Tai Maaku: Kam na Tii Onimaki!
Kam na ukora moa te kukurei man kakabwaia aika a bati ake ti a tia n anganaki iroun teuare te tia anga bwaintangira.
N na maroro n te bong aei nakoia kairake n te Ekaretia, are nanona te roro ae Beretitenti Russell M. Nelson ke iaana riki. I aki bati ni kabonganai bwai ni kabotau, ma N na kabongana n te tai aei.
Te cri de coeur boni mairoun raoraou ae waniua ana ririki ae Marin Arnold, e koreia ngke 7 ana ririki. N na kataia n raira ana reta are bon te taetae n Aikubita ae e a tia ni bitaki:
Eng, Marin, au maroro ae N na kanakoa n te tai aei e na aki kaeka am bubuti. Ngaia are ngkana ko na kororeta ni ngure nakon am bitiobi, e kakaawaki bwa ko na kauringa arau bon “Kearon. Unimwaane Patrick Kearon.”
E kaania uoua te ririki maanin te butinaoraki are botau ma are e taekinaki n te Baibara, ao e ngae ngke e katoki mwakuri aika a bati, e koaua, e bon aki katoka kamarakaia aomata, te iowawa, ao te kauntaba ae korakora irouia taan tei—i bon iabara ke itinaniku. E aki toki ikanne, ti mena inanon kangaanga aika irekereke ma reitakia aomata ao okoron te katei, n aron tauan te kaubwai mairoun te aba, uruakan te otabwanin, ao te kakaokoroaki imarenaia reeti.
Aeka n ang aika a matoa ma bong aika a rotongitong aikai, a kona ni kabwarai nanoia kairake, te koraki are ti kataningaia bwa taan kairiri n taai aika a na roko. E taekinaki ae kangai “kairake boni kaubwain te aonaba aei. Boni … kairake … taan kairiri … n taai aika imwaira.”2 N reita anne, natira bon ngaiia aika a kona n onimakinaki bwa a na kaira te Ekaretia aei.
N taai aikai, e koaua bwa e a moanna ni mamaara ungan nanon te kairake. Dr. Laurie Santos, te tia reirei n te Yale University, e katea ana reirei ae e aranna bwa Kamatebwaian te iango ao te Maiu ae Kakukurei. “N te moan ririki are e waaki iai te kiraati, e kaania [te kamwakoro] man mwaitia ataein te reirei ae [bwanin] ae a kabaei araia.”3 E raka iaon 64 te mirion mwaitia aomata ake a ongora nakon ana kaongora neiei. Ngke e korea rongorongon te bwai ae riki aei temanna te tia kareke rongorongo, e taku bwa e kananokawaki norana bwa e bati ataein te reirei aika kairake—ao ikawai—aika a “bane korakoraia ni kakae nako” ke, ae kananokawaki riki, kakaean raun nanoia.4
Au bubuti n te bong aei nakoia kairake, ao nakoia kaaro ao ikawai ake kam na ibuobuoki, bwa kam na waaki moa man kakabwaia aika a bati ake ti a tia n anganaki iroun teuare te tia anga bwaintangira.5 N te tai are a tabekaki titiraki aika nano irouia aomata aika a mwaiti, ti riai ni kaeka n te “rongorongo ae raoiroi”6 are bon ana euangkerio Iesu Kristo. Ana Ekaretia Iesu Kristo ibukiia Aika Itiaki ni Boong aika Kaitira, are kabura ana botoniango ao ana rongorongo te Tia Kamaiu, e katauraoa te tabo are ti na karekea man karaoa te tamaroa n te tai aei.
E a tia n taekinna Beretitenti Russell M. Nelson bwa e raka aia konabwai kairake n te roro aei ni “karaoa [ae tamaroa] n te aonaba nakon roro ake mai mwaina.”7 Ngaira, aomata ni kabane, ti riai n “ane[nea] kunan te kamaiu,”8 ma e na kainnanoa te ongeaba—“iriran Iesu,” arana naba teuana—te aeka ni bwai ae kamanoira man anua aika aki raoiroi man karuanikai, anua aika a na rabuna kakukurein te kuna aei.
