Enero 29–Pebrero 4: “Ako Moandam og Agianan alang Kaninyo”

1 Nephi 16–22

Samtang ang pamilya ni Lehi mipanaw padulong sa gisaad nga yuta, ang Ginoo mihimo kanila niini nga saad: “Ako moandam og agianan alang kaninyo, kon kini mao nga kamo mohupot sa akong mga sugo” (1 Nephi 17:13). Dayag kaayo, kana nga saad wala magpasabot nga ang panaw mahimong sayon—ang mga sakop sa pamilya nagkasumpaki gihapon, mga pana nabali, ug ang mga tawo nakigbisog ug nangamatay, ug sila nagkinahanglan gihapon nga mobuhat og barko gikan sa mga materyal nga wala pa mahimo. Hinoon, sa dihang ang pamilya nagsagubang og kalisod o ingon og imposible nga mga buluhaton, si Nephi nahibalo nga ang Ginoo wala gayod magpalayo. Nasayod siya nga ang Dios “moamuma [sa matinud-anon], ug molig-on kanila, ug mohatag og mga paagi diin sila makatuman sa butang diin siya misugo kanila” (1 Nephi 17:3). Kon kamo natingala kon nganong ang dili maayo nga mga butang mahitabo ngadto sa buotan nga mga tawo sama ni Nephi ug sa iyang pamilya, kamo makakaplag og mga panabot dinhi niini nga mga kapitulo. Apan tingali mas importante, nga inyong makita unsa ang gibuhat sa maayo nga mga tawo kon mahitabo ang dili maayo nga mga butang.

Mga Ideya alang sa Pagkat-on diha sa Panimalay ug sa Simbahan

1 Nephi 16–18

Ang Manluluwas motabang kanako sa pag-atubang sa mga hagit sa kinabuhi.

Ang pamilya ni Nephi miatubang og malisod nga mga hagit—sama kanatong tanan. Unsa ang inyong nakat-onan gikan ni Nephi mahitungod sa pag-atubang og kalisdanan uban sa hugot nga pagtuo diha ni Jesukristo? Basaha ang mahitungod sa iyang mga kasinatian sa 1 Nephi 16:17–32; 16:34–39; 17:7–16; 18:1–4; ug 18:9–22. Ikonsiderar ang pagrekord kon unsa ang inyong nakit-an ubos sa mga ulohan nga sama niini: “Hagit,” “Giunsa ni Nephi sa Pagtubag,” ug “Sa Unsang Paagi ang Ginoo Mitabang.” Unsa ang inyong nakat-onan nga mahimo ninyong gamiton sa mga hagit nga inyong giatubang?

Human sa pagkat-on gikan ni Nephi ug sa iyang pamilya, mahimo ninyong irekord ang dugang nga mga hunahuna ubos niining mga ulohan: “Akong mga Hagit,” “Unsaon Nako Pagtubag,” ug “Sa Unsang Paagi ang Ginoo Makatabang Kanako.” Kon inyong buhaton, mahimo ninyong ipasabot ang mga kasulatan sama niini: Mateo 11:28–30; Juan 14:26–27; Mosiah 24:13–15. Usa ka himno sama sa “Ang Kalinaw Asa Ko Pangitaa?” (Mga Himno, nu. 75), makapalig-on sa inyong hugot nga pagtuo diha sa Manluluwas ug sa tabang nga Iyang gitanyag sa mga panahon sa pagsulay.

Tan-awa usab sa Anthony D. Perkins, “Hinumdomi ang Imong mga Santos nga Nag-antos, O Among dios,” Liahona, Nob. 2021, 103–5; “Gigiyahan sa Ginoo ang Panaw ni Lehi,” “Ang Ginoo Misugo ni Nephi sa Paghimo og Barko,” ug “Ang Pamilya ni Lehi Milawig ngadto sa Gisaad nga Yuta” (mga bidyo), Gospel Library; “Tabang sa Kinabuhi,” Gospel Library.

Gigiyahan sa Ginoo ang Panaw ni Lehi | 1 Nephi 16

Ang pamilya ni Lehi ug Ishmael padayon sa ilang panaw latas sa kamingawan ug gigiyahan sa Ginoo pinaagi sa pagtuo.

Ang Ginoo Misugo ni Nephi sa Paghimo og Barko | 1 Nephi 17–18

Gisunod ni Nephi ang sugo sa Ginoo sa paghimo og barko bisan sa pagpanglutos gikan sa iyang mga magulang nga igsoon.

Ang Pamilya ni Lehi Milawig ngadto sa Yutang Saad| 1 Nephi 18

Ang pamilya ni Lehi milawig ngadto sa gisaad nga yuta sakay sa barko nga gihimo ni Nephi ug sa iyang mga igsoon.

