Jekab im Inōs, jān Scott Snow

Eprōļ 15–21: “E Ej Jerbal ilo N̄a n̄an Kōm̧m̧an Ekkar n̄an Ankilaan.”

Inōs–Naan ko an Mormon

Men̄e Inōs ekar etal n̄an bukun wōjke ko n̄an kakidudu n̄an kakijen, eaar pād ijo aolepen raan eo im bon̄on eo kōnke “an eaar ean̄den.” Ean̄den in ekar tōlļo̧k Inōs n̄an “kotak [ainikien] bwe en tōpar lan̄ ko.” Eaar kōmeļeļeik en̄jake eo an āinwōt juon oktaak im̧aan Anij (lale Inōs 1:2–4). Jān Inōs jej ekkatak bwe jar ej juon kijejeto n̄an epakeļo̧k Anij im n̄an pukot n̄an jeļā Ankilaan. N̄e kwoj jar lo wāween in, kwoj lo eļapļo̧k, āinwōt kar Inōs, bwe Anij ej ron̄jake eok im em̧ool Ej kea kōn eok, ro kwoj iakwe er, im jekdo̧o̧n rikejdāt ro am̧ (lale Inōs 1:4–17). N̄e kwojeļā Ankilaan, em̧m̧anļo̧k am̧ kōm̧anm̧an Ankilaan. Āinwōt Mormon, komaron̄ “jab jeļā men otemjej; a Irooj ejeļā men otemjej ko … [im] e ej jerbal ilo [kwe] n̄an kōm̧m̧an ekkar n̄an ankilaan” (Naan ko an Mormon 1:7).

Ļōmņak ko n̄an Ekkatak ilo M̧weeo im ilo Kabun̄ in

Inōs 1:1–17

Anij enaaj ron̄jake im uwaake jar ko aō.

En̄jake ko am̧ kōn jar remaron̄ in jab āinwōt ko an Inōs, ak reban dik tokjeer. Errein jet iaan kajjitōk ko n̄an ļōmņaki ilo am̧ ekkatak Inōs 1:1–17:

• Ta naan ko rej kōmeļeļeik kijejeto ko an Inōs ke eaar jar?

• Elmen an jar eo an Inōs oktak jān eoon 4 n̄an 11?

• Ta eo ij ekkatak jān Inōs me emaron̄ jipan̄ kōm̧anm̧an aō jar?

Bar lale “Enos Prays Mightily” (video), Gospel Library; “Sweet Hour of Prayer,” Hymns, no. 142.

Uwaaki kajjitōk ko. N̄e kwoj katakin ro jet, ļōmņak in likūti kajjitōk ko kwoj kōņaan kōnono kaki ilo juon jikin bwe aolep ren maron̄ loi. Menin ejipan̄ armej ro ļōmņaki kajjitōk ko im leļo̧k uwaak ko reim̧we.

Insō 1:1–4

Irooj emaron̄ jipan̄ eō im̧we baam̧le eo aō n̄an em̧m̧an.

Bōlen ewōr juon ilo baam̧le eo am̧ me kwoj kōņaan jipan̄ e itok n̄an Kraist, ak kwoj ļōmņak eļan̄n̄e kijejeto ko am̧ rej kōm̧m̧an eļap oktak. Ta eo kwomaron̄ ekkatak jān Inōs 1:1–4 kōn im̧we eo an Jekab n̄an ļeo nejin Inōs? N̄an waanjon̄ak, ta meļeļein “kōkaajiriri im katak ko an Irooj” n̄an kwe? Elmen am̧ maron̄ karuwaineneik im̧we eo An n̄an m̧weeo im̧ōm?

Ilo am̧ ļōmņak kōn baam̧le eo am̧ make, ļōmņaki kajjitōk kein im katak ko:

• Elmen am̧ maron̄ im̧we baam̧le eo am̧ ilo wāween ko rem̧m̧an? (lale 1 Nipai 2:16–18; 3:15–21; 5:1–6; 7:20–21; Alma 36:17–20; “Baam̧le Eo: Juon Kean̄ n̄an Laļin”). Ta eo komaron̄ kōm̧m̧ane n̄e ro jet rejjab aikuji jipan̄ eo am̧ ak rejjab jouj n̄an kwe?

