Bōk Katak ko an Kiin̄ Benjamin, jān Maria Alejandra Gil

Eprōļ 22–28: “Obrak kōn Iakwe n̄an Anij im Armej Otemjeļo̧k”

Mosaia 1–3

N̄e kwoj ron̄ naan eo kiin̄, kwomaron̄ ļōmņak kōn kūrauun ko, rijerbal ro, im tūro̧o̧n ko. Ilo Mosaia 1–3, kwonaaj riit kōn juon kiin̄ eo eoktak. Ijello̧kin mour jān jerbal ko an armej ro an, Kiin̄ Benjamin “kar jerbal kōn [pein] make” (Mosaia 2:14). Ijello̧kin an mour jān jerbal an ro jet, eaar jerbal n̄an armej ro an, “kōn aolepān aō maron̄, ļōmņak im kajoor eo Irooj [eaar] letok n̄an [e]” (Mosaia 2:11). Kiin̄ in eaar jab kōņaan bwe armej ro an ren kabun̄ n̄an e; ijoke, eaar katakin er n̄an kabun̄ n̄an aer Kiin̄ in Lan̄, Jisōs Kraist. Kiin̄ Benjamin eaar jeļa bwe ej “Irooj Ekajoor Bōtata eo ej irooj” (Mosaia 3:5), eo ekar “wanlaļtak jān lan̄” im ilo̧k “ilubwiljin armej raņ, … bwe lo̧mo̧o̧r en maron̄ itok n̄an ro nejin armej em̧ool kōn tōmak ilo Etan” (Mosaia 3:5, 9).

Ļōmņak ko n̄an Ekkatak ilo M̧weeo im ilo Kabun̄ in

Mosaia 1:1–7

“Niknik in Lin̄ūr [jeje Ko rekwojarjar].”

Ilo eoon kein, keememej elmen an ļo̧o̧k ko rekwojarjar kar kōjeraam̧m̧an armej ro an Kiin̄ Benjamin. Elmen an em̧m̧anļo̧k mour eo am̧ kōn wōt jeje ko rekwojarjar?

Mosaia 2:10–26

N̄e ij jerbal n̄an ro jet, ij barāinwōt jerbal n̄an Anij.

Ta eo kwoj ļōmņak Kiin̄ Benjamin enaaj kar ba eļan̄n̄e kwar kajjitōk ippān etke eaar jerbal kōn aolepān an “maron̄, ļōmņak im kajoor”? (Mosaia 2:11). Kōļmenļo̧kjeņ kōn menin ilo am̧ riiti Mosaia 2: 10–26. Ta eo Kiin̄ Benjamin eaar kwaļo̧k me em̧weier eok n̄an jerbal n̄an ro jet ilo juon wāween ewōr tokjen? N̄an waanjon̄ak, ta meļeļe in n̄an eok n̄an jeļā bwe n̄e kwoj jerbal n̄an ro jet, kwoj barāinwōt jerbal n̄an Anij? (lale Mosaia 2:17). Kappukot im̧we kōn wāween am̧ maron̄ jerbal n̄an ro jet wiik in.

Men̄e jej jeļā jej aikuj jerbal n̄an ro jet, jet iien jej ioon apan̄ ko. Bar juon wāween n̄an ekkatak Mosaia 2:10–26 ej n̄an kōm̧m̧ane juon laajrak in m̧ool ko Kiin̄ Benjamin eaar kwaļo̧k me emaron̄ jipan̄ eok anjo̧ ioon apan̄ ko me dāpij eok jen am̧ jerbal n̄an ro jet. Ta en̄jake ko rej iokwaj eok kōn ta eo Kiin̄ Benjamin eaar kwaļo̧ke em̧ool?

Būreejtōn Joy D. Jones eaar kwaļo̧k juon en̄jake ekajoor me ekar ukōt wāween an kalimjōk im jerbal n̄an ro jet. Riiti ilo “For Him” (Ensign ak Liaona, Nov. 2018, 50–52), im ļōmņak kōn iien ko rem̧m̧an n̄an am̧ jerbal n̄an ro jet. Kwomaron̄ bar kōlaajrake jejjo̧ iaer im kōļmenļo̧kjeņ kōn naan eo an Būreejtōn Jones, ippānļo̧k Mosaia 2:17, emaron̄ im̧we wāween am̧ tōpar iien kein rem̧m̧an. Juon al āinwōt “A Poor Wayfaring Man of Grief” (Hymns, no. 29) ak juon pija āinwōt “The Old Shoemaker” (Gospel Library) remaron̄ jipan̄ eok bar ļōmņaki en̄jake ko jet.

