Jisōs ej pukotļo̧k juon kōrā

Enaaj Tōl Eok Ilo Pein, jān Sandra Rast

M̧aaj 11–17: “Juon Jerbal Ekōppaļpaļ im Kabwilōn̄lōn̄”

2 Nipai 26–30

“Ij kanaan n̄an kom̧ kōn raan ko āliktata,” Nipai eaar je (2 Nipai 26:14). Ilo bar jet naan, eaar jeje kōn tōre in ad. Bwe ewōr unin n̄an n̄ūrbōktak kōn ta eo eaar loe: armej ro raar kaarmejete kajoor im kabwilōn̄lōn̄ ko an Anij; eļapļo̧k ebanban im nana. Bōtaab ilo kakobaba n̄an raan kein-āliktata, “jerbal ko an marok” (2 Nipai 26:10,22) kar tōl jān rikapo eo, Nipai eaar barāinwōt kōnono kōn “juon jerbal ekōppaļpaļ im kabwilōn̄lōn̄” kar tōl jān Irooj Make (2 Nipai 27:26). Ilo io̧ļepen jerbal in ekar juon bok—juon bok me ej kwaļo̧k an Setan riab im aiintok eo an ro rōwānōk. Bok in ej Bok in Mormon, jerbal eo ekabwilōn̄lōn̄ ej jerbal eo an Kabun̄ eo an Irooj ilo raan ko-āliktata, im ekōppaļpaļ eo ej—bwe Anij ej kūr kōj aolep kōjekdo̧o̧n m̧ōjņo ko ad, n̄an bōk kūņaad ilo aiintok in.

Ļōmņak ko n̄an Ekkatak ilo M̧weeo im ilo Kabun̄ in

2 Nipai 26–27; 29–30

Anij eaar kōpooj Bok in Mormon n̄an tōre in ad.

Ilo 2 Nipai 26–27, Nipai eaar kout jān kanaan ko an Aiseia (lale Aiseia 29) n̄an keidi n̄an armej ro an im ļo̧o̧k eo aer—eo ej Bok in Mormon. Nipai eaar jeļā kōn revelesōn, em̧ool m̧okta jān an Bok in Mormon kar dedeļo̧k kar je, bwe juon raan “renaaj kanooj aorōk n̄an ro nejin armej” (2 Nipai 28:2). Etke Bok in Mormon eļap an aorōk n̄an eok? Ļōmņak kōn kajjitōk in ilo am̧ riiti 2 Nipai 29–30. Ta “jerbal eo ekapaļpaļ” (2 Nipai 27:26) Anij ej kadedeļo̧k ilo laļin im ilo mour eo anm̧kōn wōt Bok in Mormon?

Bar lale Josep Smith—Bwebwenato 1:5–20.

pija in jemenere

2 Nipai 26:23–33

Jisōs Kraist ej kūr kōj aolep n̄an itok n̄an E.

Elōn̄ m̧ool ko rem̧m̧an n̄an ļōmņaki ilo 2 Nipai 26:23–24. N̄an waanjon̄ak, kwomaron̄ ļōmņak kōn ta eo Jisōs Kraist ekar kōm̧m̧an “n̄an jeraam̧m̧an eo an laļ”—im kwe. Elmen An “bōktok aolep armej”—im kwe—“n̄ane”? Ta eo kwoj en̄jake n̄an kōm̧m̧ane n̄an uwaake An kwaļo̧k an iakwe?

Riit wōt im pukot m̧ool ko kōn Rilo̧mo̧o̧r ilo eoon 25–33. Keememej lukkuun karuwainene eo An. Elmen am̧ naaj kōmeļeļeiki ennaan eo an Jisōs Kraist n̄an eok ilo juon jentōj? Al juon al āinwōt “Come unto Jesus” (Hymns, no. 117) emaron̄ kōpeļļo̧k kōļmenļo̧kjeņ eo am̧ n̄an bōk elōn̄ļo̧k im̧we.

