“Beberuare 14–20. Karikan Bwai 18–23: “Iai te Bwai Teuana ae Aki Kokonaki Iroun te Uea?’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Beberuare 14–20. Karikani Bwaai 18–23,” Nakomai, Iriirai–Ibukiia Aomata n Tatabemaniia ao Utu: 2022
Taara ao Itaaka, iroun Scott Snow
Beberuare 14–20
Karikani Bwaai 18–23
“Iai te Bwai Teuana ae Aki Kokonaki Iroun te Uea?”
Wareka ao iangoa Karikani Bwaai 18–23, ao korea am namakin. Ko kona ni kabonganai iango n te kamataata aei bwa e na buokiko ni kamatebwaia mwakoro aikai, ao ko kona naba ni kaungaaki bwa kona kakai rongorongo tabeua inanon koroboki aika a tabu ake e kaonoti nakoim te Uea.
Korea Am Namakin
Maiun Aberaam, e kaonaki ma bwaai aika a kananokawaki ao ni kakorakora, bon kakoauaan te koaua are e karekea Aberaam n te mii—bwa ti mena iaon te aba bwa tina kataaki, “n nooria ngkana [ti] kona ni karaoi bwaai ni kabane are e tua ara Uea Atua[ra] bwa ti na karaoi” (Aberaam 3:25). E kaota ana kakaonimaki Aberaam? E na kona n reitinako ni karekea te onimaki n ana berita te Atua n ana karaki ae korakora, riki ngke ngaia ao Taara a teimatoa n akea natiia n roroia ae a kara? Ao ngke e a bungiaki Itaaka, e teimatoa ana onimaki Aberaama n teimatoa inanon te bwai ae aki kona n iangoaki—te kairoro are e na anga natina bwa te karea are e a tia ni berita ibukina te Atua ni kakoroan nanon te berita anne? Aberaam e kakoauaki bwa iai irouna te onimaki. Aberaam e kakoaua te Atua, ao te Atua e onimakina Aberaam. N Karikani Bwaai 18–23, ti kunei karaki man maiun Aberaam ao tabeman ake a kona ni kairiira bwa tina iangoi oin ara konabwai ni kakoauai ana berita te Atua, ni birinako man te buakaka ao n aki manga tanrikaaki, ao n onimakina te Atua n aki wareka te anga karea.
Iango ibukin te Kamatebwai i bon Iroum ni Koroboki aika Tabu
Karikani Bwaai 18:9–14; 21:1–7
Te Uea e kakoroi bukin ana berita ni bon oin Ana tai.
Te Uea e a tia ni karaoi berita aika mimitong nakoia aika a kakaonimaki, ma n tabetai inanon bwaai aika a riki inanon maiura a kona ni karioi ara iango bwa tina titiraki bwa a kanga berita akanne ni kona ni kakoroaki nanoia. Aberaam ao Taara a namakina ae aron naba anne inanon te tai ae maan. Tera ae ko reiakinna man te bwai ae a rinanona? E kona n ibuobuoki te waaki ni kamatabwai man rinanoan te berita are e karaoia te Uea nakon Aberaam inanon Karikani Bwaai 17:4, 15–22. Tera aroia Aberaam ao Taara? (taraa naba Ana Rairairi Iotebwa Timiti, Karikani Bwaai 17:23 [inanon Karikani Bwaai 17:17, footnote b]; Karikani Bwaai 18:9–12). E kanga ana kaeka te Uea ni buokiia ni karekea te onimaki ae korakora riki n Ana berita? (taraa Karikani Bwaai 18:14).
Tera ae ko kunea man kiibu aikai are e kamatoa am onimaki? Tara tabeua bwaai aika ko rinanona—inanon maium ke maiun temanna —ae e a tia ni kakorakora am onimaki are e na kakoroa nanon Ana berita te Uea nakoim n oin ana tai ao ana kawai?
Taraa naba Reirei ao Berita aika Tabu 88:68.
Te Uea e tuangiira bwa tina birinako man te buakaka.
Tera reirei aika ko reiakin iaon te birinako man te buakaka ngkai ko wareka taekan Rota ma ana utu? Te katoto, tera ae anaaki iai nanom n te bwai are a taekinna anera ao ni karaoia ni buoka Rota ma ana utu ni birinako man te kamaunaaki? (taraa Karikani Bwaai 19:12–17). E kanga te Uea ni buokiko ao am utu ni birinako ke ni karekea te katantan man ana mwakuri te riaboro n te aonaaba?
Ibukin rongorongon riki taekan buure i Totom ao Komora, taraa Etekiera 16:49–50 ao Iuta 1:7–8.
Taara naba Ana Rairairi Iotebwa Timiti, Karikan Bwaai 50:24–38 (n te abentekiti n te Baibara).
Birinako mai Totom ao Komora, iroun Julius Schnorr von Carolsfeld
Tera te kairua ae e karaoia buun Rota?
