Kraist Ej Katakin Rikaļoor Ro An, jān Justin Kunz

M̧aaj 18–24: “Iaļ eo In”

2 Nipai 31–33

Ilubwilijin naan ko kar ļo̧o̧ki āliktata an Nipai, jej lo kean̄ in: “Irooj eaar jiron̄ eō, im ij aikuj pokake” (2 Nipai 33:15). En̄in ej juon kōmeļeļe em̧m̧an kōn mour eo an Nipai. Eaar kappukot ankilaan Irooj im kōn peran kajjieon̄ pokake—men̄e bwe meļeļe in likūt mour eo an ilo kauwōtata n̄an bōk piliej brass ko jān Laban, jōk juon wa n̄an kijoon lo̧jet eo, ak tiljek katakin katak eo an Kraist kōn alikkar im kajoor. Nipai emaron̄ kar kōnono ilo kareel kōn aikuj eo n̄an “bun̄ m̧aanļo̧k kōn dim ilo Kraist,” kōn ļoor “iaļ in erānin̄ im eaidik eo ej tōlļo̧k n̄an mour indeeo” (2 Nipai 31:20,18), kōnke ej iaļ eo eaar ļoore. Eaar jeļā jān en̄jake bwe iaļ eo in, men̄e epen ilo jet iien, ej barāinwōt kōlan̄lōn̄, im bwe “ejjeļo̧k bar juon iaļ ak āt letok ium̧win lan̄ bwe armej ren maron̄ mour ilo aelōn̄ in Anij” (2 Nipai 31:21).

Ļōmņak ko n̄an Ekkatak ilo M̧weeo im ilo Kabun̄ in

2 Nipai 31

Jisōs Kraist im katak eo An rej iaļ ko de eo n̄an mour indeeo.

Eļan̄n̄e kwoj aikuj in ba ilo tukadu in iaļ eo n̄an mour indeeo ilo jet wōt naan ko, ta eo kwonaaj kar ba? Keememej elmen an kar Nipai kōmeļeļeiki ilo 2 Nipai 31. Ļōmņak in jin̄aiki juon iaļ im je ilo iaļ eo jet pedped ko ak bun̄ten nee ko kwoj loi ilo jebta kein. Kwomaron̄ bar kobaiki ilo jin̄a eo am̧ kōmeļeļe eo am̧ make kōn ta eo Nipai ekar kwaļo̧ke kōn kajjojo pedped in katak.

Ilo am̧ riiti 2 Nipai 31:18–20, etale kijejeto ko am̧ make n̄an “bun̄ m̧aanļo̧k” ilo iaļen gospel in.

Bar lale “Press Forward, Saints,” Hymns, no. 81.

Ļoor katak ko an Jisōs Kraist ej tōlļo̧k kōj n̄an mour indeeo.

2 Nipai 31:4–13

Jisōs Kraist eaar kōm̧m̧ane juon waanjon̄ak eweppān ilo An pokake ke Eaar peptaij.

Men̄e peptaij eo am̧ ekkar bōk jikin inne ak 80 iiō remootļo̧k, ekar juon iien eaorōk. Kwaar deļo̧n̄e juon bujen indeeo n̄an ļoor Jisōs Kraist. Ļōmņak kōn peptaij eo am̧ ilo am̧ riit kōn peptaij eo an Rilo̧mo̧o̧r ilo 2 Nipai 31:4–13. Uwaaki kajjitōk kein emaron̄ jipan̄:

• Etke Kraist ekar peptaij? Etke iaar kāālet n̄an peptaij?

• Ta kallim̧ur ko iaar kōm̧m̧ane ke iaar peptaij? Ta eo Irooj ej kallim̧ur n̄an kōro̧o̧ltok? (lale eoon 12–13; bar lale Mosaia 18:10, 13).

• Elmen aō maron̄ kwaļo̧k ke ij wōnm̧aanļo̧k wōt ilo aō kallim̧ur n̄an ļoor Jisōs Kraist?

2 Nipai 31:15–20

“E eo ej niknik n̄an jem̧ļo̧kin, ejja in wōt naaj lo̧mo̧o̧ren.”

