Sarah and Isaac (Tarai ao Itaaka), iroun Scott Snow

Beberuare 14–20

Karikani Bwaai 18–23

“Iai te Bwai Teuana ae Aki Kokonaki Iroun te Uea?”

Ngkai ko ukoukora buokan kainnanoia ataei aika ko reireiniia, iangoi iango ibukiia ikawai ao ataei aika uarereke riki n te kamataata aei.

Korei Am Namakin

Kaunga te Tibwatibwa

N ni buokiia ataei n tibwaua te bwai ae a kaman ataia n Karikani Bwaai 18–23, kaoti tamnein teuana ke e raka riki bwaai aika riki man mwakoro aikai, ao tuangiia ataei bwa ana tibwaua te bwai ae a uringnga n taekan te karaki.

Reirei te Reirei: Ataei aika a Uarereke

Karikani Bwaai 18:9–14; 21:1–7

I kona n onimakina te Atua bwa e na kawakin Ana berita.

E ngae ngke e a tia te Atua ni berita bwa a nang karekea natiia Tarai ma Aberaam te mwaane, ngkana a kara riki, e taraa n ae e na aki kona ni koro bukin te berita. Ko na kanga ni kabongana te karaki aei ni buokiia ataei ni karekei aia onimaki ae e na bon kawakin Ana berita te Atua?

Waaki ni Kakukurei aika Kona ni Karaoaki

• Koroia ni kakimototoa a na berita te Atua nakon Aberaam ao Tarai ae a na karekea natiia ao kakororaoan nanon te berita aei (taraa Karikani Bwaai 17:15–19; 18:9–14; 21:1–7). Ke kaoa te taanga n te uoote bwa ana kunnikaia n aron Aberaam aoTarai ao karakina aia karaki. Buokiia ataei bwa ana ataia ae Aberaam ao Tarai a bon rangin ni kara ni karekei natiia. Titirakiniia te titiraki man Karikani Bwaai 18:14, “Iai te bwai ae matoatoa ibukin te Uea?” Kakoaua bwa e kona te Uea ni kakoroi nanon ana berita, e ngae ngke a taraa ni kaangaanga.

• Karaoa te berita nakoia ataei ae ko na kakoroi bukiia n tokin te kiraati (te katooto, ko na kariaiia bwa ana karana te tamnei). Rinanon te kiraati, kauringiia ibukin am berita, ao kakoroa nanona imwiina. Kabwarabwara bwa e kawakin Ana berita n tainako te Uea.

• Tuangiia ataei bwa ana tibwaua aia tai ngke a na tataningaa te bwai ae a bon tangiria. Aneneia ma ataei, te anene are e kakoaua ana berita te Atua, n aron “Keep the Commandments” (Aia Boki n Anene Ataei, 146–47). Buokiia ataei bwa ana atai bwaai ake e a tia ni berita te Atua bwa ti na karekei ngkana ti kakaonimaki.

• Kaota tamnein te bwabetito ke te toa (taraa Gospel Art Book, nambwa 103, 104, 107, 108). Buokiia ataei bwa ana reiakin berita aika ti rinei ma te Atua, ao tera ana berita te Atua ae na anganiiira imwiina, ngkana ti a bwabetitoaki ao n anaa te toa. (Taraa True to the Faith, 23–25.)

Karikani Bwaai 22:1–14

Aberaam e ongotaeka nakon te Uea.

E rangin ni kaangaanga iroun Aberaam n ira te tua n anga natina te mwaane bwa a na karea. Iangoia bwa ko na kanga ni kabongana raoi te karaki aei ni kaungaia ataei bwa ana ongotaeka nakon te Atua e ngae ngke e matoatoa ke aki atai raoi bukin Ana tua.

Waaki ni Kakukurei aika Kona ni Karaoaki

• Kaota tamnein Aberaam a Itaaka (taraa te kamataata n te kamatebwai n te wiiki aei in Nakomai, Iriirai—Ibukiia Aomata n Tatabemaniia ao Utu), ao kabongana n taekina ana karaki Aberaam ao Itaaka (taraa naba “Aberaam ao Itaaka,” ni Karaki man te O Tetemanti). Kaota tamnein Iesu Kristo, ao taekinna nakoia ataei bwa e kanga karakinaia Aberaam ao Itaaka ni kauringiira taekan te anga karea are a karaoia Tamara are i Karawa ao Iesu Kristo ibukira.

• Karaoa te tatakaro ae bebete are e kainnanoia ataei bwa ana irii kawai. Te katooto, te kawai are e kairiia nakon tamnein te Tia Kamaiu are e karabaaki inanon te kiratiruum. Tera bwaai tabeua aika e a tia n tuangira Tamara are i Karawa bwa ti na karaoi? Buokia ni kaotaia ataei ae kawakinan Ana tua e na buokiira n oki ni manga maeka ma Ngaia ao Iesu Kristo.

Reirei te Reirei: Ataei aika a Ikawai Riki

Karikani Bwaai 18:9–14; 21:1–7

E kakoroi nanon Ana berita te Uea, e ngae ngke a taraa n aki kona ni karaoaki.

Aberaam ao Tarai a tuangaki bwa ana bungiia natiia te mwaane, ma e taraa ni kaangaanga—Aberaam ai 100 ana ririki, ao Tarai ai 90 (taraa Karikani Bwaai 17:17). E kakoroa nanon Ana berita te Atua, ao te karaki aei e kona ni buokiia ataei ake ko reireiniia ni kakorakorai aia onimaki n ana berita te Atua ibukiia.

