Te Aki Kamwaingaki inanon te Buaka
Ngkana e roko te kangaanga inanon te maiu, ko kona n onimaki ibukina bwa ko bon tei iaon bwaan am onimaki iroun Iesu Kristo.
Tariu ao Mwaneu aika a tangiraki, ti a tia ni kakabwaiaaki n te bong aei n ongora reirei ma kaunganano irouia ana toro te Atua. Ngaira n tatabemaniira, n taabo ake ti mena iai, ti ataia bwa ti maiu inanon taai aika e a rikirake te kangaanga iai. Au tataro bwa n na konaa ni buokiiko n tei n aki kamwaingaki inanon taai ni kangaanga aika ti kaitaraaki iai, ma te rau n nano.1
Te tabo ae ti na moana mai iai bon atakin ae ngaira n tatabemaniira bon natin te Atua aika a tangiraki ao iai Ana toro aika a kairaki mai ieta. Ana toro te Atua akanne a kaman noori ara bong aika ti maiu inanona. “Te Abotoro Bauro e koroboki nakon Timoteo, “Ma ko na ata naba aei, ba ane a na roko taai aika kamamate ni bong aika kaitira.”2
Ane iai matana n noori kanikinaean taai ao n ongo bwanaia burabeti a na ataia ae a bon koaua. Mwiin kangaanga aika a korakora a riki nakoira man te kairoro n te buakaka. Kairoro akanne a rikirake. Ao ikanne are e na rikirake ni kangaanga, aki bebete, kawakinan berita ake ti riai ni karaoi ao ni kawakin ni maiuakina ana euangkerio Iesu Kristo.
Ngaira ake iai ara tabeaianga ibukira ao ibukiia ake ti tangiriia, iai te kantaninga inanon te berita are e karaoia te Atua ibukin te tabo ae mano man taian kangaanga aika imaira.
Aio bon tamnein taekan te tabo anne. E a kaman tia ni kaokiokaki kabwarabwarana irouia burabeti aika maiu. Te katooto, n aron are e koreaki n Ana Boki Moomon, te karo ae tatangira e tuangiia natina mwaane bwa a na kanga ni kakorakoraia n tiku n nene n tain taian kangaanga aika imwaaia: “ Ao ngkanne, natiu mwaane, uringnga, uringnga bwa bon iaon te bwaa are ara Tia Kaboomwi, are Kristo, natin te Atua, are kam na riai ni katea iai aami; bwa ngkana te riaboro e kanakoa te ang mairouna ae korakora, eng, ana kanoa ibuakon te ukeuke n anti, eng, ngkana ni kabane te atiibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki toki, ibukin te bwa are ko kateaki iaona, are bon aan te kateitei ni koaua, … ae ngkana aomata a kateitei iaona ao aki kona ni bwaka.”3
Te rawawata ao te nanokawaki ae akea tokina n aron ae taekinna bon mwiin ara bure ngkana ti aki rairii raoi nanora mai iai. Kangaanga aika mwaiti bon taian kariiri ao kakaitara aika a rikirake mai iroun Tatan. Ai bon akea riki te tai ae kakawaki n te tai aei n ataia bwa ti na kanga ni kateitei iaon te bwaa ae matoatoa anne. Irou, akea te tabo ae tamaroa riki n taraaki nakon ana kabanea n reirei te Uea Beniamina, e koreaki naba n Ana Boki Moomon.
Ana taeka ni burabeti te Uea Beniamina a bon kaineti nakoira inanon ara bong. E ataia man oin ana taneiai kakamaakun te buaka. E a tia ni kamanoia ana aomata inanon te aitara ni buaka, n onimakina mwaakan te Atua. E noora raoi kakamakun mwaakan Rutibero ni kariiri, ni kataia n tokanikai, ao ni kabwarai nanoia natin te Atua.
E kaoiia ana aomata ao ngaira bwa ti na kateitei iaon te bwaa ae matoa mani mano, are bon te Tia Kamaiu. E anganiira te mataata bwa ti inanomata n rinerine imarenan te raoiroi ao te buakaka ao ti aki kona n totokoi mwiin ara rinerine. E taetae ni kaineti ao n te aro ae kakang ibukina ae e ataia bwa tera te nanokawaki are e na roko nakoia koraki ake aki ongo ao kakauongo n ana kauring.