Ilo am̧ riiti 2 Nipai 31:15–20, kajjitōk ippam make, “Elmen aō jeļā ke ij niknik n̄an jem̧ļo̧kin?” Ta eo kwaar ekkatak jān Nipai me ejipan̄ eok uwaake kajjitōk in?

Elder Dale G. Renlund ekar kwaļo̧k: “Niknik n̄an jem̧ļo̧kin ejjab juon bun̄ten ne eoktak jen katak eo an Kraist—ilo ad kadedeļo̧k bun̄ten ko emān im pād bajjōk, n̄ii laļlaļ, im kōttar n̄an mej. Jaab, niknik n̄an jemļo̧kin ej lukkuun jerbal im jibadbad n̄an āliji bun̄ten nee ko” (“Lifelong Conversion” [Brigham Young University devotional, Sept. 14, 2021], 2, speeches.byu.edu). Elmen am̧ maron̄ āliji bun̄ten ko ilo katak eo an Kraist (tōmak, ukweļo̧k, peptaij, im bōk Jetōb Kwojarjar)?

2 Nipai 32; 33:2

Kōn naan ko an Kraist im Jetōb Kwojarjar, Anij enaaj kwaļo̧k n̄an eō ta n̄an kōm̧m̧ane.

Kwonan̄in ke kar en̄jake am̧ jab likkuun jeļā ta bun̄ten ne ko tokālik ilo mour eo am̧? Armej ro an Nipai raar bar ioon ņūrbōktak in (lale 2 Nipai 32:1). Lale uwaak eo an Nipai ilo 2 Nipai 32:2–9. Elmen am̧ naaj kōmeļeļeik ilo naan ko am̧ make ta eo Nipai ekar kwaļo̧k? Ta en̄jake ko kar katakin eok ke naan ko an Nipai rej m̧ool?

Ļōmņak in kōm̧m̧ane juon laajrak in ļōmņak ko ak jekjek ko (kiiō im jekļaj) me kwoj aikuji tōl eo an Anij. Ta eo kwomaron̄ ekkatak jān Nipai 32 me enaaj jipan̄ eok tōprak n̄an bōk im̧we jān E? Ta eo emaron̄ tōl armej ro n̄an “kapene būrueer ņae Jetōb Kwōjarjar”? (2 Nipai 33:2).

Ilo am̧ kōļmenļo̧kjeņ kōn kapilōk eo an Nipai, ļōmņak kōn kilen am̧ ekkatak naan ko an Rilo̧mo̧o̧r. Kwomaron̄ ke kōmeļeļeiki āinwōt kōm̧aulaļ, m̧ōn̄ā, ak kwojkwoj? Ta oktak eo, ilo am̧ ļōmņak? Ļōmņake elmen am̧ maron̄ kōm̧m̧an bwe en̄jake ko am̧ ippān naan ko an Kraist ren āinwōt juon kwojkwoj. Bōlen kwomaroņ bōk ļōmņak ko jān juon m̧ōttam̧ ak uwaan baam̧le eo.

Kwojkwoj ioon Naan ko an Kraist. Elōn̄ wāween ko n̄an kwojkwoj ioon naan ko an Kraist, ekoba jar kōn im̧we, kajjitōk kajjitōk ko m̧okta im ilo iien ekkatak, meļeļein naan ko, kōļmenļo̧kjeņ, kein ekkatak ko, jeje, pukot m̧ool ko an gospel in, im mour kōn jeje ko rekwojarjar ilo mour eo am̧ (lale 1 Nipai 19:23).

Elmen am̧ karuwaineneik Jetōb Kwojarjar bwe en m̧ōttam̧ ilo mour eo am̧, ijello̧kin bajjōk rilotok? Riiti kakkobaba ko jilu an David A. Bednar n̄an kōm̧m̧an bwe jemdo̧o̧n eo an Jetōb Kwojarjar en “ongoing reality” ilo “Receive the Holy Ghost” (Liahona, Nov. 2010, 94–97). Elmen am̧ mour kake kapilōk in?

Bar lale Gospel Topics, “Revelation,” Gospel Library; “Daily Bread: Pattern” (video), Gospel Library.

2 Nipai 33

Bok in Mormon ej kareel kōj aolep n̄an tōmak ilo Kraist.