Waaki ni Kakukurei aika Kona ni Karaoaki

• Koroi taeka man te moan n tiententi n Karikani Bwaai 18:14 iaon te mwakoro ni beeba, ao anga teuana nakoia ataei n tatabemaniia. Ngkanne tuanga te kiraati bwa ana katuka te taeka n nena ae eti. Wareka Karikani Bwaai 18:9–14; 21:1–7 ma ataei ni kakaea teuana te katooto man maiun Tarai ao Aberaam ngke e karaoa te bwai teuana te Uea ae taraa ni kaangaanga. Tera ae ti kona n reiakinna man ana taneiai Tarai ao Aberaam are e kona ni kaungaira bwa ti na onimakin ana berita te Atua?

• Kaoti tamnein karaki man booki aika tabu are e karaoa iai te bwai teuana te Atua are e taraa ni aki kona ni karaoaki ke ni kaangaanga (te katooto, taraa Gospel Art Book, nambwa 7, 8, 25, 26). Tuangiia ataei bwa ana tibwaua te bwai ae ataia ni bwaai aika riki n tamnei aikai, ao buokiia ni kaotaia bwa e kanga te Uea ni kakoroi nanon Ana berita ni bwaai aikai n tatabeua nako. Tibwauaia bwa e kanga te Uea n tia ni kawakin Ana berita ni maium ke ni maiuia aomata aika ko ataia (ibukin tabeua katooto n ana berita te Uea, taraa Maraki 3:10; Ioane 14:26–27; Reirei ao Berita aika Tabu 89:18–21). Tuangiia ataei bwa ana tibwauai tabeua katooto n aron aikanne aika atai.

Karikani Bwaai 19:15–26

I kona ni birinako man bwaai aika buakaka.

Rongorongon Rota ao ana utu ngke a birinako man te kaawa ae buakaka e kona ni kaungaia ataei aika ko reireiniia bwa ana waekoa ni birinako man kairoro aika buakaka ni maiuia.

Fleeing Sodom and Gomorrah (Kitanan Totom ao Komura), iroun Julius Schnorr von Carolsfeld

Waaki ni Kakukurei aika Kona ni Karaoaki

• Koroia ni kakimototoa Karikani Bwaai 19:15–26 man kabwarabwarakin ae ana utu Rota a maeka n te kaawa ae rangin ni buakaka, ao anera a kauringiia bwa ana kitanna. Bootaki ni wareki kiibu 15–17, 26, ao buokiia ataei n iangoia bwa tera nanonaki ibukiia n te bong aei bwa ana “birinako ni kamaiuia” man te buakaka ao “tai tara mwim” (te kibu 17).

• Kaota tamnein te Tia Kamaiu, ao tuangiia ataei bwa ana kaniia ngkai a tibwaua te bwai ae a kona ni karaoia ni birinako man te buakaka ao ni kaniia riki ma Kristo.

• Maroroakin kaangaanga ngke raoraom e kaoia ataei bwa ana karaoa te bwai ae ataia bwa e bure. Ti na kanga ni “birinako” man kaangaanga aikai? Tera ae ti kona n taekinna nakoia raoraora?

Karikani Bwaai 22:1–14

Tamara are i Karawa e kanakoa Natina, are e anga Ngaia bwa te karea ibukira.

Ngkana ko reirei taekan nanon Aberaam bwa e na anga Itaaka bwa ana karea, tatauraoi n tainako nakon aia namakin ataei. Kabongana te karaki aei ni buokiia ataei ni kakorakora aia tangira ao aia kakaitau ibukin ana karea te Tia Kamaiu.

Waaki ni Kakukurei aika Kona ni Karaoaki

• Ni buokiia ataei n reireiniia taekan te karaki inanon Karikani Bwaai 22:1–14, wareki kiibu nakoia, ao kaoia bwa ana korei tamnein bwaai aika ko wareki. Bukin tera ana tua te Uea n anga Itaaka bwa te karea e a tia n riki bwa te bwai ae kaangaanga iroun Aberaam bwa e na kawakin? Tera ae ti reiakinna n te karaki aei n taekan Aberaam?

• Kabongai tamnein Aberaam ao Itaaka (taraa Gospel Art Book, nambwa 9, 57) ni kabotaua te karaki inanon Karikani Bwaai 22 ma ana anga karea te Tia Kamaiu (taraa Mataio 27:26–37). Tera ae ti kona n reiakinna ibukin Tamara are i Karawa ao Iesu Kristo man rongorongon Aberaam ao Itaaka ao te Kamateaki n te kaibangaki?

• Kaota te witeo “For God So Loved the World” (ChurchofJesusChrist.org), ke botaki n anenea ana karea te Tia Kamaiu, n aron “He Sent His Son” (Aia Boki n Anene Ataei, 34–35). Kaoia ataei bwa a na maroroakinna bwa e kanga ana anga karea Iesu ni kaota ana tangira Tamara are i Karawa ibukira.

Kaungaa te Kamatebwai n te Mweenga

Kaoia ataei bwa ana tibwauaia ma aia utu ngke e kakabwaiaia te Atua ngke a ongotaekia nakon teuana Ana tua.

Kanakoraoan Ara Anga reirei

Kaungaa te karinerine. N aron are e kainnanoaki n tain te kiraati, ko kona ni kauringiia ataei bwa ana kawakina te rau. Ko kona ni karaoa aei man aneneana ni karaurau ke ni katangibururua te anene ke man kaotakin tamnein Iesu.