Reirei man te Mwanibwa

Iroun Susan H. Porter

Moan Kauntira n te Beretitentii ni Kabuta n te Moanrinan

Ti kona n rairaki nakon te tia Kamaiu ibukin te korakora ao te kamaiu are e na kona n buokira ni karaoi ni kabane baike ti kanakomaiakaki bwa ti na karaoi.

I rangi ni kimwareirei ngkai I kona n ikotaki ma ngkami n aia tetere aine n te maungatabu ni kabuta aei!

I ikawai rake i maeaon New York ao n ira mwaangan te Aro ae uarereke ae 20 te maire (32 km) raroana ma mwengau. Ngke I tekateka n te Reirei n Taabati n te ruu i nano n te tabo n taromauri ae e a maan man tangoaki ma raraou ae Patti Jo, e kuri kanganga iangoana ae ngai bon temanna ibuakoia mirion aine aika taari n te aonaaba.

Nimaua te ririki n nako e rotaki n te aoraki ae kakaiaki kainabau, ae Bruce, ngke ti beku ma Aika Itiaki aika a tia ni katabuaki n Aonon Eurobe Mainiku. Ti a okira mwengara, ike e a mate ti tabeua te wiiki imwiina. N te bong naba anne ao e bitaki maiu n te rubenimata. E rotai te nanokawaki ao I namakina te mamaara ao te bwarannano. I bubutia te Uea bwa e na kaira kawaiu: “Tera ae Ko tangiria bwa N na karaoia?”

Tabeua te wiiki imwiina ao I mamataku n au meeri ngke I a noora naba te tamnei ae uarereke are e kaoti inanon teuana te kataroka. Ngke I kamataua n taraia, ao I kunea bwa tamnein te aine ae te Itamaria ma Iesu n te mwaniba. N te tai anne, e taetae te Tamnei nakoiu: “Anne te bwai ae ko riai ni karaoia.” Tamara are i Karawa ae tatangira e kaoai bwa n a roko nakon te Tia Kamaiu ao n reiakinaki.

I tangiria n tibwauaia ma ngkami teniua reirei aika I reiakin ngkai I reitanako mooiu man Ana mwanibwa n te “ran ae maiu.”¹

Te Moan: Ara Kangaanga Inanon Taai Ake Rimoa ao Aika Ngkai Aki Bairea Kanoan Te Tai Ae Na Roko

Tariu n aine, I ataia bwa a mwaiti mai ibuakomi aika ti tebo aia namakin ma au namakin, n aki koaua bwa ko na kanga ni kaitarai kakaewenako ao rawawata—te rawawata bukina bwa e aki nakoraoi maium n aron are ko a tia n tataroakinna, ao ni kantaningaia.

E ngae ngkana tera aika ti aitara mangaai inanon maiura, ma maiura e tabu ao iai nanoia ao bukiia. Ngaira ni kabane bon natin te Atua aine aika tangiraki, aika ti bungiaki ma tamneira aika roko mai Irouna.

Ara Tia Kamaiu Iesu Kristo, rinanon Ana angakarea ni kamaiu, e katauraoa te kawai bwa ti na kona ni kaitiakaki ao ni kamaiuaki, bwa ti aonga ni kona ni kakoroi bukin ara kantaninga iaon te aba n aki taraa aia babaire kaain ara utu, aron ara mare, marurungira n rabwata ao ara iango, ke kangaanga riki tabeua.

Iangoa te aine are n te mwanibwa. Aekakira aron maiuna? Iesu e ataia bwa iai niman buuna ao e tuai ngkai ni mare ma te mwaane are e maeka ma ngaia. Ao e ngae n anne, n aki tabe ma kangaangan maiuna, ana moan taeka te Tia Kamaiu nakoia te botanaomata ae kaotia iai bwa Ngaia te Mesia bon nakoia. Ngke e taku, “Boni Ngaia Ngai ae I taetae nako im.”²

E riki bwa te tia kakoaua ae korakora, ni katanoata nakoia ake n ana kaawa bwa Iesu bon te Kristo. “Ao a bati I-Tamaria n te kawa arei ake a ira nanona n ana taeka te aine.”³

Ana kangaanga n taai aika nako ao ngkai aki bairea kanoan ana bong ake imwaaina. N aron neierei, ti kona n rineia n rairaki nakon te Tia Kamaiu n te bong aei ibukin te korakora ao te kamaiu are ti na kona ni kakoroa bukina ngaira ni kabane are ti kanakomaiakaki ibukina.

