Ara Berita ma te Atua a Kamatoaira, Kamanoira, ao Katauraoira ibukin te Mimitong ae Akea Tokina
Ngkai ti rineia bwa ti na karaoi berita aika a tabu ao ni kawakini, ti na kakabwaiaki ma rakan te kukurei n te maiu aei ao te maiu ae na roko ae mimitong.
Tariu, ai ka kukureira ngkai ti ikotaki n tari ni katobiia te aonaba! Ngkai aine aika ti karaoi ao ni kawakinii berita aika tabu ma te Atua, ti tibwaua te reitaki n tamnei are e buokira ni kaitarai kangaanga n boong aikai ao ni katauraoira ibukin Kauaokin Iesu Kristo. Ao kawakinan berita aika a tabu akanne a karikiira bwa banna ni katooto are a konaa ni kaania tabeman nakon te Tia Kamaiu.
Ake a tia ni bwabetitoaki a beritanaki n te tai are e aki kona ni mwanuokinaki n katoka aran Iesu Kristo iaoia, bwa ana aki toki n ururingnga, ni kawana Ana tua nako, ao ni beku Ibukina n uaa te toki. Ngkana ti karaoi bwaai aikai, E berita Tamara are i Karawa bwa e na kabwarai ara bure ao n anganiira ana iraorao te Tamnei ae Raoiroi. Kakabwaia aikai a moa mai iroura n te kawai arei, ngkana ti waaki rake ao ni teimatoa ni uaa te toki, e na kariaia bwa ti na maeka ma Ngaia ao Natina n te abanuea are te tiretio. Ni kabaneia ake a bwabetitoaki e karekea te berita aikai ngkana neienne ke teuane e kawakina ana berita ae tabu are e karaoaia te bong are kakawaki anne.
Koraki ake a karaoi riki berita aika a tabu inanon te tembora a karekei berita aika a korakora riki ,n bon nakon ana onimaki temanna. Ti berita n ongeaba nakon ana tua nako te Atua, maeuakina ana euangkerio Iesu Kristo, ti na itiaki, ao ni kabanea ara tai ao ara tarena nakon te Uea. Ni karaoan anne, E beritani kakabwaia te Atua n te maeu aei ao ti na kona n okirikaaki nakoina.1 N te aro anne, ti anganaki, ke ni kabaeaki ma, te mwaaka ni kinaa te kaokoro imarenan te koaua ao te kairua, imarenan te eti ao ao ae bure, ibuakon bwanaa aika a bati aika aki raoiroi ake a buakaniira mai irarikira. Ai korakorara te bwaintangira aei!
Ni katauraoau nakon au moan mwananga nakon te tembora, tinau ma tabeman ainen te Bootaki n Aine aika a mwaatai a buokai ni rinei bwaai ake N na kainnanoi, ni ikotaki ma kunikaiu nakon te bootaki ae mimitong. Ma te katauraoi ae moan te kakawaki e roko riki imwain atakina bwa tera te kunikai ae na bwainna. Imwiin kataetaeau bwa e na ataaki bwa I tau, e kabwarabwai berita aika a tabu ake N na karaoi au bitiobi. Ana kabwarabwara raoi anne e anganai au tai ni iangoia ao ni katauraoi ni karaoan berita ake a tabu akanne.
Ngke e a roko te bongi anne, I ira buakon te waaki ma te nano ni karabwarabwa ao n rau. E ngae ngke I aki ota n kakawakin raoi te berita ae tabu are I karaoia, I bon ataia bwa I kabaeaki nakon te Atua rinanon berita aika a tabu akanne ao ni beritanaki kakabwaia ae I tuai rangi n ota raoi iai ngkana I kawakinii. Man te moan taneiai anne, I teimatoa ni kakoauaa bwa kawakinan berita aika tabu are ti karaoai ma te Atua e na kaanira riki nakon mwaakan te Tia Kamaiu, are e na kakorakoraira man kataaki aika a kanganga totokoaia, kamanoira man korakoran kangaanga, ao ni katauraoira ibukin te mimitong mai karawa ae akea tokina.
