Abinataai Imatan te Uea ae Nooa, iroun Andrew Bosley

Meei 13–19: “Te Oota … Ae Aki Kona ni Karooaki”

Motiaea 11–17

Te ai ae korakora e kona n riki man te mwakaro n ai. Bon ti Abinataai te mwaane ae kaitaraa korakoran mwaakan te uea ma ana aomata aika e tararuaia. Aki butimwaeaki ana taeka irouia aomata aika mwaiti, ao e kabureaki ni uaa matena. E ngae n anne ana kakoaua iroun Iesu Kristo, are bon te “ota … ae aki kona ni karooaki” (Motiaea 16:9), e anaa nanon te kairake n ibonga ae Aramwa. Ao te anainano nakon te rairaki anne e karaurau n rikirake ngke e uotiia aika mwaiti riki Aramwa bwa a na rairi nanoia ao n onimakina Iesu Kristo. Te ai are e tiringa Abinataai e a moanna ni mate, ma te anainano n te onimaki are e karikaki mai iai ana taeka e na iai mwiina ae akea tokina iaoia Nibwaite—ao iaoia aomata ake a wareki ana taeka n te bong aei. Angiia mai ibuakora ti na aki kona ni kaitara ma te bwai ae karaoia Abinataai ibukin ara kakoaua, ma iai ara tai ni kabane ngkana ti ira Iesu Kristo bon katakin nanora ao ara onimaki. Tao kamatebwaiakan ana kakoaua Abinataai e na kakorakora te kakoaua ao te nano inanom naba.

Taraa naba “Abinadi Testifies of Jesus Christ” (witeo), Gospel Library.

Iango ibukin Reiakinana n te Mweenga ao n te Taromauri

Motiaea 11–13; 17

I kona n tei ibukin Iesu Kristo, e ngae ngke akea riki ae karaoia.

Ngkana ko kamatebwaia Motiaea 11–13; 17, tarai tamnein Abinataai n te kamataata aei. Tera ae ko reiakinna iaon te riki bwa te tia kakoaua ibukin Kristo? Ni bon arona, ko kona ni katurua am kamatebwai iaon kibuntaeka ao titiraki n aron aikai:

• Ko na kanga ni kabwarabwara Nooa ao ana aomata? Bukin tera Abinataai e kainnanoa te ninikoria n tibwaua ana rongorongo te Atua ma ngaiia? (taraa Motiaea 11:1–19, 27–29; 12:9–15).

• Ko na kanga ni kabwarabwara Abinataai? Tera te bwai ae ataia Abinataai are e buokia bwa e na ninikoria n ana kakoaua? (taraa Motiaea 13:2–9, 28, 33–35; 17:8–10, 20).

N ningai ae ko a tia n namakinna ae kanga ko tei n ti ngkoe ni kamanoa te Tia Kamaiu ao Ana euangkerio? E kanga ni Buokiko n namakinna ae E mena ikekei ma ngkoe? Ngkai ko iangoa te bwai aei, ko kona ni wareka rongorongon Eritai ao ana toro ae te kairake n 2 Uea 6:14–17. Tera ae kaungaa nanom ibukin te rongorongo aei?

Ko kona naba ni karaoa am kakaae iteraniba 31–33 n Ibukin Kakorakoraia Kairake: Te Kairi ibukin Karaoan Rinerine ni kakaaei kibuntaeka aika a na anganiko te ungannano ni kamanoa te koaua. Ke ko kona ni karaoa aron naba aei n taekan te anene n aron “Karaoa ae Raoitoi” ke “Ti na Waaki Nako” (Boki n Anene, nambwa. 237, 243).

Ko na kanga ni kabongana te bwai ae ko reiakinna mairoun Abinataai? Te witeo “Dare to Stand Alone” (Gospel Library) e katamnei kangaanga aika ko kona iai n tei ibukin Kristo ao Ana euangkerio. Tera katooto riki tabeua aika ko kona n iangoi?

Taraa naba I-Rom 1:16; 2 Timoteo 1:7–8; “Mwakoro 8: The Call for Courage,” Teachings of Presidents of the Church: Thomas S. Monson (2022), 135–47; Gospel Topics, “Faith in Jesus Christ,” Gospel Library.

Reirei ma te Tamnei. “Reirein te euangkerio ae mwaaka e aki ti kainnanoa katauraoan te reirei ma katauraoam n tamneim [n] ongora ao n ira ana kairi te Tamnei ngkana ko anga reirei” (Reirei n Ana Kawai te Tia Kamaiu, 17).

Motiaea 12:19–37

I kainnanoia ni kamwakura nanou nakon ataakin ana taeka te Atua.

Ana ibonga te Uea ae Nooa a taneiai ma ana taeka te Atua. A kona n taekin kibuntaeka man booki aika tabu ao n tua bwa a na anga reirei iaon tuua. Ae ngaia ae, maiuia a taraa n aki rootaki man ana euangkerio te Tia Kamaiu. Tera bukin te bwai anne?

Iangoa taekan te bwai aei ngkana ko wareka Motiaea 12:19–37. Tera ae nanonaki n am iango ni karaoa nanom bwa e na oota n ana taeka te Atua? Tera taeka ke kibuntaeka aika a kaungako bwa ko na karaoi bitaki n te kawai ae ko ira iai reiakinan te euangkerio?

Motiaea 13:11–26

A riai ni koreaki ana tua te Atua inanou.

