Beberuare 28–Maati 6

Karikani Bwaai 28–33

“E Boni Mena Iehova n te Tabo Aei”

Ngkai ko wareka Karikani Bwaai 28–33, iangoia bwa a kanga karaki ao reirei n te mwakoro aei ni kona ni kakabwaiaia ataei ake ko reireiniia.

Korei Am Namakin

Kaunga te Tibwatibwa

Kaoia ataei bwa ana karaurau ni kakiba ke ni karabinoa te booro nakoia n tatabemaniia nako. Ngkana a rawea te booro ataei, tuangiia bwa ana tibwaua te bwai ae a reiakinna man te O Tetemanti, ni mwengaia ke n te Moanrinan.

Reirei te Reirei: Ataei aika a Uarereke

Karikani Bwaai 28:10–22

Ana buokai berita aika tabu n oki nakon Tamara are i Karawa.

N te mii, e nora te kaintamwarake Iakobwa ni kaineti nako karawa. A kona mwaneka iaon te kaintamwarake n tei ibukin berita aika ti karaoi ma te Atua, bukina bwa berita aikai a buokira ni kaokiira Nakoina.

Waaki ni Kakukurei aika Kona ni Karaoaki

• Wareka Karikani Bwaai 28:12–13 nakoia ataei. Kabwarabwara bwa mwaneka iaon te kaintamwarake a kona n tei ibukin berita aika tabu are e buokiira n oki nakon Tamara are i Karawa. Tuangiia ataei bwa ao ngkoa a tamwarakea te kaintamwarake ngke ko taekin taai ngke ti berita bwa ti na ongotaeka nakon te Atua, n aron are ngke ti bwabetitoaki, kana te toa, ke n nakon te tembora. Buokiia ataei n iangoi kawai ake a kona iai ni katauraoi ni karaoi berita ngkana a bwabetitoaki.

• Wareka Karikani Bwaai 28:15 nakoia ataei, ni kamatatai taeka “I memena i roum,” ao “N na aki kitaniko.” Kabwarabwara bwa e a tia te Atua ni berita bwa e na memena irarikira n tainako ngkana ti kataia n rinea te eti. Buokiia ataei bwa a na iangoi bwaai ake a kona ni karaoi bwa aonga ni kona ni kaniia riki nakon Tamara are i Karawa ao Iesu Kristo.

Karikani Bwaai 29:16–28

I riai n tainako ni kawakini au berita.

E kariaia Iakobwa bwa e na mwakuri ibukin Rabwan inanon itiua te ririki bwa e aonga ni mare ma natin Rabwan te aine ae Rakera. E kawakina te boraraoi aei Iakobwa, ma e aki karaoia Rabwan. Iangoia ni kabongana te karaki aei n reireiniia ataei kakawakin kawakinan ara berita.

Waaki ni Kakukurei aika Kona ni Karaoaki

• Wareka Karikani Bwaai 29:18, 20 nakoia ataei, ao kabwarabwara bwa e kawakina ana berita Iakobwa bwa e na mwakuri itiua te ririki ibukin Rabwan bwa e aonga Iakobwa ni mare ma Rakera, e ngae ngke aio bon te tai ae rangin ni maan (taraa naba “Iakobwa ma Ana Utu,” n Karaki man te O Tetemanti). Buokiia ataei bwa a na iangoi berita aika ana kona ni karaoi nakoia aomata riki tabeman. Bukin tera e kakawaki kawakinan ara berita? Buokiia ataei ni kaotaia bwa te berita bon te berita ae tabu imarenan te Atua ao ngaira n tatabemaniira nako. Kaota am koaua bwa Tamara are i Karawa ao Iesu Kristo a kawakin Aia berita n tainako.

• Botaki n anenea ao ni maroroakina te anene iaon taekan te kokoaua, n aron “Stand for the Right” (Aia Boki n Anene Ataei, 159).

Karikani Bwaai 33:1–4

Tamara are i Karawa ao Iesu Kristo a kona ni buokai n tangira au utu.

Angiia ataei ataia bwa e na kanga aron ae ko na un ma tarim ao mwanem. Te karaki bwa e kanga aron tokanikaia n uniia Iakobwa ao Etau bon imarenaia ni kona n riki bwa te bwai ae kakukurei nakoia.

Illustration of Jacob and Esau embracing (Tamnein Iakobwa ao Etau n irabwati), iroun Robert T. Barrett

Waaki ni Kakukurei aika Kona ni Karaoaki

• Buokiia ataei bwa ana uringnga bwa bukin tera Etau e un iroun Iakobwa (taraa Karikani Bwaai 27:41 ke “Iakobwa ao Etau,” inanon Karaki man te O Tetemanti). Tuangia ataei bwa a na kaota aron ubun te aomata ae un. Kabwarabwara bwa imwiin ririki aika mwaiti, Iakobwa e maku ni kawara Etau. Tuangia ataei bwa a na kaotia nakoim aron kinakin te moamoa ae maaku. Tera ae ti riai ni karaoia ngkana ti maaku? Kaoia ataei bwa aongkoa a tataro ngkai ko wareka te bwai ae taekinna Iakobwa n ana tataro (taraa Karikani Bwaai 32:11). Ngkanne warekia inanon Karikani Bwaai 33:4 tera te bwai ae riki ngke e noraki Iakobwa iroun Etau. Tuangiia ataei bwa ana kaotia nakoim bwa a kanga aron tarakin ubuia Iakobwa ao Etau ngke a manga kaitibo.

