“Iango Aika a na Ururingaki ao n Iangoaki: Te Bata are Iteraera,” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)

“Iango Aika a na Ururingaki ao n Iangoaki: Te Bata are Iteraera,” Nakomai, Iriirai—Ibukiia Aomata n Tatabemaniia ao Utu: 2022

Tamnei

ana aikaon te iango

Iango Aika a na Ururingaki ao n Iangoaki

Te Bata are Iteraera

N te tabo teuana n te rereua i maiunikun Kanan, E tataninga ma te nakonano Iakoba ni kaitiboona ma tarina are bwebwena, ae Etau. Te kabanea n tai are Iakoba e nora Etau, tao bon 20 te ririki n nako, Etau e anga ana taeka bwa e na tiringnga. Iakoba e bane ana tairiki n nibwaraa i nanon te rereua, n ukoukora te kakabwaia mairoun te Atua. Man ana onimaki, botumwaaka, ao ana motinnano Iakobwa, te Atua e kaekai ana tataro. N te tairiki anne e bitaki aran Iakobwa nakon Iteraera, te ara are nanona bon “te kaunrabata ma te Atua” (Karikani Bwaai 32:28, footnote b; taraa naba Karikani Bwaai 32:24–32).¹

I rarikin te Karaanga Jabbok, Iakobwa e karekea te ara are Iteraera.

Aio te moan tai are kaoti iai te ara ae Iteraera i nanon te Baibara, ao bon te ara are e reitinako ni kabutaa te boki ao ni kabutaa te rongorongo. Te ara aei e bwainaki n taekina e raka i aon temanna n aomata. Iai 12 natin Iteraera aika mwaane, ao kanoaia a kinaaki bwa te “bata are Iteraera,” te “baronga are Iteraera,” bon “natin Iteraera,” ke “tibun Iteraera.”

N rongorongon rimoa, ao natin Iteraera a namakinna bwa a rangin ni kakawaki bwa a nako man teuana te baronga are Iteraera. Rikiia bon te bwai ae kakawaki ni kinaakin aia berita. Te Abotoro ae Bauro e katanoata bwa e roko man “ana baronga Beniamina” (I-Rom 11:1). Ngke e kanakoia natina mwaane Riaai nako Ierutarem n anai bwaatua buraati, teuana bukina bwa i nanon bwaatua akekei bon “kateirikiaia aia bakatibu” (1 Nibwaai 5:14; taraa naba 1 Nibwaai 3:3). E kunea Riaai bwa ngaia bon kanoan Iotebwa, ao ootaia kanoana n irekerekeia ma te bata are Iteraera e kaoti kakawakina nakoia i nanon ririki ake imwina (taraa Aramwa 26:36; 3 Nibwaai 20:25).

N te Ekaretia ni bong aikai, ko kona n ongo taekan Iteraera n taeka n aron “ikotakin Iteraera.” Ti anenei taekan “Te Tia Kamaiuia Iteraera,” te “Hope of Israel,” ao “Ye Elders of Israel.”² Ni bwai aikai, tiaki tii taekinii ke n anenea aban Iteraera are ngkoa ke te aba ngkai are arana Iteraera. Ma, ti taekinia naake a tia n ikotaki man aban te aonaba nakon nanon ana Ekaretia Iesu Kristo. Ti taekinia aomata ake a teimatoa ma te Atua, akea ukoukora Ana kakabwaia ma nanoia, ao ake, rinanon te bwabetito, a tia n riki bwa Ana aomata ni berita.

Am kakabwaia n tamanuea a kaota irekerekem nakon teuana mai buakon te bata are Iteraera. Iai rakana nakon ae tii te rongorongo ae kakaongora n rongorongon te utu. Te riki bwa kaain te bata are Iteraera nanona bwa iai am reitaki ae tabu ma Tamara are i Karawa ao Iesu Kristo. Nanona bwa ngkoe, n aron Aberaam, tabem bon te “riki bwa te kakabwaia” nakoia natin te Atua (Karikani Bwaai 12:2; Aberaam 2:9–11). Nanona, i nanon ana taeka Betero, bwa “ngkami bon te roro ae rineaki, ae te koraki n ibong n uea, ae te botanaomata ae itiaki, ae te natanaomata bon ana bwai te Atua, ba kam aonga ni kaoti raoiroin nako Teuare weteingkami man te ro nakon ana oota ae kamimi” (1 Betero 2:9). Nanona bwa ngkoe temanna are e “kaunrabwata ma te Atua” ngkai ko karinea am berita aika tabu ma Ngaia.