Te Atua E rang Tangiriira
Te Atua e rang n tangiriira n te aro are E kanakoa Natina Ana Rikitemanna—ti aonga n aki mate ma e na kamaiuira n te maiu are akea tokina.
“Bwa E tangiriia aomata te Atua n te aro are E anga Natina ae te riki-temanna iai, bwa e aonga n aki mate ane onimakinna, ma e na reke irouna te maiu are e aki toki” (Ioane 3:16). Te moan tai are I noora iai te kibuntaeka aei, I aki mena n te taromauri ke ni bootakin te utu n te tairiki. I mataku n te kabo n te takakaro iaon te terewition. E aki akaka bwa te titeition raa are I mataku iai, ao n aki taraia bwa te takakaro raa, e kakaawaki bwa iai te aomata ae taua te kanikina are e koreaki “Ioane 3:16.”
I a tia ni katitebooa tangirakin are n 16 ao kibu17: “Bwa E aki kanakomaia Natina te Atua nako aon te aba ba E na kabuakaka te aba; ma E kanakomaia ba e na kamaiuaki te aba i Rouna.”
Te Atua e kanakoa Iesu Kristo, Ana Rikitemanna n rabwata, bwa e anga maiuna ibukira n tatabemaniira. Aio E karaoia ibukina bwa E tangiriira ao e a tia ni katea te baire ibukira n tatabemaniira bwa tina manga oki ni maeka ma Tamara are i Karawa.
Ma aio tiaki te baire are e kabuta ni kamwengaraoia te koraki ae e aki mwakuri. E bon onoti, kateaki iroun Tamara are i Karawa ae tatangira, are e atai nanora, arara, ao tera te bwai ae tangiria bwa ti na karaoia. Bukin tera ngkai ti kakoaua anne? Ibukina bwa ti reireiaki man koroboki aika tabu:
Mote e aki toki n ongo ana taeka Tamara are i Karawa ae kangai “Mote, ae natiu” (taraa Mote 1:7, 40; taraa naba verses 7, 40). Aberaam e ataia bwa bon natin te Atua ngaia, are e rineaki ibukin ana mition imwain bungikina (taraa Aberaam 3:12, 23). Ni bain te Atua, Etita e katukaki n te tabo are e kona iai ni kamaiuia ana botanaomata (taraa Etita 4). Ao te Atua e onimakina te ataeinnaine, te toro, bwa e na kakoaua te burabeti ae maiu bwa e aonga Naaman ni kamarurungaki (taraa 2 Uea 51-15).
I rang tangira riki te mwaane ae raoiroi, ae katuarereke, are e tamwarakea te aroka bwa e na noora Iesu. Te Tia Kamaiu e ataia bwa e mena ikekei, e tei, n taratarai mwaangan te aroka ao e taekini taeka aikai:: “Takaio, … ruo” (Ruka 19:5 Ao ti aki kona ni mwaninga te ataeinimwaane ae 14 ana ririki are e nakon te buakonikai ni kan ataia i bon irouna bwa tera raoi te baire: “[Iotebwa,] Natiu ae Tatangiraki Teuaei. Ongo Irouna!” (Iotebwa Timiti—Rongorongo 1:17).
Tariu ao mwaneu, e boboto iaora ana baire Tamara are i Karawa ao te kantaninga ibukin ana mwakuri te Tia Kamaiu. Ngaira aikai, n tatabemaniira, bon Aia Mwakuri ao Mimitongiia.
Irou, akea riki ni koroboki aika a tabu ae kabwarabwara riki ni kamatata nakon are I kamatebwaia n te O Tetemanti. Te mwakoro imwiin te mwakoro ti kunei katoto n aron Tamara are i Karawa ao Iehova a karekerekeaki n te tangira inanon maiura.
