“Iotua te Burabeti,” Karaki man Te O Tetemanti (2022)
“Iotua te Burabeti,” Karaki man Te O Tetemanti
Te Tua Kaua 10; 31; 34; Iotua 1; 3–6; 10–11; 21; 24
Iotua te Burabeti
Te kabanea ni kataaki imwain te rin n te aba ni berita
Te Uea e wetea Iotua bwa e na riki bwa te burabeti ae e boou imwiin uotakirakean te burabeti Mote nako karawa. Ngkai kaain Iteraera a katei umwa n rianna n uakaan ma te Karaanga are Ioretan, te Uea e taku bwa e a roko aia tai ni mwaing nakon te aba ni berita.
Te Tua Kaua 34:1–9; Iotua 1:1–4; Aramwa 45:19
Te aba ni berita e mena i Kanaan, ma aomata aika a buakaka a maeka ikekei. Te Uea e tuanga Iotua bwa e na korakora ao n ninikoria. N raonaki ma ana ibuobuoki te Uea, a kona kaain Iteraera n tautaekana te aba are Kanaan.
Iotua e ikotiia kaain ana taanga ni buaka. E tuangiia bwa a na uoti atibun Tua ake Tebwina aika uarereke ao koroboki aika a tabu ake tabeua. Ibonga a uoti bwaai aika a tabu aikai n te bwaoki ae aranaki bwa te ake ni berita. Ngkanne te taanga ni buaka a katauraoi n rinuukan te Karaanga are Ioretan. Te karaanga e nano ao e korakora airana.
Te Tua Kaua 10:5; 31:25–26; Iotua 1:10–11; 3:1–11
Iotua e berita nakoia kaain Iteraera bwa te Uea e na buokiia n rinuukan te karaanga.
Iotua e tuangiia 12 ibonga bwa a na uota te ati ni berita ao n nakonako inanon te ran. N te tai are a tebo iai waeia ibonga inanon te karaanga, te ran e bwenauaki.
Kaain Iteraera a rinuukan te karaanga n te tano ae mau. Iotua e tuangiia kaain Iteraera bwa a na uoti 12 atibu mai kabin te karaanga are e mautakataka. E kauaotaoi atibu ni kauringiia kaain Iteraera n ana kakai te Uea n te bong anne.
Iotua e kairiia ana taanga ni buaka Iteraera nako aban Kanaan. A roko n te kaawa ae arana Ieriko. Te kaawa e rang korakora ao iai oona aika rang rietata. Te Uea e tuanga Iotua aron tauan Ieriko. E taku bwa kaain Iteraera a riai ni mwaati ni katobibia Ieriko ni katoa bong ibukin onoua te bong. Iotua e ongotaeka nakon te Uea.
Iotua e tuangiia ibonga bwa a na uota te ati ni berita ao n nakonako n rimoaia kaain Iteraera. Ni katoabong, a mwaati kaain te taanga ni buaka ni katobibia Ieriko, ao itiman ibonga a katanga aia buu. Kaain Iteraera ake tabeman a kainabwabu.
N te kaitiua ni bong, te taanga ni buaka e mwaati ni katobibia Ieriko itiua te tai. Ngke a katanga aia buu ibonga, Iotua e tuangiia kaain Iteraera bwa a na takarua. N te tai ae waekoa oon Ieriko e bwaka nako aontano, ao ana taanga ni buaka Iotua a taua te kaawa.
Te Uea e buokiia kaain Iteraera, n aron are E berita iai. Ana taanga ni buaka Iotua a reitinako n taua aban Kanaan, ao kaain Iteraera a maeka ikekei. Iotua e kauringiia kaain Iteraera n ana kakai ao ana berita te Uea. E tuangiia kaain Iteraera bwa a na rineia ni beku ibukin te Uea.