Waakin te maeu e konaa n riki man baika a kangare nakon uruakin te nano, man ae kangaanga nakon ae kakukurei. Taneiai aikai a konaa ni buokira n ota riki ibukin kororaoin ana tangira Tamara ao ara konaa ni bitaki rinanon ana karea n akoi te Tia Kamaiu. Kawakinan ara berita aika a tabu e anganira mwaakan te Tia Kamaiu ni kaitiakiira ngkai ti reiakinna rinanon bwaai ake ti karaoi—ngkana te babaire ae aki eti ke te kabwaka ae bubura. Ara Tia Kabooira e mena ikekei ni raweira ngkana ti bwaka ngkana ti Nakoina.
Ko a tia n tei iaon te katabuki ae rietata ae katati ma tabon waem iaon mangena ni katanako man te nano ae abwabwai? N tain te ruorikaaki, e ngae ngke ko ataia bwa ko bon mano raoi man matoan roobu ao bwaai ake a kabonganaaki ake ko na ruorikaaki iai ao ni mano, te tei iaon te tabo anne e bon kanakonano. Te rangata rikaaki iaon te tabo ae rietata ao tienakom n te aakea e kainnanoa onimakinan te angkaa, are e kabaeaki ma te bwai ae aki konaa ni kamwaingaki. E kainnanoa onimakinan te aomata are e na kamatoa te roobu ngke ko ruo rikaaki. Ao e ngae ngke bwaai ake a katauraoaki nakoim a anganiko arom tabeua ni bairea ruom rikaaki, ko riai n onimakina toam bwa e na aki kariaia bwa ko na bwaka.
I rangi n uringnga raoi ara tai n ruorikaaki ma ara kurubu n ataeinnaine. Bon ngai te moan man te kurubu n nako. Ngke I keerikaki man te tabo ae rietata, I a bon bwaka rikaaki naba ao ni kanganga katokana. Ma te kukurei, e waekoa n toki bwakan te roobu ao n toki naba bwakau rikaaki arei. I nanon tinetineu i nukan kawaiu inano ibuakon taian bwaa, I tataro mwaaka ibukiia ake a buokai ke tera ae totokoa bwakau rikaaki nako aon taian bwaa.
Rimwi riki, ao I kunea bwa kamatoaan te angkaa e aki kanimwaki raoi, ao n te tai are I nako man mangeen te bwaa mai ieta, te aomata are e buokai e waekoa ni mwaing ni wene iaon nukana ao ni kabaitia ni katika te roobu ni waerake. N te tai ae tawe, e karekei waena nakon tabeua taian bwaa. N mwengaraoi ni nnena arei, e karaurau ni karuoai rikaaki, ni baina teutana imwiin teuana, ma te roobu. E ngae ngke I aki nooria, I ataia bwa e mwakuri korakora ni kamaiuai. Temanna raora mai i nano, e tauraoi n raweai ngkana e aki kona n tautau te roobu. Ngke I a kaan ma naano, e waekoa n rawei kabae ake iaou ao ni katikai rikaaki nako aontano.