• Ta pedped ko kwoj loi ilo eoon kein ilaļ me remaron̄ tōl jemdo̧o̧n eo am̧ ippān ro uwaan baam̧le eo am̧? Matu 5:21–24, 38–44; 6:14; 7:1–5; 22:36–39; 3 Nipai 18:21; Moronai 7:33; Katak im Bujen Ko 18:10–13.

Elder Dieter F. Uchtdorf ekar kwaļo̧k kapilōk ko ejipan̄ an baam̧le ko ilo “In Praise of Those Who Save” (Ensign ak Liaona, Māe 2016, 77–80). Ta eo ennaan eo an ej im̧we eok n̄an kōm̧m̧an n̄an kōkajoorļo̧k baam̧le eo am̧? (lale eļaptata taitōļ jekjen eo “Saving Our Families”).

Bar lale Gospel Topics, “Family,” Gospel Library; “Home and Family—Through Small Things” (video), Gospel Library.

Inōs 1:1–18

Imaron̄ bōk jeorlo̧k bōd n̄e ij kōjerbal tōmak ilo Kraist.

Elōn̄ iien kwomaron̄ ļōmņak n̄e jerawiwi ko am̧ em̧ōj jeorlo̧k, men̄e ālkin am̧ kar ukweļo̧k jen jerawiwi ko. Ta en̄jake ko kwoj būki jān en̄jake eo an Inōs ilo Inōs 1:1–8? Elmen an kar Inōs kwaļo̧k an tōmak ilo Jisōs Kraist m̧okta im ālkin an kar bōk jeo̧rlo̧k bōd?

Jarom–Omnai

Ilo aō kajjieon̄ kōjparok kien ko An, Anij enaaj kōjeraam̧m̧an n̄a.

Jim̧or bok in Jarom im Omnai rej kwaļo̧k kōn jemdo̧o̧n eo ikōtaan wānōk im jeraam̧m̧an. Ta eo kwoj ekkatak jān Jarom 1:7–12; Omnai 1:5–7, 12–18? Ekōjkan an meļeļe eo an laļin kōn jeraam̧m̧an oktak jān meļeļe eo an Irooj? Elmen an Irooj jipan̄ armej ro An jeraam̧m̧an? (lale Alma 37:13; 48:15–16).

Omnai 1:25–26

“Itok n̄an Kraist, eo ej Rikwojarjar in Israel.”

Kūr eo “Itok n̄an Kraist” emakijkij an waļo̧k ilo Bok in Mormon. Ilo m̧ool, juon iaan jibadbad eo an bok in ej n̄an leļo̧k kūr in n̄an aolep. Ilo am̧ riiti Omnai 1:25–26, ta naan ko ak eoon ko kwoj loi me ej kōmeļeļeik elmen itok n̄an Kraist? Ta eo kwomaron̄ kōm̧m̧ane eļapļo̧k n̄an itok n̄an E?

Mormon ej Kobaiki Pileij Gold ko, jān Jorge Cocco

Naan ko an Mormon 1: 1–8

Anij enaaj jerbal ilo n̄a eļan̄n̄e ij ļoor tōl eo An.

Juon un Irooj eaar im̧we Mormon n̄an kobaik pileij ko reddik an Nipai ilo Bok in Mormon kōnke Anij ejeļā bwe peij ko 116 kar ukōti renaaj jako (lale Katak im Bujen Ko 10; Armej ro Rekwojarjar, volume 1, jebta 5). Etke kwoj kam̧m̧oolol bwe Mormon ekar ļoor kōmeļeļe ko jān Irooj n̄an kobaik jeje kein (kobain 1 Nipai n̄an Omnai)? Ta un ko bwe Mormon en kobaiki? (lale Naan ko an Mormon 1:3–7). N̄aat eo kwaar lo an Anij kōm̧m̧ane jerbal eo An kōn kwe ak ro jet?

N̄an ļōmņak ko reļļapļo̧k, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Ajri ro

Inōs 1:1–5

Imaron̄ kōnono n̄an Jemedwōj Ilan̄ ilo jar.

