ngkanne Beretitenti Oak. Tera ae ti na taekinna nakon te aine aio? Ko kona n anganiia n tatabemania nako kaain te kiraati ke membwa n te kooram teuana mai ibuakon mwakoro ake a nambwanaki n ana rongorongo Beretitenti Oaks. N kabonganaan bwaai ake a reiakinii, n raonaki ma oin nako aia taneiai, a kona n tibwauai oin aia kaeka nakon te titiraki ae “Tera ae e a tia ni karaoia Iesu Kristo ibukiu?”

• Ibukin waakinan te marooro iaon korakoran ana Mwakuri ni kamaiu te Tia Kamaiu nakoira, korea te mwakoro n taeka n aron aio n te burakibooti Bukina bwa e maraki man mate Iesu Kristo ibukiia aomata n bane … . A kona kaain te kiraati ke te kooram ni kakaei anga ni kabwanina te kibuntaeka anne. Ngkane ko kona ni manga bita te mwakoro n taeka bwa e na kangai Bukina bwa Iesu Kristo e maraki ao ni mate ibukiu… ao kaoia naba bwa a na anga naba aia iango. Ngkana a marooro kaain te kiraati ke membwa n te kooram iaon rongorongo aikai, kaungaia bwa ana wareki kiibu n koroboki aika a tabu ake n “Reitan Bwaai ni Mwakuri.” A kanga koroboki aika tabu n reireiniira taekan ana kairoro ana Mwakuri ni kamaiu te Tia Kamaiu inanon maiura n tatabemaniira?

• Te anga teuana ni kamatebwai koroboki aika a tabu n “Reitan Bwaai ni Mwakuri” bon kaoaia kairake bwa ana bitii taekan kiibu aikane bwa e aonga ni kaineti raoi nakoia. E kanga karaoan aio n roota ara namakin ibukin koaua aika ni kiibu aikai? Ti na kanga ni kaota ara kakaitau ibukin ana anga karea te Tia Kamaiu ibukira?

• Kuuna aika tabu a kakorakora kakoauaan Iesu Kristo. Iangoia ni kaoia membwa n te kiraati ao kooram bwa a na roko n tauraoi n tibwauai anene n taromauri are e buokiia n namakina korakoran ana Mwakuri ni kamaiu te TIa Kamaiu inanon maiuia. (A kona n taratarai anene n toa ke te rongorongo “Iesu Kristo-Te Tia Kamaiu” n ana intekiti atuun bwaai n te Anene n taromauri.) Kaoia membwa n te kiraati ao kooram bwa a katebenakoi mwakoro n taeka n anene n taromauri ake a buokiia n namakinna ana tangira te Tia Kamaiu ibukiia. Ko kona ni marooro iaon rootakin maiura n te bong koraki n ana karea te Tia Kamaiu. Te katooto, e kanga n rooti ara rinerine ake ti karaoi?

Kristo i Ketetemwane

Kristo i Ketetemwane, iroun Dan Burr

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi ni mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakin are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• 1 I-Korinto 15:20–22; 2 I-Korinto 12:7–9; Aramwa 7:11–12; 3 Nibwaai 11:10–11

• Tad R. Callister, “Ana Mwakuri ni Kamaiu Iesu Kristo,” Riaona, Meei 2019, 85–87

Reirei n ana Kawai te Tia Kamaiu

Kaotan ana tangira Kristo ni koaua e korakora mwaakana ni kamarauii nanoia kaain te kiraati ake iai aia kangaanga ma te euangkerio. Angiia te koraki aikanne a kainnanoia n ataia bwa a bon kainnanoaki man tangiraki.