Unimwaane Jeffrey R. Holland e reirei:
“N taraana, te bwai raoi ae riki iroun buun Rota bwa e aki tii tan rikaaki, iai nanona ae kan oki rikaaki. E na taraa n ae e ngae ngke imwain ae e kiitana tian te kaawa, e bon rangi n tangira Totom ao Komora ni kaubwaina are e anganna. … Akea ana onimaki. E nano kokoraki n ana konabwai te Uea n anganna te bwai ae tamaroa riki nakon are e a tia n reke irouna. …
“Nakoia ni kabane [aomata] n roro nako, I taekina te bwai ae e tangiria te aomata bwa e na kabwarabwara, ‘Uringa buun Rota’ [Ruka 17:32]. Te onimaki bon ibukin taai aika a na roko. Te onimaki e kateaki iaon bwaai ake a riki ngkoa ma bon akea nanona ibukin tebwai teuana ni katikua ikekei. Te onimaki e onimakinna bwa te Atua iai bwaai aika korakora aika e kawakin ibukira n tatabemaniira ao bwa Kristo ni koauana bon te ‘ibonga ae rietata ni bwaai aika a raraoi aika a na roko’ (Ebera 9:11)” (“The Best Is Yet to Be,” Ensign, Jan. 2010, 24, 27).
Tauraoin nanon Aberaam n anga Itaaka bwa ana karea bon titebo ma te Atua ao Natina.
Ti aki atai ni kabane bukina ngkai te Atua e tuanga Aberaam bwa e na anga Itaaka bwa te karea, ti ataia bwa bon kataakin ana onimaki iroun te Atua (taraa Karikani Bwaai 22:12–19). Ngkai ko wareka Karikani Bwaai 22:1–19, tera ae ko reiakinna man te bwai are e rinanona Aberaam?
Tauraoin nanon Aberaam ni kareana natina bon “ti te arona ma te Atua ngke e anga Natina are Te Rikitemanna” (Iakobwa 4:5). Ngkai ko iangoi bwaai aika titebo imarenan kataakin Aberaam ao ana anganano te Atua te Tama n anga Natina bwa te karea ibukira, tera am namakin ibukin Tamara are i Karawa?
Iai naba te kabotau imarenan Itaaka ao te Tia Kamaiu. Iangoia ni wareka Karikani Bwaai 22:1–19 teuana riki, ni kakaei bwaai aika titebo aroia.
Taraa naba “Akedah (The Binding)” (video), ChurchofJesusChrist.org.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 18:14.Iai karaki man koroboki aika a tabu, man rongorongon am utu, ke bon man maium ae ko kona n tibwaia ae e a tia n reireiniko bwa akea te bwai ae e rangi ni matoatoa iroun te Uea?
-
Karikani Bwaai 18:16–33.Tera ae ti reiakinna n anuan Aberaam man kiibu aikai? Ti na kanga ngaira i irii ana banna ni katooto? (Taraa naba Aramwa 10:22–23.)
-
Karikani Bwaai 19:15–17.Kibu aikai a kona ni buokiia kain am utu ni katauraoi nakon taai are a riai iai ni birinako man aro aika bubuaka. Tera tabeua aroaro aika aekakin aikai? Te katoto, ko kona ni karaoa te maroro iaon kaongora aika aki tau ke te kariiri nakon te winnanti. Tina kanga ni birinako man aro aikai?
-
Karikani Bwaai 21:9–20.Tera ae a kukurei iai am utu n aekakin te kawai are e karaoia te Atua nakon Aka ao Itimaera imwiin are ngke a kanakoaki iroun Taara ma Aberaam?
-
Karikani Bwaai 22:1–14.Kona kanga ni buokiia am utu n noori reitaki imarenan karakinan te Atua ngke e tua nakon Aberaam bwa e na kareana Itaaka ao ana anga karea ni kamaiu te Tia Kamaiu? Ko kona ni kaoti tamneia Aberaam ao Itaaka ao Taurakin Kristo iaon te Kaibangaki (taraa “Aberaam ao Itaaka,” n Karakinan te O Tetemanti) Ngkai kain te utu a maroroakin kabotau ake a noori inanon waaki aikai. Ko kona naba n anenea te kuna iaon taekan ana anga karea te Tia Kamaiu, n aron “He Sent His Son” (Aia Boki n Anene Ataei, 34–35), ao n taratarai kibu ake a kabwarabwara ana anganano te Tia Kamaiu.
Tera ae koa tia ni butiaki bwa kona anganano ibukin amutu? E kanga anganano aikai ni uotiira ni kaniira riki nakon te Atua?
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene are rineaki: “God Loved Us, So He Sent His Son,” Anene n Taromauri, nambwa. 187.
Kanakoraoan Am Kamatebwai
Kakauongo nakon te Tamnei. Ngkai ko kamatebwai, tarai raoi am iango ao am namakin, e ngae ngke aki kaineti nakon te bwai ae ko warekia. Namakin ao iango akanne tao bon bwaai aika e tangiria te Atua bwa ko na atai.
Kamataataan tamnein Aberaam ao Itaaka, iroun Jeff Ward