“Te Uea are Tawita,” Karaki man Te O Tetemanti (2022)
“Te Uea are Tawita,” Karaki man Te O Tetemanti
1 Tamuera 18–19; 31; 2 Tamuera 1; 5; 11–12
Te Uea are Tawita
Bwaai aika kangaanga ake e na rinanona te Uea
Te Uea ae Tauro, uean Iteraera, e kukurei n ana tokanikai Tawita iaon Koria. Tauro e karika Tawita bwa te mataniwi iaoia ana taanga ni buaka.
Tawita e tangira te Uea ao n tainako e tangiria ni karaoa ae eti. Kain Iteraera a tangira Tawita.
Tauro e a rikirake ni bakantang ao e a kataia n tiringa Tawita. Ma Tawita e iriira te Uea, ao te Uea e katanna mairoun Tauro.
Kain Iteraera a iri buaka aika a mwaiti. N te bong teuana Tauro ao natina a mate n te buaka. Tawita e tangiriia ao e rang n nanokawaki ngke a ata mateia. Ngkai kain Iteraera a kainnanoa aia uea. Te Uea e rinea Tawita bwa e na uea. Aomata a kukurei.
1 Tamuera 31:2–6; 2 Tamuera 1:11–12; 5:1–5
Te Uea e kakabwaia te uea are Tawita ao e kairia. N ana ibuobuoki te Uea, ana taanga ni buaka Tawita a tokanikai iaoia aia kairiribai.
N te bong teuana ngke Tawita e riai n nako n ira te buaka, e tiku n ana auti. E noora te aine ae moan te tikiraoi. Arana bon Bateteba, ao Tawita e tangiria ni mare ma ngaia. Ma neiei e a tia ni mare ma Uria, te tautia n ana taanga ni buaka Tawita.
Tawita e tangiria ni mare ma Bateteba, ngaia are e a kanakoa buuna are Uria n te buaka ae moan te kakamaku bwa e aonga n tiringaki Uria.
N te tai ae waekoa Tawita e ongo bwa e a mate Uria n te buaka. Tawita e kanakoa ana toro bwa e na uota rikaaki Bateteba nakon ana auti, bwa e aonga n iein ma ngaia.
Ma te Uea e aki kukurei n te bwai are e a tia ni karaoia Tawita. Te Uea e kanakoa Natan, te burabeti, bwa e na tuanga Tawita te bure ae kakaiaki are e karaoia. Tawita e rikirake n rang n nanokawaki ibukin te bwai are e a tia ni karaoia nakon Uria ao Bateteba. E tataro ao e aki mamatam ibukin kabwaraan ana bure iroun te Uea.