Minerva Teichert (1888-1976), Birinakon te Uea ae Rimwaai ma Ana Aomata1949-1951, te oera iaon te mitionaite, 35 7/8 x 48 te inti. Brigham Young University Miutiam ibukin Korobanna, 1969.

Meei 20–26: Ti a Tia ni Karaoa te Berita ae tabu ma Ngaia

Motiaea 18-24

Rongorongon Aramwa ma ana botanaomata n Motiaea 18; 23–24 e kaotaki bwa tera ae nanonaki n “roko nakon ana nanai te Atua” (Motiaea 18:8). Ngke a bwabetitoaki ana aomata Aramwa, a karaoa aia berita ae tabu ma te Atua n “toro irouna ao ni kawakin ana tua” (Motiaea 18:10). Ngkai aio bon te motinnano ae rang onoti ma te Atua, e irekereke naba ma aia waaki n ibuobuoki nakon temanna ma temanna. Eng, te mwananga n okira Tamara are i Karawa e a bon nakoimi n tatabemani ngkami, ao akea ae e konaa ni kawakina ara berita aika tabu ibukira, ma anne e aki nanonaki bwa ti tiku ni tii ngaira. Ti kainnanoira i bon i marenara. Ngkai ngaira membwa n ana Ekaretia Kristo, ti berita bwa ti na beku ibukin te Atua man ni buoka ao ni beku iroun temanna ma temanna inanon kawaira, “katoka[iaomi] rawawataia raomi” (Motiaea 18:8–10). Ana botanaomata Aramwa a tauraoi ni uotii rawawataia, n aron ae ti karaoia. Teuana te kawai ae e kona ni buokiira iai te Uea ni “uota [uotara] ma te beebete” (Motiaea 24:15) bon man anganakira aomata Aika Itiaki n aia komuniti ake a tia ni berita n tang ma ngaira ao karaunanora, n aron ae ti a tia ni berita ni karaoia ibukiia.

Taraa naba “The Lord Delivers the Covenant Peoples of Alma and Limhi” (witeo), Gospel Library.

Iango ibukin Reiakinana n te Mweenga ao n te Taromauri

Motiaea 18:1–17

Ngke I bwabetitoaki I bon karaoa au berita ma te Atua.

Iangoia bwa e kanga raoi matoan aia namakin taan kakoaua ake a kabwarabwaraaki ni Motiaea 18 iaon Iesu Kristo. A riai ni bootaki ni karaba, ni kona n reke n te kangaanga, n reiakina taekan te Tia Kamaiu (taraa kiibu 3). Ao ngkana anganaki aia tai ni kaota nanomwakaia man te berita n te bwabetito, “a uboi baia n te kimwareirei, ao a kangai: Anne bon kukurein nanora” (Motiaea 18:11).

Warekan kiibu aikai e kona n riki bwa te tai ae tamaroa ni iangoia bwa kakawakira am berita aika tabu iroum. Ngkai ko kamatebwaia n ae onoti Motiaea 18:8–14 iangoi titiraki n aron aikai:

• Tera ae ko reiakinna man kiibu aikai n taekan te berita ake ko karaoi n te bwabetito? Tera ae e beritanna te Atua nakoim? (taraa kiibu 10, 13).

• E kanga te berita ae tabu ni beku i bukin te Atua n irekereke nakon ara kekeiaki n ibuobuoki i bon i marenara? (tarai kiibu 8–9).

• Tera ae nanon aei iroum bwa ko na “tei bwa [taan kakoaua] iroun te Atua”? (kiibu 9).

• E kanga kawakinan am berita aika tabu n te bwabetito ni buokiko ni “kaonaki ma te Tamnei”? (Motiaea 18:14). E na kanga te Tamnei ni buokiko ni kawakin berita aika tabu?