Ma Iesu Kristo are ara angkaa ao te rao ni koaua, ti karauaki korakoran ana tangira inanon kataaki ao n tokina ti kamaeuaki Irouna. N aron ae reirei Beretitenti M. Russel Ballard: Onimakinan te Atua ao natina, te Uea ae Iesu Kristo, bon te … angkaa ae riai n reke iroura ni maeura bwa e na mwaneira ni waekoa n tain marebun te waaki ao te buakaka. … Ara onimaki … e na boto iaon Iesu Kristo, maiuna ao ana mwakuri ni kamaiu, ao ni kaokan ana euangkerio.”2
Bwaai ni mwakuri n tamnei ake a kamanoira bwa ti na aki rotaki iaon bwaan kanganga bon ara koaua iroun Iesu Kristo ao te berita ae tabu are ti karaoia. Ti kona ni katan iaon buotoka aikai ni kairira ao n uotira ni kamanoira. Ngkai bon raora ae tatauraoi, te Tia Kamaiu e aki konaa ni kariaia bwa ti na bwaka man Ana tararua. Riki inanon ara tai ni maraki ao n rawawata, E bon mena ikekei n tabekiira ao ni kakorakora. E buokira mwaakana n tokanikai man uaan taian rinerine. E ngae n anne, ngaira n tatabemaniira ti riai ni katokai kabaeara ao ni kakoaua bwa kabae a bon bae raoi. Ti riai n rineia bwa ti na bae ma ara tia Kamaiu, ni bae ma Ngaia man ara berita aika a tabu.3
Ti na kanga ni kamatoai ara kabae akanne? Ti tataro ma nanora ae nanorinano, kamatebwai ao iangoia raoi koroboki aika a tabu, toa ni katoa wiiki ma tamnein te rairannano ao karinerine nakon Tamara i karawa, kekeiaki-mwaaka ni kawakin tuua, ao ni irii aia reirei burabeti. Ao ngkai ti kakoraoi ara mwakuri ni katoa bong ni kawai aika “rietata ao n tabu riki”4 ti rikirake ni kaan riki nakon te tia Kamaiu, n aron naba, buokakiia aomata bwa a na Nakoina.
Tera taraan kawai aika a “rietata riki man tabu riki”? Ti kataia ni maeuakina te euangkerio inanon ara reitaki ni kabane. Ti tabeakiniia ake a kainano man karaoan te mwakuri ni ibuobuoki ni koaua, kaotan te tangira rinanon mwakuri aika bebete. Ti tibwaa te rongorongo ae raoiroi man te euangkerio ma naake a kainnanoa te rau ao te korakora ao “aki ataia bwa ana kunea iaa.”5 Ti mwakuri ni bootia utu ibukin te maeu ae akea tokina n iteran rabuna aika uoua. Ibukimi ake kam a tia ni karaoi berita aika atabu n ana auti te Uea, n aron ae kabwarabwara Beretitenti Russel M. Nelson, “Ni kabane ikawai ake ana bwaina te kaamenti ae tabu n te nakoanibonga, [are] … a kauringiira … n nakonako n te kawai ae tabu ni katoabong ae rietata ao ni tabu riki.”6 Waaki aikai aki kabanebuaka te tai ma a bongana ibukin kukureira ni katoabong—ao te kukurei ae akea tokina.
Akea riki ae kakawaki nakon te rikirake ae akea tokina nakon kawakinan ara berita aika a tabu ma te Atua. Ngkana berita aika a tabu n te tembora a kamwakuraki, ti kona n onimaki ma te kimwareirei ni kaaitibo ma ake ti tangiria ni iteran te rabuna are te iterana. Te ataei ke kaaro, ke te kainaba are e a tia ni kitana te maeu aei e kantaningaia ma nanona ni kabane bwa ko na kokoaua nakon am berita ae tabu are e kabaei ngkami n akea tokina. Ngkana ti mwanuokini ke n aki mwakuria raoi ara berita aika a tabu ma te Atua, ti karekea te kanganga nakon kabaeakira ake akea tokiia. N tai aei bon te tai n raira n nano, kaetaki, ao ni keiaki riki.
E na rotaki kukureira ngkana ti kaibibitii kakabwaia ake akea tokina ma rawawata n te maeu ae kai toki. E aki kangai bwa iraua am ririki, aio bon te koaua ni koaua: te kiing nakon te kukurei ae akea tokina bon man maiuakinan ana euangkerio Iesu Kristo ao kawakinan berita aika a tabu ake ti karaoi. Ara burabeti, Beretitenti Nelson, e kamatoa n taekinna bwa “katanara ni koaua ao teimatoara n uaa te toki e nako man tauan te kai te biti man te ekaretia are e kaokaki iroun Iesu Kristo, ae bwanin man berita aika tabu ao taian otenanti. Ngkana ti karaoa anne, ti na mano man marebun taari ibukina bwa ti karekea mwaakan te Atua.”7
A mwaiti mai ibuakora aika a tia ni rinanon te buaka anne. Ngkai ti rootaki n naon kangaanga ao ni kamatakiiaki n tabetai man bwaraon ranimata aika a korakora ake a roko n taai ni karawawata, ti kona n aki ataia bwa te kawai raa ae ti na bweena ara booti ni kamaiu nako iai. Tao ti na konaa n aki iangoia bwa iai korakorara n roko n te aba. Ururinga antai ngkoe—natin te Atua ae tangiraki—Bukin tera ko mena ikai iaon te aba, ao am kouru ni maekam ma te Atua ao aika a tangiraki iroum e konaa ni kaitiaka am taratara ao ni kairiko nakon te kawai ae eti. Inanon tain te angibuaka, iai te ota ae otamwaaka ae e kairira nakon te kawai. “Ngai te ota are e ota n te roo,” e katanoata Iesu.8 Ti na anganaki te kamanoaki ngkana ti taraa Ana ota ao ni kateimatoa te kokoaua n ara berita aika a tabu.
