baam̧le eo ej ekkatak

M̧aaj 4–10: “Jej M̧ōņōņō ilo Kraist”

2 Nipai 20–25

Jeje ko an Aiseia ekitbuuj kakkōl ko rekajoor, ak rej bar letok kōjatdikdik im m̧ōņōņō. En̄in un eo juon Nipai ekar kobaiki ilo ļo̧o̧k eo an: “ij jeje jet iaan naan ko an Aiseia,” eaar ba, “bwe jabdewōt … renaaj loi naan kein remaron̄ kotak burueer im lan̄lōn̄” (2 Nipai 11:8). Ilo allikar in, juon kajjitōk n̄an riiti naan ko an Aiseia ej juon kajjitōk n̄an m̧ōņōņō. Kwomaron̄ bōk meram, āinwōt kar Nipai, ilo kanaan ko an Aiseia kōn aiintok eo an Israel, itok eo an Messaia, im aenōm̧m̧an eo kar kallim̧ur kake n̄an ro rōwānōk. Kwomaron̄ m̧ōņōņō in mour ilo raan eo kar kanaan kake n̄e Irooj enaaj “kajutak juon flag n̄an laļ ko, im naaj kakwelo̧ktok riatajinemjen ro in Israel” (2 Nipai 21:12). Kwomaron̄ maro kōn wānōk, kwomaron̄ “kōn lan̄lōn̄ … itōk dān jān aebōj ko in lo̧mo̧o̧r” (2 Nipai 22:3). Ilo naan ko jet kwomaron̄, “m̧ōņōņō ilo Kraist” (2 Nipai 25:26).

Ļōmņak ko n̄an Ekkatak ilo M̧weeo im ilo Kabun̄ in

2 Nipai 21–22

Imaron̄ lo aenōm̧m̧an ilo Jisōs Kraist.

Ajri ro nejin Liai ewōr aer būrabōļōm̧ kōn jum̧ae. Būrabōļōm̧ in ekar ļapļo̧k an nana ilo epepen ko tok ālik, tōlļo̧k n̄an jenolo̧k, kōm̧akoko, būrom̧ōj, im jorrāān. Im jum̧ae ej wōnm̧aanļo̧k wōt āinwōt juon būrabōļōm̧ rainin.

N̄an likūti ilo kōļmenļo̧kjeņ, ļōmņak kōn kanaan ko ilo 2 Nipaii 21–22. Ļōmņak elmen an Rilo̧mo̧o̧r kakūrm̧ool kanaan kein. Ta meļeļein kanaan eo kōn kidu oļip eo enaaj “jokwe ippān lamb eo” n̄an kwe? (2 Nipai 21:6). Ļōmņake ta eo kwomaron̄ kōm̧m̧ane n̄an erom̧ rikōm̧m̧an aenōm̧m̧an.

Lale Dale G. Renlund, “Aenōm̧m̧an eo an Kraist ej Joļo̧k Kōjdāt,” Liaona, Okt. 2021, 83–85.

2 Nipai 21:9–12

Irooj enaaj aiin armej ro An.

Nipai im baam̧le eo an raar kam̧oole ejjeplōklōk eo an Israel (lale 2 Nipai 25:10). Kiiō kwomaron̄ bōk kuņaam̧ n̄an aiintok Israel (lale 2 Nipai 21:12). Ilo am̧ riiti 2 Nipai 21:9–12, ļōmņake elmen am̧ maron̄ jipan̄ kakūrm̧ool kanaan in ilo eoon kein kōmeļeļeiki.

N̄an waanjon̄ak, ilo am̧ riit kōn “flag” (jon̄ak ak tōl) me enaaj jutak n̄an aiin armej ro an Anij, ļōmņake elmen am̧ kar loe an Anij aiin armej ro An, ilo kanniōk im ilo jetōb. Ta ko rej kareel armej ro n̄an Irooj im Kabun̄ in eo An?

Ta am̧ en̄jake eim̧we n̄an jipan̄ aiintok armej ro an Anij?

2 Nipai 23–24

Men ko an laļin kōn Babilon enaaj wōtlo̧k.

