Te Tangira ae Mairoun te Atua n ana Baire te Tama
Oin te kantaninga n te reirei ao tuan te Ekaretia ae kaokaki aei bon katauraoakiia natin te Atua nakon te kamaiuaki ao ibukin te karietataaki nakon te kabane rietaata n tabo.
Ana baire te euangkerio e kaota ana tangira Tamara are i Karawa ibukiia Natina ni kabane. N ota n aei, ti riai n ukeuke n ataa Ana babaire ao Ana tua. E rangi n tangiriia Natina are E anga Natina ae te Rikitemanna, Iesu Kristo, n riki bwa ara Tia Kamaiu ao te Tia Kabooira, ni maraki ao ni mate ibukira. N te Ekaretia ae kaokaki ana Ekaretia Iesu Kristo ibukiia Aika Itiaki ni Boong aika Kaitira, iai otara ae onoti ibukin ana babaire Tamara are i Karawa. Aei e anganiira te kawai ae kaokoro n taraakin oin bukin rokora n te maiu ae mamate, ao te motikitaeka are imwiina, ao tokin kawaia ae mimitong natin te Atua ni kabane.
I tangiri ngkami, tariu ao mwaaneu. I tangiriia natin te Atua ni kabane. Ngke e titirakinaki Iesu, “Tera te tua ae korakora i buakon taian tua?” E reirei bwa tangiran te Atua ao raora bon moan tuua aika rangi ni korakora.1 Tuua akanne bon moanbwai ibukina ngkai a kaoira bwa ti na rikirake n te maiu n tamnei n ukora katotongan ana tangira te Atua ibukira n ana reirei ao ana tua. Au kantaninga bwa e na rangi n tamaroa ara atatai n ana reirei ao ana tua Tamara are i Karawa ao Natina, Iesu Kristo, are a tia ni barongaia n Ana Ekaretia Iesu Kristo ibukiia Aika Itiaki ni Boong aika Kaitira. Te bwai ae I taekinna ikai ni ukeria ni kamataata bwa e kanga ana tangira te Atua ni kabwarabwara te reirei anne ao tuan te Ekaretia aika a kaunganano akanne.
I.
N ae taneiai te aba iai n akea te mataata raoi n te motikitaeka are imwiin te maiu ae mamate bwa aomata aika a raoiroi a nako n te tabo ae aranaki bwa karawa ao aomata aika a buakaka a nako n te tabo ae akea tokina ae moone. Te anua ibukin te katautau ae ibukin tii uoua tokin kawaira e kaotaki bwa naake aki kona ni kawakin tuua ni kabane ae a katauaki ibukin karawa tokin kawaia bwa te nako moone.
Tamara are i Karawa Iai ana baire ae tamaroa Ibukiia Natina. Te reirei ae kaotaki n ana Ekaretia Iesu Kristo ae kaokaki e reiakinaki bwa natin te Atua ni kabane—ma aika tianaki n aki kairaki ikai—n tokin te tai ao a na mena n te abanuea ae mimitong.2 “A bati ne ni maeka n ana auti Tamau,”3 e reirei Iesu. Man te kaotioti ae ngkai ti ataia bwa nne akanne a mena inanon abanuea aika teniua aika a kakaokoro. Te Kabanea ni Motikitaeka a na motikaki taekara ngaira n tatabemaniira nako ni kaineti ma ara mwakuri ao ara iango inanora.4 Imwaain anne, ti na riai ni maraki ibukin ara bure aika ti tuai n rairi nanora mai iai. E kamatataaki anne inanon koroboki aika tabu.5 Ngkanne ara motikitaeka aika a raoiroi e na anganiira n nera ni maeka man teuana mai buakon abanuea akanne. N aron aei, ngkai ti ataia man te kaotioti ae ngkai, ni kabane “a na motikaki taekaia … , ao ni kabane aomata a na karekea n aron oin ana mwakuri, oin ana tautaeka, n taian nne ni maeka are a katauraoaki”6
E a tia te Uea n rineia ni kabotaua teutana taekan uoua abanuea aika a mimitong. Ni kabotaua te kaokoro, e a tia te Uea ni kaota ae mwaiti riki n taekan te kabane ni rietaata n abanuea, are e kabwarabwaraaki n te Baibara kanga “tamaroan taai.”7
Ni mimitongin te “tiretio”8 iai teniua karawa iai ke rinanna.9 Te kabanea n rietaata ibuakon aikai bon te karietataaki n te abanuea are te tiretio, ike ti na kona n riki n aron Tamara ao Natina, Iesu Kristo. Ni buokiira ni karikirakei anua n atua ao bitakin arora e bon riai ibukin ataakin ara konabwai mairoun te Atua, e a tia Uea ni kaota te reirei ao ni katei tuua ae boboto iaon te tua ae akea tokina. Aei ae ti reiakinna n Ana Ekaretia Iesu Kristo ibukiia Aika Itiaki ni Boong aika Kaitira ibukina bwa oin te kantaninga n te reirei ao tuan te Ekaretia ae e kaokaki bon katauraoakiia natin te Atua n te kamaiuaki n te abanuea are te tiretio ao, riki ibukin te karietataaki n te abanuea are e rietaata riki.