Bon te kakukurei te kaitibo ma aine ni kabane ake a maeka n aaro aika a kakaokoro ake a kawakinii aia berita aika tabu. Ni katoabong, a taraa te Uea ao Ana burabeti ibukin te kairiiri, nakon kabonganaa bwaai n reitaki aika a rangi ni kinaaki. Ibukin kakaokoron aia kanganga ao ataibwai aika karuanikai n te aonaaba aei are e na kararoaia man kawakinan aia berita aika atabu, ana nanomatoa n tiku n te kawai ae beritanaki. A katan iaon berita ni “kabane are iai iroun [te tama].”9 E aki kangai bwa iraua am ririki, ngkami aine n tatabemangkami nako kam a tia ni karaoa te berita ae tabu ma te Atua kam konaa n kaota otan te Uea ao ni kairia tabeman Nakoina.10 Man kawakinan am berita ae tabu, E na kakabwaiako ni mwaakan Ana nakoanibonga ao ni karekea nakoim am konaa ae korakora nakoia ni kabane ake ko reitaki ma ngaiia. N aron ae taekinna Beretitenti Nelson, ngkami aine aika kam na kakoroi bukin taetae ni burabeti ake a tia ni kaman taekinaki!11
Tariu aika kam tangiraki, iaon bwaai riki nako, tiku iaon kawain te berita ae tabu nakon Iesu Kristo! Ti kakabwaiaki bwa ti roko nakon te aonaaba n te tai are tembora a kaona te aonaba. Karaoan ao kawakinan berita aika a tabu n te tembora e tauraoi nakoia kaain te Ekaretia aika a tau n tatabemania. Kairake, kam riai n aki tataninga ni karokoa te mare ke te mwakuri ni mitinare bwa ningai ae ko na karaoi berita aika a tabu akanne. Ko kona ni katauraoiko ngkai te ataeinaine ngkoe ni karekea kamanoam ao korakoram man berita aika a tabu ake a reke man tembora ni waekoa imwiin koron 18 te ririki ngkai ko a tauraoi ao namakina te nano ni karekei ao ni karinei berita aika tabu akanne.12 Ngke are ko a tia ni karekea te kakabwaia man te tembora, tai kariaia aomata akekariirii bwa ana kabuaa am koaua aika akea tokina. Kamatebwai ao titiraki nakoia aika onimakinaki ibukin karekean riki ootam ibukin kakawakin bwaai aika a tabu man berita aika a tabu are ko a tia ni karaoia. Kawara te tembora n angiin te tai n reken am tai ao kakauongo nakon te Tamnei. Ko na namakina te karaunano ae kakukurei bwa ko mena n kawain te Uea. Ko na karekea te ninikoria ni waaki nako ao ni kairia tabeman irarikim.
I kakoaua bwa ngkai ti rineia bwa ti na karaoi berita aika a tabu ma Tama ae i Karawa ao ni karekea mwaakan te tia Kamaiu ni kawakinii, ti na kakabwaiaaki ma karekean te kukurei ae raka riki n te maiu aei nakon are ti kona ni katamneia ao mimitongin te maiu ae akea tokina n te maiu are e na roko.13 N aran Iesu Kristo, amen.