Aelōn̄ in kiin̄ eo an Babilon ekar juon kien ekajoor im jikin tariņae ekamijak ilo Israel etto. Ak n̄an armej ro an Nipai—im n̄an kōj rainin—kamijak eo eļaptataa me Babilon ej bōk jikin ej: men ko an laļ im jerawiwi. Ļōmņake elmen an kakkōl ko ilo 2 Nipai 23–24 maron̄ jelet armej ro raar mijak ak kar bun̄bun̄ ak lōke m̧weie eo an Babilon im kajoor (lale, n̄an waanjon̄ak 23:6–9, 11, 19–22; 24:10–19). Ta jet iaan men ko reinjuon jej maron̄ mijaki ak bun̄bun̄ ak lōke rainin? Ta eo kwoj en̄jake emaron̄ ilo ennaan eo an Rilo̧mo̧o̧r n̄an kwe ilo jebta kein? Ļōmņake elmen am̧ maron̄ kwaļo̧k ke kwoj “lan̄lōn̄ ilo utiej eo [an Irooj]” (2 Nipai 23:3).

pija in jemenere

2 Nipai 25:19–29

“Jej kōnono ilo Kraist … jej lan̄lōn̄ ilo Kraist.”

Nipai eaar kwaļo̧k tōmak ko ad—eļaptata an naan in kam̧ool kōn Jisōs Kraist. Ilo aolepen am̧ ekkatak kōn 2 Nipa 25, ļōmņake ikideleel eo an Nipai n̄an “kareel ro [nejin] … n̄an tōmak ilo Kraist, im jepļaaktok n̄an Anij” (eoon 23). Ta eo Nipai ekar kōņaan bwe armej ro an ren jeļā kōn Rilo̧mo̧o̧r? (lale eoon 12–13, 16). Elmen an kar Nipai kajjieon̄ n̄an kareel armej ro n̄an tōmak ilo E? (lale eoon 19–29). Keememej eoon kein ilo jebta in me ej kareel eok n̄an tōmak im ļoor Jisōs Kraist.

Jet iaad remaron̄ jab en̄jake āinwōt kar peran eo an Nipai n̄an kōnono kōn Kraist. Ak bōlen kwomaron̄ lo men ko ilo katak ko an Nipai ilo 2 Nipai 25:23–26 me ej im̧we eok n̄an kōnono kōn E ippān ro jet. N̄an waanjon̄ak, naan eo an Nipai “Jej m̧ōņōņō ilo Kraist” emaron̄ kam̧weier eok n̄an ļōmņak kōn wāween an Rilo̧mo̧o̧r bōkwaj lan̄lōn̄ n̄an eok—im elmen am̧ maron̄ kwaļo̧k lan̄lōn̄ eo n̄an ro jet.

Ilo ennaan eo an “Jej Kōnono kōn Kraist” (Liaona, Okt. 2020, 88–91), Elder Neil L. Andersen ej letok elmakotkōn wāween anmaron̄ ļapļo̧k ad kōnono kōn Kraist ilo elōn̄ wāween ko. Ewi iaan elmakot ko reioktok ippam̧? Ta iien ko ewōr ippam̧ n̄an kōnono kōn Kraist n̄an ro jet?

Ta eo kwoj en̄jake ej im̧we eok n̄an ba n̄an ro jet kōn Jisōs Kraistn? N̄e kwoj aikuji jet ļōmņak, kwomaron̄ lale “Kraist Eo Emour: Naan in Kam̧ool eo an Rijilōk ro” (Gospel Library). Al juon al āinwōt “I Believe in Christ” (Hymns, no. 134) emaron̄ lewaj n̄an eok eļapļo̧k ļōmņak ko.

N̄an eļapļo̧k ļōmņak ko, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Ajri ro

2 Nipai 21:1–5

Jisōs Kraist enaaj ekajet ilo jim̧we.

• N̄an jipan̄ ajri ro nejum̧ lali eoon kein, lale n̄e kwomaron̄ pukot juon wōjke me em̧ōj jeke ak juon ra ej eddōk jān wōjke eo (ak kōjerbal pija in ilaļ). N̄e “ra” eo ilo 2 Nipai 21:1 ej pinej jenkwan Jisōs Kraist, ta eo eoon 2–5 ej katakin kōj kōn E?

menin eddōk eo edik ej eddōk jen wōjke eo.

