“Beberuare 28–Maati 6. Karikani Bwaai 28–33: ‘E Boni Mena Iehova n te Tabo Aei,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Beberuare 28–Maati 6. Karikani Bwaai 28–33,” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022
Beberuare 28–Maati 6
Karikani Bwaai 28–33
“E Boni Mena Iehova n te Tabo Aei”
Ngkai ko wareka Karikani Bwaai 28–33, iangoia bwa tera ae ko reiakinna man ana banna ni katoto Iakoba ao ana utu. Korea te namakin are ko karekea.
Korea Am Namakin
Mwakoro 28 ao 32 n Karikani Bwaai e taekini uoua taneiai n tamnei are e rinanona te burabeti are Iakoba. Ni kauoua a riki inanon te rereua ma iaan aro aika a rangi ni kaokoro. N te bwai are e moan rinanona, Iakoba e mwananga nako aban tinana bwa e na kakaea buuna ao, a riki bwaai aikai iaon kawaina, e taonaki n te bong ao e kabonganai atibu ae kanga uninga. E aki kantaningaia bwa e na mena ikekei te Uea n te tabo ae rereua, ma te Atua e kaotia nakon Iakoba n te mii are e bita maiuna, ao e taekinna Iakoba, “E boni mena Iehova n te tabo aei; ao I aki ataia” (Karikani Bwaai 28:16). Ririki imwina, Iakoba e manga okira naba te rereua. N te tai aei, iaon kawaina n okira Kanaan, ni kaitara te manga kaitibo are e kona ni ikamamate ma tarina ae rangi n un, Etau. Ma Iakoba e ataia bwa ngkana e kainnanoa te kakabwaia, e kona n tuanga te Uea, inanon naba te rereua (taraa Karikani Bwaai 32).
Ko kona naba ni mena inanon oin am rereua n ukoukora te kakabwaia mairoun te Atua. Tao am rereua bon te reitaki ae kangaanga inanon te utu, n ai aron naba Iakoba. Tao ko namakina te raroanako mairoun te Atua ke n namakinna bwa ko kainnanoa te kakabwaia. N tabetai te kakabwaia e roko n aki kantaningaaki; n tai tabetai e reke man te kaaitara. Tera nako bwaai aika ko kainnanoi, ko kona ni kunei akanne inanon naba oin am rereua, “e bon mena Iehova n te tabo aei.”
Iango ibukin te Kamatebwai i bon Iroum ni Koroboki aika Tabu
I anganaki te berita n ana kakabwaia Aberaam n te tembora.
Iaon kawaina nako Aran ni kakaea buuna, Iakoba e miia te kaintamwarake ae takinaki mai iaon te aba nako karawa, ao te Atua e tei i etana. Inanon te mii, te Atua e kaboua te berita naba anne ma Iakoba are e karaoia ma Aberaam ao Itaaka (taraa Karikani Bwaai 28:10–17; taraa naba Karikani Bwaai 12:2–3; 26:1–4). Beretitenti Marion G. Romney e tibwaua ana iango iaon te bwai are e tei ibukin te kaintamwarake: “Iakoba e ataia bwa te berita are e karaoia ma te Uea i Betaera a toka iaon te kaintamwarake are ngaia are e na tamwarakeia bwa e aonga ni karekei kakabwaia—kakabwaia are e na kona n rin iai ao n reitaki ma te Uea. … Tembora a tei ibukira ni kabane n aron Betaera nakon Iakoba” (“Temples—The Gates to Heaven,” Ensign, Maati. 1971, 16).
Tera taeka tabeua ao kibuntaeka inanon Karikani Bwaai 28:10–22 ae kaotaki nakoim te reitaki n ana taneiai Iakobwa ao kakabwaia n te tembora? Ngkai ko wareki kibu aikai, iangoi berita ake ko a tia ni karaoi, tera te namakin ae roko iroum?
Ngkai ko wareka Karikani Bwaai 29:1–18, iangoia bwa e kanga ana mare Iakobwa ma Rakera ni kakaawaki n te berita nakon te Atua are e a manga kabouaki ma Iakobwa i Betaera (“ana auti te Atua”; taraa Karikani Bwaai 28:10–19). Teimatoa n iangoa te taneiai aei ngkai ko reitinako ni wareka taekan maiun Iakoba n Karikani Bwaai 29–33. E kanga umwan te Uea ni uotiko ni kaniiko riki nakon te Atua?
Taraa naba Yoon Hwan Choi, , “Tai Taratara Nako, Tararake!” Riaona, Meei 2017, 90–92.
Karikani Bwaai 29:31–35; 30:1–24
Te Uea e uringai inanon katakiu.
