“Maati 14–20. Karikani Bwaai 42–50: ‘E Atia n Rairia te Atua nakon te Bwai ae Raoiroi,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Maati 14–20. Karikani Bwaai 42–50,” Nakomai, Iriirai—Ibukiia Aomata n Tatabemaniia ao Utu: 2022
Korobanaan Iotebwa mai Aikubita
Maati 14–20
Karikani Bwaai 42–50
“E Atia ni Rairia te Atua nakon te Bwai ae Raoiroi”
Warekan koroboki aika tabu e kaoa te Tamnei. Kakauongo n ana wirikiriki ngkai ko wareware, e ngae ngke e aki irekereke ma are ko warekia.
Korea Am Namakin
Tao aio bon 22 te ririki imwin are e kabonakoaki Iotebwa nako Aikubita irouia tarina. E a tia n rawawata n taian kangaanga, n raonaki ma te bukinaki ae kairua ao te kamatawarikaki. Ngke e manga noria tarina, Iotebwa bon te koowana i Aikubita n te tai anne, ti uean Aikubita ngkoa ae iai nakoana ae rietaata riki nakon Iotebwa. E na kaman tia ni kataea kaina irouia tarina, ao n iangoa te bwai ae a tia ni karaoia nakon Iotebwa, kanga anne ae e kona n oota te aba iai. Ma Iotebwa e kabwarai aia bure tarina. Tiaki tii anne, ma e buokiia naba n nora oin bukin rawawatana. “E kani karekea te kabaia te Atua” (Karikani Bwaai 50:20), e tuangiia, ibukina bwa e uotia nakon te nne are e kona ni kamaiuia “ni kabane ana utu tamana” (Karikani Bwaai 47:12) man te rongo.
Ni kawai aika mwaiti, ana taneiai ni maiuna e ira te baeten ae ti tebo ma maiun Iesu Kristo. E ngae ngke ara bure e anganna te rawawata ae korakora, e kabwarai burera te Tia Kamaiu, e kainaomataira ngaira ni kabane man te toki are e riaon buakakan te rongo. Tao ti kainnanoa kabwaraan ara bure ke ti na kabwarai buure—n teuana te tai ti riai ni bane ni karaoi ni kauoua—ana katooto Iotebwa e buokiira bwa ti na kabanea ara iango iroun te Tia Kamaiu, are e reke mai iai te kamarurungaki ao te kaiokaki.
Iango ibukin te Kamatebwai i bon Iroum ni Koroboki aika Tabu
“Ao E kanakomaiai te Atua I mwaimi bwa N na kawakiningkami.”
Ngkai kam wareka rongorongon Iotebwa, ko a tia n noori baika a titebo imarenan karakinana ao ana mwakuri ni kamaiu Kristo? Ko kona n iangoia bwa e kanga a na mwakuri Iotebwa n titebo ma taben te Tia Kamaiu n ana utu te Atua. Tera baika a titebo are ko noria imarenan are rinanona Iotebwa ao ana mition te Tia Kamaiu, are e kanakomaiakaki bwa “e kamaiu [ra] n te kainaomataaki ae korakora”? (Karikani Bwaai 45:7).
Te kabwarabure e uota te kamarurungaki.
Warekan rongorongon Iotebwa ngke kabwarai aia bure tarina ibukin aia mwakuri ake a karaoi nakoina e kona ni kaira am iango nakon temanna are matoatoa iroum kabwaraan ana bure. Ke tao te kakatai ae matoatoa n te kabwarabure e kona n riki n taai aika a na roko. N akanne, e kona n ibuobuoki iangoana bwa e kanga ni kona Iotebwa ni kabwarai buure. Tera anuan maiun ao katein Iotebwa are ko noria i nanon Karikani Bwaai 45; 50:15–21? E kanga ana taneiai n tia ni kairorora bwa e na bwaina tekabwarabure? Tera ae kaotaki n ana katooto Iotebwa n aron karekean te nano ni kabwarabure man ana ibuobuoki te Tia Kamaiu?
Tarai naba kakabwaia ake a roko nakon ana utu Iotebwa bukina bwa e kabwarai buure. Tera kakabwaia ae ko noori man te kabwarabure? Iai te tai are ko namakinna bwa ko na tabenanoia aomata ake a tia ni karaoa te bwai ae kairua nakoim?
Taraa naba Karikani Bwaai 33:1–4; Reirei ao Berita aika Tabu 64:9–11; Larry J. Echo Hawk, “Aron Kristo naba Ngke e Kabwara Ami Bure, n Ai Aromi Naba,” Riaona, Meei 2018, 15–16.
Tera ae nanonaki n te kabotau n ana kakabwaia Iotebwa?
Ana kakabwaia Iotebwa nakoia kanoana iai inanon tamnei aika ootara, ma tabeman taan wareware a kona ni kunea bwa e matoatoa naba te oota iai. Ma te kakaitau bwa, te euangkerio ae kaokaki e anganira tabeua kaotakira riki. Ngkana ko wareka te kakabwaia nakon Iotebwa i nanon Karikani Bwaai 49:22–26, wareki naba kiibu aikai, ao taraia bwa tera iango ake a kaotii: 1 Nibwaai 15:12; 2 Nibwaai 3:4–5; Iakobwa 2:25; Reirei ao Berita aika Tabu 50:44.
