Tabekarake Nanom ao Kimwareirei
Ti bungiaki n te tai aei ibukin ara mwakuri ibukin Ueana, bwa ti na manga kaoka Iteraera.
Ngke e taetae te Uea nakon Thomas B. Marsh, temanna ae e a tibwa rairaki, e kaungaa nanona man taku, “Tabekarake nanom ao kimwareirei, bwa e a roko auan am mition” (Reirei ao Berita aika Tabu 31:3).
I kakoaua bwa e kona n riki te kakao aei, bwa te kaunganano nakoia kaain te Ekaretia. E koaua, ti a bane n tia ni karekea te tibwanga mairoun Tamara are i Karawa n ikotakin Iteraera n iteran te roki ake uoua.
“Te Ikoikotaki anne,” e taekinna Beretitenti Russell M. Nelson, “bon te bwai ae moan te kakawaki ae e a karaoaki ngkai n te aonaaba. Akea kabotauan buburana, akea kabotauan kakawakina, akea kabotauana ni mimitongina.”1
Eng, e boni bati te titbwanga ae tamaroa n te aonaba. E kangaanga atongakiia ni kabane. Ma ko aki tangiria n ibuobuoki n te mwakuri ae korakora nakon am konabwai ao ike am ibuobuoki e na rangi n manena? E reke kakabwaia aika akea tokiia irouia aomata ni bane man te ikotaki. A kona aomata n rooro nako n ibuobuoki n te mwakuri aei n aki tukaki n aron maiuia ma aia tabo ni maeka. Bon akea riki te mwakuri ae mwaneia aomata ni bane n te aonaba aei.
E taku Beretitenti Nelson ngke e marooro nakoia kairake bwa “e a tia Tamara are i Karawa ni kawakinia Tamnei aika bati man rine—tao … Ana kabanea ni korakora n tiim—ibukin te kabanea n tetere aei. Tamnei aika rine akanne—taan takakaro aika bane aroia, booto aikanne—bon ngkami!”2
Eng, kam a tia ni katauraoaki imwain te maiu aei ao ni bungiaki ngkai bwa kam na ibuobuoki n te mwakuri ae kakaawaki n ikotakin Iteraera n iteran te roki ake uoua ni boong aika kaitira (taraa Reirei ao Berita aika Tabu 138:53–56).
Bukin tera e rangi ni kakawaki te mwakuri aei? Bukina bwa “e korakora kakawakia aomata imatan te Atua” (Reirei ao Berita aika Tabu 18:10). Ao ibukina bwa “ane e kakoaua [Iesu Kristo], ma ni bwabetitoaki, ao e na boni kamaiuaki; ao … ni bwaina uean te Atua” (3 Nibwaai 11:33). Irarikin anne, “ni kabane are [ana] bwai Tamau a na anganaki” naake a karekei Ana otenanti ao ni kawakin Ana berita (Reirei ao Berita aika Tabu 84:38). Irarikin anne, “a karako taani makuri” (Ruka 10:2).
Ti inanon Ana Ekaretia Iesu Kristo Ibukia aika Itiaki ni Boong aika Kaitira ae reke iai, te kariaiakaki, ao te kawai n anga te kakabwaia nakoia aomata, aika a maiu ke a tia ni mate.
N aron are e taekinna Beretitenti Nelson: “N te tai are ko karaoa iai te bwai teuana are buoka temanna—n iteran te rabuna are teuana—ni karaoi berita aika tabu ma te Atua ao ni karekei aia otenanti ni bwabetito ao n te tembora aika kakawaki, ko buokai ikotan te bata ae Iteraera. Bon te bwai ae bebete n aron anne.”3
Ngkai e rawata kawai n ibuobuoki n te ikoikotaki, I tangiria ni katurua au maroro iaon teuana te kawai: te mwakuri ni mitinare. E bati iroumi, ae a na mwananga ni mitinare. Irouia temwangina, a riki bwa mitinare n ibuobuoki. Ma te aonaaba e kataia ni kakeai nanoia kairake man te mwakuri ae moan te tabu aei man kabonganaan te maaku ma te tabeaianga.
Bwaai riki tabeua aika a totoko bon butinakon te aoraki, kitanan te mwakuri ae tamaroa, taonakin te reirei, ke tangiran raom. E bon okoro te kakaewenako nakon temanna ma temanna. A kona n roko totoko akanne ni moan te mwakuri ibukin te Uea, ao rinerine aika e tabwanin am atatai iai imwin te tai e bon aki bebete iangoana n te moan tai.
I ataia man au taneiai ana iango te ataeinimwaane ae iai ana kangaanga. Ngke I katauraoai n nakon au mition, tabeua kairoro aika kamimi a kataia ni kabwara nanou. Teuana bon au tia karao wii. Ngke e ataia bwa n na nako ni mitinare, e kataia ni kabwara nanou man te nako ni mitinare. Bon akea atakina naba teutana ae au tia karao wi aei e kaitaraa te Ekaretia.
Totokoan au reirei e rangi ni kangaanga naba arona. Ngke I bubuti ibukin au motirawa ibukin uoua te ririki man au burokuraem n te iuniwetiri, I kaongoaki bwa e aki kona ni karaoaki. E na bon kamaunaaki naba au tabo n te iuniwetiri ngkana I aki oki imwiin teuana te ririki. I Brazil, e bon rangi ni matoatoa arona ngkai te bwai ae kainnanoaki ibukin te karinrin nakon ana burokuraem te iuniwetiri bon te ukeuke ae rangi ni kangaanga ao ni kakaiangatoa.
Imwiin teimatoau ni bubutii, ao e kuri bwara nanou ngke I kaongoaki bwa imwiin kitanan te reirei n te maan ae teuana te ririki, ao I kona ni bubuti ibukin kariaiakau n oki iaan bukina aika riai. E kona ni kariaiakaki ke e aki. I maaku n te iango are n na manga karaoa te ukeuke ni karinrin ae moan te kangaanga imwiin kitanan te reirei inanon te maan ae uoua te ririki.
E nang boboto au iango iroun temanna te ataeinnaine. Tabeman raoraou ti tebo naba nanoia iaon anne. I iango bon irou, “Ngkana I nako n au mition, n na karika au kangaanga.”
Ma te Uea Iesu Kristo e kaunga nanou bwa n na aki maaka te bwai ae na riki nakon taai aika imwaiu ngkana I teimatoa ni beku Ibukina ma nanou ni kabane.
Iai naba ana mition ae na kakoroa bukina. Ni bon oin Ana taeka, ao E kabwarabwara, “Ba I ruo mai karawa, tiaki I bukin karaoan oin nanou, ma bon i bukin karaoan nanon Teuare kanakomaiai” (Ioane 6:38). Ma e bebete Ana mition? E bon aki. Karawawataakina, are bon kanoan Ana mition ae kakawaki, e Karikia, “ae te Atua, are te kabanea ni korakora i buakora ni kabane, bwa E na ruru ni maraki, ao n tiinako te rara man bwangabwangan kunna, ao n rawaawata n te rabwata ao te tamnei—ao n tangiria bwa [E] na aki nimma te mwangko ae e mao, ao ni keerikaaki—
“E ngae n anne, ana bwai te Tama te mimitong. ao [E] anaia ao e katia [Ana] katauraoi ibukia natia aomata” (Reirei ao Berita aika Tabu 19:18–19).
Karaoan te mition ae bwanin taina e na taraa ni kangaanga nakoira. Tao e na kainnanoaki ae ti na katikui taekan bwaai aika kakawaki n te tai moa aei. Ni koauana ao te Uea e ataa te bwai aei, ao E na memena irarikira n tainako.
Ni koauana, n aia rongorongo nakoia mitinare inanon Tataekina Au Euangkerio, a berita kaain te Moan Beretitentii, “Ao e na kabooi mwiin am mwakuri ao e na bati ni Kakabwaiako te Uea ngkai ko nanorinano ao n tataromwaaka inanon am tai ni beku Ibukina.”4 E bon koaua bwa a bane ni kakabwaiaakaki natin te Atua ni kabane, n te anga teuana ma teuana, ma bon iai te kaokoro imarenan ae ko kakabwaiakaki ao ae ko kakabwaiakaki n ae mwaiti inanon Ana mwakuri.
Ko uringii ngkoa taian kakaewenako ake I taku n au iango bwa I kaitara ma ngaai imwain au mition? Te tia karao wi? E reke temanna. Au reirei ae rietata? E reke buokau irouia. Ko uringa te ataeinnaine arei? E mare ma temanna raoraou ae moan te tamaroa.