Aio aron are e kabwarabwara bwa tera mwiin ara rinerine ngkana ti iriira ana wirikiriki te Tamnei ke n iriira te reirei ae buakaka are e roko mairoun Tatan, are e tangiria ni kariirira ao ni kamaunaira:
“Bwa taraia, iai te rekenikai are e a tia n anganaki ane motikia bwa e na ira te tamnei ae [buakaka]; bwa ngkana e motikia bwa e na iria, ao e teimatoa ao ni mate i nanon ana bure, ao bon ti te arona ngke e nima kabuakakaan tamneina; bwa kanuangana ae na reke irouna bon te katuaeaki ae aki totoki, ngkai e a tia n aki ira ana tua te Atua n aron are e a tia n ataia. …
“Mangaia ae ngkana e aki rairananona te aomata anne, ao e tiku n arona ao ana kairiribai te Atua ni matena, ao e na kautaki tamneina ni korakoran te moti ae mimitong n namakinan bure ake e a tia ni karaoi, are e na kauarerekeaki iai mai matan te Uea, ao e na onrake rabwatana n te raraoma, ma te maraki, ma te aki rau, ae aiaron te ai ae aki maamate, aika a waerake mwaakarona n aki toki.”
Te Uea Beniamina e reitia n taekinna, “O ngkami aika kam a unimwaane, ao ngkami naba aika kam a ataeinimwaane, ao ngkami aika ataei aika kam kona n oota n nanon au taeka, bwa I a tia ni kabeebetei au taeka bwa kam aonga n atai, I tataro bwa kam na uti n uringan buakakan aroia ake a tia ni bwaka n riaoan te tua.”4
Irou, mwaakan te kauring n rairannano anne e tei n au iango bwa tamnein te tai are ngai ma ngkoe tina tei imatan te Tia Kamaiu imwin te maiu aei. Ti na tangiria ma nanora ni kabane n aki kerikaaki ma ti na tararake Nakoina, n Noora moangarena, ao n ongo Irouna ngkana e kangai, “E raoiroi, te toro ae ko raoiroi ao ko kakaonimaki: … rin [ikai].”5
Te Uea Benimina e kamataataira bwa ti na kanga ni karekea te kantaninga n ongo taeka akanne ngkana ti kakaea te kawai n te maiu aei ni karaoi aroarora bwa a na bitaki rinanon ana Mwakuri ni Kamaiu Iesu Kristo. Aio bon tii te kawai are ti na kona ni kateitei iaon te bwaa ae matoa anne ao n tei ni matoa inanon kangaangan taian kaririaki ao kataakira aika imwaira. Te Uea Beniamina e kabwarabwara te bitaki n aroarora n taekana ae tamaroa ae e aki toki n riinga nanou. E bon kabonganaaki irouia burabeti inanon ngaa n ririki ao bon iroun naba te Uea. Bon aio: ti riai n riki n ai aroia ataei—te teei ae uarereke.
Irouiia tabeman, e aki bebete bwa a na kariaia. Angiira ti tangiria n riki ni korakora. Ti nooria bwa te riki n aiaron te teei te taraaki bwa te mamaara. Angiia kaaro a kariariaa te bong are a na toki iai babakan ataeia natiia. Ma te Uea Beniamina, are e mataata raoi n aroia aomata bwa tera ae nanonaki n riki n oinimwaane n te korakora ao ninikoria, e kamataataa raoi bwa te riki n aron te teei bon tiaki te babakan ataei. Bon te riki n aron te Tia Kamaiu, are e tataro nakon Tamana ibukin te korakora ni kona ni karaoa nanon Tamana ao ni karaoa te mwakuri ni kamaiu ibukin aia bure natin Tamana ao imwiina e karaoia. Aroarora a riai ni bitaki n riki n aron te teei ni karekea te korakora n tei ni matoa ao n rau inanon taai ni kangaanga.