• Kaota tamnein Iakobwa ao Etau ae kuneaki n te kamataata aei. Kariaia ataei bwa ana kabwarabwara te bwai ae a noria n te tamnei. Tuangiia bwa iai naano aika bubuaka imarenaia taari aika uoman aikai, ma a motikia bwa ana kabwarai aia bure imarenaia. Buokiia ataei bwa ana kanga ni kaota riki te tangira nakon temanna n aia utu, n aron are a kaotia Iakobwa ao Etau n tangiriia bon irouia.

Reirei te Reirei: Ataei aika a Ikawai Riki

Karikani Bwaai 28:10–22

A buoka okiu berita aika tabu nakon Tamau are i Karawa.

Ko kona ni kabongana miin Iakobwa n te kaintamwarake ae nako karawa n reireiniia ataei ae kawakinan ara berita e buokiira ni kaotiira imatan te Atua.

Waaki ni Kakukurei aika Kona ni Karaoaki

• Kaoia ataei bwa ana wareka Karikani Bwaai 28:10–15 ao ngkanne korea tamnein miin Iakobwa. Tuangiia bwa ana tibwauai aia tamnei. Kabwarabwara bwa e tei te kaintamwarake bwa te kawai ibukin Iakobwa n oki nakon te Atua. Tera ae a tia n anga te Atua bwa e na buokiira n Nakoina? (taraa iteraniba ibukin waaki ni kakukurei n te wiiki aei). Kauringiia ataei ibukin aia berita n te bwabetito. E kanga maiuakinan te berita aei ni uotiira ni kaniira nakon te Atua?

• Kaota tamnein te tembora, ao koreia iaon te burakibooti kibuntaeka aika kakawaki man Karikani Bwaai 28:15–17, n aron: “I memena i roum,” “E boni mena Iehova n te tabo aei,” “Boni maneaban te Atua,” ke “Mataroan karawa.” Kaoiia ataei bwa a na kakaei kibu n taeka aikai. Tuangiia ataei bwa e kanga te tembora ao berita n te tembora ni buokiko n namakina kanim nakon te Uea.

Karikani Bwaai 29:16–30

I kakoaua bwainakin te kokoaua.

Iakobwa e kawakina ana berita bwa e na beku ibukin Rabwan n te maan ae itiua te ririki, ma e keweia Rabwan. Ko na kanga ni kabongna te karaki aei ni buokiia ataei n ataa aron kakawakin bwainakin te kokoaua e ngae ngke aki kokoaua tabeman?

Waaki ni Kakukurei aika Kona ni Karaoaki

• Bootaki ni wareka Karikani Bwaai 29:16–30, ao buokiia ataei ni koroi ni kakimototoi bwaai aika inanon kiibu aikai. Tera ae karaoia Iakobwa ngke e mwamwanaaki? Tera ae ti kona n reiakinna man te rongorongo aei?

• Koroia iaon te burakibooti Tera ae na riki ngkana ti bwaina te aki kokoaua? ao Tera ae na riki ngkana ti bwaina te kokoaua? Kaoia ataei bwa ana kakaei rekeia man warekan “Kokoaua ao Etieti” (inanon Ibukin Kakorakorakiia Kairake [2011], 19).

Karikani Bwaai 32:6–11; 33:1–4

Tamara are i Karawa ao Iesu Kristo a kona ni buokai n tangiriia au utu.

Etau e un iroun Iakobwa, ao Iakobwa e maaku ni manga nora riki Etau, e ngae ngke ai imwiin 20 te ririki imwiin maenakoia. Ma e tataro Iakobwa ibukin buokana, ao Etau e tokanikai iaon unna. Ko na kanga ni kabongana te karaki aei n reireiniia ataei kakawakin tangiraia ara utu?

Waaki ni Kakukurei aika Kona ni Karaoaki

• Titirakiniia ataei te bwai ae a uringnga ibukin te reitaki imarenan Iakobwa ao Etau (taraa Karikani Bwaai 27:41 ke “Iakobwa and Etau,” n Karaki man te O Tetemanti). Kabwarabwara bwa imwiin ae nako inanon tao 20 te ririki, e na manga kaitibo Iakobwa ma Etau. Bootaki ni wareka Karikani Bwaai 32:6–11. Tera ae a namakinna Iakobwa? Tera ae e karaoia ni karekea te ibuobuoki? Taekinna ni kakoaua bwa ti kona ni bubutia Tamara are i Karawa ibukin buokara ngkana iai ara kaangaanga n ara reitaki ma ara utu. Bootaki ni wareka Karikani Bwaai 33:1–4 ni maroroakinna bwa e kanga te Uea ni kaekaa ana tataro Iakobwa.

• Tibwaua am atatai ke te karaki man ana maekatiin te Ekaretia n aron kaotan te tangira ae korakora n ara utu. Kaoiia ataei bwa a na tibwauai naba aia taneiaia. Tera ae ti kona ni karaoia ngkana e un kaain te utu nakoira? N reirei te bwai ae e a tia te Tia Kamaiu n reireiniira bwa ti na karaoia, taraa Mataio 5:43–45.

Kaungaa te Kamatebwai n te Mweenga

Kaoia ataei bwa ana tibwaua te kamataata n te iteraniba ibukin waaki aei ma aia utu ni buokiia n reirei man ao n uringa miin Iakobwa.

Kanakoraoan Ara Anga reirei

Kabonganai tamnei ni buokiia ataei ni kaotaia ni karaki man booki aika tau. A reiakina ae raoiroi riki ataei ngkana a tarai tamnein karaki man booki aika tabu ke taian reirei. N aron te katooto, ko kona ni kaota te tamnei man te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu.