“Te Toa are Te Riao,” Karaki man Te O Tetemanti (2022)
“Te Toa are Te Riao,” Karaki man Te O Tetemanti
Te Toa are Te Riao
Katanaki iroun te Uea
Bwarao e aki kariaia kaain Iteraera bwa a na inaomata, ngaia are te Uea e tuanga Mote bwa e na kanakoa te kabanea n aoraki ae kamamate. Aia moan nati utu nako n aban Aikubita a na mate, n aron naba te moan nati irouia aia man.
E berita te Uea bwa ngkana kaain Iteraera a ira Ana kaetieti, te aoraki e na riaoia ao e na aki kamateia.
Te Uea e tuangiia ni katoaia aia utu kaain Iteraera bwa a na anga aia karea ae te tibu te teei te mwaane ao a na beniia mataroan aia auti n raraan te tiibu te teei.
E tuangiia kaain Iteraera te Uea bwa a na kuuka ao a na waekoa ni kana te tibu te teei. Ngkai a amwarake, a riai ni kunnikainiia ao n tauraoi ni kiitana aia auti. E taku te Uea bwa ngkana a karaoi bwaai aikai, ao a na kamanoaki aia moan nati man te aoraki ae kamamate.
N aron are e kauring iai te Uea, e roko te aoraki ae kakamaaku. Ni kabane moannati irouia kaain Aikubita a mate, n raonaki ma ana moa n nati Bwarao te mwane. Ma te aoraki e katuai mweenga nako ake iai raraan te tibu te teei iaon aia mataroa. Aia moan nati kaain Iteraera a kamaiuaki ibukina bwa a ongeaba nakon te Uea.
Ngke e noora natina Bwarao te mwane bwa e mate n te aoraki aei, e tuanga Mote ao Aaron bwa a na kairiia ni kabane kaain Iteraera bwa a na kiitana Aikubita.
A nako kaain Iteraera, ma Bwarao e un. E ikotiia ana taanga ni buaka ao aia kaa te biti ao a biri n rimwiia kaain Iteraera.
Kain Iteraera a katei umwaia irarikin Taari ae Uraura. N te tai ae waekoa Bwarao ao ana taanga ni buaka a nooria. Ngke kaain Iteraera a nooria kaain Aikubita n roko, a maaku. Ma Mote e tuangiia kaain Iteraera bwa te Uea e na kamanoia.
Ngke a tabe ni kaan kaain Aikubita, te Uea e tuanga Mote bwa e na tabeka ana kai. E karaoia Mote, ao te Uea e bwenaua taari. Kaain Iteraera a rinuukan taari n te tano ae mau. A birinako mairoun Bwarao ao ana taanga ni buaka.
Ana taanga ni buaka Aikubita a kaeia kaain Iteraera. Ngke a bane ni mano kaain Iteraera n iteran taari are teuana, te Uea e kaoka taari nako naano. Ana taanga ni buaka Aikubita a bwabwa i taari.
Kaain Iteraera a inaomata n tokin te tai. A anenei kuuna, a mwaie, ao a kakaitaua te Uea. A uringa n tainako te Toa are te Riao bwa te tai are e kamaiuia iai te Uea ao e kairiia n otinako mai Aikubita.