Ma ni koauana e kakabwaiaai te Atua n ae mwaiti. Ao I reiakinna bwa e kona n roko Ana kakabwaia te Uea n aanga aika kakaokoro ma are ti kantaningaia. E koaua, Ana iango bon tiaki ara iango (taraa Itaia 55:8–9).
Mai ibuakon kakabwaia aika rangi ni mwaiti ake I a tia ni karekei mai Irouna man mwiin au mwakuri ni mitinare bon au onimaki ae korakora iroun Iesu Kristo ao Ana mwakuri ni kamaiu ao te atatai ao te koaua ae korakora man Ana reirei, n te aro ae Iaaki kona n ukaki nako n “te angi nako ae te reirei nako” (I-Ebeto 4:14). E bua makaakin te angareirei. Au konabwai ni kaitarai kakaewenako ake imwaiu e a korakora riki. Rinanon mamatakuakinakiia aomata ma utu ake I reireiniia ngke I mitiniare, ao I ataia bwa a bon koaua ana reirei te Atua ngke E taekinna bwa te bure e aki uota te kukurei ni koaua ao te ongeaba nakon ana tua te Atua e buokiira ni kanakoraoi maiura n rabwata ao n tamnei (taraa Motiaea 2:41; Aramwa 41:10). Ao I reiakinna naba bwa te Atua bon Atuan te kakai (taraa Moomon 9).
Bwaai ni kabane aikai a bon riki bwa buokau ni katauraoai nakon arou n ikawai, n ikotaki ma arou ngkana I mare ao n riki bwa te karo, n au beku ibukin te Ekaretia, ao n au waaki ni mwakuri ao ni maiu ibuakoia aomata.
Imwiin au mition, ao I karekea te ungannano ae korakora ni kaotai bwa te tia iriira Iesu Kristo ao Ana Ekaretia inanon au waaki nako ao nakoia aomata, n ikotaki ma tibwauaakin te euangkero nakon te aine ae botonaine are e nang riki bwa buu ae kawakina arona, e wanawana, e uota te kakukurei n riki bwa toau ibukin te maiu ae akea tokina, ao bon ngaia naba otan maiu.
Ao eng, e bati ana kakabwaia te Atua nakoiu, n riaon are I a tia n iangoia, n aron ae E kona naba n anganiia aika “a nanorinano ao ni mwakuri mwaaka inanon aia tataro Ibukina.” I kakaitau n aki toki nakon te Atua ibukin Raoiroina.
E bon bitaki tein maiu man au mition. I ataia bwa e materaoi korakorau n onimakina te Atua, n onimakina Ana ataibwai ma Ana nanoanga ao Ana berita. E koaua, bon Ngaia Tamara, ao bon akea au nanokokoraki, bwa E tangira ae tamaroa ibukira.
Nakoia ataein te roro n rikirake n te aonaaba, I reita au kakao nakoimi bwa are e a tia ara burebeti, ae Beretitenti Nelson, n angani ngkami “bwa kam na riki bwa kaain ana taanga ni buaka te Uea ibukin kaokan Iteraera.” E taku Beretitenti Nelson:
“Bon akea mwiina ae korakora. Bon akea.
“Te ikoikoti aei e rangi ni kakaawaki ibukimi. Bon aio te mwakuri are kam a karokoaki iai nako aon te aba.”5
Ti bungiaki n te tai aei ibukin ara mwakuri ibukin Ueana, bwa ti na manga kaoka Iteraera. Ti na aitara ma kakaewenako aika mwaiti inanon ara tai ni mwakuri ni mitinare ae bwanin taina, ma bon Ngaia ae Ara uea ae ti na katotoongnga ao te tia kairiira inanon taai aikai. E ataia bwa aekakira te mition ae rangi ni kangaanga arona. Man Ana ibuobuoki, ao ti kona ni karaoi bwaai aika kangaanga. E na memena irarikira (taraa Reirei ao Berita aika Tabu 84:88), ao E na bati ana kakabwaia nakoira ngkana ti beku Ibukina.
Ma ibukin aei, ao I aki boou n ana taeka te Uea nakon Thomas B. Marsh are bon kaineti naba nakoira ni kabane, “Tabekaarake nanom ao kimwareirei, bwa e a roko auan am mition.” N aran Iesu Kristo, amen.