E Mwakuri te Baire ni Kamaiu?
I kakoaua bwa te baire ni kakukurei e mwakuri. E karaoaki iroun Tamara are i Karawa, are e tangiriira.
E Mwakuri te Baire ni Kamaiu?
N te tai ae e aki maan n nako ao I marooro ma te kairake ae e a oki ni mitinare tabeua te ririki n nako ao e a reke ana mwakuri. N aro tabeua, maiuna e nakoraoi. Ma ana onimaki e a memeere E a inako ibuakon te nano kokoraki iaon te Tia Kamaiu ao Ana Ekaretia. E kabwarabwara bwa e aki karekea te kakabwaia are e kantaningaia man te euangkerio are e kaokaki. E aki namakinna bwa te baire ni kamaiu e mwakuri ni maiuna.
Au rongorongo n te bong aei ibukimi ni kabane ake iai ami namakin ae ai aron aei. I taetae nakoia ake n te taina “a tia n namakina te kan anenea kunan te tangira ni kabomwi” ma aki “kan aneneia n te tai aei.”1
Tamara are i Karawa e a tia ni katauraoa te baire ae moan te tikiraoi ibukin kakukureiara ae akea tokina. Ma ngkana maiura e aki riki nakon are ti kantaningaia, e taraa n ae te baire e aki mwakuri.
Tao ti namakina are a namakinna ana reirei Iesu ngke a toka n te booti, “i nuukan te nama, ao e reimaurua n te nao; bwa e tutuki te ang.”2
Imwiina, n te karangaina anne:
“E nakoia Iesu, n nakonako iaon te nama.
“Ao ana reirei, ngke a noria ba E nakonako i aon te nama, ao a maku, … ao a tang, ba a maku.
“Ao E taetae naba Iesu nako ia ni kangai, Kabebetei nanomi; boni Ngai; tai maku.
“Ao e kaeka Betero ni kangai, Te Uea, ngkana tao boni Ngkoe, ao Ko na tuangai ba N na nako Im i aon te ran.
Ao e taku, Mai. Ao ngke e ruo Betero mai iaon te booti, e nakonako iaon te ran, n nakon Iesu.
“Ao ngke e nora te ang ba e baibati, ao e maku,” ngke e tiba moa n I nako, ao e takarua … “Te Uea, ko na kamaiuai.
“Ao e waekoa Iesu n arora naba baina, n taua, ao E taku nako ina, Ko aera ngkai ko nanokokoraki, ngkoe ae karako am onimaki?”3
I kona n tibwai reirei aika teniua ake I reiakin mairoun Betero? I tataro bwa reirei aikai a na kona ni buoka temanna are e namakinna bwa te babaire ibukin te kukurei e aki mwakuri inanon maiuia.
Te moan, mwakuri ma te onimaki iroun Iesu Kristo.
I mimi n ana onimaki Betero. N ana kakao Iesu ae beebete “mai,” e kiitana ana booti ae reimaurua n te nao. Taraan ae e ataia bwa ngkana e kaoia Iesu Kristo bwa e na karaoa te bwai teuana, e kona ni karaoia.4 Betero e onimakina riki ana Tia Kamaiu nakon onimakinan ana booti. Ao te onimaki anne e anganna te mwaaka ni mwakuri ma te ninikoria n tain te kangaanga, te tai ae kakamaku.
Ana onimaki Betero e kauringai te taneiai are I ongo mai iroun Unimwaane José L. Alonso. Teutana imwiin maten natin Unimwaane Alonso, ni katikuia ana utu ma natina aika uarereke, Unimwaane Alonso e ongo bwanaia ataei ni marooro.
“Tera ae ti nang karaoia?” a titiraki.
E kaeka te nati te aine ae ruaiwa ana ririki, “Daddy akea ana kangaanga. E nako n tataekina ana euangkerio Iesu Kristo.”
N ai aron Betero, te teinaine aei e noora riki are iaon ana kangaanga ao e onimakina Iesu Kristo ao Ana Mwakuri ni Kamaiu. Onimakinan te Tia Kamaiu e uota te rau ao te korakora ni waaki nako.
Ngkana ko tanrikaaki n tiroa maium, I kakoaua bwa kona nooria bwa koa tia ni kammwakura te onimaki inanon maium. Kainakin te Ekaretia bon te mwakuri n onimaki. Te marooro ma Tamara are i Karawa n te tataro bon te mwakuri n onimaki. Warekan koroboki aika a tabu bon te mwakuri n onimaki. Te ongora nakon au rongorongo n te maungatabu aei bon te mwakuri n onimaki. N aron are e taekinna Beretitenti Russell M. Nelson e taku, “Tai kamamara te onimaki are ko a tia ni karekea.”5
Teuana riki te reirei are I reiakinna mairoun Betero bon aei:
Inanon taai ni kangaanga, rairaki nakon Iesu Kristo n te tai ae waekoa.
Ngkai e nakon te Tia Kamaiu, Betero e maaka te ang ao e a moanna n inako. Ma ngke e a ataia Betero te bwai ae e riki, e aki kataia n toua te ran ibon irouna ke n uaua rikaaki nakon te booti. Ma e kanakoa ana onimaki nakon Kristo, e kamatoa riki, n tang “te Uea, ko na kamaiuai.”
Ao n te tai ae waekoa Iesu E arora baina, n taua.”6
Ngaira ni kabane ti bane n aitara ma reimaruan te bong are e kona ni kamamara ara onimaki ao ni kaiinakoira. Ngkana e riki aei, taiaoka uringa ana baire ni kakukurei Tamara are i Karawa n arana teuana—te baire ni kabomwi. Te baire e aki nanonaki bwa e na marau kawaira rinanon te maiu, n aki reke waera, n aki iinako, ma te moangare n tainako iaon moara. Tamara are i Karawa e ataia bwa ti na kainnanoa te kabooaki. Aio bukina ngkai E katauraoa te baire ni kabomwi.7 Aio bukina E kanakoa iai te Tia Kabooira. Ngkana ti ininimaki—tao ibukin tera—anne tiaki nanona bwa e aki mwakuri te baire. Anne te tai are ti a kainnanoa riki iai te baire!
