Rijilōk ro etto raar peran ilo naan in kam̧ool ko aer kōn Jisōs Kraist im Jerkakpeje eo An (lale Jerbal 4:33). Milien armej rej tōmak ilo Jisōs Kraist im kajjieon̄ ļoor E kōn naan ko aer kar je ilo Baibōļ. Aaet jet armej remaron̄ ļōmņak, eļan̄n̄e Jisōs Kraist ej Rilo̧mo̧o̧r eo an aolepān laļ, innām etke eaar jet wōt An armej in rikam̧ool jān juon jikin edik?
Bok in Mormon ej jutak āinwōt juon dam̧oļo̧k, kwaļo̧k kam̧ool bwe Jisōs Kraist ej Rilo̧mo̧o̧r eo an laļ, “kwaļo̧k e n̄an laļ ko otemjeļo̧k” (taitōļ peij eo an Bok in Mormon) im leļo̧k lo̧mo̧o̧r n̄an aolep ro rej itok n̄an E. Ilo kakobaba, kam̧ool in kein karuo ej barāinwōt kalikkar ta meļeļe in lo̧mo̧o̧r. En̄in unin an Nipai, Jekab, Mormon, im aolep rikanaan ro kar kanooj “niknik jerbal n̄an m̧wijiti naan kein ioon pileij ko”—n̄an kean̄ n̄an epepen ko ilju jekļaj bwe ren barāinwōt “kar jeļā kōn Kraist, im … wōr am kōjatdikdik kōn aiboojoj eo An” (Jekab 4:3–4). Ilo tōren Ijtō in, kejekļo̧kjeņ kōn naan in kam̧ool ko ilo Bok in Mormon bwe kajoor eo an Rilo̧mo̧o̧r jim̧or aolepān laļ in im an juon make—lo̧mo̧o̧ren aolepān laļ in im lo̧mo̧o̧ren eok.
Ļōmņak ko n̄an Ekkatak ilo M̧weeo im ilo Kabun̄ in
Pija
Kōkkaļļe eo an jemenere
Kōnke Jisōs Kraist, Inaaj jerkakpeje.
Ej juon iminene ilo Ijtō n̄an kejekļo̧kjeņ kōn Jerkakpeje eo an Jisōs Kraist, bōtaab ta eo lukkuun meļeļein jerkakpeje? Ta meļeļe ko Bok in Mormon ej letok kōn jerkakpeje? Bōlen ilo iien Ijtō in kwomaron̄ kōlaajraki m̧ool ko kōn jerkakpeje me kwoj loi ilo 2 Nipai 9:6–15, 22; Alma 11:42–45; 40:21–25; 3 Nipai 26:4–5.
Kwomaron̄ bar je elmen an m̧ool kein kōn jerkakpeje im̧we kōm̧m̧an ko am̧ im wāween am̧ mour. N̄an waanjon̄ak, ļōmņake elmen am̧ maron̄ kadedeļo̧k jentōj kein: N̄e ijjab jeļā men kein … im Kōnke ijeļā men kein …
Juon al āinwōt “Ij Jeļā Bwe Aō Dri Pinmuur Ej Mour” (Al, no. 28) emaron̄ jipan̄ eok ļōmņak etke Jerkakpeje eo an Rilo̧mo̧o̧r eaorōk n̄an kwe. Ilo am̧ al, ron̄jake, ak riiti al eo, kwomaron̄ kajjitōk ippam̧ make, “Elmen an mour e aō oktak kōn wōt jerkakpeje eo an Jisōs Kraist?”
Gospel Library ewōr ie pija in Ijtō ko me remaron̄ in juon m̧ōttan eo eaorōk n̄an ekkatak eo am̧. Bōlen kwomaron̄ alooje juon ak elōn̄ iaan pija kein im kōļmenļo̧kjeņ ta eo rej kobaik n̄an jeļā eo am̧ ak kam̧m̧oolol kōn Jerkakpeje eo an Rilo̧mo̧o̧r.
Jisōs Kraist eaar bōk ioon Make jerawiwi ko aō, metak ko, im nan̄inmej ko.
Ealikkar an Baibōļ eo kwaļo̧k bwe Jisōs Kraist ekar en̄taan kōn jerawiwi ko ad. Bok in Mormon ej kedepakpakļo̧k ad meļeļe kōn en̄taan eo an Kraist im en̄taan eo ilo wāween ko raorōk. Kwomaron̄ lo jet iaan katak kein ilo Mosaia 3:7; 15:5–9; Alma 7:11–13. Ālkin am̧ riiti eoon kein, ļōmņak in rekoote ta eo kwoj loe ilo juon jaat āinwōt in:
Ta eo Rilo̧mo̧o̧r ekar en̄taan kake?
Etke Eaar en̄taan?
Ta meļeļe in menin n̄an n̄a?
En̄in bar juon wāween n̄an ekkatak naan kein: Pukot al ko me kwoj en̄jake remāāj n̄an ennaan ko kwoj katakin. Ilo “Jeje ko Rekwojarjar” index ilo jem̧ļo̧kin bok in al eo emaron̄ jipan̄. Ta naan ko jān al kein im eoon kein rejipan̄ eok kam̧m̧oolol eļap kōn en̄taan eo an Rilo̧mo̧o̧r?
Jisōs Kraist emaron̄ karreoik eō im jipan̄ kōweppān eō.
