Tamnein Nooa ngke e kitana te aake, iroun Sam Lawlor

Tianuare 31–Beberuare 6

Karikani Bwaai 6–11; Mote 8

“Ao Nooa e Karekea te Akoaki i Matan te Uea”

Reiakinan taekaia maan n ana aake Nooa ao Tauan Babera ae rietaata e kona n riki bwa te bwai ae kakukurei ibukiia ataei. Ma uringnga bwa karaki aikai a karaoaki ibukin reiakinan koaua aika akea tokiia. Tataro mwaaka n iangoi koaua aika e tangiri te Atua bwa ana ataia ataei.

Korei Am Namakin

Kaunga te Tibwatibwa

Imwain ae ko moana reiakinan karaki inanon Karikani Bwaai 6–11 ao Mote 8 nakoia ataei, anganiia aia tai bwa ana bon reireiniia te bwai ae ataia ibukin Nooa ao te aake ke Tauan Babera.

Reirei te Reirei: Ataei aika a Uarereke

Karikani Bwaai 6:14–22; 7–8; Mote 8:16–30

Irakin te burabeti e na kakabwaiaai ao au utu.

Ngkai a reirei ataei n ira te burabeti, ana kakabwaiaaki ao ana kamanoaki n te tamnei, n aron ana utu Nooa ake a kamaiuaki man te Ieka.

Waaki ni Kakukurei aika Kona ni Karaoaki

• N oin am taeka, karakina taekan Nooa ao ana aake (taraa “Nooa ao Ana Utu,” n Karaki man te O Tetemanti; taraa naba “Follow the Prophet,” Aia Boki n Anene Ataei, 110–11, te kibu 3). Buokiia ataei ni katei kaia n te kaotioti mwakoron te karaki—te katooto, man ao ngkoa ko kabongana te bwai ni mwakuri ni kabaa te aake ke n nakonako n aroia maan n rin inanon te aake.

• Warekia nakoia ataei Mote 8:19–20, kamataata te bwai ae e tuangaki Nooa iroun te Uea bwa e na karaoia. Buokiia ataei bwa ana ataia bwa Nooa bon te burabeti ao ana utu a kamaiuaki man te Ieka bukina bwa a iria. Titirakiniia ataei ngkana ataia bwa antai ara burabeti n te bong aei. Kaota tamneina, ao buokiia ataei ni kaokioka arana.

• Uoti tamnei ke bwaai nakon te kiraati are e tei ibukin te burabeti ae ngkai, n aron booki aika tabu ke tamnein te tembora. Kariaia ataei bwa ana ikaruoruo n rinea te bwai teuana ao n taekina te bwai ae ataia ibukina. Kabwarabwara nakoia bwa tera ae tei ibukin te bwai anne. Kaungaia bwa ana korea tamneia ni karinea te bwai ae e a tia te burabeti n reireiniia. Kaota am koaua ibukin kakabwaia man irakin te burabeti.

Karikani Bwaai 9:15–16

E na kawakin ana berita te Atua nakoira.

E kakawaki ibukiia ataei bwa ana ataia ae kawakinan Ana berita te Atua, riki ngkana a katauraoia ni karaoi berita aika tabu ma Ngaia ngkana a bwabetitoaki.

Waaki ni Kakukurei aika Kona ni Karaoaki

• Kaoia ataei bwa ana koroi tamnein neiwirara. Warekia nakoia Karikani Bwaai 9:15–16, ao tuangiia bwa ana kakauongo nakon te taeka uringnga. Kaoia bwa ana taua ieta neiwirara ngkana a ongo te taeka. Kabwarabwara bwa neiwirara bon kauring n ana berita te Atua ake e a tia ni karaoi nakoira.

• Taetae nakoia ataei n taekan tabeua ana berita te Atua—te katooto, bwa ti kona n oki nakon Tamara are i Karawa ngkana ti ira Kristo ke te Atua e na kanakoa te Tamnei ae Raoiroi bwa e na kamwengaraoira. Kaota am koaua ae e teimatoa ni kawakin Ana berita te Atua.

• Kabonganai tamnei n tuangiia ataei taekan berita aika tabu aika ti karaoi ma te Atua, n aron tamneia ataei aika a bwabetitoaki, te toa, ao te tembora (taraa Gospel Art Book, nambwa 104, 108, 120).

Karikani Bwaai 11:1–9

Te kawai ae ti kona n roko iai i karawa bon ti ngkana ti iriira Iesu Kristo.

E ngae ngke a kona aomatan Babera n roko i karawa man katean te taua irarikin are maiuakinan a na euangkerio Iesu Kristo. Ko na kanga ni kateimatoaia ataei n ataia ae irirakin te Tia Kamaiu bon ti ngaia te kawai ae ti kona iai n oki nakon Tamara are i Karawa?

Waaki ni Kakukurei aika Kona ni Karaoaki

• Taekina karakin te Taua are Babera n oin am taeka, ke wareka te karaki ae kuneaki n “Tauan Babera” (n Karaki Man Te O Tetemanti). Kaungaia ataei bwa ana buokiko man tibwauakin te bwai ae a ataia n te karaki.