Inanon taai akanne, irii ana banna ni katooto Betero. Rairaki nakon te Tia Kamaiu ngkekei naba.
“Aio bon te tai ao bongin kamaiuakimi. … Tai Taotaona bongin am rairannano.”8
N aki tabe bwa ti mena ia ao tera arora mai imwaina, te rairannano bon te kawai ni waaki nako. E reirei Beretitenti Russell M. Nelson:
“Akea te bwai ae anga te inaomata, te karinerine, ke ae kakaawaki riki nakon rikirakera n tatabemaniira nakon riki te katoatai, ni iangoa te rairairannano n te bong koraki. …
“Bwa tao ko nanomwaaka ni waaki inanon kawain te berita, n tia n tibanako ke ni mwaawa man kawain te berita, ke ko aki kona n noora te kawai man te tabo are ko tei iai ngkai, I bubuti ngkami bwa kam na rairi nanomi. Namakina te korakora man te rairannano ni katoa bong—ni karaoa ao n riki n tamaroa ni katoa bong.”9
Te roko nakon Kristo nanona e raka riki nakon ti iangoakina ke tataekinana ke bon tangirakina. E nanonaki n Iriirakina. E nanonaki ni maiuakin kawai are E reireiniira bwa ti na maiuakinna. Ao ibukira ni kabane, e nanonaki bwa te rairannano, ae aki kawaeremweaki.
Temanna natiu te aine e mwakuri ngkoa n aia tienta ni kataneiai mitinare. E tuangai taekan te elder are e reireinna bwa e kaotia nakoina ae e aki koaua raoi ngkana e bon koaua ana Boki Moomon. E a tia n tataro man tataro ibukin te kakoaua n tamnei, ma bon akea kaekaana ae reke.
Natiu te aine e tataro ni kan ataia bwa tera ae e riai ni karaoia ni buoka iai te mitinare aei. Te namakin are e karekea bwa koroboki aika a tabu ti aki tii anganaki bwa tina kona ni wareki ao ni karekei iai kakoaua, ma ti anganaki bwa reireiara bwa tina kawakin ana tua te Atua. Natiu e tibwa te iango aei ma te mitinare.
Imwiina, e manga noora naba te mitinare aei, n tara riki ni kukurei. E tuangnga natiu bwa e a tia n tokin te tai ni karekea te kakoaua bwa e bon koaua Ana Boki Moomon. E ataia bwa aio te kakoaua are e roko ibukina bwa e a tia ni katamaroa riki ana mwakuri ni karaoi bwaai ake e reireia Ana Boki Moomon.
Ti a iriira ana banna ni katoto Betero n rairaki nakon te Tia Kamaiu n tain ara kangaanga. Iriira Iesu Kristo ao tai kamoamoa n oin wanawanam ao korakoram. E ngae ngke ko a tia ni kataia n am kabanea n tamaroa ma e aki reke, e tuai ni waeremwe ma kataia n nakoina. E mwakuri te baire ni kamaiu!
Te kateniua n reirei are I reiakinna man are e rinanona Betero bon aei:
Karinanoko imatan te Uea, ao E na anganiko te kakorakoraaki ni karaoi bwaai aika a korakora riki.
Betero e a tia ni kaota te onimaki, n nakonako iaon te ran ao ni butiia te Tia Kamaiu ngkai e kainnannoa te ibuobuoki. Ni karaoan anne, te Tia kamaiu e noora ana konabwai Betero ni kona ni karaoa ae mwaiti riki. “Ngkoe ae e karako am onimaki,” E taku, “ko aera ngkai ko nanokokoraki?”10
Betero e kona n un n taekana aei. Ma e butimwaia ma te nanorinano. E reitinako n ukoukora te onimaki ae korakora riki iroun Iesu Kristo. Rinanon taneiai aika a mwaiti are karaka riki ana onimaki—tabeua mai ibuakona a bon rangi, ni kangaanga—Betero n tokin te tai e a riki bwa te tia kairiiri ae korakora are e tangiria te Uea. E katiai bwaai aika a korakora n ana mwakuri te Uea.
Tera te mwakuri ae korakora ae tangiria te Uea bwa kona karaoia? N Ana Ekaretia ao n abanueana, a rang mwaiti taai ni beku ao n ibuobuoki nakoia aomata n aron are e karaoia te Tia Kamaiu. E tangiriko bwa kona riki bwa mwakoron Ana mwakuri ae korakora. E na aki kona ni koaua te baire ni kakukurei iroum ngkana ko aki buokiia aomata bwa a na maiuakinna.
Ni katean au onimaki, ana taeka Aramwa aikai a bita maiu: “a na kakabwaiaki ake a kananorinanoia ma n aki kairoroaki bwa a na nanorinano.”11 Ti a kananorinanoira n te aro are e na kona n tabekiira Iesu, kairiira, ao n anganiira konabwai aika uaana.12
I kakoaua bwa te baire ni kakukurei e mwakuri. E karaoaki iroun Tamara are i Karawa, are e tangiriira. E mwakuri ibukina ae Iesu Kristo e tokanikai iaon te bure ao te mate rinanon Ana Mwakur ni Kamaiu. Nakomai Nakoina, Iriiria, ao “e na uotaki te babaire ni kabomwi are e kakannato nakoimi.”13 N aran Iesu Kristo, amen.