• Elmen am̧ maron̄ jipan̄ ajri ro nejum̧ kōm̧m̧an bwe jar ko aer en wōr meļeļeier? Ļōmņak in kwaļo̧k n̄an er juon pijain an Inōs jar; im kōtļo̧k bwe ren kōmeļeļeik ta eo rej loe. Remaron̄ kiil mejeer im anto̧o̧ne aer kōnono jelm̧ae Jemedwōj Ilan̄. Ta eo rekōņaan kennaan kake? Ta eo Ej kōņaan ba n̄an er?

• Ilo am̧ riiti Inōs 1:1–5, n̄an ajri ro reddikļo̧k remaron̄ katen wōt n̄e er Inōs ilo aer kakidudu, bukwelōlō im jar, im ko jet. Ajri ro rōrūttoļo̧k remaron̄ ron̄jake naan eo ak eoon eo ej kōmeļeļeik jar eo an Inōs. Ta eo naan ko rej jiron̄ kōj kōn jar eo an Inōs? Kwaļo̧k juon en̄jake ke am eaar “ean̄den” im kwaar “kūr n̄an” Irooj (Inōs 1:4).

Āinwōt ajri ro nejin Anij, jemaron̄ jar n̄an Jemedwōj Ilan̄.

Inōs 1:2–16

Jemedwōj Ilan̄ ej ron̄jake im uwaake jar ko ad.

• Elmen am̧ maron̄ jipan̄ ajri ro nejum̧ meļeļe bwe Jemedwōj Ilan̄ enaaj ron̄jake im uwaaki jar ko aer? Ļōmņak in kajjitōk ippāer n̄an kōlaajraki jet iaan men ko remaron̄ jar kaki. Innām kwomaron̄ jipan̄ er pukot ta eo Inōs eaar jar kake ilo Inōs 1:2, 9, 13–14, and 16 (bar lale “Jebta 11: Inōs,” Bwebwenato ko an Bok in Mormon, 30–31).

  Ta uwaak in jar eo an Inōs? (lale eoon 6, 9, 11).

  Ta eo jej ekkatak jān en̄jake eo an Inōs kōn wāween ad kōkm̧anm̧anļo̧k ad jar?

• Al juon al ippān doon kōn jar, āinwōt “A Child’s Prayer” (Children’s Songbook, 12–13). Bōlen ajri ro nejum̧ remaron̄ kajutak peier aolep iien n̄e rej ron̄ naan eo “jar” ak “kar jar” ak bar āliji naan eo. Ba n̄an ajri ro nejum̧ kōn jet wāween ko me Jemedwōj Ilan̄ ekar uwaake jar ko am̧.

Naan ko an Mormon 1:3–8

Imaron̄ kōjeraam̧m̧an ro jet n̄e ij ron̄jake Jetōb Kwojarjar.

• Mormon eaar ļoor tōl eo an Jetōb Kwojarjar n̄an kobaik pileij ko reddik an Nipai ilo Bok in Mormon. Aolep men ko jaar ekkatak ilo Bok in Mormon ilo iiō in raar itok n̄an kōj kōnke Mormon ekar kōm̧m̧ane kāālet eo ron̄jake Jetōb. Elmen am̧ maron̄ jipan̄ ajri ro nejum̧ ekkatak kilen ron̄jake Jetōb? Kajjitōk ippāer n̄an bōk kuņaer riiti eoon ko jān Naan ko an Mormon 1:3–8. Kwomaron̄ kōnono kōn ta eo raar ekkatak jān kajjojo eoon. Innām ajri ro nejum̧ remaron̄:

  • Kwaļo̧k ta eo raar ekkatak jān bwebwenato ko ilo Bok in Mormon iiō in (pija ko jān Itok, Ļoor Eō remaron̄ jipan̄ er keememeji).

  • Al juon al ippān doon kōn Jetōb Kwojarjar, āinwōt “The Still Small Voice” (Children’s Songbook, 106–7).

  • Kōnono kōn en̄jake ko me raar tōl jen Jetōb n̄an kōm̧m̧ane juon men me raar kōjeraam̧m̧an ro jet.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Inōs Ej Jar, jān Robert T. Barrett