Ti a tibwa tia ni kamatebwaia rongorongon Iotebwa, natin Iakobwa ae tatangiraki. Man kairakena, Iotebwa e rang n tatangiraki iroun te Uea, ma e rinanon kataaki aika korakora ni baia tarina. Uoua te wiiki n nako, a mwaiti ibuakora aika a riingaki n aron Iotebwa ni kabwarai aia bure tarina. N Nakomai, Iriirai ti wareki: “N aro aika mwaiti, booraoin maiun Iotebwa ma Iesu Kristo. E ngae ngke ara bure e Anganna te rawawata ae korakora, e kabwarai burera te Tia Kamaiu, e kainaomataira ngaira ni kabane man te toki are e riaon buakakan te rongo. Tao ti kainnanoa kabwaraan ara bure ke ti na kabwarai buure—n teuana te tai ti riai ni bane ni karaoi ni kauoua—ana katooto Iotebwa e buokiira bwa ti na kabanea ara iango iroun te Tia Kamaiu, are e reke mai iai te kamarurungaki ao te kaiokaki.”1
Te reirei are I tangiria man te rongorongo anne e reke iroun tarin Iotebwa Iuta, are e riki bwa mwakoron ana baire te Atua ae onoti ibukin Iotebwa. Ngke e kamwaneaki Iotebwa irouia tarina, Iuta e anai nanoia bwa a na aki tiringa Iotebwa ma a na kabonakoa bwa te toro (taraa Karikani Bwai 37:26–27).
Ririki aika a bati imwiina, Iuta ma tarina a kaira tariia are te kabanea n uarereke, Beniamina, nako Aikubita. N te moan tai e rawa te karo. Ma Iuta e berita nakon Iakobwa—bwa e na uota rikaaki Beniamina.
I Aikubita, ana berita Iuta e kataaki. Beniamina e kairuruaki bwa e irekereke n te bure. Iuta, e taua ana berita, e anganano bwa e na kabureaki n onea mwiin Beniamina. “Bwa,” e taku, “N na iranna ni waerake nakon tamau, ngkana e aki mena irou te teinim wane aei?” (taraa Karikani Bwai 44:33–34). Iuta e tokanikai ni kawakina ana berita ao e kaira Beniamina n oki ni kamanoaki. Iai am namakin ibukiia aomata ae ai aron Iuta nakon Beniamina?
Tiaki aio aia namakin kaaro nakoia natiia? Tera aron aia namakin mitinare nakoia aomata ake a beku ibukiia? Tera aia namakin taan kairiiri n te Moanrinan ao te roronrikirake ibukiia naake a reireiniia ao a tangiriia?
N aki taraia bwa antai ngkoe ao tera arom, iai temanna ae namakin ae aia ron aei ibukim. Temanna ae e tangiria n okira Tamara are i Karawa ma ngkoe.
I kakaitau ibukiia naake aki bwarannano, ake a reitinako ni bunra nanoia n aia tataro ibukira, ao ake a reitinako n reiakiniira ao ni burokiira bwa tina okira mweengara nakon Tamara i Karawa.
Ae tibwa riki raraou e kabanea 233 te bong n te onaroraki n aorakin COVID-19. N te tai anne, e kawaraki iroun tamana ae e a tia ni mate are e tuatua karokoan ana rongorongo nakoia tibuna. Riki man iteran te rabuna, te tibu te mwane aei e tangiria ni buokiia tibuna bwa a na okira mweengaia i karawa.
A rikirake, ana reirei Iesu n ururingiia tenaan “Beniamina” inanon maiuia. Ni kabuta te aonaaba a tia n ongo ana wewete ana burabeti te Atua, Beretitenti Russell M. Nelson. Ataeinimwaane ao ataeinnaine a kabaeaki n ana taanga ni buaka te Uea. Aomata nako ao utu a arori baia n tamnein te mwakuri n ibuobuoki—tatangira, tibwatibwa, ao ni kaoia raoraoia ao kaain rarikiia bwa a na nakon Kristo. Te roronrikirake ao ikawai a ururingi ao a teimatoa ni kawakin aia berita aika tabu—ni kanoai ana tembora te Atua, n araia kain aia utu ake a tia ni mate, ao ni karekei otenanti n tei ibukiia.
Bukin tera Tamara are i Karawa e karaoi babaire bon ibukira n raonaki ma buokakiia aomata bwa a na oki Nakoina? Ibukina bwa aei arora ae ti kona n riki iai n ai aron Iesu Kristo. N tokin te tai, rongorongon Iuta ao Beniamina a reireiniira ana anganano te Tia Kamaiu ibukira. Rinanon Ana Mwakuri ni Kamaiu, E anga maiuna bwa e aonga ni kairiira nakon mweengara. Ana taeka Iuta e kaota ana tangira te Tia Kamaiu: “N na iranna ni waerake nakon tamau, ngkana [ngkoe] akea irarikiu?” Ngkai taan ikoikotiia Iteraera, akanne a kona n riki naba bwa ara taeka.
