“Beberuare 21–27. Karikani Bwaai 24–27: E a Tia ni Kabouaki Te Berita,” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Beberuare 21–27. Karikani Bwaai 24–27,” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022
Tamnein Rebeka iroun Dilleen Marsh
Beberuare 21–27
Karikani Bwaai 2:2
E a Tia ni Kabouaki Te Berita
Ngkai ko wareka Karikani Bwaai 24–27, katabea am iango nakon iango n tamnei ake ko karekei. Tataro bwa kona ataia bwa a kanga reirei ake ko kunei n irekereke nakon maium.
Korea Am Namakin
Ana berita te Atua ma Aberaam e raonaki n te berita are rinanon Aberaam ao ana kariki “a na bane utun te aonaba ni kabwaia” (Aberaam 2:11). Tiaki anne te berita are e kona ni kakoroaki bukina n te roro ae ti teuana: ni kawai aika a mwaiti, te Baibara bon rongorongon Ana berita te Atua ake a kakoroaki bukiia. Ao e waaki ni kabooua te berita ma ana utu Itaaka ao Rebeka. Rinanona bwaai ake a rinanona, ti reiakina aron te riki bwa mwakoron te berita. Aia banna ni katoto a reireiniira te akoi, taotaonnano, ao onimakinan ana berita te Atua ake e taekini n te berita. Ao ti reiakinna bwa e bongana te anganako “amwaraken” aonteaba (Karikani Bwaai 25:30) bwa e aonga ni kamanoaki ana kakabwaia te Atua ibukira ao natira ao roro ake imwina.
Iango ibukin te Kamatebwai i bon Iroum ni Koroboki aika Tabu
Te mare e kakaawaki n ana baire te Atua ae akea tokina.
Ni bong aikai a mwaiti aomata aika a karaoa te mare bwa te kabanea ni bwai ke a bon iangoia bwa te karawawata. Aberaam iai ana iango ae kaokoro—irouna, ana mare natina ae Itaaka bon te kabanea ni kakaawaki. Bukin tera e rangi ni kakaawaki irouna? Ngkai ko wareka Karikani Bwaai 24, iangoa kakaawakin te mare n ana baire ni kamaiu te Atua. Ko kona naba ni wareka ana rongorongo Unimwane D. Todd Christofferson “Bukin Tera te Mare, Bukin Tera te Utu” (Liahona, Meei 2015, 50–53) ao iangoia bukin tera “te utu e kateaki man mareakin te mwane ao te aine ni katea te kabanea n tamaroa n tabo ibukin ana baire te Atua bwa e na rikirake” (iteraniba 52).
Titiraki n aron aikai a kona ni buokiko n iangoi tabeua reirei aika a kakaawaki inanon te mwakoro aei:
Karikani Bwaai 24:1–14. Tera ae e karaoia Aberaam ma ana toro ni kaira te Uea n aia waaki ni kakaea buun Itaaka?
Karikani Bwaai 24:15–28, 55–60. Tera anua ake ko kunei iroun Rebeka ake a ko tangiria bwa a bootau?
Tera riki iango aika ko kunei?
Taraa naba Reirei ao Berita aika Tabu 131:1–4; “Te Utu: Te Katanoata nakon te Aonaaba,” ChurchofJesusChrist.org.
I kona n rineia imarenan te waekoa ni kakaitau ao bwaai aika a rangi ni kakaawaki.
N ana katei Aberaam, te nati te mwaane are te ikawai n te utu ngaia are e na karekea te nakoa ni kairiiri ao te tibwanga, e aranaki bwa te rikia ni bwaibwai. Te nati aei e karekea te bwaibwai ae korakora mairouia ana karo, ni kairake ma te tibwanga ae korakora bwa e na tararuaia nikiraia ana utu.
Ngkai ko wareka Karikani Bwaai 25:29–34, iangoia bwa bukin tera Etau e tauraoi n anga karineana ni karimoa ibukin te amwarake. Tera te reirei ae ko kunea ibon iroum n te rongorongo aei? Te katoto, iai te aekaki n “amwarake” ae e anaaki iai nanom nakon kakabwaia aika moan te kakaawaki iroum? Tera ae ko karaoia bwa kona kabanea am iango iaona ao ni kakaitau ibukin kakabwaia aikai?
Taraa naba Mataio 6:19–33; 2 Nibwaai 9:51; M. Russell Ballard, “Tera ae Kakaawaki Riki Bon Are e Tiku ni Maan,” Riaona, Nob. 2005, 41–44.
Te berita are e anganaki Aberaam e kabouaki rinanon Itaaka.
Te berita are e karaoia te Atua ma Aberaam e kantaningaki bwa e na reitinako rinanon roro aika a mwaiti, ngaia are rongorongon Aberaam ao Taara ni kawakinan te berita e na riai ni bwatinaki rikaaki nakon Itaaka, Iakobwa, ao aine aika a kakaonimaki ake tabeman ao mwane ibuakoia roro nako. Ngkai ko wareka Karikani Bwaai 26:1–5, taratarai tabeua kakabwaia n te berita are e taekini te Atua. Tera ae ti reiakinna ibukin te Atua man kiibu aikai?
