Te Bitaki n te Nano Ae Moan te Korakora:

“Ai Akea Riki ae I Kona n Anganiko”

Iroun Unimwaane Eduardo Gavarret

Man te Itingaun

Te bitaki n te nano tiaki te bwai ae riki n ti te taina; e kainnanoa te onimaki, te rairannano, ao teimatoan te tamnei bwa e aonga n riki.

Kabwarabwaraana

N te Kanimabong, 28 n Okitoobwa, 1588, te Kaibuke La Girona, e a bon uruaki bweena ao man bweenaki ngkai n te bwee n ari, bon kaibuken Gread Spanish Armada, e untaba ma atiibu aika tootooa n te Lacada Point i Maiakin Ireland.¹

E a bon baoti te kaibuke. Kaain te betinako temanna ae e kekeiaki n iangoa maiuna bon iai ana mwamwa ae bwaaun are e anganaki iroun buuna tabeua te namakaina n nako bon iai korobokiiana ae kangai, “Aakea riki ae I kona n anganiko.”²

“Aakea riki ae I kona n anganiko,”—te kibuntaeka ao te mwamwa ma karobannaakina bon tamnein te bai ae taua te aati, bon kaotan ana tangira te buu te aine nakon buuna te mwaane.

Reitaki n Koroboki aika Tabu

Ngke I wareka te karaki aio, bon iai nanona ae raka nakoiu, ao I iangoa ana bubutii te Tia Kamaiu: “Ao kam na anganai bwa ami karea te nano ae e uruaki ao te tamnei ae raraoma.”³

I angoa naba aia kaeka aomata nakon ana taeka te Uea Beniamina:“Eng, ti kakoauai taeka ni kabane ake ko a tia n taekin nakoira … , are e a tia ni karika te bitaki ae moan te korakora iroura, ke i nanora, n te aro are akea te nano ni kan karaoa te buakaka, ma n teimatoa ni karaoa ae raoiroi.”⁴

Te Reitaki ae Onoti nakon Temanna

N na tibwauaa au taneiai ae e riki nakoiu ngke 12 au ririki, are e tiku mwiina ni karokoa ngkai.

E taku tinau, “Eduardo, kataweko. Ti a rimwii nakon te taromauri.

I kaekaa, “Tinau, N nang tiku moa irarikin Tamau ngkai,”.

“Ko bon koaua? Ko riai ni kaea aia bowii kaain am nakoanibong,” e kaekaai.

I taku,“Ai kaawara tamau! E nang tiku n ti ngaia. N nang tiku moa irarikina ngkai.”

Tamau bon tiaki te membwa n Ana Ekaretia Iesu Kristo Ibukiia Aika Itiaki ni Boong aika Kaitira.

Tinau ma mwaaneu a bon kaei bootaki n taromauri n Tabati. Ngaia are, I a nakon Tamau n ana tabo ni mwakuri, te tabo are e tatangiria ni mena iai ni katoa Taabati, ao n aron are I a tia n tuanga tinau, I tiku irarikina tabeua te tai, ae n etina, bon tii tabeua te miniti, ao I a titirakinna, “Tamau, e nakoraoi bwaai ni kabane?”

E bon teimatoa n karaoi reerio ma tenaan tai, te bwai ae tatangiria ni karaoia, ao e a tii wiingare naba nakoiu.

Ao I tuanga naba, “Ao ngaia, N nang nako n takaakaro ma raraou.”

E aki taraai tamau, ma ea tii kaekaai naba, “Te Taabati ngkai. Ko aki riai n nako n taromauri?”

I a manga kaekaa, “Eang, ma I a tia n tuanga Tinau bwa N na aki nako moa ngkai”. E bon teimatoa n mwakuri tamau, ao ngai irou, anne te kariaia bwa I a konaa n nako.

N te ingabong anne bon iai ara takaakaro ni butibooro ae e nang kakaawaki, ao a tuangai raraou bwa e aki riai ae N na aki iri ibukina bwa ti riai n tokanikai.

Te kangaanga ngkanne bwa N na riai n rimatan te umwantabu bwa I aonga n roko n te marae ni butibooro.

Ma ungan nanou, I a biri naba ni kaeineta te marae ni butibooro ao n toki imwain te bwai n totoko ae korakora, te umwantabu. I biri nakon iteran te kawai, ike a tei iai aroka aika a bubura, I a motikia bwa N na biri imarenaia bwa e aonga n are akea ae e na noorai kioina bwa ea boo aia tai n roko kaain te taromauri.

I roko raoi imwaain waakin te takaakaro. E reke au tai n takaakaro ao n okira mweengau imwain okin naba tinau.