Aio kabwaraana iroun te Uea Beniamina ae ringa te nano bwa e na kanga n roko te bitaki anne: “Bon ana kairiribai te Atua te aro n aomata, man moan bwakan Atam, ao e na teimatoa n aki toki, ni karokoa ae e kakauongo nakon ana wirikiriki te Tamnei ae Tabu, ao n tokanikai i aon te aro n aomata ao n riki bwa te aomata ae itiaki rinanon ana mwakuri ni kamaiu Kristo ae te Uea, ao n riki n aiaron te ataei, n ongeaba, n nimamannei, n nanorinano, n taotaonakinnano, n onrake n te tangira, ao n tauraoi ni butimwaei bwaai ni kabane ake e tangiria te Uea bwa e na karaoi, n aiaron te teei are tauraoi ni karaoi bwaai ake e tuangaki iroun tamana.”6
Ti karekei bitaki akanne ngkana ti karaoa ao ni kabouii ara berita aika tabu ma te Atua. Anne e uota mwaakan Ana Mwakuri ni Kamaiu Kristo ni kariaia te oneaki inanora. Ti kona n namakinna ni katoa tai ngkana ti anaa te toa, ni karaoi otenanti n te tembora ibukiia ara bakatibu ake a mate, ni kakoauaa koauan te Tia Kamaiu, ke n tabeakina temanna are e kainano ngkai ana reirei Kristo ngaira.
Inanon taneiai akanne, ti riki inanon taian bwa ataei n ara konabwai n tangira ao n ongeaaba. Ti roko n tei iaon te bwaa ae matoa raoi. Ara onimaki iroun Iesu Kristo e uotiira nakon te rairannano ao ni kawakin Ana tua. Ti ongeaaba, ao ti karekea te mwaaka n totokoa te kaririaki, ao ti karekea te berita are ti na raoraonaki n te Tamnei ae Raoiroi.
Aroarora a na bitaki n riki bwa te teei ae uarereke, te ongeaaba nakon te Atua ao te tatangira riki. Te bitaki anne e na karikiira bwa ti na tau ni kukurei n te bwaintangira are e roko rinanon te Tamnei ae Raoiroi. Karekean raoraonakira iroun te Tamnei e na anganiira te kabebeteaki, te kairi, ao kakorakorakira.
I a tia n atai tabeua man te bwai are e nanoni te Uea Beniamina ngke e taku bwa ti kona n riki n aron te teei ae uarereke imatan te Atua. I a tia n reiakinna man taneiai aika mwaiti bwa te Tamnei ae Raoiroi e taetae n taainako n te bwanaa ae maaraara, e bebete ongoraeana ngkana nanon temanna e nanorinano ao nimamannei, n aron te teei. Ni koauana, te tataro ae mwakuri bon “I tii tangira are Nanom” Ti tuangai te bwai ae N na karaoia. “Ao N na karaoia.
Ngkana e roko te kangaanga inanon te maiu, ko kona n onimaki ibukina bwa ko bon tei iaon bwaan am onimaki iroun Iesu Kristo. Te onimaki anne e na kairiko nakon te rairannano ni katoa bong ao n teimatoa ni kawakin berita ae tabu. Ngkanne ko na Ururingnga n taainako. Ao rinanon kangaanga n te kairiribai ao te buakaka, ko na namakina te rau ao te kantaninga.
Iaon riki anne, ko kona ni kuneko n anga baim ni ibuobuoki n tabekiia tabeman ni kamanoia iaon te bwaa ma ngkoe. Onimakinan Iesu Kristo e kairi n taainako nakon te kantaninga ae korakora ao n namakinan te tangira nakoia tabeman, are bon ana tangira ni koaua Kristo.
I anga au kakoaua ma nanou bwa te Uea Iesu Kristo e a tia n anganiko te kakao “Nakomai nakoiu.”7 E kaoiko, n te tangira ibukim ao ibukiia ake ko tangiriia, n roko Nakoina ibukin te rau n te maiu aei ao te maiu ae akea tokina n te aonaaba ae na roko. E atai ni koaua kangaanga ake ko na kaitarai ni kataakim ngkai bon mwakoron te babaire ni kakukurei.
I bubutiko bwa kona butimwaea ana kakao te Tia Kamaiu. N ai aron te teei ae nanorinano ao n tatangira, e butimwaea Ana ibuobuoki. Karaoi ao kawakin berita aika tabu ake E anga n Ana Ekaretia Iesu Kristo Ibukiia Aika Itiaki ni Boong aika Kaitira. A na kakorakorako. Te Tia Kamaiu e atai angibuaka ao taabo aika mano iaon kawaira n oki Nakoina ao nakon Tamara are i Karawa. E ataa te kawai. Bon ngaia te Kawai. I kakoaua n aran Iesu Kristo ae tabu, amen.