Ilo 2 Nipai 33, āinwōt an Nipai kar kōjem̧ļo̧k jeje ko an, eaar kōmeļeļeik un ko etke eaar jeje ilo jino in tata. Ta un ko kwoj loi ilo jebta in? Kōļmenļo̧kjeņ kōn bwebwenato ko im katak ko kwaar riiti ilo 1 Nipai im 2 Nipai. Wōn iaer ekar im̧we eok im tōmak eo am̧ eļaptata ilo Kraist?

Bar lale “Nephi Records His Final Testimony” (video), Gospel Library.

N̄an ļōmņak ko reļļapļo̧k, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak n̄an Katakin Ajri ro

2 Nipai 31:4–13

N̄e ij peptaij, Ij ļoore Jisōs.

• Ewōr juon pijain Jisōs ke ekar peptaij ilo jem̧ļo̧kin laajrak in. Bōlen ajri ro nejum̧ remaron̄ kōjerbale n̄an kwaļo̧k n̄an kwe ta eo rejeļā kōn iien in (bar lale Matu 3:13–17). Etke Jisōs ekōņaan bwe jen peptaij āinwōt kar E? Ajri ro nejum̧ remaron̄ ron̄jake un ko ilo ami riit ippān doon jidikin 2 Nipai 31:4–13. Emaron̄ lukkuun jipan̄ n̄e juon ej kab m̧ōj aer peptaij remaron̄ kwaļo̧k en̄jake ko an.

2 Nipai 31

Jisōs Kraist eaar katakin eō kilen jepļaakļo̧k n̄an Jemedwōj Ilan̄.

• N̄an jipan̄ ajri ro nejum̧ pijaikļo̧k katak ko ilo 2 Nipai 31, remaron̄ pijaik juon iaļ ippānļo̧k juon pijain Kraist ilo jem̧ļo̧kinļo̧k. Kwomaron̄ jipan̄ er pukote ak jin̄aik pija ko me rej bōk jikin bun̄ten ko ilo iaļ eo, āinwōt tōmak ilo Kraist, ukweļo̧k, peptaij, menin letok eo an Jetōb Kwojarjar, im niknik n̄an jem̧ļo̧kin. Remaron̄ jitōn̄ļo̧k pija ko ilo ami riiti 2 Nipai 31:17–20 ippān doon.

2 Nipai 32:3–5

Elmen aō kwojkwoj ioon naan ko an Kraist.

• N̄an katakin kōn “kwojkwoj” ioon naan ko an Kraist, kwomaron̄ kajjitōk ippān ajri ro nejum̧ n̄an kōm̧m̧ane āinwōt rej m̧ōn̄ā m̧ōn̄ā eo enno kijeer. Ilo 2 Nipai 32:3, ta eo Nipai ekar ba jej aikuj kwojkwoj ioon? Elmen an kwojkwoj ioon naan ko an Anij oktak jān baj riit wōt? Bōlen emaron̄ oktak an ajri ro nejum̧ kōm̧m̧ane. Kwaļo̧k n̄an ajri ro kōjeraam̧m̧an ko kwoj būki ilo am̧ kwojkwoj ioon jeje ko rekwojarjar.

2 Nipai 32:8–9

Jemedwōj Ilan̄ ekōņaan bwe in jar aolep iien.

• Ālkin riiti 2 Nipai 32:8–9, kōnono n̄an ajri ro nejum̧ etke Setan ejjab kōņaan bwe jen jar. Etke Anij ekōņaan bwe jen “jar iien otemjej”? Ajri ro nejum̧ remaron̄ kōm̧m̧ane juon laajrak ak jin̄aik jekjek in aer jar. Innām kom̧ maron̄ al juon al me ej kwaļo̧k kōn jar, āinwōt “N̄e Kwoj Ruj Tok Jen Ion Kinem?” (Al, nō. 33). Kwomaron̄ bōk jikin jet iaan naan ko ilo al eo kōn naan ko jān laajrak ko aer. Elmen an Irooj kōjeraam̧m̧an kōj n̄e jej jar iien otemjej?

N̄an ļōmņak ko reļļapļo̧k, lale ennaan eo an allōn̄ ilo eo Jera māākjiin.

N̄an Kakūrm̧ool Aolep Jim̧we, jān Liz Lemon Swindle