E bon nakoraoi bwaai ni kabane; e bon moanna ara tiim, ao I bon rangi ni kukurei. Ma biriu nakon te marae are e nang baarongaaki e bon nooraki iroun te tia kairiiri n te kuaoram n riikan.

Te Tari Félix Espinoza e bon noorai ngke I kawaekoaai ni biri man te aroka teuana nakon te aroka teuana, ngke I rangi ni kabanea au kona bwa N na aki nooraki.

Ni moan te wiiki anne, ao e bon roko te Tari Espinoza nakon au auti n tuatua bwa e kan taetae ma ngai. E aki tuangai te bwai are e noorai ae e riki n te Taabati, ke tao n tuangai bwa e aera I aki roko n te taromauri.

E tii anganai te bokinreirei ao n taku, “I tangiria bwa kona anga reirei n tain te kiraati ibukiia nakoanibonga nakon te Taabati. I a tia ni kanikinaea te reirei ibukimi. E aki rangi ni kangaanga. I tangiriko bwa kona warekia, ao I a manga oki uabong ma ngkai ni buokiko ni katauraoa am reirei.” Ngke e tia n taetae, e anganai te boki n reirei ao ea nako naba.

I bon aki tangiria n anga reirei n te kiraati, ma I a bon aki kona n tuanga ae I rawa. I a bon tia n baireia bwa nakon te Taabati ae e na roko bwa N na tiku riki irarikin tamau—are nanona, manga iai naba ara butibooro ae kakawaki.

Te Tari Espinoza bon te aomata ae e nang taatangiraki irouia kairake.⁵ E a tia ni kunea te euangkerio ae kaokaki ae e bita maiuna ke, n taekana riki teuana, nanona.

Ngke ai bwakantaain te Kaonobong, I taku, Eng, tao ningabong N na uti n aoraki, I aaki naba kona n nako n taromauri. Ai tiaaki te butibooro ae I raraoma iai; ma I a bon raraomaeakina te kiraati are N na anga reirei iai, riki ngke te reirei ai manga taekan Bongin te Taabati.

E a roko te Taabati, ao I a uti ma te marurung nakon ake mai imwaina. Ai bon akea au anga—akea au anga ni birinako.

Ai bon tibwa au moan tai n anga reirei, ma te Tari Espinoza e na bon mena irarikiu, ao anne bon te bong are ea reke inanou te bitaki ae korakora.

Man te tai anne, I a waaki n tabua te bong ae te Taabati, ao inanon taina, n aron ana taeka Beretitenti Russell M. Nelson, te Taabati e riki bwa te bong ae Kakukurei.⁶

“Te Uea, I anganiko bwaai ni kabane; Ai akea riki ae I kona na Anganiko.”

Karekeana

Ti na kanga ni karekea te bitaki n te nano ae korakora? E waakinaki ao imwiina e na riki inanon taina

1. ngkana ti kamatebwai koroboki aika a tabu ni karekea te rabakau are e na kakorakoraa ara Onimaki iroun Iesu Kristo are e na karika te nano ni kan bitaki.⁷

2. ngkana ti ribanaa te nano anne rinanon te tataro ao te aki mamatam.⁸

3. ngkana ti mwakuri, nakon taeka ake a tia ni kamatebwaiaki ke n karekeaki, ao ti karaoa ara berita ae tabu bwa tina anga nanora nakoIna, n aron ana aomata te Uea Beniamina.⁹

Kinaakina ao te Berita ae tabu

Ti na kanga n ataia ae ea moanna ni bitaki nanora?¹⁰

1. Ngkana ti kan kakukureia te Atua ni bwaai nako.¹¹

2. Ngkana ti reitaki ma aomata inanon te tangira, te karinerine, ao te iango raoi.¹²

3. Ngkana ti nooria bwa anauan Kristo ea moanna n riki bwa kateira.¹³

4. Ngkana ti namakina ana kairiiri te Tamnei ae Raoiroi bwa e moanna n rikirake.¹⁴

5. Ngkana ti kaawakina te tua ae ea tia n rangi ni kangaanga ngkoa iirana ao e reitinako maiuakinakina.¹⁵

Ngkana ti ongora raoi nakon aia taeka n reirei ara tia kairiiri ao ti kukurei n ira nanona, ti tuai naba ngkanne n namakina te bitaki ae korakora inanora?

“Te Uea, I anganiko bwaai ni kabane; Ai akea riki ae I kona na Anganiko.”

Kateimatoaana ao Tamaroana

Ti na kanga n kateimatoaa te bitaki ae korakora?

1. Ngkana ti kana te toa ni katoa wiiki ao n kabowii ara berita n katokaa iaora aran Kristo, n ururinga n taainako, ao n kawakin ana tua nako.¹⁶

2. Ngkana ti bweena maiura ni kaineta te tembora.¹⁷ Roorokora n te tembora e na buokiira n kateimatoaa te nano ae boou ao n kaboouaki ngkai ti karaoi otenanti aika tabu.