Berita aika tabu ake a tia ni karaoaki ao kakabwaia ake a tia ni beritanaki nakoia ake a kakaonimaki n ana tembora te Atua bon taian kiing. Aio e kabwarabwara katean taian tembora ni kabuta te aonaaba, ae bukina te kueaea e rangi n tamaroa aneneana irouia. Tabeman a kaminoaki n te kamataata aei, n aki ota bwa berita aika tabu ao otenanti n te tembora a kairiira nakon reken te karietataaki. E tii kona ni mataata aio n te rongorongo ae kaokan te koaua ibukin teniua abanuea aika a mimitong. Ibukin korakoran ana tangira Tamara are i Karawa ibukiia natina ni kabane, E a tia ni katauraoi abanuea ake tabeua—n aron are e kabwarabwara ngkoananoa Unimwaane Quentin L. Cook.10
Ana Mwakuri ni Kamaiu Iesu Kristo a kona ni karaoi bwaai ni kabane ibukira. E a tia ni kaotia bwa E “kamimitonga te Tama, ao ni kamaiu ni kabane ana mwakuri baina.”11 Te kamaiuaki anne e reke n abanuea aika teniua aika a kakaokoro. Ti ataia man kaotioti aika ngkai bwa “ni kabane abanuea iai te tua aika anganaki.”12 Ae kakawaki:
“Ane e aki kona n ongeaba n tuan te abanuea ae te tiretio e aki kona moan mimitongin te tiretio.
“Ao ane e aki kona n ongeaba n tuan te abanuea ae te teretirio e aki kona moan mimitongin te teretirio.
“Ao ane e aki kona n ongeaba n tuan te abanuea ae te teretio e aki kona moan mimitongin te teretio.”13
N taekana teuana, n abanuea aika mimitong ti karekea n te Kabanea ni Motikitaeka are e barongaaki man tuua ake ti rinei ni maiuakin n ana baire n tangira Tamara are i Karawa. Iaan te baire anne iai abanuea aika a mwaiti bwa aonga natina ni kabane ni baireaki nakon abanuea are a na kona iai ni “maeka.”
II.
Ana reirei ao tuan ana Ekaretia te Uea are e a tia ni kaokaki a kamwakuraki koaua aika akea tokina n te kawai are e na kona ni bwanin ara atatai man ti ana baire Tamara are i Karawa ibukiia ni kabane natina.
Ngaia ae, ti karinea inaomatan temanna n rinerine. Angiina a ataa aei ana mwakuri ae korakora te Ekaretia n eutarake inaomataia aaro. Mwakuri aikai a buokia ni boutoka ana baire Tamara are i Karawa. Ti ukeuke ni buokiia ni kabane natina—tiaki tii kaain ara aro—ni kakukureiaki n reken oin inaomataia n rinerine.
N ae ti te arona, ti titirakinaki n tabetai bwa bukin tera ti kanakoia mitinare nakon aaba aika a mwaiti, riki bon ibuakoia te botanaomata aika Kiritian. Ti titirakinaki naba bukin tera ngkai ti anga ara ibuobuoki ae moan te korakora ibukin te botanaomata nakoia aomata aika tiaki kaain ara Ekaretia n akea reitakin aio ma aia mwakuri mitinare. Ti karaoa aio ibukina bwa e a tia n reireiniira te Uea n tabekiarake natina ni kabane kanga tarira ao mwaanera, ao ti kan ibuokanibwai ni kaubwaira ma aomata nako n te maiu n tamnei ao n te maiu n rabwata.
Te reirei ae akea tokina e katauraoa naba te taratara ae e onoti iaoia ataei. Rinanon te taratara aei ti noora karikaia ao ribanakiia ataei bwa mwakoron te baire ae mairoun te Atua. Bon te beku ae kakukurei man tabu ibukiia naake anganaki te mwaaka ni karaoia. Ngaia are, ti riai n reirei ao ni katani reirei ao waaki ake a karekea mwiin ae tamaroa ibukin karikirakean ao kakukureiaia ataei iaan ana babaire te Atua.
III.