Kaekaan titiraki aikai tao e na kairiko ni iangoia bwa bukin tera berita aika tabu ao otenanti a kakawaki iroun te Atua. Ko kona ni kakaei nonoori n ana rongorongo Unimwaane Gerrit W. Gong “Te Bwaibwai n te Berita” (Riaona, Nobembwa 2019, 80–83) ke ana rongorongo Beretitenti Jean B. Bingham “Ara Berita ma te Atua a Kamatoaira, Kamanoira, ao Katauraoira ibukin te Mimitong ae Akea Tokina” (Riaona, Meei 2022, 66–69). Bukin tera ko kakaitau ibukin am berita aika tabu? Tera ae ko na karaoia ni kawakina am berita?

Taraa naba Gospel Topics, “Baptism,” Gospel Library; “Alma the Elder Teaches and Baptizes at the Waters of Mormon” (witeo), Gospel Library.

Reireii koaua man booki aika tabu ao mai irouia burabeti aika ngkai. Ngkai ko anga reirei—ao n reiakinii bwaai—uringnga bwa teuana te kawai ae tamaroa ni kakorakoraa te onimaki iroun Kristo bon kabanean nanora iaon koroboki aika tabu ao aia taeka burabeti ni boong aikai (taraa Motiaea 18:19).

Motiaea 18:17–30

E tua te Atua nakoia Ana aomata bwa a na bootaki, barongaiia, ao ni katiteuanaaki.

Tabeman aomata a mimi, bwa bukin tera ti kainnanoa te ekaretia? Kakaea ni Motiaea 18:17–31, n noria bwa tera ae a kuna ana botannaomata Aramwa ni bonganan te ikotaki n “ana ekaretia Kristo” (Motiaea 18:17). Tera baika a titebo ake ko nori n Ana Ekaretia Iesu Kristo n ana bong Aramwa ao n ara bong?

Ko na kanga ni kaeka nakon raoraom ke kaain am utu ake aki kakoauaa ae te ekaretia ae barongaaki e riai ni iai? Bukin tera ko kakaitau ngkai ko kaaina Ana Ekaretia Iesu Kristo?

Iangoa te bwai ae ko kona ni karaoia ni buokiia kaain am uoote ke mwaanga ni “botaki nanoia n te nano ae ti teuana ao i nanon te tangira” (Motiaea 18:21).

Taraa naba Dallin H. Oaks, “Kainnanoan te Ekaretia,” Riaona, Nobembwa 2021, 24–26; “Love One Another,” Hymns, no. 308.

Motiaea 21–24

Te Atua e buokai n uota uotau.

Ana botanaomata Rimwaai ao ana botanaomata Aramwa a kaai n rinanon te tautoronaki, e ngae ngke e kaokoro baika a rinanona. Tera ae ko kona n reiakinna man kabotauan rongorongon ana botanaomata Rimwaai ni Motiaea 19–22 ao ana botanaomata Aramwa ni Motiaea 18; 23–24? Ngkai ko karaoia, noori rongorongo ake e kaaineti nakon maium. Te katooto, tera nanon ae a “kakabwaiaki teutana imwin teutana”? (Motiaea 21:16). Ko na kanga ni kamwakura te reirei aio?

Motiaea 23:21–24; 24:8–17

I kona ni onimakina te Uea.

E ngae ngke a tia n rairinanoia man aia bure, Aramwa ma ana botanaomata a teimatoa inanon te tautoronaki. Te taneiai aio e kaotia bwa onimakinan te Uea ao maiuakinan ara berita aika tabu e aki kanakoi kakaewenako mai iroura, ma e buokiira n tokanikai iaoia. Ngkai ko wareka Motiaea 23:21–24 ao 24:8–17, tarai taeka ao mwakoro n taeka are e kona ni buokiiko n onimakina te Atua, n aki ongei baike ko mena inanona.

Taraa naba David A. Bednar, “Bear Up Their Burdens with Ease,” Riaona, Meei 2014, 87–90.

Iango ibukin Reiakinaia Ataei

Motiaea 18:7–17

Ngke I bwabetitoaki I bon karaoa au berita ma te Atua.