Ngkai ko wareka rongorongon ana kakabwaia Iuta i nanon Karikani Bwai 49:8–12, uringnnga bwa te Uea ae Tawita ao Iesu Kristo bon kanoan Iuta. Tera taeka ao kibuntaeka ni kiibu aikai are ko uringa iai te Tia Kamaiu? Ngkai ko kamatebwaia ana kakabwaia Iuta, e na kona n ibuobuoki naba warekan Te Kaotioti 5:5–6, 9; 1 Nibwaai 15:14–15; Reirei ao Berita aika Tabu 45:59; 133:46–50.
Ngkana ko tangiria n reiakina riki rongorongon natin Iakobwa ao ana baronga Iteraera are a roko mai iai, iai te koroboki ibukiia i nanon Kairi nakon Koroboki aika Tabu (scriptures.ChurchofJesusChrist.org).
Karikani Bwaai 50:24–25; Ana Rairairi Iotebwa Timiti, Karikani Bwaai 50:24–38 (in the Bible appendix)
“E na kateirakeaki te tia mamata iroun te Uea ae Atuau.”
Rinanon miin Iotebwa (taraa Karikani Bwaai 37:5–11) ao kabwaraan miia tabeman irouna (taraa Karikani Bwaai 40–41), te Uea e kaotii bwaai ake a na riki ni boong ake a na roko. Ma te Uea e kaotia naba nakon Iotebwa te bwai ae na riki n tienture aika a na roko. N ae onoti, e reiakina ana mwakuri ni burabeti Mote ao Iotebwa Timiti. Ngkai ko wareka ana taeka Iotebwa i nanon Karikani Bwaai 50:24–25 ao i nanon Ana Rairairi Iotebwa Timiti, Karikani Bwai 50:24–38 (in the Bible appendix), bon titirakiniko bwa a kanga bwai aikai ni kakabwaiaia Iotebwa ao tibun Iteraera. Bukin tera e kakaawaki iroun te Uea bwa e na kaoka te taetae ni burabeti aei rinanon Iotebwa Timiti? (taraa naba 2 Nibwaai 3).
E kanga Iotebwa Timiti ni kakoroa nanon taetae ni burabeti ake i nanon Ana Rairairi Iotebwa Timiti, Karikani Bwai 50: 27–28, 30–33? (taraa Reirei ao Berita aika Tabu 1:17–23; 20:7–12; 39:11; 135:3).
Kamataataan tamnein Iotebwa mai Aikubita, iroun Paul Mann
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 42–46.A kona n unga kaain te utu man karaoan te kaotioti ni karakinan Iotebwa ngke e a manga kaitiboaki ma tarina. (“Iotebwa ao te Rongo,” i nanon Karaki n te O Tetemanti e kona n ibuobuoki.) Kaungai ngkami iai—kabonganai kunnikai ke katamaroa ngkana kam tangiria. Kaungaia kaain te utu bwa a na kataia n oota n aia namakin ao aia iango naake n te karaki. Ko kona ni katurua te taratara n ana namakin Iotebwa nakoia tarina ao tao tera are a namakinna ngke e kabwarai aia bure. Aio e kona ni karekea te marooro bwa e kanga te kabwarabure ni kona ni kakabwaia am utu.
Ngke e kaitibo Iotebwa ma tarina imwin ririki aika mwaiti, a kanga ni kaotia ae a tia ni bitaki man te kabanea n tai are e noriia iai? Tera ae ti kona n reiakinna i aon te rairannano man are a rinanona?
-
Karikani Bwaai 45:3–11; 50:19–21.E noria Iotebwa bwa e ngae ngke e matoatoa te bwai are e rinanona i Aikubita, “E kani karekea te kabwaia te Atua” (Karikani Bwaai 50:20). E a tia te Atua n rairii kangaanga n ami utu nakon taian kakabwaia?
Te anene i aon raoiroin te Atua i nanon taai ni kangaanga (n aron “Ai Matoara” [Anene n Taromauri, nambwa. 85]) e kona ni kanakoraoa te marooro. Tera rongorongo man karakinan Iotebwa are e kaota ana reirei te kuna aei?
-
Karikani Bwaai 49:9–11, 24–25.Tera ae ti noria ni kiibu aikai are e reireiniia taben ao ana mition Iesu Kristo? (Ibukin buokan te kamataata ni kiibu aikai, taraa te kanoa ibukin Karikani Bwaai 49 i nanon “Iango ibukin Am Kamatebwai i Bon Iroum ni Koroboki Aika Tabu.”)
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “Ai Matoara,” Anene n Taromauri, nambwa 85.
Kanakoraoan Ara Anga reirei
Kabongana te katangitang. Buokiia kaain te utu n nori koaua n te euangkerio n mwanewen te kuna ke kunan te Moanrinan. Tarai kawai are ko na karika anene n taromauri bwa kanoan am kamatebwai n te euangkerio.
Iakobwa e Kakabwaiaia Natina Mwaane, iroun Harry Anderson