Te kabane, Ana Ekaretia Iesu Kristo ibukiia Aika Itiaki ni Boong aika Kaitira e rang kinaaki riki bwa te Ekaretia ae e boboto iaon te utu. Ma ibukin te aki mataata e kakoauaki bwa kabotoan ara taratara iaon ara utu e aki tianaki nakon taian reitaki. Te reitaki ae akea tokina bon aan naba ara kamatebwai n aron te aro ae koaua. Ana mition te Ekaretia ae kaokaki bwa e na buokiia natin te Atua bwa aonga n tau ibukin tokin kawaia are e tangiria te Atua. Man kabooan maiura are e katauraoki man ana Mwakuri ni Kamaiu Kristo, a na karekea te maiu are akea tokina aomata ni kabane (te karietataaki n abanuea are te tiretio), are e taekinna Tinara ae Ewa “are e anga te Atua nakoia ni kabane aika ongeaba.”14 E korakora riki aio nakon te kamaiuaki. Beretitenti Russell M. Nelson e kauringira, “Inanon ana baire te Atua ae akea tokina, te kamaiuaki bon ana bwai temanna ma temanna; [ma] te karietataaki bon bwain te utu.”15
Ae kakawaki iroura bon ana kaotioti te Atua bwa e kona n reke te karietataaki rinanon te kakaonimaki nakon berita aika tabu n te mare ae akea tokina imarenan te mwaane ao te aine.16 Te reirei ane mairoun te Atua bukina ngkai ti reiakinna ae “rikin te aomata bon katein temanna ma temanna n te maiu are imwain aio, te maiu aei, ao kinakina ae akea tiana ao bukina.”17
Anne naba bukina ngkai te Uea e kaantaninga Ana Ekaretia ae kaokaki bwa e na kaitarai karawawata n te waaki n reitaki ao te tua n taenikai man Ana reirei n te mare imarenan te mwaane ao te aine ni kaitarai bitaki are e na kamangaoa ke ni bita tein karikam ke ni kaokoroa teim imarenan te mwaane ao te aine.
Nakoan te Ekaretia ae kaokaki iaon bwaai aikai e kauntaba te kakaitara. Ti mataata n anne. Ana baire Tamara are i Karawa e kariaia ibukin “kaitaraan bwaai ni kabane,”18 ao ana kakaitara Tatan ae moan te korakora e kairaki ni bwaai nako aika a rang ni kakaawaki n ana baire te Atua. N tokina, e ukora kaaitaraan te rikirake nakon te karietataki man kamangaoan te mare, aki kaungaan te kariki, ke kamangaoan rikim ni mwaane ke n aine. E ngae n anne, ti ataia bwa imwiin te tai ae bwanin, ana baire Tamara are i Karawa ae iai bukina e na bon aki bitaki. Kaangaanga aika onoti a kona ni bitaki, ao ana tua te Atua a kakoaua bwa n te tai ae bwanin, naake a kakaonimaki ake a kawakin aia berita aika tabu a tau ni karekei kakabwaia nako ake a tia ni beritanaki.19
Te anga reirei ae onoti man bongana e na buokiira ni katauraoira ibukin te maiu are akea tokina, “are te bwai n tituaraoi ae moan te korakora mai i buakon ana bwai n tituaraoi nako te Atua”20 bon te katanoata ibukin te utu n 1995.21 Rongorongona, a bon koaua, ni kaokoro ma tuua n taai aikai, te aro n totoko n aron te itataanga n aki mare ao te mare imarenan te mwaane ma te mwaane ao te aine ma te aine. Naake akea aia atatai raoi n ana baire Tamara are i Karawa ibukiia Natina a taku bwa te katanoata aei ibukin te utu bon akea riki nakon taekan bitakin te tua. Ni kaitara, ti kamatoa bwa te katanoata n te utu, e kateaki iaon te reirei ae nene ni matoa, e kamatata te aekaki ni itoman n te utu ike e mena iai te mwakoro ae moan te kakawaki ibukin rikirakera ae akea tokina ae kona n riki.
Anne te rongorongo ibukin te reirei ae onoti ao tuan ana Ekaretia Iesu Kristo ibukiia Aika Itiaki ni Boong aika Kaitira are e a tia ni kaokaki.
IV.
Inanon reitaki ao kaangaanga aika mwaiti inanon te maiu ae mamate aei, ti riai n reitaki ma aomata aika kaokoro ma ngaira. Ngkai taan iriira Kristo are a riai n tangiriia raora n aomata, ti riai ni maeka ma te rau ma naake aki kakoaua bwa ti karaoia. Ngaira ni kabane bon natin Tamara are i Karawa ae tatangira. Ibukira ni kabane, E a tia ni bairea te maiu imwiin te mate ao, n te kabane, bon te abanuea ae mimitong. Te Atua e tangiriira ni kabane bwa ti na kekeiaki ibukin Ana kakabwaia aika moan rietaata aika a kona n reke man kawakinan Ana tua, berita aika tabu, ao otenanti, ake ni kabane a toki inanon Ana tembora aika tabu ake a tia ni kateaki ni kabuta te aonaaba. Ti riai n ukeria n tibwauai koaua aika akea tokiia aikai ma tabeman. Ma n ara tangira are ti bae iai irouia kaain rarikira ni kabane, ti na butimwaea aia baire n taainako. N aron ana reirei te burabeti man Ana Boki Moomon, ti riai ni waaki nako, ni karekea “tangiran te Atua ma aomata ni kabane.”22
N aron are e takeinna Beretitenti Russel M, Nelson n ara maungatabu ae nako; “Bon akea tetaina n rongorongon te aonaaba ngke ataakin ara Tia Kamaiu e a rangi ni kakawaki nakon temanna ao ni kaineti nakon tamneia aomata nako. … Ana reirei ae itiaki Kristo e mwaakaroiroi. E bitii maiuia naake a mataata iai ao n ukoria ni karaoia inanon maiun teuanne ke neienne.”23
Ke ti na bane ni karaoi nanon reirei akana a tabu inanon maiura, I tataro n aran Iesu Kristo, amen.