Ļōmņak elmen an eoon kein maron̄ im̧we wāween eo kwoj iaio̧ ippān ro jet im karuwaineneik er n̄an itok n̄an Kraist. Kwomaron̄ lo jet ļo̧mņak ko ilo ennaan eo an Elder D. Todd Christofferson “Katak eo kōn Kobatok” (Liaona, Okt. 2022, 53–56).

Bar lale 3 Nipai 18:30–32; Dallin H. Oaks, “Ta eo Ad Rilo̧mo̧o̧r Ekar Kōm̧m̧ane n̄an Kōj?,” Liaona, Māe 2021, 75–77; Gospel Topics, “Belonging in the Church of Jesus Christ,” Gospel Ļāibrāre.

Jab mijak in ikōn̄. Kajjitōk ko rem̧m̧an rebōk iien n̄an uwaaki. Rebōk kappukot, kōļmeņļo̧kjeņ, im im̧we Iien eo kwoj joļo̧k im kōttar uwaak ko n̄an juon kajjitōk ippān emaron̄ erom juon iien ekwojarjar n̄an kejōkļo̧kjeņ. Bōbrae kapo eo n̄an kam̧ōkaj kajem̧ļo̧k iien in n̄an wōnm̧aanļo̧k n̄an bar men ko jet.

2 Nipai 28

Setan ej kappukot n̄an m̧oņe.

Elōn̄ iaan riab im m̧oņ ko an Setan rej waļo̧k ilo 2 Nipai 28. Pukoti ilo eoon 6, 8, 21–23, 29. Etke kwoj aikuj in jeļā kōn riab ko an Setan? Ta eo kwonaaj kōm̧m̧ane n̄e rikapo eo ej kajjieon̄ in m̧oņe eok?

Kōlaajraki ilaļ jet iaan eoon ko me rej jum̧ae riab ko an Setan. Lale n̄e kwomaron̄ kōmājeji katak ko rem̧ool n̄an eoon kein n̄an katak ko rebōd Nipai ekar kakkōl kōj kaki ilo 2 Nipai 28:

• 2 Nipai 2:17: ewōr juon devil (2 Nipai 28:22: “Ej jab n̄a devil, bwe ejjeļo̧k juon”)

• Moronai 7:35–37

• Katak im Bujen ko 1:31

• Katak im Bujen ko 68:31; 82:14

• Laajrak in Tōmak Ko 1:9.

Bar lale Gary E. Stevenson, “Jab M̧oņe Eō,” Liaona,Okt. 2019, 93–96

2 Nipai 28:27–31; 29

Anij ej wōnm̧aanļo̧k wōt n̄an leļo̧k revelesōn n̄an tōl ro Nejin.

Āinwōt Armej ro Rekwojarjar ilo Raan Ko Āliktata, jej jeraam̧m̧an eļap kōn naan in Anij. Im aaet, āinwōt an Nipai kar kakkōl, jej aikuj bōk en̄jake in ke “ebwe ijo ippa!” Ilo am̧ riiti naan in kakkōl ko ilo 2 Nipai 28:27–31 im 2 Nipai 29, ļōmņak kōn kajjitōk ko āinwōt kein:

• Elmen an Irooj kōņaan bwe in en̄jake kōn im uwaak naan ko An?

• Etke armej jet iien rej “illu” kōn bōk eļapļo̧k m̧ool jān Anij? (2 Nipai 28:28). Ij ke en̄jake wāween in? N̄e āindein, elmen aō maron̄ oktak?

• Ta meļeļe in n̄an bōk naan an Anij? Elmen aō kwaļo̧k n̄an E bwe ikōņaan bōk eļapļo̧k naan eo An?

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

2 Nipai 26:23–28, 33

Jisōs Kraist ekōņaan bwe aolep ren itok n̄an E.

• N̄an katakin ajri ro nejum̧ kōn karuwainene eo an Rilo̧mo̧o̧r ilo eoon kein, kwomaron̄ kōnono ippāer kōn tōre eo rekar karuwaineneik armej ro n̄an juon iien ippān doon, āinwōt bade in kōļak raan in ļotak. Innām kom̧ maron̄ riiti 2 Nipai 26:23–28 ippān doon im pukot ta eo Jisōs ej karuwaineneik kōj n̄an kōm̧m̧ane. Ajri ro nejum̧ remaron̄ kōņaan kōm̧m̧an kaat in karuwaineneik ro jet n̄an itok n̄an Jisōs Kraist. Kōketak er n̄an kōjerbal juon naan jān eoon kein ilo aer keppopo.

