“Iango aika Ana Ururingaki ao ni Iangoaki: Te Berita ae Tabu,” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Iango aika Ana Ururingaki ao ni Iangoaki: Te Berita ae Tabu,” Nakomai, Iriirai—Ibukiia Aomata n Tatabemaniia ao Utu, 2022
Iango aika Ana Ururingaki ao ni Iangoaki
Te Berita ae Tabu
Rinanon te O Tetemanti, kona wareka n tai tabetai te taeka berita. N te bong aei ti aki toki n iangoa te berita bwa te berita ae tabu ma te Atua, ma n te aonaaba n taai akekei, berita a bon kakaawaki naba n te itera are e kakaawaki n aia reitaki aomata imarenaia. Ibukin kamanoakiia ao maiuia, aomata a kainnanoia bwa a na kona n onimakiniia imarenaia, ao te berita bon te kawai ni kamanoa te onimakinaki anne.
Ngaia are ngke te Atua e taetae nakon Noa, Aberaam, ke Mote ibukin te berita, E bon kaoia bwa a rin inanon te reitaki n onimakinaki ma Ngaia. Teuana te katoto ae te kabanea n tamaroa n te berita n te O Tetemanti bon teuana are e karaoia te Atua ma Aberaam ao Taara—ao imwina manga kabouana ma ana kariki Itaaka ao Iakobwa (aranaki naba bwa Iteraera). Ti arana aio bwa ana berita ae tabu Aberam, e ngae ngke n te O Tetemanti e bon ti kinaaki bwa “te berita.” Kona nooria bwa te O Tetemanti bon aan rongorongoia aomata ake a taraia bwa taan bwaibwai n te berita aio—aomatan te berita.
Ana berita Aberaam e reitinako ni kakaawaki ni boong aikai, riki nakoia Aomata aika a Itiaki ni Bong aika Kaitira. Bukin tera? Ibukina bwa ngaira naba aomatan te berita, ngkana ngaira ke tiaki ana kariki Aberaam, Itaaka, ao Iakobwa (taraa I-Karatia 3:27–29). Ibukin aei, e kakaawaki bwa tina ota bwa ana berita Aberaam bon ngaia ao arona are e kaineti iai nakoira n te bong aei.
Tera ana Berita Aberaam?
Aberaam e tangiria “n irira ae raoiroi” (Aberaam 1:2), ngaia are te Atua e kaoia bwa e na reitaki inanon te berita. Aberaam tiaki ngaia te moan ni karekea te nano aei, ao bon tiaki te moan aomata ni karekea te berita. E ukoukora “aia kakabwaia bakatibu” (Aberaam 1:2)—kakabwaia ake a anga man te berita nakon Atam ao Nei Ewa ao ake imwiina nakoia naake a ukoukori kakabwaia aikai ma te nanomwaaka.
Ana berita te Atua ma Aberaam bon kakabwaia aika tamaroa: n te bwaibwai iaon te aba, roro ae mwaiti n taai aika a na roko, karekean te otenanti n te nakoanibonga, ao te ara are e na karineaki irouia rooro aika a na roko. Ma boton te berita aei bon tiaki ti te kakabwaia are Aberaam ma ana utu a na karekea ma te kakabwaia naba are a na reke nakoia nikiraia natin te Atua. “Ao N na kakabwaiako,” e taetae te Atua, “ao kona riki n ae e na kabaia te aba iai” (Karikani Bwaai 12:2–3).
Te berita aei E anga te kakabwaia aei nakon Aberaam, Taara, ao aia kariki aroia ni kakabwaia ibuakoia natin te Atua? Ti n te aro are e na reke tibwangaia ni kakabwaiaia tabeman. Ana utu Aberaam a na “uota te mwakuri n ibuobuoki aei ao te Nakoanibonga nakoia aba ni kabane,” n tibwai “kakabwaia n te Euangkerio, are bon kakabwaia n te kamaiuaki, riki n te maiu ae akea tokina” (Aberaam 2:9, 11).
Te berita aio bon te kakabwaia are e a kaman tataningaia Aberaam. Imwiin rekena, Aberaam e taku inanona, “: Am tia mwakuri e a tia ni ukoukoriko ma nanona ni koaua; ngkai I a tia ni kuneko” (Aberaam 2:12).