Bar lale Matu 25:40; “Faith Murray’s Story: Overcoming Adversity through Service,” “King Benjamin Teaches about Serving God” (videos), Gospel Library; JustServe.org; Gospel Topics, “Service,” Gospel Library.

N̄e ij jerbal n̄an ro jet, ij barāinwōt jerbal n̄an Anij.

Mosaia 2:38–41

Lem̧ōņōņō ej itok jān kōjparok kien ko an Anij.

Elmen am̧ kōmeļeļeiki m̧ōņōņō eo ej itok jān pokake Anij? Elōn̄ ke jabdewōt naan ko ilo Mosaia 2:38–41 me emaron̄ jipan̄ eok kōmeļeļeik etke kwoj kōjparok kien ko An?

Mosaia 3:1–20

Imaron̄ erom̧ juon rikwojarjar kōn Pinmuur eo an Jisōs Kraist.

Kiin̄ Benjamin, āinwōt aolep rikanaan ro, kar kam̧ool kōn Jisōs Kraist bwe armej ro an “emaron̄ bōk jeorļo̧k in jero̧wiwi ko an, im m̧ōņōņō kōn lan̄lōn̄ eo ekanooj ļap” (Mosaia 3:13). Erkein rej jet kajjitōk ko n̄an kejōkļo̧kjeņ kaki ilo am̧ riiti naan in kam̧ool eo an Kiin̄ Benjamin kōn Rilo̧mo̧o̧r ilo Mosaia 3:1–20:

• Ta eo ij katak jān eoon kein kōn Rilo̧mo̧o̧r eo im mijen eo An?

• Ta eo ij katak jān Mosaia 3:18–19 kōn ta meļeļein erom̧ juon rikwojarjar?

• Elmen an Jisōs Kraist kar jipan̄ eō anjo̧ ioon jerawiwi, ukōt paoktokkū, im erom̧ āinwōt juon rikwojarjar?

Mosaia 3:5–21

“Irooj Ekajoor Bōtata … enaaj wanlaļtak jān lan̄.”

Elmen an jarom̧ lewaj n̄an eok maron̄ eo n̄an jerbal? Elmen an oktak mour eo am̧ n̄e ejjeļo̧k jarom̧? Kajjitōk kein remaron̄ jipan̄ eok kōļmenļo̧kjeņ ilo eļapļo̧k kajoor bwe Rilo̧mo̧o̧r emaron̄ bōktok n̄an mour eo am̧.

Enjeļ eo me eaar waļo̧klo̧k n̄an Kiin̄ Benjamin ej Jisōs Kraist āinwōt “Irooj Ekajoor Bōtata,” juon taitōļ me meļeļein ewōr An aolep kajoor. Ta eo kwoj katak jān Mosaia 3:5–21 kōn wāween an Rilo̧mo̧o̧r kōjerbal kajoor in? Kwonan̄in ke kar loe kajoor eo an Rilo̧mo̧o̧r ilo mour eo am̧ im ilo mour ko an armej ro ipeļaakūm̧? Ta eo kajoor eo An ej kōmaron̄ eok n̄an kōm̧m̧ane im n̄an erom̧? Elmen an oktak mour eo am̧ n̄e ejjeļo̧k jarom̧?

N̄an ļōmņak ko reļļapļo̧k, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Ajri ro

Mosaia 2:11–18

N̄e ij jerbal n̄an ro jet, ij jerbal n̄an Anij.

• Peij in m̧akūtkūt eo an wiik in epād ie juon kurauun ajri ro nejum̧ remaron̄ kōm̧m̧ane. Bōlen komi maron̄ bōk kuņami jutak ioon juon jiia ak tābōļ im katen wōt n̄e er Kiin̄ Benjamin ilo am̧ kwaļo̧k jet men ko Kiin̄ Benjamin eaar kwaļo̧ki n̄an armej ro an, loi ilo Mosaia 2–3. Kwomaron̄ bar kwaļo̧ki n̄an er “Jebta 12: Kiin̄ Benjamin” (Bwebwenato ko an Bok in Mormon, 32–35) n̄an leļo̧k n̄an er jidik kōmeļeļein katak ko an Kiin̄ Benjamin.