3. Ngkai ti tangiriia ao ni beku ibukiia kaain rarikira ni karaoi waaki ni kakukurei ao te mwakuri ni mitinare.¹⁸

Ao ibukin kukureira ae korakora, te bitaki inanora e na kakorakoraaki e na buta ni karokoa ea koburake inanon mwakuri aika raraoi.¹⁹

Te bitaki ae korakora inanora e anganiira te namakin n inaomata, onimaki, ao n rau.²⁰

Te bitaki n te nano tiaki te bwai ae riki; e kainnanoa te onimaki, te rairannano, ao teimatoan te tamnei bwa e aonga n riki. E moanaki ngkana iai nanora ae ti anga nakon ana babaire te Uea, ao n riki ngkana ti rin inanon ao man kawakin berita aika tabu ma Ngaia.

Ana mwakuri temanna iai mwiina ae tamaroa iaora ao iaoia aomata aika irarikira.

N ana taeka Beretitenti Russell M. Nelson, “Iangoa aron birimwaakan te kakaiangatoa ni kabuta te aonaaba—ao naake ti tangiriia ni maiura—a na kona ni katokaki ngkana ti bane n rineia n iriira Iesu Kristo ao n ongo Ana reirei.”²¹ Te waaki ni iriirakin Ana reirei te Tia Kamaiu e karika te bitaki n nano ae moan te korakora.

Tariu ao mwaneu aika kam tangiraki, kairake, ao ataei, ngkai ti kaaina te maungatabu nte wiiki aio, karaoia bwa aia taeka ara burabeti, are e bon roko mai iroun te Atua, e na rin inanora bwa tina namakina te bitaki ae korakora.

Ibukiia ake a tuai kaaina ana Ekaretia te Atua ae kaokaki, I kaoi ngkami bwa kam na ongora nakoia mitinare ma te nano ae koaua n kan ataia bwa tera ae tangiria mai iroum n te Atua ao namakina te bitaki anne inanom.²²

Ngkai bon te bong ni baireia bwa ti na iriira te Uea Iesu Kristo. “Te Uea, I anganiko nanou; Ai akea riki ae I kona n Anganiko.”

N aiaron te mwamwa are e kuneaki n te kaibuke are e uruaki, ngkana ti angan te Atua nanora, ti na bon kamaiuaki man buakan te maiu aio, ao inanon taina ti a kaitiakaki rinanon ana Mwakuri ni Kamaiu Kristo ao n riki bwa “natin Kristo,” ngkai ti a manga “bungiaki maIrouna,” n te tamnei.²³ I a taekin aikai n aran Iesu Kristo, amen.

Bwaai aika a na taraaki

1. Taraa Pedro Luis Chinchilla, “La Girona: La Historia del Mayor Naufragio de la Gran Armada,” armadainvencible.org/la-girona.

2. Te Mwamwa n te Ulster Museum, Belfast, Northern Ireland.

3. 3 Nibwaai 9:20.

4. Motiaea 5:2.

5. Félix Espinoza bon te tiambion n te Basque pelota. E ira te kaboo ni bon ana tabo ao n te aonaaba. E mate ni Beberuare 5, 2022.

6. Taraa Russell M. Nelson, “Te Tabati Bon te Bong ni Kakukurei,” Riaona, Meei 2015, 129–32.

7. Taraa 2 Timoteo 3:15–17.

8. Taraa Aramwa 17:3.

9. Taraa Motiaea 5:5.

10. Taraa Motiaea 5:2–5; Aramwa 5:26–29.

11. Taraa Ioane 8:29.

12. Taraa Nakoaia Iteraera 19:18; Mataio 22:39.

13. Taraa Preach My Gospel: A Guide to Missionary Service, (2019), mwakoro 6, “How Do I Develop Christlike Attributes?,” 121–32.

14. Taraa Reirei ao Berita aika Tabu 11:12–13.

15. Taraa Taeka n Rabakau 4:4; Timoteo 1:5.

16. Taraa Reirei ao Berita aika Tabu 20:77–79.

17. Taraa Motiaea 2:6.

18. (taraa Motiaea 2:17; Reirei ao Berita aika Tabu 81:5.

19. Taraa Ita 12:4.

20. Taraa 4 Nibwaai 1:15–16.

21. Russell M. Nelson, “Te Koaua ae Itiaki, Reirei ae Itiaki, ao Kaotioti ae Itiaki,” Riaona, Nobembwa 2021,6.

22. Taraa Ieremia 29: 12– 13; Motiaea 18:10; Reirei ao Berita aika Tabu 20:37.

23. Motiaea 5:7.