“Iakobwa ma Ana Utu,” Karaki man Te O Tetemanti (2022)
“Iakobwa ma Ana Utu,” Karaki man Te O Tetemanti
Karikan Bwaai 27–33
Iakobwa ma Ana Utu
E kanga te Uea ni kawakina Ana berita
Iakobwa e kitana mweengana ni birinako mairoun tarina are Etau ngke e un. Taman Iakobwa e kakabwaia bwa e na reke ao e na iein ma te aine ae e tangira te Uea ao e kawakin Ana tua.
Karikan Bwaai 27:42–46; 28:1–5
Ngke e mwananga Iakobwa, te Uea e roko irouna n te mii. E berita bwa e na mena n tainako iroun Iakobwa. Iakobwa e berita bwa e na angan te Uea kabwian bwaai ni kabane ake e karekei.
Te Uea e berita nakon Iakobwa bwa e na karikiia natina aika a mwaiti. Rinanon ana kariki Iakobwa, utu iaon te aba a na kakabwaiaki bwa a na ata te Tia Kamaiu. Ana utu Iakobwa ni boong aika kaitira e aranaki bwa ana auti Iteraera.
Karikan Bwaai 28:3–4, 14; 1 Nephi 10:14
Iakobwa e mwananga nakon te aba ae aranaki bwa Aran. Ikekei e tangira ma te aine ae raoiroi ae arana Rakera.
Iakobwa e kariaia bwa e na mwakuri itiua te ririki ibukin tamana, Raban, ngkana e kariaia bwa e na mare ma Rakera. Raban e kariaia. Iakobwa e mwakuri itiua te ririki.
Ma Raban e tangiria bwa Rea, natina are te ikawai, bwa e na mare moa. N tain te mare, Raban e kamwanea Iakobwa ao e mareia ma Rea n onea mwiina. Ma Iakobwa e tangira Rakera. E berita bwa e na mwakuri riki itiua te ririki ngkana e kona ni mare ma ngaia. Raban e kariaia, ao ana utu Iakobwa e a tabe n rikirake.
Karikan Bwaai 29:28–35; 30:3–13, 17–24; Iakobwa 2:27–30
Raban e babakanikawai nakon Iakobwa. Ma te uea e kakabwaia Iakobwa ma maan aika a mwaiti ao e tuanga Iakobwa bwa e na okira mweengana.
Karikani Bwaai 30:31, 43; 31:1–7, 17–18
Iaon kawaina nakon mweengana, Iakobwa e kaongoaki bwa tarina are Etau ao 400 mwaane a roko bwa a na kaitibo ma ngaia.
Iakobwa e taku bwa Etau e na bae n teimatoa n un irouna. Iakobwa e maaku ibukin mauriia ana utu, ngaia are e a kairiia nakon te tabo ae mano ao e tataro.
Iakobwa e tataro ni kabongnga ni karokoa te ngaina. E roko te Uea iroun Iakobwa ao e kakabwaia. Te Uea e tuanga Iakobwa bwa e na riki bwa te tia kairiiri ae korakora irouia aika a mwaiti. Te Uea e bita aran Iakobwa nakon Iteraera.
N te tai ae waekoa Etau ao ana mwaane a kunea Iakobwa ma ana Utu. Etau e a aki un iroun Iakobwa. E biri ni kawara Iakobwa ao e inga ma ngaia. E rang kukurei n nooria ao ni kaitibo ma ana utu. Iakobwa e kukurei ni manga noora naba Etau.
Te Uea e kawakina Ana berita nakon Iakobwa inanon maiuna. Iakobwa e okira mweengana ma ana utu ao a maeka ikekei. Man te tai anne, Iakobwa e aranaki bwa Iteraera, ao ana utu a aranaki bwa kaain Iteraera. E reitinako ni kawakin tua ao n taromauriia te Uea.