Te Kauoua: Te Mwaaka e Mena i Roura

N te kibu ae e ataaki n Reirei ao Berita aika Tabu, te Uea e kaungaia aine ao mwaane “bwa a na riai n unga nanoia ni karaoa ae e raoiroi, ao ni karaoi bwai aika a mwaiti n oin nanoia, ao ni kakoroa bukin te raoiroi ae e mwaiti; bwa e mena te mwaaka irouia⁴

Tariu, iai iroura te mwaaka ao te kona ni kakoroa bukin te raoiroi ae e mwaiti!

E taekina koauana Beretitenti Russell M. Nelson, “Ni kabane aine ao mwaane ake a karaoi berita ma te Atua ao ni kawakin berita akanne, ao ake a mwakuri ma te kororaoi n otenanti n te nakoanibonga, iai aia kona ni karekea mwaakan te Atua.”⁵

I a tia n ataia bwa ngkana ti kekeiaki ni karinei ara berita aika tabu ake a karaoaki n te bwabetito ao inanon tembora aika tabu, e na kakabwaiaira te Uea “ma Mwaakana ni kamaiu” ao ni kakorakoraira n ara “atatai n tamnei ao ni kaotaaki nakoira bwaai aika [ti tuai] atai mai imwaina.”⁶

Te Kateniua: “Man Bwaai Aika Uarereke e Kaoti te Bwai ae Korakora”⁷

N te Kabwarabwara iaon te Maunga, e reireiniia Ana reirei Iesu, “Taarin te aba ngkami”⁸ ao “Otan te aba ngkami.”⁹ Imwiina E kabotaua te rikirake n abanuean karawa nakon te bwai ni kariki, “are e anaia te aine, n renganna i buakon te baraua ae teuana te butere, ni karokoa e a bane n rikirake.”¹⁰

• Te Taoro

• Te Bwai ni Kariki

• Te Ota

E ngae ngke e uarereke mwaitina, iai mwiia ni kabane nakon ake irarikina. E kaoira te Tia Kamaiu bwa ti na kabongana Mwaakana n riki bwa te taoro, te bwai ni kariki, ao te ota.

Te Taoro

E kamimi bwa e mwaiti te kaokoro ni kangkangin te amwarake are ti kanna ngkana e kataoroaki teutana. E ngae n anne te taoro bon te rengarenga teuana ae boraoi ao ni bebete arona.

N ana boki te 2 Uea, ti wareka iai taekan te “ateiaine ae karako,”¹¹ are e kairaki nako bwa te taenikai irouia I-Turia ao n riki bwa te toro iroun buun Naaman, te kaben n ana taanga ni buaka I-Turia. Ao e riki bwa kaanga te taoro; e rangi n ataei, n taraaki bwa akea uaana ibukin te aonaaba, ao arona n riki bwa te toro ngaia n te aba ae iruwa iai bon tiaki are e kantaningaia.

E ngae n anne, e taekin uoua kibuntaeka ni mwaakan te Atua, ni kakoauaa nakon buun Naaman: “E bia mena au toka te mwaane iroun te burabeti are i Tamaria! bwa e na kamaiua iai man reberana.”¹²

Ana taeka n onimaki a kaineti nakon Naaman, are e mwakuri iaon ana taeka, ni kariaia bwa e na kamaiuaki n rabwatana ao n tamneina.

Ti rangi ni katuua ara iango iaoia tooro ake a anaa nanon Naaman bwa e na tebo inanon karaangan Ioretan, n aron are e tuatua te burabeti Eritai, ma e na bon aki roko Naaman n ana mataroa Eritai n akean te “ataeiaine ae karako aei.”

E ngae ngke ko uarereke ke n namakinna ae akea bonganam, ma ko kona n riki n aron te taoro n am utu ao inanon am kaawa.

Te Bwai ni Kariki

Ko a tia ni kana te kariki ae aki karikaki? Ko na kanga ni kabwarabwara? Matenten? Tinebu? Matoatoa? Man ti teutana man bwain karikan te kariki, e na rikirake, e na bubura ao e na bebete ma n rangi ni maraurau te kariki.

Ngkana ti kaoa mwakan te Atua nako nanon maiura, ti kona n onea mwiin “te rawawata are inanora”¹³ ma te kairiiri mairoun te Atua are e na kona n tabekia rake raora ao ni karekea n neia ake a taonaki n te rawawata.

Raoraou temanna ae taonaki n te rawawata, e wene iaon ana kainiwene ni moaningabongin te Kiritimati teuana. E butia natina bwa a na kateirakea; ma, e taonaki ma rawawatan iangoan ana buraure. Ao ni wene n tang iaon ana kainiwene, e bunnra nanona n ana tataro nakon Tamana are i Karawa, n Tuangnga ibukin rawawatana.

Ngke e motika ana tataro, e roko ana wirikiriki te Tamnei n tuanga bwa e ataa marakina te Atua. I namakina Ana tangira ao nanoanga ibukina. Taneiai aikai a kaota koauan ana namakin ao n angana te kantaninga bwa e aki nanokawaki n ti ngaia. E teirake, e nako tinaniku, ao e katea te tinouman ma natina, n onea mwiin rawawatan te moaningabong ma te moangare ao te kimwareirei.

Te Ota

Mwaitira te ota ae na kainnanoaki bwa e na kanakoa te roo inanon te ruu? Teuana bakareren te ota ae uarereke. Ao bakareren te ota anne n te ruu ae roo e kona n roko man mwaakan te Atua are mena iroum.

E ngae ngkana ko namakina te maroaa inanon angibuakan te maiu aei, ko konaa ni kaota te ota inanon tain te aki ota ao te minotaki, ao n tain te nano kokoraki. E kona n ineti ao ni koaua otan am onimaki iroun Kristo, ni kairiia ake irarikim nakon taabo aika a na tan ao ana rau iai.

Tariu n aine, a konaa ni bitaki naano ao ni kakabwaiaaki maiu ngkana ti anga teutana te taoro, ao teutana tamrurun karikan te kariki, ao te ota.

I kakoaua bwa Te Tia Kamaiu bon te taoro inanon maiura, are kaoira bwa ti na katoonga te kukurei ao Ana tangira.¹⁴ Boni Ngaia te tia kaungaa nanora ngkana ti rootaki n te kanganga, karekea nakoira te kantaninga¹⁵ n tabeki rake rawawatara nako¹⁶ rinanon Mwaakana ae akea kabotauana ao ana tangira ni kamaiu.¹⁷ Ngaia ara ota,¹⁸ e na buokira ngaira ni kawaira n oki rikaaki nakon mwengara.

I tataro bwa ti na roko nakon te Tia Kamaiu, n ai aron te aine are n te mwanibwa, ao ni mooi man Ana ran are maiu. Ma kaain Tamaria, ti taekina ae kangai, “Ti kakoaua ngkai, … ba ti bon ongora i Rouna, ao ti ataia ba bon te Tia Kamaiua te aba.”¹⁹ N aran Iesu Kristo, amen.

Bwaai aika a na taraaki

1. Ioane 4:10.

2. Ioane 4:26.

3. Ioane 4:39.

4. Reirei ao Berita aika Tabu 58:27–28; e kairaki ma katuruturuana.

5. Russell M. Nelson, “Kaubwai n Tamnei,” Riaona, Nob. 2019, 77. “N taainako ngkana ko beku ma te kororaoi ao n nebonebo n te tembora, ko otinako ma korakoran mwaakan te Atua iaom ao Ana anera aika a ‘tararua iaoia [Reirei ao Berita aika Tabu 109:22].”

6. Russell M. Nelson, “The Temple and Your Spiritual Foundation,” Liahona, Nov. 2021, 94, 95.

7. Reirei ao Berita aika Tabu 64:33.

8. Mataio 5:13; e kairaki ma katuruturuana.

9. Mataio 5:14; e kairaki ma katuruturuana.

10. Mataio 13:33.

11. 2 Uea 5:2.

12. 2 Uea 5:3.

13. Itaia 61:3.

14. Taraa Aramwa 36:24–25.

15. Taraa Ita 12:4.

16. Taraa Mataio 11:28–30.

17. Taraa Aramwa 5:9.

18. Taraa Taian Areru 27:1; Ioane 8:12; Reirei ao Berita aika Tabu 88:50; taraa naba Sharon Eubank, “Christ: The Light That Shines in Darkness,“ Liahona, Meei 2019, 73–76.

19. Ioane 4:42.