2 Nipai 21:6–9

Jisōs Kraist ej letok aenōm̧m̧an im lan̄lōn̄.

• Ta eo 2 Nipai 21:6–9 ej kwaļo̧k kake ta eo enaaj waļo̧k n̄e aolep rej ļoor Rilo̧mo̧o̧r eo? (bar lale 4 Nipai 1:15–18). Elmen ad maron̄ kōm̧m̧an bwe m̧oko im̧ōd ren āinwōt in? Ajri ro nejum̧ remaron̄ kōņaan lali pijain menin mour ko kar kwaļo̧ki ilo eoon 6–7—menin mour ko ekkā aer nana ak reban kōmetak doon n̄e Jisōs enaaj bar itok (lale peij in m̧akūtkūt eo an wiik in). Ajri ro nejum̧ remaron̄ bar jin̄aik er make im menin mour ko rej mour aenōm̧m̧an ippān Jisōs.

2 Nipai 21:11–12; 22

Irooj enaaj aiin armej ro An.

• Aiseia eaar ba bwe Irooj enaaj kajutak “flag n̄an laļ” n̄an jipan̄ armej ro aiintok er n̄an Ippān (lale 2 Nipai 21:11–12). Jipan̄ ajri ro nejum̧ meļeļe bwe juon ensign ej āinwōt juon flag. Bōlen remaron̄ kōņaan jin̄a aer make flag. Remaron̄ kobaik ilo pija ko ak naan ko me rej pinej jenkwan un ko rej kōņaan erom̧ Jisōs Kraist im Kabun̄ in An. Kōtļo̧k bwe ren kōnono kōn flag eo, im jipan̄ er ļōmņake elmen aer maron̄ jipan̄ ro jet “aiin doon” n̄an Jisōs Kraist.

• Ālkin riiti 2 Nipai 22:4–5 ippān doon, kwomaron̄ kōnono n̄an ajri ro nejum̧ jet iaan “men ko rem̧m̧an” Irooj eaar kōm̧m̧ani. Ta jet iaan men ko Irooj eaar “kōm̧m̧ani ilubwil[jid]” me jemaron̄ kwaļo̧ke? N̄an jipan̄ ajri ro ļōmņake kajjitōk in, komi maron̄ al ippān doon juon al kōn Rilo̧mo̧o̧r “I Believe in Christ” (Hymns, no. 134). Komi maron̄ kajjojo kam̧ōjļo̧k juon jentōj āinwōt jentōj in: “Ij tōmak ilo Kraist, E .” Elmen ad maron̄ kwaļo̧k n̄an armej ro jet kōn ta eo Rilo̧mo̧o̧r ekar kōm̧m̧ane n̄an kōj?

2 Nipai 25:26

“Jej m̧ōņōņō ilo Kraist”

• Elmen am̧ maron̄ jipan̄ ajri ro nejūm̧ “m̧ōņōņō ilo Kraist”? Kwomaron̄ kwaļo̧k juon bwebwenato kōn an Jisōs Kraist bōktok lan̄lōn̄ n̄an ro jet, ak kwaļo̧k juon pija āinwōt “Jesus Heals a Man Born Blind” ak “Suffer the Little Children to Come unto Me” (Gospel Library). Ajri ro nejum̧ remaron̄ kwaļo̧k iien ko rekam̧ōņōņō ilo bwebwenato ak pija eo. Innām, ilo ami riit ippān doon 2 Nipai 25:26, remaron̄ kōnono etke rej “m̧ōņōņō ilo Kraist.”

Kam̧ool kōn Kraist. Jab ba wōt ke baam̧le eo am̧ rejeļā am̧ en̄jake kōn Rilo̧mo̧o̧r. Ba n̄an er, im kwaļo̧k am̧ en̄jake kōn wāween an Rilo̧mo̧o̧r im̧we iaio̧ eo am̧ ippāer.

N̄an ļōmņak ko reļļapļo̧k, lale ennaan eo an allōn̄ ilo eo Jera māākjiin.

mijenede ro rej katakin juon baam̧le

Emaron̄ Jab Ion Tol Eutiej, jān Ramon Ely Garcia Rivas

peij in m̧akūtkūt: Jisōs Kraist ej letok aenōm̧m̧an im lan̄lōn̄