• Pija eo ilo jem̧ļo̧kin laajrak in ej kwaļo̧k armej ro jān elōn̄ laļ ko. Bōlen ajri ro nejum̧ remaron̄ lale pija in ilo am̧ riti 2 Nipai 26:33. Kwomaron̄ āliji naan eo “Jisōs ej kūrtok er aolep n̄an itok n̄an Ippān” ilo an ajri ro nejum̧ jitōn̄ kajjojo armej ilo pija eo—innām er make. Elmen ad itok n̄an Jisōs?

• Al juon al kōn iakwe aolep armej, āinwōt “I’ll Walk with You” (Children’s Songbook, 140–41), emaron̄ jipan̄ eok kwaļo̧k ennaan eo ilo 2 Nipai 26:33.

2 Nipai 28:2; 29:7–11; 30:3–6

Bok in Mormon ej juon kōjeraam̧m̧an.

• N̄an jipan̄ ajri ro nejum̧ en̄jake bwe Bok in Mormon ej “kanooj aorōk” (2 Nipai 28:2), kwomaron̄ rāpe juon kape āinwōt juon menin leļo̧k im kōtļo̧k bwe ren kajjidedeik ta eo lowaan. Remaron̄ lale ilo 2 Nipai 30:3–6. Ba n̄an ajri ro nejum̧ etke Bok in Mormon ekanooj aorōk n̄an kwe, im kōtļo̧k bwe ren kwaļo̧k bar en̄jake ko aer.

• Ļōmņak in kajjitōk ippān ajri ro n̄an pijaikļo̧k an juon m̧ōttāer kar ba, “Ijjab aikuj in riiti Bok in Mormon. Emōj aō riiti Baibōļ eo. Ta eo jenaaj ba n̄an in m̧ōttad? Riit ippān doon 2 Nipai 29:7–11 n̄an jeļā etke Anij ekōņaan bwe jen bōk jim̧or bok kein.

2 Nipai 28:30–31

Jemedwōj Ilan̄ ej katakin kōj jidik kōn jidik.

• Bōlen kwomaron̄ in ļōmņak kōn juon menin katak me enaaj jipan̄ ajri ro lo ta meļeļe in n̄an katak “ļain im bar ļain.” N̄an waanjon̄ak, remaron̄ ikkure in bajōļ ak ikkure in ekkal aļaļ jiddik ko, juon ilo juon. Ak kwomaron̄ katakin er jidik kapeel jidik kōn jidik, āinwōt kōm̧m̧an lippen ak jin̄aik juon pija. Innām kwomaron̄ riiti 2 Nipai 28:30 im kōnono elmen an Jemedwōj Ilan̄ katakin kōj m̧ool ilo juon iien.

• Bar juon ļōmņak emaron̄ bar kāālete juon naan jān 2 Nipai 28:30 im aolep ren bōk kuņaer je, juon naan ilo juon iien. Elmen an m̧akūtkūt in āinwōt wāween eo Anij ej letok n̄an kōj m̧ool eo? Etke Anij ej kwaļo̧k m̧ool eo n̄an kōj “ļain im bar ļain, naan in kain̄i im bar naan in kain̄i, ijin jidik im ijjuweo jidik” ijello̧kin aolep ilo juon wōt iien? Elmen aō kwaļo̧k n̄an Anij bwe ikōņaan bōk eļapļo̧k m̧ool jān E?

N̄an ļōmņak ko reļļapļo̧k, lale ennaan eo an allōn̄ ilo eo Jera māākjiin.

Jisōs Kraist ej pād ibwiljin jarlepju eo

Kraist ilo Ilubwilijin, jān Judith A. Mehr

peij in m̧akūtkūt: Bok in Mormon ej juon kōjeraam̧m̧an