Karikani Bwaai 26:18–25, 32–33
Iesu Kristo bon mwanibwan te ran ni kamaiu.
Ko na ataia bwa mwanibwa ao koburake n ran ao aron ran riki tabeua iai aroia ae kakaawaki n angiin karaki n te O Tetemanti. Aio e aki rangi ni kakubanako, ibukina bwa angiin karaki a riki n tabo aika a rangi ni mwau teretere. Ngkai ko wareware ni Karikani Bwaai 26 n taekan ana mwanibwa Itaaka, iangoia bwa tera te kanikina ae e tei ibukin te ran n koroboki aika a tabu. Tera iango aika ko kunei ibukin te mwanibwa n tamnei n te “ran ni kamaiu”? (taraa Ioane 4:10–15). Tera arom ni kena te mwanibwa n tamnei inanon maium? N te aro raa ae riki iai te Tia Kamaiu bwa ran ni kamaiu nakoim? Uringnga bwa I-Biritia a “tauni” mwanibwa (taraa Karikani Bwaai 26:18). Iai te bwai inanon maium ae katoka am mwanibwa n ran ni kamaiu?
Te mwanibwa rimoa i Bwateteba, are a keni iai mwanibwa Aberaam ao Itaaka.
A kairua Rebeka ao Iakoba ngke a kewea Itaka?
Ti aki ata bukin n aia tetere Rebeka ao Iakoba are a kabongana ni karekea te kakabwaia ibukin Iakoba. E ibuobuoki bwa tina uringnga bwa te O Tetemanti ae ti a ataia ngkai e bon aki bwanin (taraa Mote 1:23, 41). A mwaiti rongorongo aika a bua man te moan rongorongo are e kona ni kabwarabwara te bwai are e taraa ni kananououa iroura. E ngae n anne, ti a taia bwa bon ana kantaninga te Atua ibukin Iakoba bwa e na karekea te kakabwaia mairoun Itaaka ibukina bwa Rebeka e karekea te kaotioti are Iakoba e na tautaeka iaon Etau (taraa Karikani Bwaai 25:23). Imwiina ngke Itaaka e a ataia ae e a tia ni kakabwaia Iakoba n onean mwiin Etau, e kamatoa nakon Iakoba bwa “e na kakabwaiaki” (Karikani Bwaai 27:33)—e taekinna bwa ana kantaninga te Atua e a tia ni karaoaki.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 24:2–4, 32–48.Aberaam e tuanga te toro ae onimakinaki bwa e na kakaea buun Itaaka, ao te toro e berita ma Aberaam bwa e na karaoia. E kanga ana toro Aberaam ni kaota ana kakaonimaki ni kawakinan ana berita? Ti na kanga ni irii ana banna ni katooto?
-
Karikani Bwaai 24:15–28, 55–60.Am utu a kona n tarai kibu aikai ibukin anua ake e karaoi Rebeka bwa e na riki bwa raon Itaaka ae akea tokina. Kaungaia kain te utu bwa a na rinea teuana man anua aikai are a namakinna bwa a riai ni karikirakea.
-
Karikani Bwaai 25:19–34; 27.N rinanon te karaki are n aron rikian Etau ni bwaibwai ao kakabwaia n roko nakon Iakoba n onean mwiina, ko kona ni korea te tiententi man “Iakoba ao Etau” (n Karaki man te O Tetemanti) iaon te moti ni beeba ae okoro. Kain te utu a kona ni ikotaki ni katikui tiententi n nneia ae eti.
Ngkai ko maroroakina Etau ni kabonakoa karineana ni karimoa, ko kona naba ni maroroakina te bwai ae kakaawaki riki nakon am utu, n aron am reitaki ma Tamara are i Karawa ao Iesu Kristo. Tao kain am utu a kona ni kakaai bwai ke tamnei ake a tei ibukin te bwai are a iangoia bwa e kakaawaki n akea tokina. Anganiia bwa a na kabwarabwara bwa bukin tera a rinei bwai akanne.
-
Karikani Bwaai 26:3–5.Ni buokiia am utu n ota n te berita nakon Aberaam, ko kona ni kaoia bwa a na kakaea te berita are e kabwarabwaraaki inanon kibu akanne. Bukin tera e kakaawaki nakoira bwa tina atai berita aikai ni boong aikai? (taraa “Iango aika Ana Ururungaki ao Ni Iangoaki Raoi: Te Berita ae Tabu,” n te boki aei).
-
Karikani Bwaai 26:18–25, 32–33.Bukin tera a kakaawaki mwanibwa? E kanga Iesu Kristo n riki n aron te mwanibwa n ran?
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene ae rineaki: “Choose the Right,” Anene n Taromauri, nambwa 239.
Kanakoraoan Am Kamatebwai
Kamatenanoa te kibu. E reirei Unimwaane Richard G. Scott, “Te kibu ae kamatenanoaki e riki bwa te rao ae teimatoa are e aki kamamaraaki ma kanoan te tai” (“Mwaakan Koroboki Aika Tabu,” Riaona, Nobembwa 2011,6).
Etau E Kabonakoa Nakoana ni Karimoa nakon Iakoba, iroun Glen S. Hopkinson