E ngae ngke ti mena “n iteran te kaawa ae rau,”9 ti bon kona naba ni kaitibo ma te aomata anne n te tai teuana ma teuana ae kabanea ana tai ni baika a aki raoiroi. Kam ataa ana botoniango: “E na roko te roo imwain te rotongitong.” E uara moa te aeka n iango, ae akea kakukureina! Eng, n tabetai ti tangiria ni mwaing man ara tabo ni maeka, ma ti riai n aki birinako man kinaakira—bwa natin te Atua ao E tangirira, are e tauraoi ni kabwarai buure, ao are e na bon aki kitanira. Ngkami bon Natina aika kam rangi ni kakawaki. Ngkoe Natina, ao E weteia burabeti ao E anga berita aika tabu, bwaintangira n tamnei ma kaotioti, kakai ao rongorongo, ao anera n iteran te aonaba aika uoua.10
E a tia ni katea te ekaretia bwa e na kakorakoraia utu n te maiu aei ao e kabaeia n aki toki. E katei 31,000 uoote ma mwaanga ike a bootaki iai aomata, n anene, n aki mamamtam, ao n tataro imarenaia man angabwai ibukin buokaia kainnano. Bon aio te tabo are a koreaki iai araia aomata ni kabane, a warekaki, a buokaki ao te tabo are a ibuobuoki iai raoraora ma kaain rarikira n aki kaboaki aia mwakuri n aron te mwakuri ni kiraaka ke te kaitiaki. Kairake—ao taanga aika ikawai naba—aika ngaa mwaitiia a mwananga ni mitinare ao a kabonganai oin aia mwane, a aki naba rinea aia tabo ni mwakuri, ao a mwananga kairake ma kaara nakon te tembora ni karaoi otenanti ake a na kabaeia utu—te aeka ni mwakuri n te aonaba ae uamaenako ma e teretere iai bwa te kakaokoroaki bon te bwai ae e aki teimaan. Aikai tabeua bukina ngkai ti anga ara bwai ibukin “te kantaninga ae mena i [nanora]”.11
Eng, ni boong aikai, e bati te kangaanga ae e na kaitaraa te tia irira Iesu Kristo. Taan kairiiri, n te Ekaretia, a anga maiuia n ukora ana kairiri te Uea bwa katokan kakaewenako aikai. Ngkana e aki kakukurei mwin te babaire irouia aomata ni kabane, tao aio naba kanoan tabekan ara kaibangaki are ti riai n tabekia ngkana ti na iria.12 Inanon boong aika rotongitong ke kangaanga, E berita te Atua bwa n te boua ae te nang ni ngaina ma te boua ae te ai ni bong, e na kairia burabeti, e na anganira te kai te biti, ao e na kauka te mataroa are wariki are kaineti nakon te kawai ae eti, are e na anganira te korakora ni karokoira ni kawaira.13
Ngaia are taiaoka, taiaoka kaea te botaki e ngae ngke ko ribaa te amwarake. Kukurei n Ana ota ao anga am bwae nakon te mwakuri.14 E koaua te taeka n te Buraimwari: E tangiria Iesu bwa “[ko na riki] bwa te ota.”15
Ngke e bubuti Iairo nakon Iesu bwa e na kamaiua natina te aine ae 12 ana ririki, are wene ni mate ni mwengana, e uanao te aomata ni katabetabea te Tia Kamaiu, n te aro bwa e a taetae temanna te toro nakon te karo ae tabeaianga aei, “Akea bwa e mate natim te aine; tai katabea te tia Reirei.”
“Ao ngke E ongo Iesu, ao E kaeka ni kangai, Tai maku; ko na ti onimaki, ao e na kamaiuaki”16
Ao bon neienne. Ao kam na kamaiuaki naba. “Tai maaku: kam na tii onimaki.”
Ibukina bwa ngkami aika kam ongora, kam rangi ni kakaawaki iroun te Atua ao nakon te Ekaretia, I kainin ni bwaanau n abotoro. Imwain ae ko karekea ana bwaintituaraoi te Tamnei ae Raoiroi, e nene inanom te Ota ni Koaua,17 bwa te “oota are e mena ni bwaai ni kabane, are e anga te maiu nakon bwaai ni kabane,”18 ao bon oin te kukurei inanoia aomata ni kabane ake a tia ni maiu ke iaon kawaia. Kam anganaki te oota bwa e na kamanoi man reireini ngkami. Teuana ana rongorongo ae kakaawaki bwa te maiu aei bon te kabanea ni kakaawaki ni bwaintangira ae e tii kona n reke man Ana Mwakuri ni Kamaiu Iesu Kristo. Ngkai e roko Ootan ao Maiun te Aonaba,19 Ana Rikitemanna te Atua n anganira te maiu imwin ana tokanikai iaon te mate.
Ti riai ni kabanea korakorara ni kamanoa maiura ao ni buokiia naake a tangiria ni kaki te kakabwaia ae tabu aei. Taan kairiri, taan ibuobuoki, raao, utu—tarai kanikinaean te nanokawaki ae korakora, te bwarannano, ke anua ni bakabure. Anga baim n ibuobuoki. Ongora. Karekea te ibuobuoki ae riai.
Nakoimi kairake aika kam rawawata, tera ami tabeianga ke kangaanga, te bakabure bon tiaki katokana. E aki kona ni katoka te maraki are ko namakinna ke are ko taku bwa e riki man am mwakuri. N te aonaba ae kainnanoa te oota, taiaoka tai kamemerea te oota ni koaua are e kaki te Atua i nanom imwain karikan te aonaba aei. Kakaea te aomata ae kona ni buokiko. Bubuti buokam. Bon tai urua te maiu are E anga Maiuna ibukina Kristo. Ko kona n uota rawawatan te maiu aei ibukina bwa ti na buoka rawawatam. Ko korakora ma ko aki ataia. E bon tauraoi te ibuobuoki, mairouia aomata ao riki te Atua. Ko tangiraki ao ko kakawaki ao ko kainnanoaki. Ti kainnanoiko! “Tai Maaku: kam na tii onimaki.”
E taku ana taeka te aomata ae kaitara ma te kangaanga ae riaon te kangaanga ae ti a tia n rinanona ngai ma ngkoe “Waaki nako [raoraou aika kam uarereke]. Ninikoria, … ao waaki, waaki nakon te tokanikai! Kakukureia nanomi, ao kam na bati ni kukurei.”20 E bati te bwai ae ti riai ni kukurei iai. Iai ara utu, ao iai ara Tia Kamaiu. Tai katinanikuira bwa ti na raoniko, I bubuti, n arana ae tabu man mimitong ae te Uea Iesu Kristo, ara Mataniwi, amen.