“Iotebwa i Aikubita,” Karaki man Te O Tetemanti (2022)
“Iotebwa i Aikubita,” Karaki man Te O Tetemanti
Iotebwa i Aikubita
Te toro e riki bwa te tia kairiiri
Iotebwa e kaboakinako bwa te toro nakon te mwaane ae arana Botibwa. Botibwa e mwakuri ibukin Bwarao, teuare e tautaekana Aikubita. Botibwa e kona n ataia bwa te Uea e buoka Iotebwa. E onimakina Iotebwa ao e onimakinna bwa e na tararua ana auti ao ana bwai ni kabane.
Buun Botibwa e tangira Iotebwa. E tangira Iotebwa bwa e na urua ana tua te Uea ma ngaia. Iotebwa e tuangnga bwa e aki kariaia.
E aki kan ongo buun Botibwa, ngaia are Iotebwa e a birinako. E rang n un iroun Iotebwa.
E kaotia nakon Botibwa mwakoron ana kunnikai Iotebwa. E kewe nakon Botibwa ibukin Iotebwa. Botibwa e karina Iotebwa n te karabuti.
Iotebwa e a maenako mairouia ana utu. E a tia n riki bwa te toro, ao ngkai e a riki bwa te bure. Ma e teimatoa te Uea ni buoka Iotebwa. Iotebwa e aki bwarananona. Te Uea e kakabwaia te tia kawakiniia bure n noora tamaroan Iotebwa. E a moanna te tia kawakiniia bure n onimakinna, ngaia are e katea Iotebwa bwa e na tararuaia buure ake tabeman.
Iotebwa e kaitibo ma buure aika uoman, te tia karao kariki ao te tia tarai ninima, ake a tia ni mwakuri ibukin Bwarao. A uaia ni miia te mii ae kamimi. Rinanon mwaakan te Uea, Iotebwa e kabwarabwara nanon miia. Miin te tia tarai ninima nanona e na kainaomataaki. Teniua te bong imwiina, e kainaomataaki bwa e na manga mwakuri riki ibukin Bwarao.
Karikani Bwaai 39:22–23; 40:1–21
N te bong teuana Bwarao e un ibukin miina. Akea ae e tuangnga bwa tera nanon miina.
Ngkanne te tia tau mwiin ninima e uringnga are Iotebwa e kona ni kabwarai nanon mii.
Iotebwa e kaotinakoaki man te karabuti bwa e na kabwara nanon miin Bwarao. E kabwara nanon te mii Iotebwa ao e taku bwa Aikubita e na karekei itiua te ririki n amwarake aika a bati ao itiua te ririki n te rongo ao amwarake aika a karako. Iotebwa e tuanga Bwarao bwa Aikubita e kona ni kawakin amwarake aika raka inanon ririki aika raraoi.
Bwarao e ataia bwa te bwai are e taekinna Iotebwa ibukin miina e bon koaua. E kainaomata Iotebwa man te karabuti ao e karika Iotebwa bwa te tia kairiiri ae korakora i Aikubita. Ibukin ririki aika itiua, Iotebwa e buoka Aikubita ni kawakin amwarake aika tabunnako.
Imwiina e a roko te rongo. Inanon te tai aei, akea temanna ae kona n unika te amwarake. Aomata a mwananga nako Aikubita ni kabooi amwarake ake e kawakini Iotebwa. Ibukin Iotebwa, kaain Aikubita a kawakin amwarake aika a tau ni buokaiia ibon irouia ao tabeman bwa a na maiu n tain te rongo.