E ngae ngke Rakera ao Reea a maiu n te tai ao n te katei ae okoro ma are iroura, ti kona ni bane n ota n tabeua namakin ake a karekei. Ngkai ko wareka Karikani Bwaai 29:31–35 ao 30:1–24, taratarai taeka ao kibuntaeka ake a kabwarabwara ana nanoanga te Atua nakon Rakera ao Reea. Iangoia bwa e kanga te Atua n “noori [am] kangaanga” ao e “uringngko” (Karikani Bwaai 29:32; 30:22).
E kakaawaki naba bwa kona uringnga bwa e ngae ngke te Atua e ongo iroura, ibukin Wanawanana E aki anganiira n tainako te bwai raoi are ti bubuti ibukina. Iangoia ni kamatebwaia ana rongorongo Unimwaane Brook P. Hales “Kaekaan Tataro” (Riaona, Meei 2019, 11–14) n reiakinii kaokoron kawai are e kaekaira iai Tamara are i Karawa.
Ibukin riki rongorongon te katei n te tai are e koreaki iai te karaki aei, taraa Aia Boki n Reirei Ataein te Reirei O Tetemanti: Karikan Bwaai—2 Tamuera (2003), 86–88.
Tamnei ni kabwarabwara Iakoba ao Etau ngke a inga, iroun Robert T. Barrett
Te Tia Kamaiu e buokiira n tokanikai iaon kakauntaeka inanon ara utu.
N okin Iakoba nako Kanaan, e “bati ni maaku ao e rawawata” bwa e na kanga Etau ni butimwaia (Karikani Bwaai 32:7). Ngkai ko wareka Karikani Bwaai 32–33 taekan kaitiboon Iakoba ma Etau ao ana namakin are e kaineti nako iai, ko na bae n iangoi am reitaki ma am utu—tao teuana e kainnanoa te kamaoaki. Tao te karaki aio e kona ni kaungako bwa kona karoko iroun temanna. Titiraki n aron aikai a kona n ibuobuoki: ni kairiko inanon am wareware:
-
E kanga Iakoba ni katauraoi ni kaitibo ma Etau?
-
Tera ae e katereaki nakoim n taekan ana tataro Iakoba are e reke n Karikani Bwaai 32:9–12?
-
Tera ae ti kona ni reiakinna n te kabwarabure man ana banna ni katoto Etau?
-
E kanga te Tia Kamaiu ni buokiira ni kamaoa te reitaki inanon te utu?
Taraa naba Ruka 15:11–32; Jeffrey R. Holland, “The Ministry of Reconciliation,” Liahona, Nov. 2018, 77–79.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 28–33.Kabongana “Iakoba ma Ana Utu” (inanon Karaki n te O Tetemanti) ni buokiia ataei n ota n te bwai are e riki man mwakoro aikai. Tao kain te utu a kona ni kamatebwai tamnei n tatabeua nako ao n ataa te bwai ae e a tia n reiakinaki, n aron kakaawakin te mare, berita, mwakuri ao te ikabwarabure.
-
Karikani Bwaai 28:10–22.Ko kona ni kabongana te kaintamwarake (ke tamneina teuana) ni maroroakinna bwa e kanga ara berita ni katotonga te kaintamwarake. Tera te berita ae ti a tia ni karaoia, ao a kanga ni uotiira ni kaniira riki nakon te Atua? Kain te utu a kona ni kukurei ni korea tamnein miin Iakoba, are e kabwarabwaraaki n Karikani Bwaai 28:10–22.
Te anene n taromauri “Nearer, My God, to Thee” (Anene n Taromauri, no. 100) e kaugaaki man miin Iakoba. Am utu a kona n anenea te kuna aei ao ni maroroakinna bwa tera ae e reirei iaona kibu aikai n tatabeua nako.
-
Karikani Bwaai 32:24–32.E bae ni iai kain am utu aika a tatangiria ni boorabwata. Bukin tera te “boorabwata” te kawai ae tamaroa ni kabwarabwaraan ukoukoran te kakabwaia mairoun te Uea? Tera ae taekinaki n Enoti 1:1–5; Aramwa 8:9–10 ibukin te bwai are e nanonaki n te “boorabwata … i matan te Atua”?
-
Karikani Bwai 33:1–12.Imwiin ririki aika a bati ni maaku, Iakoba ao Etau a manga katiteuanaaki. Ngke arona bwa a kona Iakoba ao Etau n taetae nakoira n te bong aei, a na tera ae a na taekinna ni buokiira ngkana iai te itabarara inanon ara utu?
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene are rineaki: “Dearest Children, God Is Near You,” Anene n Taromauri, no. 96.
Kanakoraoan Am Kamatebwai
Kakaea Iesu Kristo. Te O Tetemanti e kakoaua Iesu Kristo rinanon ana karaki ao kanikina. Iangoi korean ke mwakenakin kibu ake a kaineti nakon te Tia Kamaiu ao riki aika a nano iroum.
Miin Iakoba i Betaera, iroun J. Ken Spencer