Te O Tetemanti e kaonaki ma kakai ao nanoanga ake kanikinaean ana baire Tamara are i Karawa. N 2 Uea, mwakoro 4, te kibuntaeka “ao n te bongina” e kabonganaaki teniua te tai ni katuruturua kakaawakin te tai anne ni kaineti ma ana tai te Atua, ao akea te kabwarabwara ae rang uarereke ae aki kakaawaki Irouna.
Raraou ae boou Paul e kakoaua te koaua aei. Paul e ikawairake n te mweenga are n tabetai iai te iowawa iai ao n tainako iai te kaun aro. Inanon ana reirei n te taanga ni buaka i Tiaman, e kinaia uoman tititati aika tara n iai irouia otan te tamnei. E titiraki bwa bukin tera ngkai a kaokoro e uota te kaeka are ngaiia kain Ana Ekaretia Iesu Kristo ibukiia aika Itiaki ni Boong aika Kaitira.
E waekoa ni kakaitibo ma mitinare Paul ao e a kaoaki nakon te taromauri. Te Tabati are imwiina, ngke e ruo man te bwati, e nooria mwane aika uoman n aia kabaraki ae mainaina ao aia neketai. E titirakiniia ngkana mitinare mwaane ngaiia n te Ekaretia. A kaeka eng, ngaia are e a iriia Paul.
N tain te taromauri, te tia kabwarabwara e koteia aomata aikai ibuakoia kain te taromauri ao e kaoia bwa a na kaota aia koaua. Ni katoa banen aia koaua, te tia oroturam e anga te turam ni karine ao kain te taromauri a atonga, “Amen.”
Ngkai te tia kabwarabwara e kotea Paul, e teiraki man taku, “I ataia bwa Iotebwa Timiti bon te burabeti ao Ana Boki Moomon e bon koaua.” Akea te turam ni karine ke te amen. E kunea n tokin te tai Bauro bwa e bure te Ekaretia ae mena iai. N te tai ae waekoa, Paul e kunea te tabo ao e a bwabetitoaki.
N ana bong ni bwabetito Paul, te aomata ae e aki kina e tuangnga, “Ko a tia ni kamaiuai.” Tabeua te wiiki mai imwaina, te aomata aei e a tia ni baireia bwa e na kaea te ekaretia teuana ae iai turam iai ao amen. Ngke e ongo iroun Paul ni kaota ana koaua iroun Iotebwa Timiti ao Ana Boki Moomon, e a ataia bwa te Atua e kina, e atai ana kangaanga, ao iai ana babaire ibukina. Iroun Paul ao te mwaane anne, e bwaka raoi “n bongina,” ni koaua
Ngaira naba ti ataia bwa Tamara are i Karawa iai ana baire ibukira ae onoti n tatabemaniira. Ibukina bwa te Atua e kanakoa Natina ae Tangiraki ibukira, te kakai are ti kainnanoia e na “[koro] ni “[bon te] bongina” are riai ibukin Ana baire bwa e na koro bukina.
I kakoaua bwa n te ririki aei ti kona n reiakina riki taekan ana baire te Atua ibukira n Te O Tetemanti. Kanoana ae tabu e reireiniira tibwangaia burabeti n taai aika a aki rang ataaki ao ni bain te Atua n te aonaaba are e kananououa ao n angiin te kaiangatoa. Bon taekaia naba taan kakoaua aika nanorinano ake a ingainga nakon Rokon te Tia kamaiu, n ai arora n ingainga ao n tauraoi ibukin Kauouan Okina—Okina are e a kaman tataekinaki, ae mimitong.
Ni karokoa te bong anne, ti kona n aki nooria ni matara, ana baire te Atua n tein maiura ni kabane (taraa Reirei ao Berita aika Tabu 58:3). Ma ti kona n uringa ana kaeka Nibwaai ngke e kaitara te bwai ae e aki ota iai; ngkai e aki atai nanon bwaai ni kabane, e ataia bwa te Atua e tangiriia Natina (taraa 1 Nibwaai 11:17).
Aio au kakoaua ni moaningabongin te Tabati ae tamaroa aei. Ti bia koreia inanora ao ni kariaia bwa e na kaoni nanora n te rau, kantaninga, ao te kimwareirei ae akea tokina: E rang tangiriira te Atua ngaia are e kanakoa Ana Rikitemanna—bwa E na aki kabuakaka te aba; ma E na kamaiuira. N aran Iesu Kristo, amen.