• Mosaia 2:17 emaron̄ in juon eoon em̧m̧an n̄an an ajri ro nejum̧ katak. Kwomaron̄ jipan̄ er ālijji jidik naan ko. Ak kwomaron̄ je eoon eo, ippān naan ko rejako, im kajjitōk ippān ajri ro nejum̧ n̄an pukot naan ko rejako. Innām kwomaron̄ kōnono n̄an ajri ro nejum̧ etke Anij ekōņaan bwe jen jerbal n̄an doon.

• Kwomaron̄ jipan̄ ajri ro nejum̧ lale Mosaia 2:11–18 n̄an lale ta eo Kiin̄ Benjamin eaar kōm̧m̧ane n̄an jerbal n̄an ro jet. Innām ro nejum̧ remaron̄ je ioon peba eo wāween ko remaron̄ jerbal n̄an ro uwaan baam̧le eo. Likūt peba ko ilowaan juon kantenar, āinwōt juon pāāk ak juon bato, bwe ajri ro nejum̧ ren maron̄ bōk juon kajjojo raan im kōm̧m̧ane jerbal in jipan̄ n̄an ro jet.

Ajri ro rej jeraam̧m̧an jān bar āliji. Jab mijak n̄an bar ālij m̧akūtkūt ko elōn̄ alen, eļaptata ippān ajri ro reddikļo̧k. Bar āliji enaaj jipan̄ ajri ro keememej ta ko rej ekkatak.

Kiin̄ Benjamin eaar katakin bwe jemaron̄ jerbal n̄an Anij kōn jerbal n̄an ro jet.

Mosaia 2:19–25

Aolep kōjeraam̧m̧an ko aō rej itok jān Jemedwōj Ilan̄.

• Jerbal eo an Kiin̄ Benjamin n̄an armej ro an ekar im̧we eļap kōn an kam̧m̧oolol n̄an Anij. Elmen am̧ im̧we ejja kain en̄jake in n̄an ajri ro nejum̧? Kwomaron̄ riit ippān doon Mosaia 2:21 im jino kōlaajraki kōjeraam̧m̧an ko Jemedwōj Ilan̄ ekar litok iood. Innām kwomaron̄ kobaiki ilo laajrak eo kōjeraam̧m̧an ko jet ajri ro rej ļōmņaki.

• En̄in ej juon ikkure kwomaron̄ ikkure kake n̄an jipan̄ ajri ro kile kōjeraam̧m̧an ko an Jemedwōj Ilan̄. Ajri ro remaron̄ leto-letak juon pijain Rilo̧mo̧o̧r ilo aer al ak ron̄jake juon al kōn kam̧m̧oolol “Gratitude” ilo indext eo an Children’s Songbook). Kabōjrak al ak kabōjrak al eo iien n̄an iien, im kajjitōk ippān jabdewōt eo ej jibwe pija eo n̄an kwaļo̧k juon kōjeraam̧m̧an ej kam̧m̧oolol kake. Ekkar n̄an Mosaia 2:22–24, elmen ad kwaļo̧k ke jej kam̧m̧oolol kōn kōjeraam̧m̧an ko ad?

Mosaia 3:5–10, 19

Jisōs Kraist enaaj jipan̄ eō erom̧ āinwōt E.

• Juon enjeļ eaar jiron̄ Kiin̄ Benjamin m̧ool ko raorōk kōn mour im jerbal in kwaļo̧k eo an Jisōs Kraist. Bōlen kwe im ajri ro nejum̧ maron̄ lale jet iaan pija ko kōn m̧akūtkūt ko ilo Mosaia 3:5–10 (lale, n̄an waanjon̄ak, Gospel Art Book, no. 30, 41, 42, 57, 59). Ilo am̧ riiti Mosaia 3:5–10, ajri ro nejum̧ remaron̄ kotak peier n̄e rej ron̄ men ko ilo eoon ko me ej waļo̧k ilo juon iaan pija ko.

• Ajri ro nejum̧ renan̄in ke kar jipan̄ kōppopo m̧ōn̄ā kōjerbal juon iiōk? Kwomaron̄ kajjitōk ippāer n̄an kōjerbal Mosaia 3:19 im itok kōn juon “iiōk” elmen ad maron̄ erom āinwōt Jisōs Kraist. Elmen an Jisōs Kraist jipan̄ kōj erom̧ āinwōt E?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Ennaan eo an Kiin̄ Benjamin, jān Jeremy Winborg