  

  Te Kamataata n Tamnein te Taua are i Babera, iroun David Green

• Kariaia ataei bwa ana katea te taua man taian buriki ke man bwaai riki tabeua. Ngkanne kaotia nakoia ataei tamnein te Tia Kamaiu, ao titirakiniia te kawai ae ti na kona n okira iai Tamara are i Karawa—katean te taua ke irirakin Iesu Kristo? Kaoia ataei bwa ana taekin taekan bwaai aika a kona ni karaoi bwa aonga n iriira te Tia Kamaiu.

Reirei te Reirei: Ataei aika a Ikawai Riki

Karikani Bwaai 6:14–22; 7–8; Mote 8:16–30

Irakin te burabeti e na kakabwaiaai ao au utu.

A ikawai rake ataei n te aonaaba ae buakaka, ae ti tebo ma te aonaaba n ana tai Nooa. Ana taneiai Nooa e kona n anganiia te koaua ae a kona ni karekea te kamanoaki n te tamnei ngkana a ira te burabeti.

Waaki ni Kakukurei aika Kona ni Karaoaki

• Buokiia ataei n rinei kiibu man Karikani Bwaai 6:14–22; 7–8 are a kona ni kaoti n te korotamnei. Kabonganai aia tamnei n reireiniia karakinan Nooa. Tuangiia ataei bwa a na tibwauaa te bwai ae a reiakinna man te karaki.

• Kaota tamnein Nooa (taraa Gospel Art Book, nambwa 7–8) ao te burabeti ae maiu ngkai. Buokiia ataei bwa ana karaoa aia ukeuke n Mote 8:16, 19–20, 23–24 ni kakaai bwaai aika e reirei Nooa ae a teimatoa ara taan kairiiri n te Ekiaretia n anga reirei iaon n te bong aei. Ti kanga ni kakabwaiaaki ngkana ti ongotaeka nakon reirei aikai?

• Tibwaua te bwai teuana ae e a tibwa anga reirei iaona te burabeti ae maiu. Tuangiia ataei bwa a na korea te bwai teuana ae e a tia n reirei iaona te burabeti iaon mwakoro ni beeba, ao buokiia ni bairei mwakoro ni beeba aikai nakon katotongan te aake. A kanga reirei aikai n riki n aron te aake are e kabaia Nooa?

Karikani Bwaai 9:15–17

Ti kainnanoia ni uringa ara berita aika tabu.

Ngke ti bwabetitoaki, ti karaoi berita ma te Atua bwa ti na karinei Ana tua. Inanon Karikani Bwaai 9:15–17, e taekinaki ikai bwa nei wirara e riki bwa te kanikina n ana berita te Atua. A kona kawai aikai ni kaungaia ataei ni ukoukori kawai n uring aia berita ma te Atua.

Waaki ni Kakukurei aika Kona ni Karaoaki

• Kaotia nakoia ataei te bwai ae iai iroum ae na kauringko n te bwai ae kakawaki ni maium, n aron te mwamwa ni mare, te tamnei, ke te tieno. Tuangiia ataei bwa a na tibwauai oin aia katotoo. Bootaki ni waeka Karikani Bwaai 9:15–17 (taraa naba Ana Rairairi Iotebwa Timiti, Karikani Bwaai 9:21–25 [inanon te Bible appendix]). Tera ae tangiria Tamara are i Karawa bwa ti na iangoia ngkana ti noora nei wirara?

• Kauringiia ataei n aia berita ake a karaoi ngke a bwabetitoaki ao a kaboui n tainako ngkana a taua te toa (taraa Motiaea 18:8–10; Reirei ao Berita aika Tabu 20:77, 79). Tuangiia ataei bwa ana korea ke katea te bwai teuana ae na kauringiia n aia berita.

Karikani Bwaai 11:1–9

Te kawai ae ti kona n roko iai i karawa bon ti man irirakin Iesu Kristo.

Ngkai aomata n taai aikai aikoa katei taua bwa aonga n roko i karawa, a mwaiti aika a kataia ni karekea te rau ao te kukurei man irakin kawai irarikin are e a tia Iesu Kristo ni katei. Ko na kanga ni kabongana karikinan Tauan Babera n reirei te reirei aei?

Waaki ni Kakukurei aika Kona ni Karaoaki

• Tuangiia ataei bwa ana tibwaua te bwai ae ataia ni karakinan te Taua are Babera (taraa Karikani Bwaai 11:1–9). Ni kaineti ma Ereman 6:28, bukin tera a katea te taua kaain Babera? Bukin tera katean te taua aei te kawai ae bure nako karawa? Tera te reirei ae ti na anganiia aomata aika kaain Babera?

• Kaoia ataei bwa ana kamwatebwaia 2 Nibwaai 31:20–21 ao Ereman 3:28 ni kakaea te kawai ae eti nako karawa. Kaota am koaua ibukin te Tia Kamaiu Iesu Kristo.

Kaungaa te Kamatebwai n te Mweenga

Kaoia ataei bwa ana iangoi kawai aika ana reireiniia aia utu n taian karaki aika a reiakin n te Moanrinan. Te katooto, a kona ni kabonganai tamnei aika a koroi ke n te iteraniba ibukin waaki ni kakukurei n te wiiki aei .

Kanakoraoan Ara Anga reirei

Ukoukoria ni kaotaia ataei ake ko reireiniia. Ngkana ko reireiniia ataei, kakauongo raoi nakon aia titiraki, aia kaeka, ao karaki ke reirei aika ana uaana nakoia. Atakin bwaai aikai a na buokiko n iangoi kainnanoia.