Anne bon nga ma nga ririki n nako, ma te berita aei e a tia ni kaokaki inanon ara bong (taraa 1 Nibwaai 22:8–12). Ao e a kakoroaki bukina inanon maiuia ana aomata te Atua n te tai aei. Ni koauana, kakoroan nanon te berita bon kanikinaean boong aika kaitira ngkai ana mwakuri te Atua a rikirake, kakabwaiai utu ni kabuta te aonaaba. Ao aomata nako, n aron Aberaam, ake a tangiria n riki bwa taan irira te raoiroi, aomata nako ake a ukoukora te Uea ma nanoia ae korakora, a kona n riki bwa mwakorona.
Tera Nanon te Berita nakon Aberaam Irou?
Ngkoe bon natin te berita. Ko karaoa te berita ma te Atua ngke ko bwabetitoaki. Ko kaboua te berita anne ni katoa te tai are ko kana iai te toa. Ao ko karaoa te berita ae tabu n te tembora. N ikotaki, berita aikai a kona ni karikiko bwa temanna ae ira ana berita Aberaam, ni kabwanina are e reke inanon otenanti n te tembora. Ngkai e reirei Beretitenti Russell M. Nelsontaught, “N tokina, inanon te tembora ae tabu, ti kona n riki bwa taan bwaibwai n te berita n te utu ae akea tokina, ao are e a tia ni berita iai nakon Aberaam, Itaaka, Iakobwa, ao aia kariki.”1
Rinanon berita aikai ao otenanti, ti a riki bwa ana aomata te Atua (taraa Otinako 6:7; Te Tua Kaua 7:6; 26:18; Etekiera 11:20). Ti riki n okoro man te aonaaba ae katobibira. Ara berita a karekea te kona ibukira bwa tina riki ni koaua, ni kabaeaki bwa ana reirei Iesu Kristo. “Ara berita,” e kabwarabwara Beretitenti Nelson, “e kabaeira NakoIna ao e anganiira te mwaaka n atua.”2 Ao ngke e kakabwaiaia Ana aomata te Atua ni Mwaakana, e karaoia ma te kakao ao te kantaninga bwa a na kakabwaiaia tabeman—bwa a na riki “bwa te kakabwaia” nakoia “ni kabane utu iaon te aba” (Aberaam 2:9, 11).
Aio te atatai ae kakaawaki are ti anganaki ibukin Kaokan Bwai n te berita nakon Aberaam rinanon te Burabeti Iotebwa Timiti. Ngaia are ngkana ko wareka taekan te berita n te O Tetemanti, tai tii iangoa taekan ana reitaki te Atua ma Aberaam, Itaaka ao Iakobwa. Iangoa naba taekan Ana reitaki ma ngkoe. Ngkana ko wareka taekan te berita ni mwaitiia ana kariki (taraa Karikani Bwaai 28:14), tai tii iangoia aika mirion ake a arana Aberaam bwa tamaia. Iangoa naba ana berita te Atua n te utu ae akea tokina ao n rikirake n akea tokina (taraa Reirei ao Berita aika Tabu 131:1–4; 132:20–24). Ngkana ko wareka taekan te berita n aban rikiia, tai iangoa tii te aba ni berita nakon Aberaam. Iangoa naba tian tokin te aonaaba bwa te tiretio—te berita ni bwaibwai nakoia aika a “nimamannei” ake a “tataninga te Uea” (Mataio 5:5; Taian Areru 37:9, 11; taraa naba Reirei ao Berita aika Tabu 88:17–20). Ao ngkana ko wareka taekan te berita are ana aomata ni berita te Atua e na kakabwaiaia “a na bane utun te aonaba ” (Aberaam 2:11), tai ti iangoa taekan ana mwakuri n ibuobuoki Aberaam ke burabeti ake a riki mai irouna. Iangoia naba bwa tera ae ko kona ni karaoia—ngkai te tia iriira Iesu Kristo n te berita—n riki bwa te kakabwaia nakoia ana utu ake a katobibiko.