Iangoa ana iango Abinataai ae a tuai tuua “ni matenano [i] nanoia” ibonga (Motiaea 13:11). Tera nanon te kibuntaeka aei? Ngkana ko wareka Motiaea 13:11–26, iangoia ngkana a koreaki tuua aikai inanomi.

Taraa naba Ieremia 31:31–34; 2 I-Korinto 3:3.

Motiaea 14–15

E korakai Iesu Kristo ibukiu.

Inanon Motiaea 14–15, kinai taeka ao kiibu aika a kabwarabwara te Tia Kamaiu ao tera te bwai ae E karawawataaki iai ibukim. Tera kiibu aika a buokiko ni kakorakora am tangira ao am kakaitau nako Ina?

Motiaea 15:1–12

E kanga Iesu Kristo n riki bwa te Tama ao te Nati?

Abinataai e reirei bwa te Atua te Nati—Iesu Kristo—e na riki bwa te Tia Kabooi Maiura (taraa Motiaea 15:1), e maiu n te rabwata, n riki bwa mwakoron te aomata ao mwakoron te Atua (kiibu 2–3). E kabanea nanona ni kabane nakon ana kantaninga te Atua te Tama (kiibu 5–9). Ibukin aei, Iesu Kristo bon Natin te Atua ao te tia tei ibukin te Atua te Tama ae kororaoi n te aonaaba (taraa Ioane 14:6–10).

Iesu Kristo bon te Tama naba bukina bwa ngkai ti kariaia Ana mwakuri ni kamaiu, ti riki bwa “kanoana” ao “taan bwaibwai n uean te Atua” (Motiaea 15:11–12). E nanonaki aei, ti na riki ni manga bungiaki n tamneira Rinanona (taraa Motiaea 5:7).

Bukin tera n am namakin e kakawaki bwa ti na atai koaua aikai ibukin Tamara are i Karawa ao Iesu Kristo? E kanga ana kakoaua Abinataai ni kakorakoraa am koaua Irouia?

Iango ibukin Reiakinaia Ataei

Motiaea 11–13; 17

I kona n tei ibukin Iesu Kristo, e ngae ngke akea riki ae karaoia.

• N taai n tabetai inanon maiura, ti bane ni kaitara ma kangaanga ni karaoi ara rinerine are e kaitaraa ara onimaki iroun Iesu Kristo. Tera ae a kona n reiakinna am ataei mairoun Abinataai ngke e riki bwa a na tia kakoaua Iesu Kristo, e ngae ngke e aki rangi ni kinaaki? Te mwakuri ni korotamnei n te kamataata aei ke “Mwakoro 14: Abinataai ao te Uea ae Nooa” (inanon Karaki n Ana Boki Moomon, 38–42) e kona ni buokiia ni katamneia te rongorongo n Motiaea 11–13; 17. Titirakiniia te bwai ae a tangira iai Abinataai.

• A na bae natim ni kukurei ni katei kain mwakoron ana karaki Abinataai. A kona ni karaoi kain kangaangan bwain te maiu aei ni kataneiaia n te bwai ae a na kona ni karaoia ngkana iai aika a na kataia n anai nanoia ni karaoa te bwai ae kairua. Ke a kona n tibwauai aia taneiai n ninikoria n iriira Iesu Kristo. E kanga Abinataai n iriira Iesu Kristo? (taraa Motiaea 13:2–9; 17:7–10). Bukin tera te Uea Nooa e aki karaoa te bwai ae e ataia bwa e eti? (taraa Motiaea 17:11–12).

Motiaea 12:33–36; 13:11–24

N na riai n ongotaeka nakon Tua ake Tebwina.

• Ana ibonga te Uea ae Noa a atai tuua ma akea irouia “ni koreaki [i] nanoia” (Motiaea 13:11). Ko na kanga ni buokiia natim bwa a na atai tuua ao n tangiri? Tao a kona ni korei tuua man Motiaea 12:33–36 ao 13:11–24 iaon mwakoron beeba aika tein te buroo. Ngkana a karaoia, taetae ma ngaia iaon nanon tuua aikai ao a na kanga n irii. Ti na kanga ni koroi tuua aikai inanora?

• Kam kona naba ni bootaki n anenea te anene ibukin taian tua, n aron “Keep the Commandments” (Aia Boki n Anene Ataei,146–47). Tera kakabwaia aika reke man kawakinan taian tua?

Koroboki aika a tabu a reireiniira ana tua te Atua.

Motiaea 14; 16:4–9

Tamara are i Karawa e kanakoa Iesu Kristo bwa e na kairai rikaaki nako Ina.

• E ngae ngke te mwakoro ae uarereke, Motiaea 14 iai inanona tabeua taekana ao kibuntaeka aika a kabwarabwara Iesu Kristo. Tao kam kona ngkoe ao natim ni koroi ni karinani ngkana kam bootaki ni wareka te mwakoro. Ngkanne kam kona ni maroroakina aron ami namakin ibukin te Tia Kamaiu ngkana kam kamatebwai taeka ma kibuntaeka aikai.

• N reirei ibukin Iesu Kristo, Abinataai e taekina te burabeti are Itaia, are e kabotauiira ma tiibu aika bua. Tao a kona ami ataei n tibwaua te tai ae e riki nakoia ngke e bua aia bwai ke bon ngaiia ngke a bua. Tera ae a namakinna? Tera ae a karaoia? Baane wareka Motiaea 14:6 ao 16:4–9. Ti kanga n riki n aekakiia tiibu ake a kararoaia mairoun te Atua? E kanga Iesu Kristo ni buokiira bwa ti na oki?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

E a Oota Ubuna n te Raneanea,, iroun Jeremy Winborg