“Iakobwa ao Etau,” Karaki man Te O Tetemanti (2022)
“Iakobwa ao Etau,” Karaki man Te O Tetemanti
Karikan Bwaai 25–27
Iakobwa ao Etau
Taari aika uoman ao teuana te karineaki ni karimoa
Itaaka ao Rebeka iai natiia bwebwe mwaane, Iakobwa ao Etau. Etau te tia kaeman ae mwaatai. Iakobwa e bebete maiuna ao e iriira te Uea.
Etau e moan bungiaki. Te moan bungiaki n tainako e karekea te kakabwaia ni karineaki ni karimoa iroun tamana. Te karineaki ni karimoa nanona e na kaira te utu nakon karekean te aba ao te man ae mwaiti riki ni buoka te tararua nakon te utu. Ma Etau e tabeakinna ibon irouna nakon ana utu, ao e aki ongotaeka irouia ana karo ao te Uea.
Karikan Bwaai 25:25, 32; 26:34–35
N te bong teuana Etau e oki man te kaeman. E a rang bora ni baki ao e bubutia Iakobwa bwa e na anganna kanana. Te Uea e tangira Iakobwa bwa e na karekea te kakabwaia ni karineaki ni karimoa ibukina Etau e aki tau nako iai. Iakobwa e tuanga Etau bwa e na anganna te karineaki ni karimoa ao ngaia e na anganna amwarake tabeua. Etau e kariaia bwa e na anga karineakina ni karimoa nakon Iakobwa.
Karikan Bwaai 25:23, 29–34; Ebera 11:20
Rebeka ao Itaaka a tangira ae tamaroa ibukiia natiia. A nanokawaki bwa Etau e reitinako ni karaoi bwaai ake e tangiri ao tiaki ake e tangiri te Uea.
Itaaka e a rikirake ni kara ao e a mataki. Imwain matena, e tuanga Etau bwa e na kaeman ao e na kukana te man ibukina bwa a na uaia ni kukurei n amwarake.
Rebeka e ataia bwa e a boo ana tai Itaaka n anga te kakabwaia ni karineaki ni karimoa.
Rebeka e tuanga Iakobwa bwa e na karekeia uoman maan bwa e na kukanna imwain okin Etau. Ngkanne Iakobwa e kona ni karekea te kakabwaia.
Iakobwa e karin oneana n ai aron Etau ao e uota te amwarake nakon tamana. Itaaka e angan Iakobwa te kakabwaia ni bwaibwai. Ngke e oki Etau, e a rang n un iroun Iakobwa. Ma te karineaki ni karimoa e a nakon Iakobwa ibukina bwa e kawakin ana tua te Uea ao Etau e aki.