Ara Kouru bon te Rairaki
Akea onean mwiin te tai ae ko kabanea ni koroboki aika a tabu, kakauongo n ana wirikiriki te Tamnei ae Raoiroi ae kaineti nakoim
Inanon teniua te ririki ngkai, tia bon tia ni kaai ni mwananga bwa kaain ana Ekaretia te Uea. Bon Okitobwa 2018 ngke te Moan Beretitentii ao te Kooram n Abotoro n te Tengaun ma Uomana a kaoira bwa ti na reiakina Iesu Kristo man kamatebwaian koroboki aika a tabu n te aro ae boou man anai nano, n Nakomai, Irirai bwa te bwai ni kairi.
N te mwananga n aron anne, e rangi n tamaroa te motirawa teutana n taai tabetai n tuoi ara kakamwakuri ao ni kakoaua bwa ti bon teimatoa ni waaki nakon ara kouru.
Ara Kouru bon te Rairaki
Iangoa kakawakin te rongorongo man te kabwarabwara n Nakomai, Iriirai:
Te kantaninga ni kabane ibukin reiakinan te euangkerio ao te anga reirei bon ibukin kakorakoraan rairikira nakon Tamara ae i Karawa ao Iesu Kristo. …
“… Ma te aeka n reirei n te euangkerio are e kakorakora ara onimaki ao ni kairiira nakon te kakai nakon te rairaki aki riki n te tai naba arei. E riaon riki ae ti n te kiratiruum ma e nakon nanora ao mweengara. E kainnanoa te mwakuri ae teimatoa, ni katoabong n ota iai ao ni maiuakina te euangkerio. Reiakinan te euangkerio are e kairira nakon te rairaki ni koaua e kainanoa ana ibuobuoki te Tamnei ae Raoiroi. ”1
Bon aio te kakai ae ti ukoria—temanna e reke ana taneiai man koroboki aika a tabu2 ao te taneiai anne e kakabwaiaaki man ana kairiri te Tamnei ae Raoiroi. Taneiei akanne bon matoan ann rairakira aika a rangi ni kakawaki nakon te Tia Kamaiu. N aron are e a tibwa tia ni kauringiira Beretitenti Russell M. Nelson, aan tameneira ana riai ni kamatoaaki n taainako.3 Maanin-matoan rarirakira bon te waaki ae reitinako inanon maium.4 Te Rairaki Bon Ara Kouru.
Bwa e na bon mwakuri raoi, am taneiai ma koroboki aika a tabu bon mairoum.5 Wareware ao kakauongo nakon ana taneiai temanna ao ana nonoori e kona n ibuobuoki, ma anne e aki uota korakoran te rairaki. Akea onean mwiin te tai ae ko kabanea inanon koroboki aika a tabu, kakauongo n ana maroro te Tamnei ae Raoiroi nakoim.
Tera ae reiakinai te Tamnei ae Raoiroi?
Ni katoa wiiki ngkana I kauka Nakomai, Irirai I korea te titiraki aio ieta ni baan te beeba: “Tera ae reireiai te Tamnei ae Raoiroi n te wiiki aei ngkai I warekii mwakoro aikai?”
Ngkai I kamwatebwai koroboki aika tabu, I manga iangoa riki te titiraki anne ni kaokiokia. N aki iremwe, iango mairoun te tamnei ana roko, ao n na koroi n aubokinreirei.
Ngkai, N na kanga n ataia bwa I reiakinaki iroun te Tamnei ae Raoiroi? Eng, e bon ririki n aanga aika a uarereke ao ni bebete. N taai tabetai kibuntaeka n koroboki aika a tabu a taraa n nako man baan te boki nakon au kantaninga. N taai tabetai, I namakina au iango bwa e kamatataaki ma te ota ae raababa nakon reirein te euangkerio. I namakina naba ana mwakuri te Tamnei ae Raoiroi ngke kainabau Anne Marie, ao ngkai ti maroroakina te bwai are ti na warekia. Ana iango a kaoa te Tamnei n tainako.
Te Burabeti ao te Toa are te Riao
N te ririki aei ti kamatebwaia te O Tetemanti— koroboki aika a tabu aika a kaona tamneira ma te ota. Ngkai ti wareka te O Tetemanti, I namakinna ae I kabanea au tai ma kairi aika tamaroa: Atam, Ewa, Enoka, Aberaam, ao a bati riki.
Te wiiki aio, ngkai ti kamatebwaia Te Otinako mwakorona 7–13, ti reiakina aron te Uea ni kainaomataia natin Iteraera man bubua n ririki n tautoronaki i Aikubita. Ti wareka rongorongon ruaia taian aoraki—ruaiua kaotioti aika a kakaongora ni mwaakan te Atua—are e norii Bwarao n aki bitaki nanona iai.
Imwiina te Uea e a tuanga Ana Burabeti, Moote, taekan te katebwina n aoraki—ao ana kanga utu iaon Iteraera ni katauraoia imwaina. Ngkai mwakoron te mwakuri are a ana arana bwa te Toa are te Riao, kain Iteraera a na kareana te tiibu te mwaane, ae akea kairuana. Imwiina mwaaken aia mataroa ma raraan te tiibu te tei. E berita te Uea bwa auti ake a bane ni mwaakenaki ma te raraa ana kamanoaki man te aoraki ae kakamaaku are iaon kawaina n roko.
E taekinaki ni koroboki aika a tabu, “Ao natin Iteraera… a karaoa are e tua te Uea … nakon Moote” (Otinako 12:28). Iai te bwai ae rangi ni mwaaka man te rongorongo iaon te ongotaeka.
Ibukina bwa tibun Iteraera a ongotaeka ni kaetieti mairoun Moote ao ni karaoia ma te onimaki, a kamaiuaki man aoraki ao, n tokina, a kainaomataaki man te tautoronaki.
Ngaia are tera ae reiakinai te Tamnei ae Raoiroi ni mwakoro aikai n te wiiki aei?
Aikai tabeua iango aika a roko n au iango:
-
E mwakuri te Uea rinanoia Ana burabeti ni kamanoia ao ni kamaiua Ana aomata.
-
Te onimaki ao te nanorinano n ongo irouia burabeti e rimwiiaki n te kamanoaki ao te kaotinakoaki.
-
Te rara iaon te mataroa bon te kanikina ae noraki n te onimaki iroun Iesu Kristo, ana Tiibu te Tei te Atua.
Te Burabeti ao ana Berita nako te Uea
I rangi ni kakatonga n nakoraoin ana anga te Uea ni kaabwaiaia Ana aomata n te O Tetemanti ao ana kawai are e kakabwaiaia Ana aomata n bong aikai.
Ngke ana burabeti ae maeu te Uea, Beretitenti Nelson, e kaota nakoira Nakomai, Irirai bwa te anga ni kamatebwaian koroboki aika a tabu, e kaoira bwa ti na bita mwengara nakon taabo ni katantan n te onimaki ao n reiakina te euangkerio.
Imwiina e beritani aua kakabwaia aika a onoti:
-
am Tabati bwa boong aika kakukurei,
-
ami ataei a na rangi n ingainga n reirei ao ni maiuakin ana reirei te Tia Kamaiu,
-
Ana kairoro te tia kakaitara ni maium ao inanon mweengam a na kerikaaki, ao
-
bitaki aikai n am utu a na bon korakora ao ni kamatoaira.6
Ngkai, tiaki norii rongorongo mai irouia naake a rinanon Toan te Riao ma Moote i Aikubita. E ngae n anne, e rangi ni bati koaua mairouia Aika Itiaki aika, n te onimaki naba anne, a ruamwiin ana maroro Beretitenti Nelson n te bong aei ni butimwaai kakabwaia akanne.
