te tina ma nati aine a kuuka

Okitobwa 8

E na kanga Ana Euangkerio Iesu Kristo ni Buokai ni Kakorakora au Utu?

I-Ebeto

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne, irarikin are kam na marooro imarenami iaon te kainnano ae e onoti n te kiraati ke te kooram, ko na tangiria ni maroroakin bwaai ake a taekinaki ao botoniango man te maungatabu ni kabuta. Titiraki aika imwina a kona n ibuobuoki.

• Tera botoniango ke rongorongo aika a kakaawaki nakoira? Tera ae kakorakora ara onimaki iroun Iesu Kristo?

• Tera ae kakorakora ara koaua irouia burabeti aika maiu? Tera ae ti namakinna bwa ti na riai ni karaoia ibukin te bwai ae ti reiakinna ke n namakinna?

• Tera ae ti kainnanoia ni karaoia n te kiraati ke n te kooram n uring ao ni karaoi nanon reirei ake ti ongo n te maungatabu ni kabuta?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Tabeman aomata n am kiraati a bae n iai aia utu ae korakora man tatangira n karikirakeia n te onimaki ao te maiu n tamnei. Tabeman a bae ni maroa n aia kekeiaki ni maiuakina te euangkerio, ao tabeman a kaitara ma te itabaraaraa ao te uruaki n nano n mwengaia. Ma akea n am kiraati ke kooram ae nakoraoi ana utu, ao ma akea aia kangaanga. Ao ni kabane a kona n karekea mwaakan Iesu Kristo, are e na kamarurungiia ao ni kakorakoraia utu.

Te Tia Kamaiu e tangiria ni kakabwaiaia utu. Tabetai ao te kawai are E karaoia aio bon rinanon te tangira ao ana katooto temanna ae ataei ae kekeiaki n Iriria ao ni maiuakina Ana euangkerio. Ngkai ko katauraoi n reireiniia kairake iaon te mwaaka are e tauraoi nakoia ao aia utu rinanon Iesu Kristo, iangoi moan tua ake n I-Ebeto are a kona n buokira n kakorakorai reitakira n te utu. Ko kona naba n kamatebwaia “Te Utu: Te Katanoata nakon te Aonaaba” (ChurchofJesusChrist.org).

Te Uaia n Reirei

Imwiin anganakiia kaain te kiraati ke te kooram aia tai n tibauaa te bwai are e reiakiniia te Tamnei n te wiiki are a kamatebwaia iai I-Ebeto, kakaei aanga ni karinna ibuakon te reirei aron Iesu Kristo ni kona ni bouka kakorakorakiia ara utu. N arona teuana, ko kona ni kaoia kairake bwa a na kakaei man tibwauai ikota ni kibuntaeka ake n I-Ebeto are a taekin moan tua ake ti kona ni kabonganai ni kakorakora reitakira n ara utu. Tabeua katooto a kona n reke n I-Ebeto 2:19-22; 3:14-19; 4:1-3, 25-26, 29-32; 5:1-2; 6:1-4. A na kanga taeka n ibuobuoki ni kiibu aikai ni kakabwaiaa te utu? E kanga n tia n riki te Tia Kamaiu ao Ana Euangkerio bwa te kakabwaia ni mwengara? Aikai tabeua riki iango iaon waaki ni kakukurei aika a irekereke ma atuun te reirei aio.

• Ngkana ko tangiria n marooroakina te tua are “karinea tamam ma tinam” (I-Ebeto 6:2), ko kona ni moanna man titirakinakia kaain te kiraati ke kooram bwa tera nanon te taeka ae karinea nakoia. Tao e kona temanna n tibauaa nanon te taeka anne man te rikitionari ke man te Kairi nakon Koroboki aika a tabu (scriptures.ChurchofJesusChrist.org). Kaoia kairake bwa a na taetae iaon aroia ni kamwakura te tua aio inanon maiuia. E kona naba ni kaunganano ukoran raoi aron Iesu Kristo n karinea Tamana are i Karawa ao Tinana, Maria (tara, te katooto, Ruka 2:41-52; Ana Rairairi Iotebwa Timiti, Ioane 2:4 [n Ioane 2:4, bwaai aikana taraki inanoa]; Ioane 8:29; 19:25-27). Tera ae ti kona n reiakinna man ana katooto Iesu are e kona ni kakorakora ara reitaki ma ara karo?

• E na rangi n ibuobuoki ngkana e marooroakinaki bwa tera bwaai aika kainnanoaki ibukin katean te auti ae matoatoa. Tera tabeua bwaai aika kainnanoaki ibukin katean te utu ae korakora? N mwakoron am kabwarabwara, ko kona n tibauaa te rongorongo aio mai iroun Unimwaane L. Whitney Clayton: “Ae kakawaki riki bon aron tein maiuia kaain te mweenga, tiaki aron tein aia auti” (“Mweenga aika Tamaroa.” Riaona, Meei 2020, 107-9). Ko kona naba ni marooro iaon ana iango n ibuobuoki Unimwaane Clayton ake aua inanon ana rongorongo iaon katean “mweenga aika tamaroa.”

• “Te Utu: Katanoata nakon te Aonaaba” e airi ma te berita aio: “Te Kukurei n te maiu n utu e na kona n reke ngkana e aanaki n ana reirei te Uea Iesu Kristo.” E kanga ana reirei te Tia Kamaiu n katea aan te utu ae kukurei? Te katanoata nakoia utu ao koroboki aika a tabu iaan “Reitan Bwaai ni Mwakuri” a anga katooto. A na kanga kaain te utu ni ibuobuoki imarenaia ni maiuakini reirei aikai?

• Tao a kona kaain te kiraati ni mataku n te witeo “Through Small Things,” are a marooro iai taari aika teniman iaon butimwaean ana kakao te bitiobi n iangoan kawai are a na kona n karika mweengaia bwa te tabo ae tabu. E kanga te utu n te witeo anne ni kakabwaiaaki man aia waaki kairake aikane? Ti na kanga ni karaoa mwengara bwa te tabo ae tabu? Iangoia ni kaoia kairake ni butimwaea te kakao naba anne are e kanakoa te bitiobi. Ibukin buokaia bwa a na iangoi bwaai aika kona ni karaoi, marooro iaon te titiraki are n te witeo: “Tera ae ko tauraoi n karaoia ni kaoa te Tamnei nako nanon mweengam?”

te utu a ikotaki ni kamatebwai

Ana reirei Iesu Kristo bon aan te kukurei in te maiu n utu.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi ni mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakin are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Mataio 5:21–24, 38–42; 6:14; 7:1–5; 22:36–39; 3 Nibwaai 18:21; Moronaai 7:33; Reirei ao Berita aika Tabu 18:10–13

• Henry B. Eyring, “Te Mweenga Are Maeka iai Tamnein te Atua,” Riaona, Meei 2019, 22–25

• “E Raoiroi te Aonaaba,” “Home Can Be a Heaven on Earth,” Anene n taromauri, nambwa. 294, 298

Reirei n ana Kawai te Tia Kamaiu

Ngkana ataia kairake ae ko onimakiniia, aia koaua n aia konabwai ae mairoun te Atua e na rikirake, ao a na kakubako ma te bwai are a konaa ni katia. Buokiia bwa a na kona n noora ana kaantaninga Tamaia are i Karawa ibukiia.