Emaron̄ in kar ba bwe Bok in Mormon ej juon bwebwenato in armej ro me raar oktak kōn wōt Pinmuur eo an Jisōs Kraist. Kwomaron̄ riiti jet iaan en̄jake kein ilo Mosai 5:1–2; 27:8–28; Alma 15:3–12; 24:7–19. Kwomaron̄ bar ļōmņak kōn bar jet waanjon̄ak ko n̄an ekkatak. Ta eo kwoj kile bwe kajjojo en̄jake kein ewōr juon men rej juon wōt ie? Ta oktak ko kwoj kūli? Ta eo bwebwenato kein rej katakin eok kōn elmen an Pinmuur eo an Rilo̧mo̧o̧r eo maron̄ ukōt eok?
Kwomaron̄ kōjerbal “Jebta 53: Jisōs Ej Debwāāl” im “Jebta 54: Jisōs Ej Jerkak” (ilo Bwebwenato ko jān Kallim̧ur Ekāāl, 136–38, 139–44) n̄an jiron̄ļo̧k ajri ro kōn Jerkakpeje eo an Jisōs Kraist. Ak kōtļo̧k an ajri ro nejūm̧ kwaļo̧k n̄an kwe bwebwenato eo, kōjerbal pija kein ilo jebta kein.
Loļo̧k eo an Jerkakpeje Rilo̧mo̧o̧r n̄an Amedka ej juon kam̧ool eo ekajoor ilo Jerkakpeje eo An. Ļōmņak in kwaļo̧k n̄an ajri ro nejum̧ kake, kōjerbal 3 Nipai 11; 17; al “Easter Hosanna”; ak eoon eo āliktata ilo “Bwebwenato ko ilo Bok in Mormon” (Children’s Songbook, 68–69, 118–19). Kōketak ajri ro nejum̧ n̄an pijaikļo̧k ta eo enaaj kar āinwōt n̄an en̄jake kinej ko an Jisōs (lale 3 Nipai 11:14–15) ak n̄an āinwōt juon iaan ajri ro Eaar kōjeraam̧m̧ane (lale 3 Nipai 17:21). Kwaļo̧k n̄an doon en̄jake ko ami kōn Jisōs Kraist im An Jerkakpeje.
N̄an jipan̄ ajri ro loe ta eo Bok in Mormon ej katakin kōn jerkakepeje, kwomaron̄ kajjitōk ippāer n̄an katen wōt n̄e kwojjab jeļā jabdewōt kake im kajjitōk ippāer n̄an kōmeļeļeik waj n̄an eok. Jipan̄ er lale ilo 2 Nipai 9:10–15; Alma 11:41–45; im Alma 40:21–23 n̄an uwaak ko n̄an kajjitōk ko āinwōt kein: Ta meļeļein n̄an jerkakpeje? Wōn ro renaaj jerkakpeje? Bar kajjitōk ippāer bwe ren kwaļo̧k naan in kam̧ool eo aer kōn Jerkakpeje eo an Rilo̧mo̧o̧r āinwōt m̧ōttan uwaak ko aer.
Jisōs Kraist ejeļā wāween kaenōm̧m̧an n̄a.
Mosaia 3:7 im Alma 7:11 rej kōmeļeļeik jet iaan ta eo Rilo̧mo̧o̧r ekar ioone āinwōt m̧ōttan Pinmuur eo An. Kwomaron̄ riiti juon iaan eoon kein n̄an ajri ro nejum̧ im kajjitōk ippāer n̄an ron̄jake naan ko rej waļo̧k kōn ta eo Jisōs ekar en̄taan kōn kōj kake. Innām kwomaron̄ riiti Alma 7:12 n̄an lale etke E ekar en̄taan. Kam̧ool bwe Jisōs Kraist eaar en̄jake aolep ad metak im nan̄inmej bwe En maron̄ meļeļe ekōjkan an kaenōm̧m̧an kōj.
Ewōr ke al in jar em̧m̧an ippān ajri ro nejum̧ ak al kōn Jisōs Kraist im Pinmuur eo An? Komi maron̄ al ippān doon—ak ekkatak juon eo ekāāl. Kōnono kōn naan ko ak eoon ilo al in me ej katakin eok kōn ineem̧m̧an in aenōm̧m̧an eo Rilo̧mo̧o̧r eaar letok n̄an kōj.
Jisōs Kraist emaron̄ karreoik n̄a im jipan̄ n̄a oktak.
Bok in Mormon ej letok elōn̄ waanjon̄ak ko kōn armej ro me rekar oktak kōn Pinmuur eo an Rilo̧mo̧o̧r. Kajjitōk ippān ajri ro n̄an kālet juon iaan armej rein n̄an ekkatak kake: Inōs (lale Inōs 1:2–8), Alma eo Edik (lale Mosaia 27:8–24), ak Antai-Nipai-Liai ro (lale Alma 24:7–19). Elmen an armej in ak kurup in oktak kōn wōt Pinmuur eo an Jisōs Kraist? Elmen ad maron̄ in ļoor waanjon̄ak ko aer?
Kwe im ajri ro nejum̧ maron̄ bar keidi men ko rōreeeo im men ko rettoon im kōnono kaki elmen an men ko ettoon maron̄ erreeo. Riit ippān doon Alma 13:11–13. Ta eo Jisōs ekar kōm̧m̧ane bwe jen maron̄ erreeo jān jerawiwi ko ad? Elmen an menin kōm̧m̧an bwe jen en̄jake kōn jerawiwi? Elmen an menin kōm̧m̧an bwe jen en̄jake kōn Rilo̧mo̧o̧r?
N̄an ļōmņak ko reļļapļo̧k, lale ennaan eo an allōn̄ in ilo Jera māākjiin.
Mour erreo n̄an tōl eo an Jetōb. Jetōb ej lukkuun rūkaki eo. Ilo am̧ kappukot tōl eo An im mour erreeo, E enaaj lewaj n̄an eok ļōmņak ko im im̧we ko am̧ kōn wāween tōpar aikuj ko an armej ro kwoj katakin.
