Reiakina te Riki n Toronibwai nakoia Ataei ao te Roronrikirake
Ti a iriira ara Tia Kamaiu Iesu Kristo, ao Ana euangkerio ni katoronibwaira inanon maiura ao n reiakina aio nakoia natira ao te roronrikirake.
N na taetae iaon te riki n toronibwai ao arona ni kona n reikainaki nakoia ataei ao te roronrikirake. Te riki n toronibwai e kona n taraaki bwa oin te kantaninga ibukia ikawai. I ataia bwa e na tamaroa riki irouia ikawai irakin te kawai n toronibwai ngkana a tia n reiakinaki ana euangkerio Iesu Kristo ao n tia ni irii nanon reirei ao tuana mangke a uarereke ao ngkai a kairake inanon te mweenga.
Kabwarabwarana ae tamaroa n te katoto bon maiuakinana. Wilfried Vanie, tarina ao mwanena aika itiman, ao tinana e kaina te Ekaretia i Abidjan, Ivory Coast, ngke onoua ana ririki. E bwabetitoaki ngke waniua ana ririki. Tamana, are te tia kareke maiu n te utu, e mate ngke tebwi ma teuana ana ririki Wilfried.
E ngae ngke e karawawataki aia utu, Wilfried e baireia bwa e na reitinako n reirei ma ana kaunganano tinana ao ana boutoka te Ekaretia. E anga beebwa man te kauarinan ao e karaoa ana mwakuri ni mitinare ae bwanin i Ghana Cape Coast Mition, are e reiakinaki iai te Ingiriti. Imwiin ana mwakuri ni mitinare, e nakon te kura n reirei ae rietata ao e karekea ana beeba ae te Diploma n te akaunti ao n aron tauan te mwane. E ngae ngke e kaangaanga karekean te mwakuri n te aekaki ni mwakuri aei, e reke ana mwakuri n te tourism ao hospitality.
E waaki bwa te tia butimwaaia iruwa n te 5-star hotel, ma nanona ni kan rikirake e a kairoroa bwa e na reiakinaki riki ni karokoa e a riki bwa te tia butimwaaia iruwa n taetae aika a mwaiti ikekei. Ngke e kaukaki te Oteero ae boou, e a kamwakuraki bwa te oteta n te bong. Imwiina, e karin n te BYU–Pathway are e karaoki n te Aonaba ni kabuta ao ngkai e a karaoa ana kooti ibukin karekean ana beeba n te hospitality ao tourism management. Iai ana iango bwa e na riki bwa te manatia n te oteero are te kabanea n tamaroa n te bong teuana. Wilfried e a kona ni kamaiua buuna ao uoman natina, ao e a kona naba ni buoka tinana ma tarina ao mwanena. N te tai aei e beku n te Ekaretia bwa te kauntira ae rietatata n te titeiki.
Te riki n toronibwai e kabwarabwaraaki bwa, “te konabwai, te motinnano, ao te kekeiaki ni karekei bwaai aika a kainanoaki n te maiu n tamnei ao n rabwata bon ibukim ao te utu.”1 Kataakin te riki n toronibwai bon mwakoron tibwangara iaon kawain te berita are kairiira rikaaki nakon Tamara are i Karawa ao natina ae Iesu Kristo. E na kakorakora ara onimaki iroun Iesu Kristo ao ni kimwareirei ni kabaeaki nakoina rinanon berita ao otenanti n te kamaiuaki ao te karietataki. Te riki n toronibwai bon reirein ana euangkerio Iesu Kristo, tiaki te burokuraem. Bon te waaki ae reitinako inanon maium, tiaki te bwai ae karaoaki ti tetaina.
Ti riki n toronibwai inanon maiura man rikirakera ni korakora n te maiu n tamnei, kanakoraoa marurungin rabwata ao ara iango, karekean ara reirei ao ara mwakuri, ao n tauraoi n te maiu n rabwata.2 Iai tian te mwakukri aei inanon maiura? Akea, bon te waaki ae reitinako inanon te maiu n reiakinaki, n rikirake, ao ni mwakuri. Akea tokina, e reitinako, karaoana ni katoabong.
Ti na kanga n reireia reirein ao tuan te riki n toronibwai nakoia natira ao te roronrikirake? Te kawai teuana ae moan te kakaawaki bon karaoan nanon tua n reirei n taainako man te burokuraem ibukin karikirakeaia Ataei ao te Roronrikirake. Kaaro ao nati a reiakina ana euangkerio Iesu Kristo, karaoan ibuobuoki ao waaki ni kakukurei, ao ni uaia ni mwakuri ni mwakoro te rikirake ae aua are ibukin karikirakean temanna ae e onoti ibukiia ataei nako. Ai tiaki te burokuraem ae katauaki ibukiia rooro nako.
N te Boki ni Kairi ibukia Ataei e taku, “Ngke roromi Iesu, E reiakinaki ao n rikirake. Ngkami kam reiakinaki ao n rikirake naba. E taekinaki n koroboki aika tabu: ‘Ao E rikirake Iesu n rabakau ma n ikawai, ma n akoaki iroun te Atua ma aomata’ (Ruka 2:52).”3 Te kibu aei e kaineti nakon waaki n te rikirake ao te reiakinaki n te maiu n tamnei, n akoaki iroun te Atua, te waaki ni reitaki, n akoaki irouia aomata, te waaki n te maiu n rabwata, rietam n am mwakuri, ao te waaki n te wanawana, rabakaum. Rikirake ni itera aikai a kaineti nakoira ni kabane, n aki taraaki te roro. Nningai ae tina reireiniia iai? I nanon Te Tua Kaua 6:6–7 ti warekia:
“Ao a na mena inanom taeka aikai, ake I tuangko n te bong aei:
“Ao ko na reirei’a raoi natim n aikai, ma n taekin ngkana ko tekateka i nanon am auti, ao n nakonakom i nanon te kawai, ao ni wenem, ao n teirakem.”
Ti reirei bwaai aikai nakoia natira man ara banna aika raraoi, man mwakuri ao n ibuobuoki ma ngaiia, kamatebwai koroboki aika tabu, ao man irakin ana reirei Iesu Kristo ake a anga reirei iai burabeti.
I a tia n taekinna bwa n aia burokuraem Ataei ao te Roronrikirake, ataei a rinei kouru aika a kakaokoro man mwakoro ake aua n te rikirake. E kakaawaki bwa a na katei oin aia kouru ni katoai tabo akanne. Kaaro ao taan kairiiri a kona n reirei, marooro ao ni boutoka.
Te katoto, tibura te aine Miranda e rang unga ni karikirakea maiuna n tamnei n iriiran ana kiraati n te tieminari ni katoa ingabong. E anaaki nanona man ongoraana ni marooro aika tamaroa mairouia ataein ana uoote n te tieminari. E aki kakautia tinana ibukin ana kiraati. Ibon irouna, e uti ao e reitaki n te videoconference n te tai are e baireaki ae 6:20 n te moaningabong ibukina bwa e karekea te anua ae raoiroi are e buokia bwa e na kona ni karaoia. Au karo a kaongoai bwa Miranda e a rang bwarantiko riki ngkana e kawariia, ngkai e a rikirake n atatai. Aikai reirei ibukin te maiu ao te rikirake aika a kona n nooraki mwiia.
Kaaro, tibu, taan kairiiri, ao rao a ibuobuoki n aron rikirakeia ataei. Taari ao Mwaane aika a bwanin aia mwakuri ni ibuobuoki, ni ikotaki ma taan kairiiri n te nakoanibonga ao bootaki n te uoote, a katauraoi boutoka. “Te Utu: Te Katanoata nakon te Aonaaba” e taku: “N aron ana babaire te Atua, kaaro boni ngaia ake a na kairiiri n te utu n te tangira ao te kororaoi ao bon tabeia ni karekei baika a riai ibukin te maiu ao ni kawakinia aia utu. Oin tabeia tiina bon te tararuaia natiia. Inanon mwiokoakiia aika tabu aikai, a katabeaki kaaro ao tiina bwa a na uaia ni ibuobuoki imarenaia bwa rao aika ti te arona ngaia. … Te utu ae bwanin a riai n anga te boutoka ngkana e kainanoaki.”4 Te kabanea n rain anne e kaineti nakoia tibu, ibuakoia ake tabeman.
Ngke ti beku i Aberika Maeao, kainnabau, Nuria e a tia ni karaoa te ibuobuoki ae rangi n tamaroa nakoia ao n teimatoa n reitaki ma ara utu ao tibura n tabo nako. E karaoa aei man kabonganaakin rabakau aika a boou. E wareki booki nakoia tibuna aika uarereke. E reireiniia tibura aine ake a ikawai rongorono n aron riki karakinan ara utu, tiaienti, rongorongon Puerto Rico, Taekan te Onimaki, ao ana euangkerio Iesu Kristo. Te raroa ni boong aikai e aki tiatiana te reitaki, n riki bwa kaaina, ao ni ibuobuoki nakoia, ao n reireiniia te roro ae rikirake n ara utu nako. I raona naba Nuria ngkana I kona n reireiniia tibura aika kakaawaki, n tangiriia, ao ni kamonaia ao ni kangareia.
Kam riai ni kinai katiteuanaaki aika a karekeaki man ana kairiri te tamnei imarenan karikirakeaia Ataei ao te Roronrikirake ao katean te riki n toronibwai. Man mwakoro ake aua ni karikirake a kuri n rang n titebo. Korakoran te maiu n tamnei n te toronibwai e irekereke ma aroia Ataei ao te Roronrikirake n tamnei. Marurungin te rabwata ao n te iango n te riki n toronibwai e toma ma te waaki ni maiun te rabwata ao n te reitaki irouia Ataei ao te Roronrikirake. Te reirei, te mwakuri, ao te tatauraoi n te toronibwai bon titebo ma te waaki iaon te wanawana n aia burokuraem Ataei ao te Roronrikirake.
Ni kainana, ti bia iriira ara tia Kamaiu Iesu Kristo, ao Ana euangkerio n riki n toronibwai inanon maiura ao n reiakina aei nakoia natira ao te roronrikirake. Ti kona ni katamaroa riki aei man
-
arora n riki bwa banna ni katoto ni buokiia aomata.
-
maiuakina ao n reiakina reirein taian tua ao tuan te toronibwai, ao
-
ongeaba nakon tua ni katea te toronibwai bwa mwakoron ana euangkerio Iesu Kristo.
Reirei ao Berita aika Tabu 104:15–16 e taku:
“Ao bon au kantaninga bwa N na katauraoi kainnanoia au aomata aika itiaki, bwa bwaai ni kabane bon au bwai.
“Ma e riai ni karaoaki n oin au kawai; ao nooria aio te kawai are Ngai, te Uea, I a tia n tua bwa N na katauraoi kainnanoia au aomata aika itiaki, bwa kainnano a na karietaaki, bwa man aei a na karinanoaki kaubwai.”
Aio bon ana Ekaretia Iesu Kristo. Ana euangkerio e kakabwaiaia utu ikai iaon te aba ao n te maiu ae akea tokina. E kairiira inanon maiura ngkai ti kataia n riki bwa utu ae akea tokiia. I ataia e koaua aei. N aran Iesu Kristo, amen.