1 Nephi 16:10–16, 23–31; 18:11–22

Ang Dios migiya kanako pinaagi sa gamay ug yano nga mga pamaagi.

Sa dihang ang Dios migiya sa pamilya ni Lehi ngadto sa kamingawan, wala Siya mohatag nila og usa ka mapa nga nagpakita sa matag detalye sa panaw. Hinoon, Siya mihatag kanila sa Liahona aron sa paggiya kanila sa matag adlaw. Sa inyong pagbasa sa 1 Nephi 16:10–16, 23–31, ug 18:10–22, hunahunaa ang paghimo og lista sa mga kamatuoran nga naghulagway kon giunsa sa Dios paggiya ang Iyang mga anak (sama pananglitan, ang 1 Nephi 16:10 makatudlo nga ang Dios usahay naggiya kanato sa wala damha nga mga paagi). Unsa nga mga pagkasusama ang inyong nakita tali sa Liahona ug sa Espiritu Santo? Unsa nga “gagmay nga mga pamaagi” diin Siya nakapahinabo sa “mahinungdanong mga butang” sa inyong kinabuhi?

Tan-awa usab sa Alma 37:7, 38–47; Doktrina ug mga Pakigsaad 64:33–34.

If Ye Are Prepared Ye Shall Not Fear [Kon Kamo Andam Dili Kamo Mahadlok], ni Clark Kelley Price

1 Nephi 17:1–6, 17–22

Ang akong mga pagsulay mahimong usa ka panalangin.

Bisan og si Nephi ug ang iyang mga igsoong lalaki adunay samang mga hagit diha sa kamingawan, ang ilang mga kasinatian lahi kaayo. Mahimo ninyong itandi ang asoy ni Nephi sa pagpanaw sa kamingawan (tan-awa sa 1 Nephi 17:1–6) ngadto sa asoy sa iyang mga igsoong lalaki (tan-awa sa 1 Nephi 17:17–22). Unsa ang nahibaloan ni Nephi nga nakatabang kaniya sa pagbaton og matinud-anong panglantaw? Ikonsiderar ang pagsulat mahitungod sa bag-ohay o kasamtangan nga pagsulay gikan sa panglantaw sa hugot nga pagtuo ug pagpasalamat. Unsa ang inyong gibati o nakat-onan gikan niini?

Tan-awa usab sa Amy A. Wright, “Si Kristo Moayo Nianang Naguba,” Liahona, May 2022, 81–84.

Hilom nga panahon sa pagpamalandong. Ang paggahin og panahon sa paghunahuna, pagpamalandong, pag-aninaw, o pagsulat mosangpot ngadto sa pagdasig. Kini makatabang kanato sa pagtan-aw kon sa unsang paagi ang doktrina o mga baroganan sa ebanghelyo may kalabotan ngadto sa atong kinabuhi. Kon makatudlo ka sa uban, hatagi sila og panahon sa pagpamalandong ug pagsulat sa ilang mga pagbati. Kini makapadugang usab sa ilang kaandam sa pagpakigbahin sa ilang mga hunahuna ug mga pagbati ngadto sa uban.

1 Nephi 19:22–24; 20–22

Ako “mipahisama sa tanan nga mga kasulatan” sa akong kaugalingon.

Tungod kay ang mga kasulatan nahisulat sa dugay na kaayong panahon, kini ingon og wala kaayoy kalabotan kanato karon. Apan si Nephi mas nakahibalo. “Ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Kini mao ang usa ka rason nga si Nephi nakakaplag og hilabihan nga espirituhanong gahom diha sa mga kasulatan.

Hunahunaa kini nga mga pangutana sama sa mosunod samtang kamo mobasa diha sa 1 Nephi 20–22:

1 Nephi 20:1–9.Unsa ang gitudlo niini nga mga bersikulo mahitungod sa mga tawo sa panahon ni Isaias? Unsa ang inyong nakit-an nga magamit diha kaninyo?

1 Nephi 20:17–22.Unsa ang gitudlo niini nga mga bersikulo mahitungod kon sa unsang paagi ang Langitnong Amahan migiya sa mga tawo sa panahon ni Isaias? Sa unsang paagi Siya modapit kaninyo sa pagsunod Kaniya?

Unsa pa ang inyong nakit-an diha sa 1 Nephi 20–22 nga kamo “mopahisama” ngadto sa inyong kaugalingon?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

1 Nephi 16:10, 28–29; 18:8–13, 20–22

Kon akong matuman ang kasugoan, ang Ginoo mogiya kanako.