• Teuana te kawai ae kakaawaki ni buokiia natim ni katauraoi ibukin te bwabetito bon reireinaia taekan te berita ae tabu ake a na karaoia ngkana a bwabetitoaki. E na kona ni bebete karaoan aei man kaotakin te tamnei are ni banen te kabwarabwara n te wiiki aei ao ni warekan taekan te berita ma ngaiia Motiaea 18:9–10. Iangoia ni kaoa te ataei are e a tia ni bwabetitoaki n reirei iaon aei nakoia ataei ake a uarereke riki. Natim a na bae ni kukurei n ongo taekan am bwabetito. E kanga n tia kawakinan am berita ae tabu ma te Atua ni kakabwaiaa maium?

• Ataei ake a tia ni bwabetitoaki a kona ni kabonganai ni katoa tai kauring iaon te berita ae tabu are a karaoi ao ni kabooui n te wiiki koraki n tain te toa. Tao a kona natim ni kabotaua te berita ae tabu n te bwabetito are e kabwarabwaraaki inanon Motiaea 18:8–10 ma tataron te toa (taraa Reirei ao Berita aika Tabu 20:77, 79). Ti na kangan ni karaoa te toa bwa e na onoti, te tai ni karinerine, n ai aron ara bwabetito?

Ti karaoa te berita ae tabu ma te Atua ngkana ti bwabetitoaki.

Motiaea 18:17–28

Ngkana I bwabetitoaki, I riki bwa te membwa n Ana Ekaretia Iesu Kristo ibukia Aika Itiaki ni Boong Aika Kaitira.

• A ataia natim bwa tera nanon ae a riki bwa kaain Ana Ekaretia Iesu Kristo ibukia Aika Itiaki ni Boong aika Kaitira? Iangoia buokiia ni kakaea te tamnei are e tei ibukin bwaai ake kaain te Ekaretia a karaoi n Motiaea 18:17–28. Te katooto, te tamnei Katabuaki nakon te Nakoanibonga ao Kabwakaan te Kabwianibwai (Gospel Art Book, nambwa 106, 113) e na tei ibukin kiibu 18 ao 27–28. Tuangiia bwa bukin tera ko rangi ni kakaitau n riki bwa te membwa n ana Ekaretia Iesu Kristo.

• Buokakiia ataei n namakina ae a na “botaki nanoia n te nano ae ti teuana i nanon te tangira imarenaia” (Motiaea 18:21) e buokiia n tiku n nene nakon te Ekaretia rinanon nako maiuia. Iangoia ni kaoiia natim bwa a na wareka Motiaea 18:17–28. Tera ae a karaoia kaain Ana Ekaretia Kristo n ana bong Aramwa n itangitangiri ao n ibuobuoki imarenaia? Ti na kanga ni karaoa aei n ara uoote, mwaanga, ke komiunite? Te anene iaon te tangira, n aron,“I’ll Walk with You” (Aia Boki n Anene Ataei,, 140), e kona ni kamatoaa te rongorongo aei.

Motiaea 24:8–17

Te Atua e kona ni kabebetea uotau.

• Te reirei ae bebete n te bwai ae kaotaki e kona ni karika reiakinan te bwai teuana ni ururingaki. Iangoia ni kanoaa te baeki ni bwaai aika a tinebu (ake a na tei ibukin te uota ae rawawata), ao kaoa te ataei bwa e na taua te baeki. Ngkai ko wareka Motiaea 24:8–17 ma natim, tuangiia bwa a na kanakoa te bwai man te baeki ni katoa tai are a ongo iai taekan te bwai are a karaoia ana aomata Aramwa n ukora ana buoka te Atua ibukin rawawataia. Ngkanne ko kona ni marooro ma ngaiia iaon ae e kanga Tamara are i Karawa ni karika rawawatara bwa e na bebete ngkana ti ukora Ana buoka.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Ranin Moomon,, iroun Jorge Cocco