Aikai tabeua kakoaua akanne:
Te tina ae kairake e taku: “Ti taetae ibukin Kristo ao kimwareirei inanon Kristo ni mwengara. I bon irou aei te kakabwaia ae korakora—bwa natiu a kona n rikirake ma maroro n te ekaretia n te mwenga are e na kaania riki nakon te Tia Kamaiu, ”7
Te tari ae e a mmwaane e taku bwa kamatebwaian koroboki aika a Tabu rinanon Nakomai, Irirai “bon te kawai ae kaonaki n te ota are e buokiira n norii reirein te euangkerio aika a tau ibukin tamneira ao arora.”8
Te buu te aine ae ataei e kabwarabwarai kakabwaia n ana mare: “I a konaa n ataa raoi nanon kainabau, ao ni kauka riki nanou nakoina ngkai ti kaai ni kamatebwai .”9
Te tina n te utu ae bubura e nora te bitaki ae korakora n reiakinan ana utu. E taekinna “Ngkai I a noria, ai aron ae I katanga te biaano ma nangoan ni bai ibukin te tinoo. I rinanon te katangana, ma te anene e aki rangi n eti. Ngkai akea nangoan baiu, ma ngkai au katangitang e tuai raoi tangiraoi, I kona n ongo te kaokoro. Nakomai, Irirai e a tia n anganai te nooraba, te konabwai, ao te kaantaninga.”10
Te buu te mwaane ae kairake e taku: “Baika a rangi ni moanibwai ni mwengau a moanna ni mataata riki ngkai I a karaoa Nakomai, Irirai bwa kanoan au moaningaabong. Te kamatebwai e a kairai n iangoi riki taekan bwaai aika a kakawaki nakoiu, n aron te tembora, au reitaki ma buu, ao weteau. I kakatonga bwa mwengau ai te tabo ni katantan are e moanibwai iai te Atua.”11
E tibwatibwa te titita “Au taneiai ni katoabong ma Nakomai, Irirai a aki rangi ni manena, ma I kona n noria bwa I a bitaki inanon taina man kamatebwaiakan koroboki aika a tabu, ae aki bwabwaka. E karinanoai te aeka ni kamatebwai anne, e reireinai, ao ni bitai teutana mwiin teutana.”12
E taku te mitinare ae bane ana tai: “Te burokuraem ae Nakomai, Irirai e a uarokoai riki nakon kamatebwaian koroboki aika a tabu are I kakaraoia n au mition, ao I a tia ni kona ni mwaing man ti te kamwatebwai ae karinanaki nakon waaki aika a karikirakea ataan te Atua.”13
E taku te tari: “I namakina ae I a karina te Tamnei ae Raoiroi inanon maiu ao n namakina ana kairiri te Atua mai i karawa ni karaoan babaire. I karekei riki maroroo aika a kakawaki ni kaineti ma te tamaroa n Ana reirei Kristo ao Ana Mwakuri ni kamaiu.”14
Te tei ae itiua ana ririki e tibwaa aio: “E a kaan bwabetitoakiu, ao Nakomai, Irirai e katauraoai. Ngai ma au utu ti maroro iaon te bwabetito, ao e aki nako nanou ibukin karaon te bwabetito ngkai. Nakomai, Irirai e buoka te Tamnei ae Raoiroi n roko i nanou, ao I namakina te abuee ngkana I wareki koroboki aika a tabu.”15
Ao ni kabaneana, mairoun te tina ae bati natina: ” Ngkai ti kamatebwaia ana taeka te Atua, E a tia ni buoka au utu ni mwaing man te raraoma nakon te korakora; man kataaki ao kanganga nakon te kamaiuaki; man te kauntaeka ao kabuakaka nakon te tangira ao te rau; ao man ana kairoro te kakaitara nakon ana waaki te Atua.16
Aikai ao tabeman riki, taan irira Kristo aika a kakaonimaki a katuka kanikinaean raraan ana Tiibu te Tei te Atua ni mataroan mwengaia. A kaotiota nanoia n tatauraoi ni irira te tia Kamaiu. E roko moa te onimaki imwaain te kakai. Bon aio ana kakai te aomata ae e reke ana taneiai man koroboki aika a tabu ao te taneiai anne e kakabwaiaaki man ana kairiri te Tamnei ae Raoiroi.
Ngkai ti kamwatebwai koroboki aika tabu, akea te rongo ni maiura. N aron ae taku Nibwaai, “Ao ane e ongo nakon ana taeka te Atua, ao n taua ni kamatoaa, ao e na bon aki mamate; ao e naaki naba rotaki n taian kariri ao kanoan ana kai ni katebe aika a ura teuare e buakaka ma ni kamatakiaki, ni kairia nakon te mate” (1 Nibwaai 15:24).
N taai ake ngkoa, ngke tibun Iteraera a irira ana kairiri te Uea are e kanakoa rinanon te burabeti Moote, a kakabwaiaki ma te kamanoaki ao te inaomata. Ngkai, ti irira ana kawai te Uea are ti karekea rinanon ara burabeti ae maiu, Beretitenti Nelson, ti kaai ni kakabwaiaaki man te rairaki n nanora ao katanan mwengara.
I ataia bwa e maiu Iesu Kristo. Aio Ana Ekaretia, ae kaokaki rinanon te Burabeti Iotebwa Timiti. Beretitenti Russell M. Nelson bon Ana burabeti te Uea ae maiu. I tangiriia ao I buotokaia. N aran Iesu Kristo, amen.