• Kon kamo adunay usa ka kompas, usa ka mapa, o laing butang nga makatabang kanato sa pagpangita sa atong dalan, inyo kining mapakita ngadto sa inyong mga anak. Kini mahimong usa ka maayo nga paagi sa pagsugod og panaghisgotan mahitungod sa Liahona, nga kamo makabasa mahitungod niini diha sa 1 Nephi 16:10, 28–29. Unsa ang pipila ka rason nga ang usa ka kompas o mapa lagmit dili magsilbi? Ngano man nga ang Liahona usahay dili molihok alang sa pamilya ni Lehi? (tan-awa sa 1 Nephi 18:9–12, 20–22). Unsa ang gihatag sa Langitnong Amahan kanato karon aron sa paggiya kanato balik ngadto Kaniya?

• Aron matabangan ang inyong mga anak nga makagamit sa unsay ilang nakat-onan mahitungod sa Liahona diha 1 Nephi 16:10, 26–31; 18:8–22, mahimo ninyong dapiton sila sa paghunahuna mahitungod sa usa ka importante o malisod nga desisyon. Unsa ang gihatag sa Dios kanato aron makagiya kanato karon nga molihok sama sa Liahona? (Tan-awa sa, pananglitan sa, Alma 37:38–44.) Ikonsiderar ang pagpakigbahin og usa ka personal nga kasinatian diin ang Langitnong Amahan migiya kaninyo.

1 Nephi 16:21–32

Ako mahimong maayo nga ehemplo ngadto sa akong pamilya.

• Samtang magbasa kamo og dungan sa 1 Nephi 16:21–32, tabangi ang inyong mga anak sa pagdiskobre kon sa unsang paagi ang ehemplo ni Nephi mipanalangin sa iyang pamilya (tan-awa usab ang bidyo nga “Gigiyahan sa Ginoo ang Panaw ni Lehi” [Gospel Library]). Kini makagiya ngadto sa usa ka panaghisgot mahitungod kon unsaon nga kita mahisama kang Nephi. Dapita ang inyong mga anak sa pagplano og usa ka butang nga ilang mabuhat aron mahimong usa ka maayo nga impluwensiya sa uban nga mga sakop sa pamilya.

  Gigiyahan sa Ginoo ang Panaw ni Lehi | 1 Nephi 16

  Ang pamilya ni Lehi ug Ishmael padayon sa ilang panaw latas sa kamingawan ug gigiyahan sa Ginoo pinaagi sa pagtuo.

1 Nephi 17:7–19; 18:1–4

Ang Langitnong Amahan makatabang nako sa pagbuhat og lisod nga mga butang.

• Ang mga bata ganahan moistorya og mga sugilanon. Mahimo ninyo silang dapiton sa pagtabang ninyo sa pagsulti sa sugilanon kabahin ni Nephi nga gisugo sa pagbuhat og usa ka barko (tan-awa sa 1 Nephi 17:7–19; 18:1–4; tan-awa usab sa “Kapitulo 7: Pagbuhat og Barko,” sa Mga Istorya sa Basahon ni Mormon, 21–22; o ang bidyo nga “Ang Ginoo Misugo ni Nephi sa Paghimo og Barko” [Gospel Library]). Sila mahimo mag-uban sa pagpanganta sa ikaduha nga bersikulo sa “Ang Kaisog ni Nephi” (Songbook sa mga Bata, 64–65). Unsa ang nakatabang ni Nephi nga makabaton og kaisog sa dihang gibugal-bugalan siya sa iyang mga igsoon tungod sa pagpaningkamot niya sa paghimo sa barko?

  Ang Ginoo Misugo ni Nephi sa Paghimo og Barko | 1 Nephi 17:7–10

  Ang Ginoo misugo ni Nephi sa paghimo og barko. Mitubag si Nephi pinaagi sa pagpangutana sa Ginoo kon asa mangita og oro aron makahimo og mga himan.

• Si Nephi wala makahibalo kon unsaon sa paghimo og usa ka barko, busa siya misalig sa instruksiyon gikan sa Ginoo. Human sa pagbasa 1 Nephi 18:1 uban kaninyo, ang inyong mga anak makakompleto sa pahina sa kalihokan niining semanaha. Samtang sila magbuhat, pakig-istoryahi sila mahitungod kon sa unsang paagi ang Langitnong Amahan makatabang kanato nga makahimo og malisod nga mga butang, sama lang nga Siya mitabang ni Nephi.

Alang sa dugang nga mga ideya, tan-awa ang isyu karong bulana sa Higala nga magasin.

They Did Treat Me with Much Harshness [Sila Mitratar Kanako uban sa Hilabihan nga Kabangis], ni Walter Rane